Nyabiaɖaka

◼ Ɣeyiɣi didi kae wòle be míasrɔ̃ nu kple Biblia nusrɔ̃vi aɖe si le ŋgɔyiyi wɔm?

Nu nyuitɔ si wòle be míawɔ ne míele nu srɔ̃m kple Biblia nusrɔ̃vi aɖe si le ŋgɔyiyi wɔm lae nye be míayi nusɔsrɔ̃a dzi kplii va se ɖe esime wòwu agbalẽ eve siwo nye Nuka Tututue Nye Biblia ƒe Nufiafia? kple “Midzra Mia Ðokui Ðo Ðe Mawu Ƒe Lɔlɔ̃ La Me” sɔsrɔ̃ nu. Esia sɔ nenye be nusrɔ̃via xɔ nyɔnyrɔ hafi wu agbalẽ eve siawo nu gɔ̃ hã. Le eƒe nyɔnyrɔxɔxɔ megbe hã la, míate ŋu ayi edzi abu ɣeyiɣi si míezã tsɔ srɔ̃ nu kplii, kple zi ale si nu míetrɔ yi egbɔ ŋuti kɔnta, eye míabui hã be enye nusrɔ̃vi. Ne mía kple gbeƒãɖela aɖee yi ɖasrɔ̃ nua kplii la, eya hã ate ŋu abu gaƒoƒoa.—Kpɔ March 2009 Míaƒe Fiaɖuƒe Subɔsubɔdɔ, axa 2.

Ele vevie be gɔmeɖoanyi nyui nasu ame yeyewo si le nyateƒea me hafi woadzudzɔ nusɔsrɔ̃ kple wo. Ele na wo be ‘woaƒo ke ɖe to’ le Kristo me eye ‘woali ke ɖe xɔse la me.’ (Kol. 2:6, 7; 2 Tim. 3:12; 1 Pet. 5:8, 9) Gakpe ɖe eŋu la, ele na wo be “nyateƒe ƒe sidzedze vavãtɔ” la nasu wo si hafi woate ŋu afia nu ame bubuwo ale si dze. (1 Tim. 2:4) Ne míewu agbalẽ eveawo nu kple nusrɔ̃viawo la, ekema míele kpekpem ɖe wo ŋu be woƒe afɔ nali ɖe “mɔ si kplɔa ame yia agbe me la” la dzi sesĩe.—Mat. 7:14.

Hafi woakafu ame aɖe be edze axɔ nyɔnyrɔ la, ele be hamemetsitsiwo nakpɔ egbɔ be ese Biblia ƒe gɔmedzenufiafiawo gɔme nyuie eye ele agbe nɔm ɖe wo nu. Ele be hamemetsitsiwo naɖɔ ŋu ɖo, vevietɔ ne wole nusrɔ̃vi aɖe si mekpɔ wu agbalẽ gbãtɔa nu o ƒe nyɔnyrɔxɔxɔ ŋu bum. Ne ame aɖe medze na nyɔnyrɔxɔxɔ o la, ele be hamemetsitsiwo nakpɔ egbɔ be wona kpekpeɖeŋu si wòhiã lae ale be wòadze na nyɔnyrɔxɔxɔ emegbe.—Kpɔ Ðoɖo Hena Yehowa ƒe Lɔlɔ̃nu Wɔwɔ, axa 217-218.

[Nya si ɖe dzesi si le axa 2]

Ele vevie be gɔmeɖoanyi nyui nasu ame yeyewo si le nyateƒea me