NUSƆSRƆ̃ 14
Aleke Míate Ŋu Asubɔ Mawu Wòadze Eŋu?
Abe ale si míekpɔe le nusɔsrɔ̃ si do ŋgɔ na esia me ene la, menye subɔsubɔhawo katãe dzea Mawu ŋu o. Gake míate ŋu asubɔ mía Wɔlaa le mɔ si dzea eŋu la nu. ‘Mawusubɔsubɔ’ ka ƒomevie dzea eŋu? (Yakobo 1:27) Na míakpɔ nya si Biblia gblɔ tso esia ŋu ɖa.
1. Aleke míawɔ anya ale si míasubɔ Mawu wòadze eŋu?
Biblia ye akpe ɖe mía ŋu míanya ale si míasubɔ Mawu. Yesu gblɔ na Mawu be: “Wò nya la nye nyateƒe.” (Yohanes 17:17) Subɔsubɔha aɖewo gbe nyateƒe si Mawu ŋutɔ ɖe fia le eƒe Nya, Biblia me. Wotsɔ amegbetɔwo ƒe nufiafiawo kple kɔnyinyiwo ɖɔli nyateƒea. Gake Yehowa mekpɔa ŋudzedze ɖe ame siwo “gbe Mawu ƒe se la” ŋu o. (Xlẽ Marko 7:9.) Gake ne ale si míesubɔa Mawui la wɔa ɖeka kple Biblia ƒe nufiafia eye míewɔna ɖe eƒe aɖaŋuɖoɖowo dzi la, míedoa dzidzɔ na Mawu ƒe dzi.
2. Aleke wòle be míasubɔ Yehowa Mawui?
Esi wònye be Yehowae nye mía Wɔla ta la, eya ɖeka koe wòle be míasubɔ. (Nyaɖeɖefia 4:11) Esia fia be, mele be míazã legba alo nɔnɔmewɔwɔ aɖeke le mía Wɔlaa subɔsubɔ me o, ke boŋ, ele be míalɔ̃e, eye míasubɔ eya ɖeka ko.—Xlẽ Yesaya 42:8.
Ele be míaƒe mawusubɔsubɔ nanɔ ‘kɔkɔe, eye wòadze Yehowa ŋu.’ (Romatɔwo 12:1) Esia fia be, ele be míawɔ ɖe eƒe sededewo dzi. Le kpɔɖeŋu me, ame siwo lɔ̃ Yehowa la lɔ̃ eƒe sedede siwo ku ɖe srɔ̃ɖeɖe ŋu eye wowɔa wo dzi. Eye woƒoa asa na nuwɔna siwo gblẽa nu le ame ŋu, abe sigaretnono, atike vɔ̃ɖiwo zazã, alo aha tsu nono ene.a
3. Nu ka tae wòle be míawɔ ɖeka kple haxɔsetɔwo asubɔ Yehowa?
Kpekpe siwo míedena kwasiɖa sia kwasiɖa la naa mɔnukpɔkpɔ mí be ‘míakafu Yehowa le amehawo dome.’ (Psalmo 111:1, 2) Mɔ aɖe si dzi míetona wɔa esia ye nye be míedzia kafukafuhawo na Mawu. (Xlẽ Psalmo 104:33.) Yehowa di tso mía si be míanɔ kpekpeawo dem, elabena elɔ̃ mí, eye enya be kpekpeawo dede akpe ɖe mía ŋu be míakpɔ dzidzɔ le agbe me tegbee. Le kpekpeawo me la, míedea dzi ƒo na mía nɔewo, eye esia ɖea vi na mí.
SRƆ̃ NU BUBUWO
Míadzro nu si tae legbawo kple nɔnɔmewɔwɔwo zazã le mawusubɔsubɔ me medzea Yehowa ŋu o la me. Azɔ hã, àkpɔ mɔ vevi siwo dzi míate ŋu ato akafu Mawu.
4. Mele be míazã nɔnɔmewɔwɔwo kple legbawo le míaƒe mawusubɔsubɔ me o
Aleke míewɔ nya be nu mawo zazã medzea Mawu ŋu o? Mikpɔ VIDEOA, eye miadzro biabia si gbɔna me.
Esi Mawu ƒe ame siwo nɔ anyi le blema la dometɔ aɖewo te kpɔ be yewoasubɔe to legba aɖe dzi la, nu kae dzɔ?
