Srɔ̃ Mawudɔla Wɔnuteƒewo

1-2. (a) Nu kawo mee míeto vovo na mawudɔlawo le? (b) Nu kawo mee mía kple mawudɔlawo míesɔ le?

ESI Yehowa he wò va nyateƒea me la, ena nèva wɔ ɖeka kple esubɔla gbogbo siwo dome lɔlɔ̃ le, eye mawudɔla miliɔn geɖe hã le ƒome sia me. (Dan. 7:​9, 10) Ne míaƒe susu yi mawudɔlawo dzi la, míebua ale si gbegbe woto vovo na míi ŋu. Le kpɔɖeŋu me, wowɔ mawudɔlawo xoxoxo hafi va wɔ amegbetɔwo. (Hiob 38:​4, 7) Ŋusẽ le wo ŋu sãsãsã wu amegbetɔwo. Wole kɔkɔe hele dzɔdzɔe wu mí, elabena wode blibo, gake míawo ya míede blibo o.—Luka 9:26.

² Togbɔ be mawudɔlawo to vovo na mí alea hã la, mía kpli wo míesɔ le nanewo me. Le kpɔɖeŋu me, míate ŋu asrɔ̃ Yehowa ƒe nɔnɔme nyoameŋuwo, abe mawudɔlawo ke ene. Tiatiawɔblɔɖe le mía si, abe ale si wòle mawudɔlawo si ene. Ŋkɔ le mawudɔlawo si, woƒe nɔnɔmewo le vovovo eye dɔdeasi vovovowo hãe le wo si. Nenemae wòle le míawo hã gome. Didia le mí amegbetɔwo me be míasubɔ mía Wɔla la, eye nenema kee wòle le mawudɔlawo hã gome.—1 Pet. 1:12.

3. Nu kae míate ŋu asrɔ̃ tso mawudɔla wɔnuteƒewo gbɔ?

³ Esi mía kple mawudɔlawo sɔ le nu geɖe me ta la, woƒe kpɔɖeŋu nyuiawo ate ŋu ade dzi ƒo na mí eye míate ŋu asrɔ̃ nu geɖe tso wo gbɔ. Le nyati sia me la, míakpɔ ale si míate ŋu asrɔ̃ mawudɔla wɔnuteƒewo ƒe ɖokuibɔbɔ, ale si wolɔ̃a ame, woƒe dzidodo kple ale si wodzea agbagba be yewoana hamea nanɔ dzadzɛ.

MAWUDƆLAWO BƆBƆA WO ÐOKUI

4. (a) Nu kae ɖee fia be mawudɔlawo bɔbɔa wo ɖokui? (b) Nu ka tae mawudɔlawo bɔbɔa wo ɖokui? (Psalmo 89:7)

⁴ Mawudɔla wɔnuteƒewo bɔbɔa wo ɖokui. Togbɔ be nuteƒekpɔkpɔ geɖe su mawudɔlawo si, ŋusẽ le wo ŋu eye woƒe nunya de ŋgɔ hã la, wowɔa Yehowa ƒe gbe dzi. (Ps. 103:20) Ne wole woƒe dɔdeasiwo wɔm la, womeƒoa adegbe alo zãa woƒe ŋusẽa be amewo nakafu yewo o. Wotsɔa dzidzɔ wɔa dɔ si Mawu de wo si, ne ame aɖeke manya woƒe ŋkɔ atɔ ɖe dɔ si wowɔna ŋu o hã.a (1 Mose 32:​24, 29; 2 Fia. 19:35) Womelɔ̃na gbeɖe be woatsɔ bubu kple kafukafu si Yehowa dze na la ana yewo o. Nu ka tae mawudɔlawo bɔbɔa wo ɖokui alea gbegbe? Elabe wolɔ̃ Yehowa eye wodea bubu gã eŋu.—Xlẽ Psalmo 89:7.

