Ame Etɔ̃ Aɖewo Siwo Di Nyateƒea Le Ƒe Alafa 16 Lia Me—Nu Ka Ŋue Woke Ðo?

“NU KAE nye nyateƒe?” Nya mae Pontio Pilato, si nye Romatɔwo ƒe nutomefia si nɔ Yudea le ƒe alafa gbãtɔ me, la bia Yesu esime wònɔ ʋɔnu drɔ̃mee. (Yohanes 18:38) Gake le nyateƒe me la, menye ɖe Pilato nɔ didim be yeanya nyateƒe la o. Ne nanee la, ale si wòbia nya lae la ɖee fia be ɖeklemi ɖem wònɔ. Edze ƒãa be, le Pilato ƒe susu nu la, nu sia nu si wofia ame aɖe alo esi wòtia be yeaxɔ ase lae amea buna be enye nyateƒe; mɔ aɖeke meli si dzi woato anya nu si nye nyateƒe o. Aleae ame geɖe susuna egbea hã.

Sɔlemedela siwo nɔ anyi le ƒe alafa 16 lia me le Europa la menya nu si dzi woaxɔ ase be eyae nye nyateƒea o; wotsi evedomesi. Esi wofia wo tso woƒe ɖevime ke be woaxɔe ase be sɔlemehaa ƒe tatɔe nye papa la eye woaxɔ sɔlemehaa ƒe nufiafia bubuwo dzi ase ta la, Ðɔɖɔɖotaʋlilawo ƒe nufiafia yeye siwo nɔ ta kekem le Europa-nyigbaa dzi ɣemaɣi la na wotɔtɔ. Nu ka dzie woaxɔ ase? Aleke woawɔ anya nu si nye nyateƒea?

Ɣemaɣi la, ŋutsu etɔ̃ aɖewo kple ame bubu geɖewo ɖoe kplikpaa be yewoadi nyateƒea ake ɖe eŋu.a Aleke wowɔ de vovototo nu si nye nyateƒea kple nu si nye aʋatso dome? Eye nu ka ŋue woke ɖo? Na míakpɔe ɖa.

“MINA BIBLIA LA . . . NAFIA MƆ MÍ ƔESIAƔI”

Wolfgang Capito nye ɖekakpui aɖe si doa vevie nu le mawusubɔsubɔ me. Capito xɔ hehe le atikeŋutinunya, seŋutinunya, kple mawunyaŋutinunya me, eye le ƒe 1512 me la, eva zu nunɔla; emegbe eva zu mawunyagblɔla le bisiɔpgã si nɔ Mainz la te.

Gbã la, Capito dze agbagba be yeaɖe dzi le Ðɔɖɔɖotaʋlila siwo nɔ gbeƒã ɖem gbedeasi si tsi tsitre ɖe Katolikotɔwo ƒe nufiafiawo ŋu la ƒo. Gake ɣeyiɣi kpui aɖe megbe la, Capito ŋutɔ va de ɖɔɖɔɖotaʋlilawo dzi. Nu kae wòwɔ? Ŋutinyaŋlɔla James M. Kittelson ŋlɔ ɖe eƒe agbalẽ me be, esi Capito lé ŋku ɖe nufiafia vovovoawo ŋu la, ekpɔe be “nu nyuitɔ si wòle be yewoatsɔ ado yewoƒe nufiafiawo kpɔe nye Biblia la, elabena eya me koe nyateƒea le.” Eya ta Capito ƒo nya ta be dzixɔse siwo nye be abolo kple wain si Katolikotɔwo zãna le woƒe Misa me la trɔna zua Yesu ƒe ŋutilã kple ʋu nukutɔe kpakple ame kɔkɔewo subɔsubɔ menye Biblia ƒe nufiafia o. (Kpɔ aɖaka si nye “Wodzro Eme Kpɔ ‘Be Nya Siawo Le Eme Hã.’”) Capito ɖe asi le ɖoƒe kɔkɔ si nɔ esi le bisiɔpgãa gbɔ la ŋu le ƒe 1523 me, eye wòʋu yi ɖanɔ Strasbourg, si nye du si me ɖɔɖɔɖotaʋlilawo sɔ gbɔ ɖo ɣemaɣi.

