Nu Siwo Míate Ŋu Awɔ Be Kpekpe Na Gbeadzi Naɖe Vi

Abe ale si wòle le hame ƒe kpekpewo gome enea, kpekpe na gbeadzi nye ɖoɖo nyui si Yehowa wɔ be míato edzi ado ŋusẽ mía nɔewo na lɔlɔ̃ kple dɔ nyuiwo wɔwɔ. (Heb 10:24, 25) Ele be kpekpe bliboa naxɔ miniti atɔ̃ alo adre. Miniti mawo ke mee woama nɔviawo, ana wo teƒe si woawɔ dɔ le ahado gbe ɖa. (Ne miekpa le kpekpe aɖe hafi awɔ kpekpe na gbeadzia, ke ele be wòaganɔ kpuie wu gɔ̃ hã.) Ele be ame si le kpekpea dzi kpɔ gea nadzra ɖo do ŋgɔ ɖe nane si aɖe vi na nɔvi siwo le gbeadzi yi ge gbe ma gbe ŋu. Le kpɔɖeŋu me, ne nɔvi siwo va kpekpe na gbeadzi Memleɖagbe dometɔ geɖe mede gbeadzi le kwasiɖa domedome oa, ke anyo be miadzro nya siwo miate ŋu atsɔ aɖo dze kple amewoa ko me. Nya bubu kawo hã mee miate ŋu adzro wòaɖe vi?

• Kpɔɖeŋudzeɖonya aɖe si tso Kristotɔwo Ƒe Agbenɔnɔ Kple Subɔsubɔdɔ—Kpekpea Ƒe Nusrɔ̃gbalẽa me

• Ale si miazã nudzɔdzɔ aɖe si amewo nya atsɔ adze dzeɖoɖo gɔme

• Ale si miawɔ aɖo dzeɖonyanutsinya aɖe si amewo lɔ̃a gbɔgblɔ le mia gbɔ ŋu

• Ale si miaɖo dze kple ame aɖe si mexɔ Mawu dzi se o, ame aɖe si xɔe se be ɖe nuwo dzɔ le wo ɖokui si, ame aɖe si doa gbe bubu, alo ame aɖe si le subɔsubɔha aɖe si mebɔ ɖe miaƒe nutoa me oa me

• Ale si miazã jw.org nyatakakadzraɖoƒea, JW Library^® dɔwɔnua, alo Biblia ƒe teƒe aɖe

• Ale si miazã Dɔwɔnu Siwo Míetsɔ Fiaa Nuia dometɔ aɖe

• Ale si miawɔ gbeadzisubɔsubɔdɔa ƒe akpa aɖe koŋ. Le kpɔɖeŋu me, ɖaseɖiɖi to telefon dzi, lɛta ŋɔŋlɔ, dutoƒoɖaseɖiɖi, tɔtrɔyiwo alo Biblia nusɔsrɔ̃

• Dedienɔnɔ ƒe nyawo, ale si miatrɔ ɖe nɔnɔmeawo ŋu, ale si miaɖe nɔnɔme nyuiwo afia, ale si susu nyui nanɔ mia si ɖe amewo ŋu, kple emawo tɔgbi

• Nusɔsrɔ̃ alo video aɖe si tso Do Vevie Nuxexlẽ Kple Nufiafia gbalẽ gbadzaa me

• Ale si nɔviawo ate ŋu ade dzi ƒo na woƒe gbeadzizɔhɛwo ahakpe ɖe wo ŋu

• Ŋɔŋlɔ aɖe alo nuteƒekpɔkpɔ dedziƒoname aɖe si ku ɖe gbeadzisubɔsubɔdɔa ŋu