5. Aleke mawudɔla aɖe wɔ nu ɖe Yohanes ŋu le ɖokuibɔbɔ me? (Kpɔ nɔnɔmetataa hã.)

⁵ Bu nudzɔdzɔ aɖe si ɖe mawudɔlawo ƒe ɖokuibɔbɔ fia ŋu kpɔ. Le ƒe 96 Kristotɔwo Ŋɔli (K.Ŋ.) me lɔƒo la, mawudɔla aɖe si ŋkɔ womeyɔ o ɖe nu wɔnukuwo fia apostolo Yohanes le ŋutega me. (Nyaɖ. 1:1) Aleke Yohanes wɔ nui esi wòkpɔ ŋutega wɔnuku ma? Edze klo be yeade ta agu na mawudɔlaa. Gake mawudɔla wɔnuteƒe sia gbee nɛ. Egblɔ be: ‘Kpɔ nyuie! Mègawɔ nu ma o! Nye hã kluvi ko menye abe wò ke ene kpe ɖe nɔviwòwo ŋu. De ta agu na Mawu!’ (Nyaɖ. 19:10) Ðokuibɔbɔ ka gbegbee nye esi! Mawudɔlaa medi be woatsɔ bubu kple kafukafua ana ye o. Ehe Yohanes ƒe susu yi Yehowa dzi enumake. Gake meda Yohanes ɖe anyi o. Togbɔ be mawudɔla ma le Yehowa subɔm ɣeyiɣi didi wu Yohanes eye wòsesẽ wui hã la, egblɔ na Yohanes ɖokuibɔbɔtɔe be ye hã kluvi koe yenye abe eya ke ene. Togbɔ be ehiã be mawudɔlaa naɖɔ apostolo Yohanes ɖo hã la, mehe nya ɖe apostolo tsitsia ŋu o. Ke boŋ eƒo nu nɛ tufafatɔe. Anɔ eme be mawudɔlaa se egɔme na Yohanes be nu si wòkpɔ lae wɔ dɔ ɖe edzi.

6. Aleke míate ŋu asrɔ̃ mawudɔlawo ƒe ɖokuibɔbɔ?

⁶ Aleke míasrɔ̃ mawudɔlawo ƒe ɖokuibɔbɔ? Ele be míawɔ dɔ si wode mía si, evɔ míaƒo adegbe alo adi kafukafu tso amewo gbɔ o. (1 Kor. 4:7) Tsɔ kpe ɖe eŋu la, nenye be míele Yehowa subɔm ƒe geɖee nye esia alo mɔnukpɔkpɔ tɔxɛ aɖewo su mía si hã la, mele be míabui be míenyo wu ame bubuwo o. Le nyateƒe me la, zi ale si subɔsubɔmɔnukpɔkpɔ geɖe su mía si la, zi nenemae wòle be míayi edzi abɔbɔ mía ɖokui. (Luka 9:48) Ele be míasrɔ̃ mawudɔlawo alɔ̃ faa asubɔ mía nɔewo. Mele be míato míaƒe nuwɔnawo dzi ana mía nɔviwo nasusui be míele vevie wu yewo o.

7. Aleke míabɔbɔ mía ɖokui ne míele aɖaŋu ɖom na ame aɖe alo le eɖɔm ɖo?

⁷ Ne eva hiã be míaɖɔ ame aɖe ɖo alo aɖo aɖaŋu nɛ, eɖanye haxɔsetɔ alo mía vi aɖee o, ele be míabɔbɔ mía ɖokui. Ɣeaɖewoɣi la, ahiã be míatɔ afɔ to ayi nyaa gbɔ tẽe. Abe ale si mawudɔlaa ɖo aɖaŋu na Yohanes tufafatɔe ene la, míawo hã míate ŋu aɖo aɖaŋu na ame aɖe tẽe, eye míawɔ nu ɖe eŋu nyuie be dzi nagaɖe le eƒo o. Ne míebua mía ɖokui be míenyo wu ame bubuwo o la, anɔ bɔbɔe na mí be míazã Biblia atsɔ aɖo aɖaŋu le bubu kple veveseseɖeamenu me.—Kol. 4:6.

MAWUDƆLAWO LƆ̃ AMEWO

8. (a) Le Luka 15:10 ƒe nya nu la, nu kae ɖee fia be mawudɔlawo lɔ̃ amegbetɔwo? (b) Akpa kae mawudɔlawo wɔna le gbeƒãɖeɖedɔa me? (Kpɔ foto hã.)