Capito ƒe aƒe si nɔ Strasbourg la va zu ame siwo meda asi ɖe sɔlemehaa ƒe nufiafiawo dzi o la ƒe takpeƒe, eye ɖikeke mele eme o be wodzroa subɔsubɔnyawo kple Biblia ƒe nufiafia geɖewo me le afi ma. Le agbalẽ si nye The Radical Reformation (Ðɔɖɔɖotaʋiʋli Moveviɖoɖotɔe) ƒe nya nu la, togbɔ be Ðɔɖɔɖotaʋlila aɖewo gakpɔtɔ lé Mawuɖekaetɔ̃ ƒe nufiafiaa me ɖe asi hã la, Capito ya “meƒo nu tso Mawuɖekaetɔ̃ ƒe nufiafiaa ŋu” le eƒe agbalẽwo me o. Nu ka tae? Ale si Spaintɔ mawunyaŋutinunyala Michael Servetus zã Biblia tsɔ ɖee fia be Mawuɖekaetɔ̃ ƒe nufiafiaa nye aʋatso la wɔ dɔ ɖe Capito dzi ŋutɔ.b

Ɣemaɣi la, ne ame aɖe ƒo nu tsi tsitre ɖe Mawuɖekaetɔ̃ ƒe nufiafiaa ŋu la, woate ŋu awui, eya ta Capito ɖɔ ŋu ɖo be meɖe eƒe susuwo gblɔ gaglãa o. Ke hã eƒe agbalẽwo ɖee fia be ekpɔe be nya ku ɖe Mawuɖekaetɔ̃ ƒe nufiafiaa ŋu hafi wòva do go Servetus gɔ̃ hã. Katoliko nunɔla aɖe va ŋlɔ emegbe be Capito kple eƒe zɔhɛwo ɖeɖe “dzroa mawusubɔsubɔ me nya goglo siwo gɔme sese sesẽ la me; [eye] womeda asi ɖe Trinita Kɔkɔe ƒe nufiafiaa dzi o.” Ƒe alafa ɖeka megbe la, Capito ŋkɔe woyɔ gbã le agbalẽnyala siwo meda asi ɖe Mawuɖekaetɔ̃ ƒe nufiafiaa dzi o la dome.

Capito xɔe se be Biblia me koe woate ŋu akpɔ nyateƒea le. Egblɔ be: “Mina Biblia la kple Kristo ƒe se la nafia mɔ mí ɣesiaɣi le mawunyaŋutinunya me.” Le Agbalẽnyalagã Kittelson ƒe nya nu la, Capito “te gbe ɖe edzi be nu si koŋ me mawunyaŋutinunyala gãwo da ƒu lee nye ale si woŋe aɖaba ƒu Ŋɔŋlɔawo me nyawo dzi.”

Didi vevi sia si nɔ eme be yeanya nyateƒe si le Mawu ƒe Nyaa me la kee nɔ Martin Cellarius (si wogayɔna be Martin Borrhaus), si nye ɖekakpui aɖe si nɔ Capito ƒeme le ƒe 1526 me la hã me.

“MAWU VAVÃ LA . . . ŊUTI SIDZEDZE”

Wodzi Cellarius le ƒe 1499 me, eye enye ame si doa vevie nu le mawunyaŋutinunya kple xexemenunya sɔsrɔ̃ me. Eva zu nufiala le Wittenberg, Germany. Esi wònye be Wittenberg ye nye afi si Ðɔɖɔɖotaʋiʋlia dze egɔme tsoe ta la, eteƒe medidi o, Cellarius va nya Martin Luther kple ame bubu siwo di be woawɔ ɖɔɖɔɖo le sɔlemehaa ƒe nufiafiawo ŋu. Aleke Cellarius wɔ te ŋu de vovo amegbetɔwo ƒe susuwo kple Ŋɔŋlɔawo me nyateƒea dome?

Le agbalẽ si nye Teaching the Reformation (Nufiafia Tso Ðɔɖɔɖotaʋiʋlia Ŋu) ƒe nya nu la, Cellarius xɔe se be “Ŋɔŋlɔawo sɔsrɔ̃ veviedodotɔe, Ŋɔŋlɔawo me nyawo tsɔtsɔ sɔ kple wo nɔewo enuenu hekpe ɖe gbedodoɖa kple dzimetɔtrɔ ŋue” nana gɔmesese vavãtɔ sua ame si. Nu ka ŋue Cellarius ke ɖo le eƒe Biblia me dzodzroa me?