Nu si tae ame aɖewo zãa nɔnɔmewɔwɔwo le woƒe mawusubɔsubɔ me ye nye be, wodi be esia nakpe ɖe yewo ŋu yewoase le yewo ɖokui me be yewote ɖe Mawu ŋu kplikplikpli. Gake ɖe esia wɔwɔ ana Mawu nanɔ adzɔge tso wo gbɔ boŋua? Mixlẽ 2 Mose 20:4-6 kple Psalmo 106:35, 36, eye miadzro biabia siawo me:
Nɔnɔmewɔwɔ kple nu vovovo kawoe nèkpɔ be amewo zãna le woƒe mawusubɔsubɔ me?
Aleke Yehowa sena le eɖokui me ne amewo le nu mawo zãm?
Aleke nèsena le ɖokuiwò me tso nɔnɔmewɔwɔwo zazã atsɔ asubɔ Mawui ŋu?
5. Ne míesubɔa Yehowa ɖeka ko la, míavo tso alakpadzixɔsewo si me
Le video sia me la, àkpɔ ale si Yehowa subɔsubɔ le mɔ nyuitɔ nu ate ŋu ana míavo tso alakpadzixɔsewo si me. Mikpɔ VIDEOA.
Mixlẽ Psalmo 91:14, eye miadzro nyabiase sia me:
Nu kae Yehowa do ŋugbe be yeawɔ na mí ne míesubɔa eya ɖeka ko tsɔ ɖenɛ fiana be míelɔ̃e?
6. Míesubɔa Mawu le míaƒe hame ƒe kpekpewo me
Míekafua Yehowa hedea dzi ƒo na mía nɔewo ne míedzia ha eye míeɖoa nya ŋu le hame ƒe kpekpewo me. Mixlẽ Psalmo 22:22, eye miadzro biabia siawo me:
Ðe amewo ƒe nyaŋuɖoɖo le kpekpeawo me do dzidzɔ na wòa?
Ðe nàdi be yeadzra ɖo aɖo nya ŋu le hame ƒe kpekpe aɖe mea?
7. Edzɔa dzi na Yehowa ne míeƒoa nu tso nu siwo srɔ̃m míele ŋu na amewo
Míate ŋu ato mɔ vovovowo dzi agblɔ Biblia me nyateƒea na amewo. Mixlẽ Psalmo 9:1 kple 34:1, eye miadzro nyabiase sia me:
Nu kae nèva srɔ̃ le Biblia me si ŋu nàdi be yeaƒo nu tsoe na ame aɖe?
AME AÐEWO GBLƆNA BE: “Dzi mee Mawu kpɔna, eya ta, aleke kee míeɖasubɔe o, edzea eŋu.”
Nu kae nèsusu tso nya ma ŋu?
NU SIWO MÍESRƆ̃
Míaƒe nu dzea mía Wɔla la ŋu ne míesubɔa eya ɖeka ko, ne míekafunɛ le hamea ƒe kpekpewo me, eye míeƒoa nu tso nu siwo míesrɔ̃ ŋu na ame bubuwo.
Numetoto
Aleke míawɔ anya ale si míasubɔ Mawu wòadze eŋu?
Nu ka tae Yehowa ɖeka koe wòle be míasubɔ?
Nu ka tae wòle be míawɔ ɖeka kple ame siwo dina be yewoadze Mawu ŋu ale be mía kpli wo míasubɔ Mawu ɖekae?
KU NU ME TSO NYATIA ŊU
Xlẽ nu tso ale si nyɔnu aɖe wɔ dzudzɔ legbawo subɔsubɔ la ŋu le nyati si nye “Nyemeganye Kluvi Na Trɔ̃wo Azɔ O” la me.
“Biblia Le Amewo Ƒe Agbenɔnɔ Trɔm” (Gbetakpɔxɔ, July 1, 2011)
Xlẽ nu tso nu si ate ŋu akpe ɖe ŋuwò be nàɖo nya ŋu le hame ƒe kpekpewo me la ŋu.
Le video sia me la, àkpɔ ale si hame ƒe kpekpewo dede ɖe vi na ɖekakpui aɖe togbɔ be kpekpeawo dede menɔ bɔbɔe nɛ o hã.
Ame geɖe xɔe se be atitsoga nye Kristotɔwo ƒe dzesi, gake ɖe wòle be míazãe le míaƒe mawusubɔsubɔ mea?
“Nu Ka Tae Yehowa Ðasefowo Mezãa Atitsoga Le Tadedeagu Me O?” (Nyati sia le jw.org)
a Míava dzro nya siawo me le nusɔsrɔ̃ bubu siwo le ŋgɔ la me.