Nu Kae Wòle Be Manya Tso Gbɔdɔnuwɔwɔ Ðe Ame Ŋuti Ŋu?​—Akpa 1: Nu Siwo Ŋu Nànɔ Ŋudzɔ Ðo

Nu kae nye gbɔdɔnuwɔwɔ ɖe ame ŋu?

Togbɔ be nu si setɔwo yɔna be “gbɔdɔnuwɔwɔ ɖe ame ŋu” toa vovo tso dukɔ me yi dukɔ me hã la, nya la ate ŋu afia be woto mɔ aɖe dzi de asi amea ŋu evɔ amea melɔ̃ hafi o, eye ɣeaɖewoɣi hã elɔa ameléle sesẽe adɔ egbɔ alo avudodo nɛ ɖe eme. Etea ŋu nyea gbɔdɔnuwo wɔwɔ ɖe ɖeviwo alo sɔhɛwo ŋu, ƒometɔ kpamkpam gbɔ dɔdɔ, ameléle sesẽe agblẽe, kple “kpekpeɖeŋunalawo” abe ɖɔktawo, nufialawo kple subɔsubɔhakplɔlawo ƒe ayemɔ dzi toto adɔ ame gbɔ hã ene. Wodoa ŋɔdzi na ame siwo ŋuti wowɔ nu sia ɖo la dometɔ aɖewo (eɖanye gbegblẽnyae wogblɔ ɖe wo ŋu alo ɖe wodɔ wo gbɔ sesẽe o) be yewoawɔ nu vevi wo ne woke atse gblɔe na ame aɖe.

Numekuku aɖe ɖee fia be ƒe sia ƒe la, ame akpe alafa eve blaatɔ̃ kloe gblɔna be wowɔ gbɔdɔnuwo ɖe yewo ŋu le United States (États-Unis) ɖeɖe dzaa. Eye ame siawo ƒe afã kloe nye ame siwo xɔ tso ƒe 12 va ɖo 18.

Nu si wòle be nànya

• Biblia meda asi ɖe gbɔdɔnuwo wɔwɔ ɖe ame ŋu dzi o. Biblia ƒo nu tso ŋutsuwo ƒe ha aɖe si gbɔdɔdɔ xɔ susu me na ale gbegbe la ŋu. Ŋutsu mawo nɔ du si woyɔna be Sodom la me anɔ ƒe 4,000 aɖewoe nye esi va yi. Esi wokpɔ ŋutsu eve aɖewo ɖi tsa va woƒe dua me la, wodze agbagba be yewoalé wo adɔ wo gbɔ, eye nudzɔdzɔ ma ɖe nu si tae Yehowa tsrɔ̃ du ma ɖo la fia. (1 Mose 19:4-13) Gakpe ɖe eŋu la, wode se na Israel-viwo le Se si Mawu tsɔ na Mose anɔ ƒe 3,500 aɖewoe nye esia la me be woatsri ƒometɔ kpamkpam gbɔ dɔdɔ, esia lɔ gbɔdɔnuwo wɔwɔ ɖe ame ƒe ƒometɔwo ŋu hã ɖe eme.​—3 Mose 18:6.

• Ame nyanyɛwoe wɔ gbɔdɔnuwo ɖe ame akpa gãtɔ ŋu. “Ame siwo gbɔ wodɔ sesẽe la dometɔ eve le etɔ̃ me ƒe ame nyanyɛwoe wɔ nua ɖe wo ŋu. Menye ame manyamanya aɖewoe va dze wo dzi le vo me o.”​—Talking Sex With Your Kids.

• Wowɔa gbɔdɔnuwo ɖe ŋutsuwo kple nyɔnuwo siaa ŋu. Le United States la, ame siwo ŋu wowɔ gbɔdɔnuwo ɖo la dometɔ 10 le alafa me nye ŋutsuwo. Agbalẽ aɖe gblɔ be ŋutsu siwo ŋu wowɔ nu siawo ɖo la “vɔ̃na be nu si wowɔ ɖe yewo ŋu ana be yewoazu ŋutsugbɔdɔlawo alo ‘yewomeganye ŋutsu tututu o.’”​—Rape, Abuse & Incest National Network (RAINN).