⁸ Mawudɔlawo mewɔa nu abe ɖe amegbetɔwo ƒe nya meka yewo o ene o. Ke boŋ wolɔ̃ amegbetɔwo. Ne ame aɖe si dzudzɔ Yehowa subɔsubɔ trɔ gbɔ va Yehowa gbɔ alo ame aɖe trɔ le eƒe mɔ vɔ̃wo dzi va nyateƒea me la, wokpɔa dzidzɔ. (Xlẽ Luka 15:10.) Mawudɔlawo le asi kpem ɖe Fiaɖuƒegbeƒãɖeɖedɔa ŋu vevie. (Nyaɖ. 14:6) Togbɔ be womeɖea gbeƒã na amewo tẽe o hã la, woate ŋu akpe ɖe gbeƒãɖelawo ŋu woake ɖe dzinyuitɔ siwo di be yewoasrɔ̃ nu geɖe tso Yehowa ŋu la ŋu. Míate ŋu agblɔe kple kakaɖedzi be mawudɔlawoe kpe ɖe mía ŋu le nudzɔdzɔ aɖe koŋ me o. Elabe Yehowa ate ŋu azã mɔnu bubuwo hã, abe eƒe gbɔgbɔ kɔkɔe la ene, atsɔ akpe ɖe eƒe amewo ŋu alo afia mɔ wo. (Dɔw. 16:​6, 7) Ke hã, ezãa mawudɔlawo tsɔ kpena ɖe mía ŋu geɖe ŋutɔ. Eya ta ne míele gbeƒã ɖem la, míate ŋu aka ɖe edzi be Yehowa ƒe dɔlawo li be yewoakpe ɖe mía ŋu.—Kpɔ aɖaka si ƒe tanyae nye “Mawu Ðo Woƒe Gbedodoɖawo Ŋu.”b

9. Aleke míate ŋu asrɔ̃ mawudɔlawo alɔ̃ amewo?

⁹ Aleke míate ŋu asrɔ̃ mawudɔlawo alɔ̃ amewo? Ne míese woɖe gbeƒãe be wogbugbɔxɔ ame aɖe ɖe hamea me la, míate ŋu akpɔ dzidzɔ abe mawudɔlawo ke ene. Míate ŋu ate ɖe eŋu ado wòezɔ̃ nɛ ana wòakpɔe be míelɔ̃ ye. (Luka 15:​4-7; 2 Kor. 2:​6-8) Míagate ŋu asrɔ̃ mawudɔlawo ne míewɔa míaƒe ŋutete katã le gbeƒãɖeɖedɔa me. (Nyagb. 11:6) Azɔ hã, míate ŋu adi mɔ siwo dzi míato akpe ɖe mía nɔviwo ŋu le gbeƒãɖeɖedɔa me, abe ale si mawudɔlawo hã le kpekpem ɖe mía ŋu ene. Le kpɔɖeŋu me, ɖe nàte ŋu awɔ ɖoɖo azɔ kple gbeƒãɖela yeye aɖe le gbeadzia? Alo ɖe nàte ŋu akpe ɖe nɔvi tsitsiwo alo esiwo dze dɔ ŋu be woawo hã woawɔ akpa aɖe le gbeƒãɖeɖedɔa mea?