Le July 1527 me la, Cellarius ta nu siwo ŋu wòke ɖo la ɖe agbalẽ si ƒe tanyae nye On the Works of God (Le Mawu Ƒe Dɔwɔwɔwo Ŋu) la me. Eŋlɔ ɖe agbalẽa me be kpɔɖeŋunuwo koe abolo kple wain siwo wosusuna be wotrɔna zua Kristo ƒe ŋutilã kple ʋu le sɔlemehaa ƒe kɔnu kɔkɔea me la nye. Eye le Nufialagã Robin Barnes ƒe nya nu la, Cellarius ƒe agbalẽa “ɖe ŋɔŋlɔawo me nyagblɔɖi aɖewo me tsɔ ɖee fia be ɣeyiɣi aɖe gbɔna si me afɔkuwo kple fukpekpe axɔ aƒe ɖi, eye le ema yome la, woagaɖɔ nuwo ɖo le xexea me godoo abe ale si wòle be wòanɔ ene.”​—2 Petro 3:10-13.

Nu si gaɖe dzesi wue nye nya kpui si Cellarius gblɔ tso ame si Yesu Kristo nye la ŋu. Togbɔ be Cellarius meƒo nu tsi tsitre ɖe Mawuɖekaetɔ̃ ƒe nufiafiaa ŋu tẽe o hã la, eɖee fia be “Fofo si le Dziƒo” la le vovo na “Via Yesu Kristo,” eye wòŋlɔ hã be Yesu nye mawu kple vi geɖe siwo le Mawu ŋusẽkatãtɔ la te la dometɔ ɖeka.​—Yohanes 10:34, 35.

Robert Wallace ŋlɔ ɖe eƒe agbalẽ si nye Antitrinitarian Biography (Ame Siwo Melɔ̃ Ðe Mawuɖekaetɔ̃ La Dzi O Ƒe Ŋutinya) [1850] me be Cellarius mede Mawuɖekaetɔ̃ ƒe nufiafia si xɔ aƒe ɖe ƒe alafa 16 lia me la dzi le eƒe agbalẽwo me o.c Eya ta agbalẽnyala geɖe ƒo nya ta be anɔ eme be Cellarius meda asi ɖe Mawuɖekaetɔ̃ ƒe nufiafiaa dzi o. Woɖɔ Cellarius be enye dɔwɔnu siwo Mawu zã “tsɔ na be Mawu vavã la kple Kristo ŋuti sidzedze su amewo si” la dometɔ ɖeka.

EKPƆ MƆ BE WOAVA ÐƆ NUWO ÐO GBE ÐEKA

Le ƒe 1527 me lɔƒo la, mawunyaŋutinunyala Johannes Campanus, si wobu agbalẽnyalagãwo dometɔ ɖeka le eƒe ŋkekea me la, hã ʋu yi ɖanɔ Wittenberg. Togbɔ be ɖɔɖɔɖotaʋlilawo domee Campanus nɔ hã la, megava kpɔ ŋudzedze ɖe Martin Luther ƒe nufiafiawo ŋu o. Nu ka tae?

Campanus meda asi ɖe nufiafia si nye be, le Misa wɔɣi la, abolo kple wain la trɔna zua Kristo ƒe ŋutilã kple ʋu la dzi o. Meda asi ɖe Luther ƒe nufiafia si nye be Kristo ƒe ŋutilã kple ʋu la va nɔa anyi kple aboloa kple wain la le gbɔgbɔ me le Aƒetɔ ƒe Fiẽnuɖuɣia o. Le agbalẽŋlɔla André Séguenny ƒe nya nu la, Campanus xɔe se be “Aboloa kpɔtɔ nyea abolo ɣesiaɣi, gake le wɔna kɔkɔea me la, ɖeko wònye kpɔɖeŋunu si le tsitre ɖi na Kristo ƒe ŋutilã.” Le takpekpe si woyɔ be Marburg Colloquy, si wowɔ le ƒe 1529 me, si me wodzro biabia siawo tututu me le la, womeɖe mɔ na Campanus be wòaƒo nu tso nu siwo wòsrɔ̃ tso Ŋɔŋlɔawo me ŋu o. Esia megbe la, ehati Ðɔɖɔɖotaʋlila siwo nɔ Wittenberg megadea ha kplii o.

