4. Aleke woƒo nu tso Yesu ŋui le alẽwo kple gbɔ̃wo ŋuti lododoa ƒe gɔmedzedze, eye amekawo hãe woyɔ?

⁴ Yesu dze eƒe lododoa gɔme be: “Ne Amegbetɔvi la ava.” Anɔ eme be ènya amesi “Amegbetɔvi la” nye. Nyanyuigbalẽŋlɔlawo zã nyagbɔgblɔ ma na Yesu enuenu. Yesu ŋutɔ hã zãe, eye ɖikeke mele eme o be Daniel ƒe ŋutega si me wòkpɔ “nane . . . abe amegbetɔ ene” si va Amegã ɖeɖia gbɔ be yeaxɔ “ŋusẽ, bubu kple dziɖuɖu” le lae nɔ eƒe susu me. (Daniel 7:13, 14; Mateo 26:63, 64; Marko 14:61, 62) Togbɔ be Yesue nye ame vevitɔ le lododo sia me hã la, menye eya ɖekae le eme o. Egblɔ le nuƒo sia, si le Mateo 24:30, 31 me do ŋgɔ be ne Amegbetɔvi la ‘va kple ŋusẽ kple ŋutikɔkɔe geɖe’ la, eƒe dɔlawo awɔ akpa vevi aɖe. Nenema kee alẽwo kple gbɔ̃wo ŋuti lododoa hã ɖee fia be mawudɔlawo akpe ɖe Yesu ŋu ne ‘enɔ eƒe ŋutikɔkɔezikpui la dzi’ be yeadrɔ̃ ʋɔnu. (Tsɔe sɔ kple Mateo 16:27.) Gake dziƒoe Ʋɔnudrɔ̃la la kple eƒe dɔlawo le, eyata ɖe woƒo nu tso amegbetɔwo ŋu le lododoa mea?

Mawudɔlawo akpe ɖe eŋu Mawudɔlawo ava kplii