Mawu Tsɔ Ðe Le Eme Na Wò
BIBLIA mee míate ŋu akpɔ aɖaŋuɖoɖo nyuitɔ kekeake le, elabe etso Mawu gbɔ. Togbɔ be menye dɔdada ŋuti mɔfiagbalẽe wònye o hãa, aɖaŋuɖoɖo nyui siwo le emea ate ŋu akpe ɖe mía ŋu ne míele nɔnɔme sesẽ aɖe me tom; míetɔtɔ le mía ɖokui me; míele veve sem; míaƒe lãme gblẽ alo míele susumedɔ aɖe lém.
Nu si ganyo wue nye be Biblia ka ɖe edzi na mí be mía Wɔla, Yehowa Mawu,a sea míaƒe nuŋububu kple seselelãmewo gɔme wu ame bubu ɖe sia ɖe. Ele klalo be yeakpe ɖe mía ŋu míanɔ te ɖe kuxi ɖe sia ɖe si vaa mía dzi nu. Le kpɔɖeŋu me, bu nya fakɔname siwo dze le mawunyakpukpui eve siawo me ŋu kpɔ:
“Yehowa tsɔ ɖe ame siwo ƒe dzi gbã gudugudu la gbɔ; exɔna na ame siwo ƒe gbɔgbɔ ŋu nu te.”—PSALMO 34:18.
“Elabena nye, Yehowa wò Mawu, melé wò nuɖusi ɖe asi, nye ame si le gbɔgblɔm na wò be: ‘Mègavɔ̃ o. Makpe ɖe ŋuwò.’”—YESAYA 41:13.
Gake aleke tututue Yehowa kpena ɖe mía ŋu ne susumedɔléle aɖe le fu ɖem na mí? Le nyati siwo kplɔe ɖo mea, àkpɔe be Yehowa kpena ɖe mía ŋu le mɔ geɖe nu tsɔ ɖenɛ fiana be yetsɔ ɖe le eme na mí vavã.
a Mawu ƒe ŋkɔe nye Yehowa.—Psalmo 83:18.