Ale Si Nàwɔ Abi ɖe Ðaseɖiɖidɔa me​—Ðo Dze Kple Amewo Ale Be Nàte Ŋu Aɖi Ðase Na Wo

Yesu te ŋu ɖi vomeɖase na Samaria-nyɔnua elabe gbãa edze dzeɖoɖo gɔme kplii. Aleke míawɔ abi ɖe dzeɖoɖo kple ame siwo míedoa goe me?

• Wɔ nu xɔlɔ̃tɔe eye nàɖo dze kple amewo. Togbɔ be ɖeɖi te Yesu ŋu hã la, tsi ko wòbia tsɔ dze eƒe dzeɖoɖoa gɔme. Eya ta àte ŋu ado gbe na amewo vividoɖeameŋutɔe eye ɖewohĩ nàƒo nu tso yame ƒe nɔnɔme, alo nudzɔdzɔ yeye aɖe ŋu. Ðo ŋku edzi be wò taɖodzinu koe nye be yeaɖo dze kplii, eya ta ƒo nu tso nu sia nu si ado dzidzɔ nɛ ŋu. Ne medo vivi ɖe ŋuwò oa, mèbu naneke o. Gaƒo nu na ame bubu kpɔ. Bia Yehowa be wòana dzi nanɔ ƒowò.—Neh 2:4; Dw 4:29.

• Nɔ ŋudzɔ ɖe mɔnukpɔkpɔ siwo ʋu ɖi be nàte ŋu aƒo nu tso nya nyuia ŋu la ŋu, gake mègawɔe kple dzitsitsi o. Miɖo dze tso nu sia nu ŋu faa. Ne èzi nyaa ɖe amea dzi la, mavo le eɖokui me o, eye atso dzeɖoɖoa dzi. Dzi megaɖe le ƒowò ne mieɖo dze gake mète ŋu ɖi ɖase nɛ o. Ne èvɔ̃na be yeaƒo nu tso nya nyuia ŋu na amewo la, ekema dze agbagba be yeanɔ dze ɖom kple ame siwo nèdoa goe kple susu be nàɖi ɖase na wo. [Na woaɖe video 1 eye miadzro eme.]

• Dze agbagba nàna mɔnukpɔkpɔa nanɔ ʋuʋu ɖi be nàƒo nu tso wò dzixɔsewo ŋu le mɔ aɖe si ana amea nadi be yeanya nu geɖe la nu. Yesu gblɔ nya siwo ʋã nyɔnua wòbia nyawo. Esi Yesu te nuƒoƒo tso nya nyuia ŋu la, nya siwo nyɔnua bia la ŋu ko ɖom wònɔ. [Na woaɖe video 2 lia eye miadzro eme, emegbe na woaɖe video 3 lia eye miadzro eme.]