Nyagblɔɖiwo Va Eme Pɛpɛpɛ

“Biblia ƒe nyagblɔɖiwo . . . sɔ gbɔ ale gbegbe be manya wɔ be wo me vava nanye nudogoɖenunu aɖe ko o.”—A LAWYER EXAMINES THE BIBLE, SI IRWIN H. LINTON ŊLƆ

Ŋutinya, Ke Menye Nyakpakpa O

“Meku nuwo katã me tsitotsito tso gɔmedzedzea me.”​—LUKA 1:3.

MƆ KA NUE BIBLIA TO VOVO LE? Nya wɔdɔɖeamedziwo nɔa glitotowo kple nyakpakpawo me, ke hã womeƒoa nu tso afi si tututu nuwo dzɔ le, ɣeyiɣi si me wodzɔ, kple ame siwo nɔ anyi kpɔ la ŋu o. Gake Biblia ya gblɔ ŋutinya me nya vevi geɖe siwo naa exlẽlawo kana ɖe edzi be “emenyawo nye nyateƒe matrɔmatrɔ.”​—Psalmo 119:160, The Psalms for Today, R. K. Harrison ƒe gɔmeɖeɖe.

ESIA ƑE KPƆÐEŊU: Biblia gblɔ be “Babel-fia Nebukadnezar . . . [kplɔ Yuda Fia] Yoyaxin yi Babel.” Emegbe “Babel-fia Ewil Merodax ɖe Yuda-fia Yoyaxin tso gaxɔ me le ƒe si me wòzu fia.” Eye wògblɔ kpee be, “[Yoyaxin xɔ] gbe sia gbe nuɖuɖu, si wòhiã gbe sia gbe la, tso Babel-fia gbɔ le eƒe agbe me ŋkekewo katã me.”​—2 Fiawo 24:11, 15; 25:27-30.

NU SI ŊU TOMENUKULAWO KE ÐO: Le nu siwo ŋu tomenukulawo ke ɖo le blema Babilon glikpowo domee me la, wokpɔ dziɖuɖu ƒe nuŋlɔɖi siwo wobu akɔnta be wonɔ anyi tso Nebukadnezar II ƒe dziɖuɣi. Woŋlɔ nuɖuɖu siwo wonana gamenɔlawo kple ame bubu siwo nɔ fiaa ƒe dzikpɔkpɔ te la ɖe wo dzi. Wo dometɔ aɖewoe nye “Yaukin [Yoyaxin],” ame si nye “Yahud (Yuda) nyigba ƒe fia” kple eƒe aƒemetɔwo. Ke Ewil Merodax, ame si va xɔ ɖe Nebukadnezar teƒe, ƒe anyinɔnɔ kpɔ ŋu nyaa ya ɖe? Wokpɔ seƒoƒoze aɖe le afi si te ɖe dugã Susa ŋu si dzi woŋlɔ ɖo be: “Babilon Fia Amil-Marduk [Ewil Merodax], si nye Babilon Fia Nebukadnezar ƒe vi la, ƒe fiasã.”

NU KAE NYE WÒ SUSU? Ðe blema subɔsubɔ ŋuti gbalẽ aɖe gali si gblɔ ŋutinyawo pɛpɛpɛ alea? Alo Biblia gome ko wòle nenema?

[Nya si ɖe dzesi si le axa 5]

“[Biblia] ƒe ɣeyiɣi ŋuti kɔntabubuwo kple nya siwo wògblɔ tso teƒewo ŋu la de pɛpɛpɛ, eye kakaɖedzi le wo ŋu wu blemagbalẽ bubuawo katã.”​—A SCIENTIFIC INVESTIGATION OF THE OLD TESTAMENT, SI ROBERT D. WILSON ŊLƆ

[Nɔnɔmetata si le axa 5]

