Lododowo 17:17—“Xɔlɔ̃ Lɔ̃a Ame Ɣesiaɣi”

Nu Si Lododowo 17:17 Fia

Xɔlɔ̃ vavãwo nye ame siwo dzi míate ŋu aka ɖo ɣesiaɣi. Wowɔa nuteƒe eye wotsɔa ɖe le eme na ame vevietɔ le nɔnɔme sesẽwo me, abe ale si ko dadavi siwo dome le kplikplikpli wɔnɛ ene.

“Xɔlɔ̃ vavã lɔ̃a ame ɣeawokatãɣi.” Nya sia agate ŋu afia be “xɔlɔ̃ ɖenɛ fiana ɣesiaɣi be yelɔ̃ ame.” Hebrigbe me nya si wozã na “lɔlɔ̃” le nya sia me bia nu geɖe wu ale si ame ase le eɖokui me ɖe ame bubu ŋu. Efia be ame madi eɖokui tɔ o, ke boŋ ato eƒe nuwɔnawo dzi aɖee afia ame bubu be yelɔ̃e. (1 Korintotɔwo 13:4-7) Xɔlɔ̃ siwo dome lɔlɔ̃ sia le la yia edzi kuna ɖe wo nɔewo ŋu ne nane dzɔ si ate ŋu ana wo dome naklã hã, ate ŋu anye masɔmasɔwo loo alo agbe me kuxiwo. Wolɔ̃na faa tsɔna kea wo nɔewo hã. (Lododowo 10:12) Xɔlɔ̃ vavã meʋãa ŋu nɔvia ne nuwo le nyonyom nɛ o, ke boŋ ekpɔa dzidzɔ kplii.—Romatɔwo 12:15.

‘Xɔlɔ̃ vavã nye ame nɔvi si wodzi ɖe xaxagbe ŋu.’ Ale si dadaviwo dome te ŋu nɔa kplikplikpli tae wogblɔ nya sia. Eya ta ne míedze agbagba ɖe sia ɖe be míanye xɔlɔ̃ vavã na ame aɖe si le nɔnɔme sesẽ me tom la, anɔ abe ale si nɔviwo wɔnɛ na wo nɔewo ene. Azɔ̃ hã, masɔmasɔ aɖeke megblẽa xɔlɔ̃ siawo dome o. Ðe masɔmasɔ mawo nana wogadea bubu wo nɔewo ŋu geɖe wu eye woƒe lɔlɔ̃ gasẽna ɖe edzi boŋ.

Nya Siwo Ƒo Xlã Lododowo 17:17

Nya siwo me nunya le siwo wogblɔ kpokploe ye le Lododowo ƒe agbalẽa me eye wonana nuxlẽlaa dea ŋugble. Fia Salomo ye ŋlɔ Biblia-gbalẽ sia ƒe akpa gãtɔ. Ale si wòɖo nyaawoe la sɔ kple ale si Hebri hakpanyaŋlɔlawo wɔnɛ. Mɔnu siwo wozãna ye nye be wogblɔa nya siwo ɖia wo nɔewo gake nyaa ƒe akpa evelia kɔa gbãtɔa me yia ŋgɔ. Kpɔɖeŋu ɖekae nye Lododowo 17:17; nya siwo le kpukpuia ƒe akpa evelia na akpa gbãtɔ me gakɔ ɖe edzi. Alo wogblɔa susu eve siwo toa vovo na wo nɔewo. Le kpɔɖeŋu me, Lododowo 18:24: “Xɔlɔ̃ aɖewo li siwo gblẽa wo nɔewo dome, gake xɔlɔ̃ aɖewo kuna ɖe ame ŋu wu ame nɔvi gɔ̃ hã.” Susu si dze le kpukpuia ƒe akpa evelia to vovo na esi dze le kpukpuia ƒe akpa gbãtɔ.

Esi Salomo nɔ Lododowo 17:17 ŋlɔm la, eƒe susu anya yi xɔlɔ̃wɔwɔ si nɔ fofoa David kple Yonatan si nye Fia Saul ƒe vi dome la dzi. (1 Samuel 13:16; 18:1; 19:1-3; 20:30-34, 41, 42; 23:16-18) Togbɔ be David kple Yonatan medo ƒome o hã, wo dome nɔ kplikplikpli wu nɔviwo. Yonatan de eƒe agbe afɔku me gɔ̃ hã ɖe exɔlɔ̃a ta.a

Lododowo 17:17 Ƒe Biblia Gɔmeɖeɖe Bubuwo

“Xɔlɔ̃ lɔ̃a ame ɣeawokatãɣi ke wodzi nɔviŋutsu hena hiãgbe.”—Agbenya La.

“Xɔlɔ̃ lɔ̃a ame ɣesiaɣi baa; ke nɔvi ya dzɔ be yeaxɔ na ame le xaxaɣi.”—Biblia La.

Kpɔ video kpui sia be nànya nu si ŋu Lododowo ƒe agbalẽa ku ɖo.