Dzilawo, Mina Sidzedze Nakpɔ Mia Viwo Ta

Xexea dina be míabu nyui be vɔ̃ eye míabu vɔ̃ be nyui. (Yes 5:20) Nublanuitɔea, ame aɖewo wɔa nu gbegblẽ siwo Yehowa lé fui; eƒe ɖee nye ŋutsu kple ŋutsu alo nyɔnu kple nyɔnu ƒe dɔdɔ. Sukuhatiwo alo ame bubuwo ate ŋu able mía nɔvi sɔhɛwo nu be woawɔ nu siwo yewowɔna. Aleke nàte ŋu akpe ɖe viwòwo ŋu be woanɔ te ɖe tetekpɔ sia kple bubuwo nu dzidzedzetɔe?

Fia Yehowa ƒe dzidzenuwo viwòwo. (3Mo 18:3) Fia nu siwo Biblia gblɔ tso gbɔdɔdɔ ŋu la wo vivivi le woƒe ƒexɔxɔ kple nugɔmesese nu. (5Mo 6:7) Bia ɖokuiwò be: ‘Ðe mefiaa vinyewo ŋutsu kple nyɔnu dome lɔlɔ̃ɖeɖefia nuwɔna siwo mesɔ o, ale si wòle vevie be woado awu le nɔnɔme nyui me, kple ale si mele be woaɖe mɔ amewo nanɔ wo lém le mɔ gbegblẽ nu oa? Ðe vinyewo nya nu si woawɔ ne ame aɖe di be yeaɖe gbɔdɔnuwɔnawo afia wo alo bia be woawɔ nane si Yehowa lé fuia?’ Nu siawo nyanya do ŋgɔ ate ŋu akpɔ wo ta be woagaɖo afɔku me o. (Lod 27:12; Nyg 7:12) Ne èfiaa nu siawo viwòwoa, ke èle eɖem fia be yelɔ̃ domenyinu xɔasi si Yehowa na wò la vevie.—Ps 127:3.

MIKPƆ VIDEO SI NYE TU XƆ SI ANƆ ANYI ÐAA—KPƆ VIWÒWO TA TSO “NU VƆ̃ÐI” ME, EYOME MIAÐO BIABIA SIAWO ŊU:

• 

  Nu ka tae wòsesẽna na dzila aɖewo be woafia nu wo viwo tso gbɔdɔnyawo ŋu?

• 

  Nu ka tae wòle be dzilawo namla wo viwo le “Yehowa ƒe amehehe kple nuxɔxlɔ̃ me”?—Ef 6:4.

• 

  Nu kawoe Yehowa ƒe habɔbɔa na dzilawo be wòakpe ɖe wo ŋu woafia nu wo viwo tso gbɔdɔnyawo ŋu?—w19.05 12, aɖaka

• Nu ka tae wòle be nànɔ dze ɖom kple viwòwo edziedzi hafi woava ɖo nɔnɔme sesẽwo me?