Nu si koŋ ve dɔme na Ðɔɖɔɖotaʋlilawoe nye dzixɔse si nɔ Campanus si ku ɖe Fofo la, Vi la, kple gbɔgbɔ kɔkɔe la ŋu. Campanus ŋlɔ ɖe eƒe agbalẽ si wota le ƒe 1532 me, si nye Restitution (Nuwo Gbugbɔgaɖɔɖo), me be Yesu kple Fofoa wonye ame vovovo eve. Eɖe eme be Fofo la kple Vi la ‘le ɖeka’ le gɔmesesea nu be, wowɔ ɖeka abe ale si ko wogblɔ be srɔ̃ŋutsu kple srɔ̃nyɔnu nye “ŋutilã ɖeka” ene, gake wokpɔtɔ nye ame eve siwo to vovo tso wo nɔewo gbɔ. (Yohanes 10:30; Mateo 19:5) Campanus ɖe eme be Ŋɔŋlɔawo wɔ kpɔɖeŋu sia tɔgbi tsɔ ɖee fia be Fofo la lolo wu Vi la, esi wògblɔ be: ‘Nyɔnu ƒe tae nye ŋutsu; ke Kristo la ƒe tae nye Mawu.’​—1 Korintotɔwo 11:3.

Ke gbɔgbɔ kɔkɔea ya ɖe? Campanus gazã Biblia le afi sia hã tsɔ ɖe nu si wònye la me esi wòŋlɔ bena: “Ŋɔŋlɔawo ƒe akpa aɖeke meɖo kpe edzi be amee Gbɔgbɔ Kɔkɔe la nye o . . . Woƒo nu tso Mawu ƒe gbɔgbɔ la ŋu abe ŋusẽ si le dɔ dzi ene, si fia be [Mawu] wɔa nuwo katã to eƒe gbɔgbɔa ƒe ŋusẽ kple dɔwɔwɔ dzi.”​—1 Mose 1:2.

Luther yɔ Campanus be busunyagblɔla kple Mawu ƒe Vi la ƒe futɔ. Ðɔɖɔɖotaʋlila bubu aɖe hã bia be woatso kufia na Campanus. Ke hã dzi meɖe le Campanus ƒo kura o. Agbalẽ si nye The Radical Reformation (Ðɔɖɔɖotaʋiʋli Moveviɖoɖotɔe) gblɔ be: “Campanus ka ɖe edzi be ɖoƒe si Mawu kple amegbetɔwo le ŋuti gɔmesese sia si nɔ apostoloawo si tsã eye wòwɔ ɖeka kple Biblia la, si ŋu Sɔlemehaa ɖe asi le lae wɔe be ha la mete ŋu li ke o.”

Campanus meɖoe gbeɖe be yeaɖo subɔsubɔha bubu aɖe anyi o. Egblɔ be yedi nyateƒea le “kɔmamawo kple ame siwo katã tsi tsitre ɖe sɔlemehaa ŋu la gbɔ” do kpoe. Eya ta enɔ mɔ kpɔm be Katolikohaa ava ɖɔ woƒe nufiafiawo ɖo ale be woagbugbɔ aɖo Kristotɔ vavãwo ƒe nufiafiawo anyi. Gake mlɔeba la, Katolikohaa ƒe ŋgɔnɔlawo na wolé Campanus, eye anɔ eme be enɔ gaxɔ me ƒe 20 kple edzivɔ sɔŋ. Ŋutinyaŋlɔlawo xɔe se be eku le ƒe 1575 me.

“MIDO NUWO KATÃ KPƆ”

Biblia sɔsrɔ̃ moveviɖoɖotɔe kpe ɖe Capito, Cellarius, Campanus kple ame bubuwo ŋu wote ŋu de vovo nyateƒea kple aʋatsonufiafiawo dome. Togbɔ be menye nu siwo katã ŋu nyateƒedila siawo ke ɖo lae wɔ ɖeka kple Biblia bliboe o hã la, ŋutsu siawo tsɔ ɖokuibɔbɔ dzro Ŋɔŋlɔawo me eye wode asixɔxɔ nyateƒe si ŋu woke ɖo la ŋu.

Apostolo Paulo de dzi ƒo na nɔvia Kristotɔwo be: “Mido nuwo katã kpɔ; milé ɖe nu si nyo la ŋu.” (1 Tesalonikatɔwo 5:21) Yehowa Ðasefowo di be yewoakpe ɖe ŋuwò nàdi nyateƒea, eya ta wota agbalẽ si ƒe tanya sɔ nyuie, si nye Nuka Tututue Nye Biblia ƒe Nufiafia?