Nɔ Te Sesĩe Esi Nuwuwua Le Aƒe Tum

NU SI TA WÒLE VEVIE: Eteƒe madidi o, nu dovoɖinamewo adzɔ si abia be dzi nanɔ mía ƒo eye míaɖo ŋu ɖe Yehowa ŋu geɖe wu ɣeyiɣi bubu ɖe sia ɖe. Xaxa gãa adze egɔme ne wotsrɔ̃ alakpasubɔsubɔhawo ɖa. (Mt 24:21; Nyɖ 17:16, 17) Le ɣeyiɣi sesẽ ma me la, anɔ eme be míaɖe gbeƒã ʋɔnudrɔ̃gbedeasi sesẽ aɖe. (Nyɖ 16:21) Gog si tso Magog adze mía dzi. (Eze 38:10-12, 14-16) Gake Yehowa ahe nu si Biblia yɔ be “Mawu Ŋusẽkatãtɔ la ƒe ŋkeke gã la ƒe aʋawɔwɔ” la vɛ atsɔ axɔ na eƒe amewo. (Nyɖ 16:14, 16) Be dzi nanɔ mía ƒo ɖe nu siawo siwo ava dzɔ le etsɔme ŋu la, ehiã be míayi edzi anɔ te sesĩe le xɔse ƒe dodokpɔ siwo vaa mía dzi fifia la me.

ALE SI NÀWƆE:

• Nɔ agbe ɖe Yehowa ƒe agbe nyui nɔnɔ ƒe nudidiwo nu eye nàʋli wo ta dzinɔameƒotɔe.—Yes 5:20

• Yi edzi nànɔ kpekpeawo dem.—Heb 10:24, 25

• Lɔ̃ faa nàwɔ ɖe mɔfiame siwo Yehowa ƒe habɔbɔa nana mí la dzi.—Heb 13:17

• De ŋugble le ale si Yehowa xɔ na eƒe amewo va yi la ŋu.—2Pe 2:9

• Do gbe ɖa na Yehowa eye nàɖo ŋu ɖe eŋu.—Ps 112:7, 8

MIKPƆ WƆWƆFIA ƑE VIDEO SI NYE ETSƆMENUDZƆDZƆ SIWO ABIA BE DZI NANƆ MÍA ƑO—ƑE KPUITƆ, EYOME MIAÐO BIABIA SIAWO ŊU:

• 

  Esi woma hamea me la, aleke esia do hamea me tɔwo ƒe toɖoɖo kpɔe?

• 

  Aleke toɖoɖo nana dzi ɖoa mía ƒo?

• 

  Nu ka tae míahiã dzinɔameƒo ne Armagedon-ʋaa dze egɔme?

• 

  Biblia me nudzɔdzɔ kae ate ŋu akpe ɖe mía ŋu míaxɔ edzi ase bliboe be Yehowa axɔ na mí?—2Kr 20:1-24