Woyi Edzi Yehowa Subɔm Le Ɣeyiɣi Sesẽwo Me

Le ƒe ʋɛ siwo va yi mea, ganyawo tɔ gu le Venezuela ale gbegbe, eye esia wɔe be agbea sesẽ ŋutɔ. Ðasefo aɖe si ŋkɔe nye Edgar gblɔ be: “Le ƒe ʋɛ aɖewo ko mea, nuwo va nɔ asi axɔm ŋutɔ eye ga si ame atsɔ aƒle wo hã meli o. Ðeko wòle abe amedzrowoe míenye le dukɔ bubu me ene!”

Nu kae kpe ɖe Edgar ŋu? Egblɔ be: “Nye kple srɔ̃nye Carmen míede ŋugble le ale si dutanyanyuigblɔlawo trɔna ɖe nɔnɔmeawo ŋu ne woʋu yi dukɔ siwo me nuwo mede ame dzi le o me la ŋu. Esia ʋã mí míekpɔe be ele be míawo hã míatrɔ ɖe nɔnɔmea ŋu anɔ agbe tsɛ. Le kpɔɖeŋu me, míeɖoe be míade agble sue aɖe.”

Gake Edgar kple Carmen gawɔ nu bubu aɖe hã. Woɖoe wo ɖokuiwo dzi fa akɔ na wo nɔvi Kristotɔwo kple ame bubu siwo dzi nu te ɖo. (1 Tesalonikatɔwo 5:11) Edgar gblɔ be, “Menye ɖeko míefa akɔ na wo ko evɔ o, ke míede dzi ƒo na woawo hã be woakpe ɖe ame bubuwo ŋu ale be woakpɔ dzidzɔ si dona tso eme.”—Dɔwɔwɔwo 20:35.

Nu Nyuiwo Do Tso Eƒe Agbagbadzedze Me

Le corona dɔvɔ̃a ƒe gɔmedzedzea, Argenis ɖoe be yeaɖe gbeƒã na yeƒe ƒometɔwo. Eƒe ƒometɔ aɖewo lɔ̃ be wòasrɔ̃ Biblia kple yewo to fon dzi.

Argenis di hã be yeƒe ƒometɔwo nakpɔ ƒe 2020 takpekpe gã ƒe wɔnawo, gake kuxiae nye be Internet mele wo si o. Eya ta Argenis na Ðasefo bubu si tsɔ ɖe eƒe ƒometɔawo gbɔ la tsɔ takpekpea ƒe videowo ƒe kɔpi yi na wo. Eye Argenis ƒe ƒometɔwo vae ɣe television gã aɖe be yewoatsɔ akpɔ wɔnaa. Hafi woadze takpekpea kpɔkpɔ gɔmea, Argenis ƒo ka na wo do gbe ɖa kpli wo ɖekae. Argenis ƒe agbagbadzedze alea wɔe be eƒe ƒometɔ 4 kple ame 15 bubu te ŋu kpɔ takpekpea.

Wowɔ Nu Le Xɔse Kple Lɔlɔ̃ Me

Atsu kple asi aɖe si ŋkɔe nye Jairo kple Johana si koe ʋu le le woƒe hamea me. Eye wozãnɛ faa tsɔ kpena ɖe nɔviwo ŋu. Gake kuxi aɖe si va do mo ɖae nye be ami si woadze ade ʋua mea va nɔ vevem vevie le wogbɔ. Jairo gblɔ be: “Míenɔa fli me gaƒoƒo geɖe, ɣeaɖewoɣia, zã bliboa gɔ̃ hã, hafi kpɔa ɖe dzena.”

Jairo se le eɖokui me be yewoƒe agbagbadzedzeawo mezu dzodzro kura o. Egblɔ be: “Ne míetsɔ míaƒe ʋua tsɔ nuwo yi na nɔviwo eye míekpɔ ale si wole akpe dam na Yehowa, ame si naa nu eƒe amewo faa, esia nana dzi dzɔa mí ŋutɔ.”—2 Korintotɔwo 9:11, 14.

Ame Sia Ame Ate Ŋu Ana Kpekpeɖeŋu

Nɔvinyɔnu aɖe si ŋkɔe nye Norianni si le eƒe ƒe 20-awo mea se le eɖokui me be yemate ŋu akpe ɖe amewo ŋu o, elabe esusui be yemetsi o. Gake exlẽ 1 Timoteo 4:12, afi si gblɔ be: “Mègana ame aɖeke nado vlo wò ɖekakpuinyenye [alo ɖetugbuinyenye] o. Ke boŋ nànye kpɔɖeŋu na nuteƒewɔlawo.”

Mawunyakpukpui ma ʋã Norianni wòte ɖe nɔvi tsitsi siwo le woƒe hamea me ŋu na kpekpeɖeŋu wo. Le kpɔɖeŋu me, ekpena ɖe wo ŋu woŋlɔa lɛtawo tsɔ ɖia ɖase na amewo, eye ɣeaɖewoɣi hã, ekpea nɔvi tsitsiawo wowɔa ɖeka kplii ne ele nu srɔ̃m kple eƒe nusrɔ̃viwo. Norianni ƒoa ka alo ŋlɔa text message na nɔvi tsitsi siawo tsɔ dea dzi ƒo na wo. Norianni gblɔ be, “Yehowa na mekpɔe be mate ŋu awɔ geɖe.”

Mía nɔvi siwo le Venezuela le go dom kuxi vovovowo le ɣeyiɣi sesẽ siawo me. Ke hã, woyi edzi le vevie dom gbeƒãɖeɖedɔa eye wonye ‘ame siwo va zu akɔfafa gã aɖe’ tsoƒe na wo nɔewo.—Kolosetɔwo 4:11; 2 Timoteo 4:2.