FPG/The Image Bank via Getty Images
NƆ ŊUDZƆ!
Dunyahelawo Be Armagedon Adzɔ Kpuie—Nya Kae Biblia Gblɔ?
Le Dzoɖa, October 10, 2022 ƒe ŋdi mea, Russiatɔwo da bɔmbwo ɖo ɖe Ukraine ƒe dugã aɖewo me. Nu si tae nye be ŋkeke eve do ŋgɔa, bɔmb sesẽ aɖe wó hegblẽ nu le tɔdzisasrã vevi aɖe si le Russia kple Crimea domea ŋu. Eye Russia bu fɔ Ukraine ɖe nu si dzɔa ta. Evɔ ɣeyiɣi kpui aɖe do ŋgɔ na nudzɔdzɔ siawoa, dunyahelawo nɔ gbɔgblɔm be Armagedon ate ŋu adzɔ kpuie, si fia be xexe bliboa atsrɔ̃.
“To vovo na ʋunyaʋunya si ɖo Amerika kple Cuba dome le [Dukplɔla John F.] Kennedy ƒe dziɖuɣia, ʋunyaʋunya aɖeke megana míegogo Armagedon alea gbegbe kpɔ o. . . . Nyemeka ɖe edzi be anya wɔ be [míazã] nukliaʋawɔnuwo evɔ Armagedon madzɔ o.”—Amerika Dukplɔla Joe Biden, October 6, 2022.
“Melɔ̃ ɖe edzi be esia ate ŋu ana Armagedon nadzɔ kpuie, eye xexe bliboa ɖo afɔku me.”—Ukraine Dukplɔla Volodymyr Zelensky, ye gblɔ nya mawo esi wobia nyae tso nu siwo nukliaʋawɔnuwo zazã agblẽ ŋu, BBC News, October 8, 2022.
Ðe nukliaʋawɔnuwo zazã ate ŋu ahe Armagedon vɛa? Nya kae Biblia gblɔ?
Ðe nukliaʋawɔnuwo zazã ana Armagedon nadzɔa?
Ao. Zi ɖeka koe nya “Armagedon” dze le Biblia me le Nyaɖeɖefia 16:16. Menye aʋa si ayi edzi le dukɔwo domee Armagedon nye o, ke boŋ enye aʋa si ayi edzi le Mawu kple “anyigba blibo la dzi fiawo” dome. (Nyaɖeɖefia 16:14) Mawu ato Armagedon-ʋaa dzi ahe amegbetɔwo ƒe dziɖuɖu ava nuwuwu.—Daniel 2:44.
Ne èdi be yeaxlẽ nu geɖe tso nu si adzɔ ɖe anyigba dzi le Armagedon-ʋaa me ŋua, xlẽ nyati si nye Nu Kae Nye Armagedon-ʋa La?
Ðe nukliaʋawɔwɔ awɔe be anyigba kple edzinɔlawo katã natsrɔ̃a?
Ao. Togbɔ be amegbetɔwo ƒe dziɖulawo ate ŋu ava zã nukliaʋawɔnuwo le etsɔme hãa, Mawu maɖe mɔ be woatsrɔ̃ anyigba o. Biblia gblɔ be:
“Anyigba ya li tegbee.”—Nyagblɔla 1:4.
“Ame dzɔdzɔewo anyi anyigba la dome, eye woanɔ edzi tegbee.”—Psalmo 37:29.
Ke hã, nya siwo Biblia gblɔ ɖi kple nu siwo le dzɔdzɔm egbea ɖee fia be eteƒe madidi o, nu ɖedzesi siwo medzɔ kpɔ le amegbetɔ ƒe ŋutinya me oa adzɔ. (Mateo 24:3-7; 2 Timoteo 3:1-5) Àte ŋu ava nya nu si Biblia gblɔ tso etsɔme ŋu to míaƒe Biblia sɔsrɔ̃ femaxee ƒe ɖoɖoa dzi.