10. Nu kae míate ŋu asrɔ̃ tso Sara ƒe nuteƒekpɔkpɔa me?

¹⁰ Nu kae míate ŋu awɔ ne nɔnɔmea meɖe mɔ na mí be míawɔ geɖe o? Míate ŋu ato mɔ aɖe dzi kokoko awɔ dɔ kple mawudɔlawo le gbeƒãɖeɖedɔa me. Bu mía nɔvinyɔnu Sara,c si tso India ŋu kpɔ. Sara wɔ mɔɖeɖedɔa abe ƒe 20 ene, gake eva dze dɔ tsi teƒe ɖeka. Esia na wòlé blanui vevie. Nɔvi siwo le eƒe hamea me kpe ɖe eŋu ale gbegbe, eye eya ŋutɔ hã xlẽa Biblia gbe sia gbe, si wɔe be dzi gava nɔ edzɔm. Eva hiã be Sara nate gbeƒãɖeɖemɔnu yeyewo kpɔ. Esi mate ŋu anɔ anyi aŋlɔ lɛta o ta la, eɖia ɖase na amewo to telefon dzi. Ne eyɔ eƒe Biblia nusrɔ̃viwo eye wòsrɔ̃ nu kpli wo vɔ la, ebiana wo ne wonya ame bubu siwo hã adi be yewoasrɔ̃ Biblia hã. Nu kae do tso eme? Kaka ɣleti ʋɛ aɖewo nava yi la, Biblia nusrɔ̃vi 70 ye su Sara si; eya ɖeka mate ŋu asrɔ̃ nu kple wo katã o. Eya ta ema ɖewo na nɔviwo le hamea me. Biblia nusrɔ̃vi mawo dometɔ geɖe le kpekpeawo dem fifia. Dzidzɔ gãe wònye na mawudɔlawo be yewoawɔ dɔ kple nɔvi siwo doa vevie nu le gbeƒãɖeɖedɔa me abe Sara ene!

MAWUDƆLAWO LE DZI DOM

11. Nu kawo mee mawudɔla wɔnuteƒewo le dzi dom le?

¹¹ Mawudɔla wɔnuteƒewo ɖo dzidodo ƒe kpɔɖeŋu nyuiwo ɖi na mí. Wole dzi dom le nu madzɔmadzɔ wɔwɔ teƒe kpɔm ƒe akpe geɖee nye esia. Wokpɔ eteƒe esime Satana kple mawudɔla bubu siwo subɔna kpli wo ɖekae tsã la va dze aglã ɖe Yehowa ŋu. (1 Mose 3:1; 6:​1, 2; Yuda 6) Biblia gblɔ gɔ̃ hã be gbɔgbɔ vɔ̃ aɖe si si ŋusẽ geɖe le tsi tre ɖe mawudɔla wɔnuteƒe aɖe ŋu. (Dan. 10:13) Azɔ hã le amegbetɔwo ƒe ŋutinya me la, mawudɔlawo kpɔe be ame ʋɛ aɖewo koe tiae be yewoasubɔ Yehowa. Togbɔ be ele alea hã la, mawudɔla wɔnuteƒewo tsɔ dzidzɔ le Yehowa subɔm veviedodotɔe. Woka ɖe edzi be le ɣeyiɣi nyuitɔ dzi la, Mawu aɖe nu madzɔmadzɔwo katã ɖa.

12. Nu kawoe akpe ɖe mía ŋu míado dzi?

¹² Aleke míate ŋu asrɔ̃ mawudɔlawo ƒe dzidodo? Ate ŋu adzɔ be míawo hã míakpɔ nu madzɔdzɔwo teƒe alo amewo natsi tre ɖe mía ŋu. Gake abe mawudɔlawo ene la, míeka ɖe edzi be le ɣeyiɣi nyuitɔ dzia, Mawu aɖe vɔ̃ɖinyenye ɖa. Eya ta abe mawudɔla wɔnuteƒewo ene la, mele be “míadzudzɔ nu si nyo la wɔwɔ o.” (Gal. 6:9) Mawu do ŋugbe be yeakpe ɖe mía ŋu míado dzi. (1 Kor. 10:13) Míate ŋu ado gbe ɖa na Yehowa be wòana eƒe gbɔgbɔ kɔkɔea mí ale be wòakpe ɖe mía ŋu míagbɔ dzi ɖi eye míanɔ dzidzɔ kpɔm. (Gal. 5:22; Kol. 1:11) Nu kae nàwɔ ne amewo tsi tre ɖe ŋuwò? Ka ɖe Yehowa dzi bliboe eye mègavɔ̃ o. Yehowa akpe ɖe ŋuwò ɣesiaɣi eye ado ŋusẽ wò.—Heb. 13:6.