Babilontɔwo ƒe nuŋlɔɖi si dzi Yuda Fia Yoyaxin ƒe ŋkɔ le

[Nɔnɔmetata Tsoƒe si le axa 5]

© bpk, Berlin/Vorderasiatisches Museum, SMB/Olaf M. Tessmer/Art Resource, NY

Ede Pɛpɛpɛ Le Dzɔdzɔmeŋutinunya Gome

“Dzadzɛnyenye ŋuti mɔfiame nyui siwo ŋu dɔ wowɔ le Mose ŋɔli la wɔa dɔ ɖe ame dzi ŋutɔ.”​—MANUAL OF TROPICAL MEDICINE, SI ÐƆKTA ALDO CASTELLANI KPLE ÐƆKTA ALBERT J. CHALMERS ŊLƆ

Emenyawo Wɔ Ðeka

“Ne wotsɔ nuŋlɔɖi siawo ƒo ƒu la, edzena ƒãa be agbalẽ ɖeka ko wònye . . . Agbalẽ bubu aɖeke meli si le abe eya ene pɛpɛpɛ, alo de eɖi ge gɔ̃ hã o.”​—THE PROBLEM OF THE OLD TESTAMENT, SI JAMES ORR ŊLƆ

Eɖea Vi Egbea

“Wò nya enye akaɖi na nye afɔ kple kekeli na nye toƒe.”​—PSALMO 119:105.

MƆ KA NUE BIBLIA TO VOVO LE? Agbalẽ aɖewo me nyawo nya se ŋutɔ, gake womabu wo be wonye agbalẽ siwo ate ŋu afia mɔ nyuitɔ ame le agbe me o. Eye ehiãna be woanɔ asi trɔm le egbegbe mɔfiamegbalẽwo ŋu edziedzi. Ke hã, Biblia ya gblɔ be “nu siwo katã woŋlɔ ɖi tsã la, woŋlɔ wo ɖi le míaƒe nufiafia ta.”​—Romatɔwo 15:4.

ESIA ƑE KPƆÐEŊU: Togbɔ be menye atikewɔgbalẽe Biblia nye o hã la, aɖaŋuɖoɖo nyui siwo ate ŋu akpe ɖe ame ŋu wòanɔ lãmesẽ me le ŋutilã kple seselelãme gome le eme. Le kpɔɖeŋu me, egblɔ be “dzi nyodɔme enye agbe le lã me.” (Lododowo 14:30) Biblia xlɔ̃ nu hã be: “Ame si ɖe eɖokui ɖe aga le eya ŋutɔ ƒe dzodzro yome dim la, etsia tre ɖe nunyanyawo katã ŋu.” (Lododowo 18:1) Egagblɔ hã be, “dzidzɔ geɖe le nunana me wu nuxɔxɔ.”​—Dɔwɔwɔwo 20:35.

NU SI NUMEKUKUWO ÐE FIA: Tufafa, xɔlɔ̃kadodo kplikplikpliwo, kple dɔmenyowɔwɔ ate ŋu ana nànɔ lãmesẽ me. Agbalẽ aɖe (The Journal of the American Medical Association) gblɔ be: “Gbagbadɔ dzea ŋutsu siwo doa dziku helĩhelĩ la dzi bɔbɔe wu ŋutsu siwo ɖua woƒe dziku dzi.” Numekuku si wowɔ ƒe ewo le Australia ɖee fia be ame tsitsi siwo si “xɔlɔ̃ kplikplikpliwo le, eye ame le wo si wogblɔa woƒe dzimenyawo na la,” nɔa agbe didi wu. Le ƒe 2008 me la, numekula siwo le Canada kple United States de dzesii be “gazazã ɖe ame bubuwo ŋu hea dzidzɔ vanɛ wu be woazãe ɖe ame ɖokui ŋu.”

