Dzigbɔɖi Hiã Le Míaƒe Subɔsubɔdɔa Wɔwɔ Me
1. Aleke Yehowa ɖe dzigbɔɖi fia le nuwɔwɔ kple ameƒomea me?
1 Dzigbɔɖi ɖe dzesi le Mawu ƒe nuwɔwɔ kple ameƒomea me tso blema ke va se ɖe egbea. (2 Mose 34:6; Ps. 106:41-45; 2 Pet. 3:9) Míate ŋu akpɔ Mawu ƒe dzigbɔgbɔɖi lɔlɔ̃tɔe ƒe kpɔɖeŋu ɖedzesi aɖe le Fiaɖuƒegbeƒãɖeɖedɔ si wɔm wole le xexea me katã la me. Yehowa gbɔ dzi ɖi na ameƒomea ƒe 2,000 kloe nye esia, ke hã egayi edzi le dzi anukwaretɔwo hem va eɖokui gbɔ. (Yoh. 6:44) Aleke míate ŋu asrɔ̃ Yehowa ƒe dzigbɔɖi le míaƒe subɔsubɔdɔa me?
2. Aleke míate ŋu awɔ nu dzigbɔɖitɔe ne míele dɔ wɔm le míaƒe anyigbamama me?
2 Gbeƒãɖeɖe Tso Aƒe Me Yi Aƒe Me: Míesrɔ̃a Yehowa ƒe dzigbɔɖi ne míeɖea gbeƒã “madzudzɔmadzudzɔe” le anyigbamama siwo me amewo mele ɖetsɔleme ɖem fia le haɖe o me. (Dɔw. 5:42) Míedoa dzi dzigbɔɖitɔe ne amewo metsɔ ɖeke le gbedeasia me o, ne woɖu fewu le mía ŋu, alo wotsi tsitre ɖe mía ŋu le gbeadzisubɔsubɔdɔa me. (Mar. 13:12, 13) Míegbɔa dzi ɖi hã esi míele agbagba dzem be míade tsi nyateƒea ƒe nuku siwo míeƒã ɖe ɖetsɔlemetɔwo ƒe dzi me, ne esesẽ be míakpɔ wo le aƒe me gɔ̃ hã.
3. Nu ka tae dzigbɔɖi hiã ne míele tɔtrɔyiwo kple Biblia nusɔsrɔ̃wo wɔm?
3 Biblia Nusɔsrɔ̃wo: Ne míeƒã nuku eye míele mɔ kpɔm be wòatsi la, ehiãna be míagbɔ dzi ɖi. Míate ŋu alé be nɛ ahade tsii, gake míate ŋu ado tsɔtsɔe eƒe tsitsi o. (Yak. 5:7) Nenema kee nusrɔ̃viwo tsina le gbɔgbɔ me vivivi abe ale si nuku dzena heva tsina mlɔeba ene. (Mar. 4:28) Ate ŋu anɔ sesẽm na ame siwo míesrɔ̃a Biblia kplii la be woaɖe asi le alakpadzixɔsewo alo kɔnu siwo mewɔ ɖeka kple Ŋɔŋlɔawo o la ŋu. Mele be míaƒlɔ dzo ɖe míaƒe nusrɔ̃viwo te be woawɔ tɔtrɔwo be míado tsɔtsɔe woƒe tsitsi o. Ebia dzigbɔɖi be míaɖe mɔ ɣeyiɣi agbɔsɔsɔme si sɔ nava yi be Mawu ƒe gbɔgbɔa nawɔ dɔ ɖe nusrɔ̃via ƒe dzi dzi.—1 Kor. 3:6, 7.
4. Aleke dzigbɔgbɔɖi ate ŋu akpe ɖe mía ŋu míaɖi ɖase na míaƒe ƒometɔ dzimaxɔsetɔwo dzidzedzetɔe?
4 Ƒometɔ Dzimaxɔsetɔwo: Togbɔ be míedi vevie be míaƒe ƒometɔ siwo nye dzimaxɔsetɔwo nasrɔ̃ nyateƒea hã la, míewɔa nu dzigbɔɖitɔe eye míelalana va se ɖe ɣeyiɣi nyuitɔ dzi hafi ɖia ɖase na wo tso míaƒe dzixɔsewo ŋu, eye míeɖɔa ŋu ɖo be míagaƒo nu tso nu geɖe fũu akpa ŋu o. (Nyagb. 3:1, 7) Gake hafi mɔnukpɔkpɔ mawo nasu mía si la, míeɖea mɔ be kpɔɖeŋu siwo míeɖona la naƒo nu ɖe mía nu, eye míenɔa klalo ɣesiaɣi be míaʋu míaƒe xɔse me le tufafa kple bubu deto me. (1 Pet. 3:1, 15) Le nyateƒe me la, ne míegbɔa dzi ɖi le míaƒe subɔsubɔdɔa me la, viɖe geɖe wu ado tso eme, eye mía Fofo si le dziƒo la akpɔ ŋudzedze ɖe eŋu.