MAWUDƆLAWO WƆA AKPA VEVI AÐE BE HAMEA NANƆ DZADZƐ

13. Dɔ vevi ka wɔm mawudɔlawo le le ŋkeke mamlɛ siawo me? (Mateo 13:​47-49)

¹³ Yehowa de dɔ vevi aɖe asi na mawudɔlawo le ŋkeke mamlɛ siawo me. (Xlẽ Mateo 13:​47-49.) Nya nyui si míeɖea gbeƒãe la sese doa dzidzɔ na ame miliɔn geɖe le xexea me godoo. Wo dometɔ aɖewo wɔa tɔtrɔ siwo hiã va zua Kristotɔ vavãwo. Gake mele alea le ame akpa gãtɔ ya gome o. Wode dɔ asi na mawudɔlawo be “woama ame vɔ̃ɖiwo ɖa tso ame dzɔdzɔewo gbɔ.” Esia fia be wode dɔ asi na wo be woakpɔ hamea ta be wòanɔ kɔkɔe. Gake mefia be ne ame aɖe dzudzɔ hadede kpli mí la, magate ŋu atrɔ agbɔ o. Mefia hã be kuxiwo mate ŋu anɔ hamea me gbeɖe o. Míate ŋu aka ɖe edzi be mawudɔlawo le dɔ dzi vevie be hamea nanɔ dzadzɛ.

14-15. Aleke míate ŋu aɖee afia be míedi be hamea nanɔ kɔkɔe abe mawudɔlawo ke ene? (Kpɔ fotoawo hã.)

¹⁴ Aleke míate ŋu asrɔ̃ mawudɔlawo be hamea nanɔ dzadzɛ? Gbãa, ele be míawo ŋutɔ míayi edzi anɔ agbe nyui eye míakpɔ mía kple Yehowa dome kadodoa ta. Be míawɔ esia la, ele be míadzɔ míaƒe dzi ŋu. Esia bia be míadze xɔlɔ̃ ame siwo lɔ̃ Yehowa eye míaƒo asa na nu sia nu si agblẽ mía kplii dome. (Ps. 101:3) Azɔ hã míate ŋu akpe ɖe mía nɔviwo ŋu be woawo hã woayi edzi awɔ nuteƒe na Yehowa. Le kpɔɖeŋu me, nu kae míawɔ ne míeva nyae be mía nɔvi aɖe wɔ nu vɔ̃ si nye ŋkubiãnya? Esi míelɔ̃e ta la, míade dzi ƒo nɛ be wòagblɔe na hamemetsitsiwo. Gake ne mewɔe nenema o la, ele be míawo ŋutɔ míagblɔe na hamemetsitsiawo. Mía nɔvia kple Yehowa dome gblẽ, eya ta míedi be woakpe ɖe eŋu kaba ale si wòanya wɔe!—Yak. 5:​14, 15.

¹⁵ Nublanuitɔe la, eva hiãna ɣeaɖewoɣi be woaɖe ame aɖewo siwo wɔ nu vɔ̃ gã ɖa le haa me. Ne edzɔ alea la, ‘míedzudzɔa hadede’ kpli wo.d (1 Kor. 5:​9-13) Esiae nye ɖoɖo si wowɔ be hamea nayi edzi anɔ kɔkɔe. Ne míedzudzɔ hadede kple ame siwo woɖe le haa me la, míeɖenɛ fiana be míelɔ̃ wo. Ne míewɔ ɖe ɖoɖo sia dzi la, ema awɔe be amea nanyɔ le eɖokui me eye wòakpɔe be ehiã be yeatrɔ ava Yehowa gbɔ. Ne nu vɔ̃ wɔla aɖe trɔ dzi me la, Yehowa kple eƒe dɔlawo kpɔa dzidzɔ eye míawo hã míekpɔa dzidzɔ.—Luka 15:7.

16. Nu kae nèɖo kplikpaa be yeawɔ?

¹⁶ Mɔnukpɔkpɔ gã aɖee wònye be Yehowa kpe ɖe mía ŋu míenya mawudɔlawo nyuie wu eye míewɔa dɔ kpli wo! Mina míasrɔ̃ mawudɔla wɔnuteƒewo ƒe ɖokuibɔbɔ, ale si wolɔ̃a amewo, woƒe dzidodo kple ale si wowɔa dɔ sesĩe be hamea nayi edzi anɔ kɔkɔe. Ne míewɔe alea la, míanɔ Yehowa subɔlawo ƒe ƒome gã sia me tso fifia yi ɖe mavɔ me.