NU KAE NYE WÒ SUSU? Ne agbalẽ bubu aɖe si woŋlɔ ƒe 2,000 kloe ye nye esi va yi ɖo aɖaŋu ku ɖe lãmesẽnyawo ŋu la, àka ɖe edzia? Alo Biblia gome ko wòle nenema?

[Nɔnɔmetata ŋu nya si le axa 8]

“Biblia me nyawo wɔ dɔ ɖe dzinye ale gbegbe . . . elabena atikewɔwɔ ŋuti aɖaŋuɖoɖo nyuiwo le eme.”​—HOWARD KELLY, M.D., SUKU KƆKƆ SI NYE JOHNS HOPKINS UNIVERSITY SCHOOL OF MEDICINE ƑE AKAMETIWO DOMETƆ ÐEKA

“Esiae Nye Agbe Mavɔ La”

“Esiae nye agbe mavɔ la: be woanɔ wò, Mawu vavã ɖeka la, kple Yesu Kristo, si nèdɔ ɖa la, ŋuti sidzedze xɔm.”​—YOHANES 17:3.

SIDZEDZE ate ŋu axɔ ame ɖe agbe. Esi Nouhou, si xɔ ɣleti ewo, ƒe lãme gblẽ la, dadaa si nye kɔdzidɔwɔla le Niger la nya nu si wòle be yeawɔ. Ede dze kple sukli tsi nyui me hekpe na via, bene tsi nagaɖo lãme nɛ. Dukɔ Ƒoƒuawo ƒe Ðeviwo Ŋu Nyagbɔkpɔha (UNICEF) ka nya ta be, esi wòtso ɖe via ŋu “kaba, eye wònye kɔdzidɔwɔla hã ta la, via ƒe lãme sẽ kaba.”

Biblia ŋuti sidzedze hã xɔa ame ɖe agbe. Mose, si nye Biblia ŋlɔla gbãtɔ, gblɔ be: “Menye nya gbɔlo wonye na mi o, ke boŋ miaƒe agbee; eye nya sia ana mianɔ agbe didie.” (5 Mose 32:47) Ðe Biblia ate ŋu adidi míaƒe agbenɔƒewo ɖe edzi vavã? Mɔ ka nue wòate ŋu anye míaƒe agbe le?

Nyati atɔ̃ siwo do ŋgɔ ɖee fia be Biblia nye agbalẽ si ɖeke mesɔ kplii o le ale si kakaɖedzi le eƒe nyagblɔɖiwo ŋu, ale si wòde pɛpɛpɛ le ŋutinya kple dzɔdzɔmeŋutinya gome, ale si emenyawo wɔ ɖeka, kpakple ale si eƒe mɔfiamewo ɖea vii gome. Esia ɖo kpe edzi be Biblia le etɔxɛ. Eya ta ne wogblɔ le eme be afia ale si míawɔ anɔ agbe tegbee mí la, ke ɖe mele be míadzro eme nyuie oa?

Míade dzi ƒo na wò be nàsrɔ̃ nu tso ale si Biblia ŋuti sidzedze vavãtɔ ate ŋu akpe ɖe ŋuwò be wò susu nadze akɔ anyi fifia, eye nàkpɔ dzidzɔ le etsɔme la ŋu. Adzɔ dzi na Yehowa Ðasefowo be yewoakpe ɖe ŋuwò be sidzedze ma nasu asiwò.

[Aɖaka/​Nɔnɔmetata si le axa 9]

Nu si hã na Biblia le etɔxɛ ye nye be, ena míekpɔ ŋuɖoɖo na biabia veviwo abe:

• Nu ka tae míele afi sia?

• Nu ka tae fukpekpe bɔ alea gbegbe ɖo?

• Ðe mɔkpɔkpɔ aɖe li na nye ame vevi siwo kua?

Àte ŋu akpɔ ale si Biblia ɖo biabia siawo ŋui le agbalẽ sia, Nuka Tututue Nye Biblia ƒe Nufiafia? Yehowa Ðasefowoe tae.