• Ale si gbɔdɔnuwo wɔwɔ ɖe ame ŋu va bɔ egbea la mewɔ nuku kura o. Biblia gblɔe ɖi be le “ŋkeke mamlɛawo me la,” ame geɖewo anye “ame siwo melɔ̃a ame ƒe nya o,” “ame wɔadãwo” kple “ame siwo meɖua wo ɖokuiwo dzi o.” (2 Timoteo 3:1-3) Nɔnɔme siawo dzena kɔtɛe le ame siwo wɔa gbɔdɔnuwo ɖe amewo ŋu la ŋu.

• Menye ame siwo ŋu wowɔ gbɔdɔnuawo ɖo la ƒe agɔdzedzee o. Mesɔ be woawɔ gbɔdɔnuwo ɖe ame aɖeke ŋuti o. Nuwɔna ƒe fɔbubua katã le nua wɔlawo ɖeɖe dzi. Ke hã àte ŋu aɖe afɔ aɖewo atsɔ akpɔ ɖokuiwò ta va se ɖe afi aɖe ya teti.

Nu siwo nàte ŋu awɔ

• Dzra ɖo. Dzra ɖo do ŋgɔ ɖe nu si nàwɔ ne ame aɖe di be yeawɔ gbɔdɔnu ɖe ŋuwò, eɖanye wò ŋugbetɔ alo dɔwɔhati ye gɔ̃ hã o la ŋu. Ðetugbui aɖe si ŋkɔe nye Erin ɖo aɖaŋu be ne èdi be yeadzra ɖo ɖe ale si nàwɔ anɔ te ɖe gbɔdɔnuwɔwɔ ɖe ame ŋu ƒomevi aɖe nu ŋu la, wò ŋutɔ wɔ ale si nɔnɔmea ate ŋu do mo ɖa la le ɖokuiwò si eye nàdzra ɖo ɖe ale si nàwɔ nui hã ŋu. Egblɔ be: “Adze bometsinya na ame aɖewo ya, gake ne ète ŋu wɔ esia la, asesẽ ŋutɔ be nu siawo nadzɔ ɖe dziwò.”

  Biblia gblɔ be: “Mikpɔ nyuie be ale si miezɔna la naganye abe numanyalawo ene o, ke boŋ abe nunyalawo ene, . . . elabena ŋkekeawo nye vɔ̃.”​—Efesotɔwo 5:15, 16.

  Bia ɖokuiwò be: ‘Nu kae mawɔ ne ame aɖe lé teƒe aɖe nam eye wòɖe fu nam?’

• Dzra ɖo ɖe ale si nàsi le nɔnɔmea nu la ŋu. Agbalẽ si nye RAINN la gaɖo aɖaŋu be “nàɖo nya nyanyɛ aɖe ɖi si anɔ nyanya na xɔwòwo kple wò ƒometɔwo ale be ne èɖo xaxa me eye nègblɔe ko la woanya evɔ ame si le gbɔwò ya mase naneke gɔme o. Esia ate ŋu ana be xɔ̃wòwo alo wò ƒometɔwo nava kplɔ wò dzoe.” Gake àte ŋu aƒo asa na dzigbagbã geɖe ne èƒo asa na teƒe siwo nàte ŋu aɖo nɔnɔme sia me le.

  Biblia gblɔ be: “Aɖaŋudzela kpɔa afɔku gbɔna eye wòɣlaa eɖokui, ke ame makpɔnuteƒe yina ɖadea ta eme, eye wòkpɔa emetsonua.”​—Lododowo 22:3.

  Bia ɖokuiwò be: ‘Ðoɖo kae mewɔ ale be ne meɖo nɔnɔme sia me la, mate ŋu asi le enu?’

  

• Ðo seɖoƒewo eye nàlé wo me ɖe asi. Le kpɔɖeŋu me, ne wò kple ame aɖe miele ɖoɖo wɔm ɖe srɔ̃ɖeɖe ŋu la, wò kple wò ŋugbetɔa miɖo dze tso nu siwo miate ŋu awɔ ɖe mia nɔewo ŋu kple esiwo masɔ be miawɔ o la ŋu. Ne amea ya be ema mehiã kura o la, ke ehiã be nàdi ame bubu, ame si ade bubu wò dzidzenu siwo nu nènɔa agbe ɖo la ŋu.

  Biblia gblɔ be: “Lɔlɔ̃ . . . mewɔa nu si medze o, media eya ŋutɔ tɔ o.”​—1 Korintotɔwo 13:4, 5.

  Bia ɖokuiwò be: ‘Dzidzenu kawo nue menɔa agbe ɖo? Nuwɔna kawoe mabu be womesɔ o?’