Srɔ̃ Yehowa ƒe Dzɔdzɔenyenye

¹ “Yehowa lɔ̃a nya dzɔdzɔe.” (Ps. 37:28) Le esia ta togbɔ be eɖoe be yeatsrɔ̃ xexe mawɔnuteƒe sia hã la, ewɔ ɖoɖo be woaxlɔ̃ nu amewo gbã. (Mar. 13:10) Esia na mɔnukpɔkpɔ amewo be woatrɔ dzime ne woakpɔ ɖeɖe. (Pet. II, 3:9) Ðe míedzea agbagba srɔ̃a Yehowa ƒe dzɔdzɔenyenyea? Ðe nɔnɔme wɔnublanui kple fukpekpe siwo me tom ameƒomea le ʋãa mí míeɖea gbeƒã Fiaɖuƒemɔkpɔkpɔa na amewoa? (Lod. 3:27) Ne míelɔ̃ dzɔdzɔenyenye la, ekema aʋã mí be míaɖe gbeƒã dzonɔamemetɔe.

² Ðe Gbeƒã na Ame Ƒomevi Ðesiaɖe: Ne míeɖea gbeƒã Mawu ƒe tameɖoɖo ameŋkumemakpɔmakpɔe la, ke míewɔa “nusi le eteƒe.” (Mixa 6:8) Ele be míatsri blibomademade ƒe nɔnɔme si nana be wonɔa te ɖe gotagome dzedzeme dzi bua nazã ɖe amewo ŋu. (Yak. 2:1-4, 9) Yehowa le “didim be, woaxɔ amewo katã, bene woava nyateƒe ƒe sidzedze la me.” (Tim. I, 2:4) Mawu ƒe nyateƒenya la ate ŋu ahe tɔtrɔ wɔnukuwo va amewo ƒe agbenɔnɔ me. (Heb. 4:12) Esia nyanya ate ŋu aʋã mí be míatsɔ kakaɖedzi ate ɖe amewo ŋu, ate ɖe amesiwo ɖewohĩ wogbe toɖoɖo le ɣeyiɣi siwo va yi me kura gɔ̃ hã ŋu.

³ Nɔvinyɔnu aɖe si wɔa dɔ le fiase aɖe me ƒe asisiwo dometɔ ɖeka ƒe dzedzeme naa wòvɔ̃na nɛ. Gake esi nya aɖe do mo ɖa gbeɖeka la, nɔvinyɔnua dze agbagba ɖe gbeƒã nɛ tso Paradiso si ŋugbe Mawu do ŋu. Ŋutsua ɖo eŋu kple dziku be yemexɔa ameblenyawo dzi sena o, be yenɔa agbe alesi yedii, eye be yezãa atike vɔ̃ɖi hã. Gake dzi meɖe le nɔvinyɔnua ƒo o. Gbeɖeka ŋutsua va biae be nukae wòsusu le yeƒe ɖa legbeea ŋu mahã, eye nɔvinyɔnua tsɔ aɖaŋudzedze gblɔ Biblia ƒe nukpɔsusu ku ɖe nya sia ŋu nɛ. (Kor. I, 11:14) Esi ŋu ke la, ewɔ moya na nɔvinyɔnua ŋutɔ esi wòkpɔe be ŋutsua lũ ge eye wòkpa ɖa hã ɖe nɔnɔme nyui aɖe me! Ŋutsua bia be woasrɔ̃ Biblia kpli ye, eye nɔviŋutsu aɖe lɔ̃ faa srɔ̃e kplii; ŋutsua wɔ ŋgɔyiyi, ɖe adzɔgbe hexɔ nyɔnyrɔ. Abe ŋutsu sia ene la, egbea Yehowa subɔla geɖe daa akpe be amesiwo tsɔ Fiaɖuƒe gbedasia vɛ na yewo la wɔe kutrikukutɔe eye womekpɔ ame ŋkume o.

⁴ Eteƒe madidi o, Yehowa aɖe numadzɔmadzɔwɔwɔ ɖa le anyigba dzi. (Pet. II, 3:10, 13) Esi ɣeyiɣi ʋɛ aɖe gasusɔ ta la, mina míasrɔ̃ Yehowa ƒe dzɔdzɔenyenye ana mɔnukpɔkpɔ amesiame be wòasi tso Satana ƒe xexe mawɔnuteƒe sia ƒe tsɔtsrɔ̃ si gbɔna nu.—Yoh. I, 2:17.

Akpa 1—Biblia-nusɔsrɔ̃ Siwo Yia Ŋgɔ Wɔwɔ

Nukae Nye Biblia-nusɔsrɔ̃?

¹ Le xexeame godoo la, Mawu ƒe amewo wɔa Biblia-nusɔsrɔ̃ ɣleti ɖesiaɖe kple amesiwo ade miliɔn ade. Ne míezãa nufiafiamɔnu nyuiwo la, míate ŋu akpe ɖe Biblia-nusrɔ̃vi siawo ŋu be woaɖe adzɔgbe axɔ nyɔnyrɔ eye ‘woadze nyuie be woafia nu ame bubuwo hã.’ (Tim. II, 2:2) Ðe nàdi be yeakpe ɖe wò nusrɔ̃vi ŋu wòawɔ ŋgɔyiyi sia ƒomevia? Le Míaƒe Fiaɖuƒe Subɔsubɔdɔ sia kple esiwo akplɔe ɖo me la, nyati aɖewo ava ɖe wo nɔewo yome siwo aɖe Biblia-nusɔsrɔ̃ siwo yia ŋgɔ wɔwɔ ƒe akpa veviwo me.

² Ɣeyiɣi si Woabu Biblia-nusɔsrɔ̃ Ŋuti Kɔnta: Ne èɖoa dze tso Biblia me edziedzi kple ame aɖe ɖe ɖoɖo aɖe koŋ nu metsɔ le eme be dzeɖoɖoa le kpuie o, si me nèzãa Biblia kple agbalẽ siwo wokafu na mí dometɔ ɖeka le ko la, Biblia-nusɔsrɔ̃ enye ma wɔm nèle. Ne ʋɔtru nu koe mietɔ ɖo alo ne telefon dzie mieƒo nu le kura gɔ̃ hã la, Biblia-nusɔsrɔ̃e. Ne miesrɔ̃ nu zi eve le esi nèɖe alesi wowɔa nusɔsrɔ̃a me na aƒemenɔlaa vɔ megbe eye ne èka ɖe edzi be nusɔsrɔ̃a ayi edzi ko la, ekema àte ŋu abu eŋuti kɔnta.

³ Nusi Mawu Di ƒe agbalẽ gbadzaa kple Sidzedze-gbalẽae míezãna zi geɖe tsɔ wɔa Biblia-nusɔsrɔ̃woe. Ne wosrɔ̃ agbalẽ eve siawo vɔ, eye míekpɔ be nusrɔ̃via le ŋgɔyiyi wɔm, togbɔ be manɔ tsɔtsɔm kabakaba o hã, eye ne ele ŋudzedzekpɔkpɔ ɖem fia ɖe nusi srɔ̃m wòle ŋu la, ekema míate ŋu ayi nusɔsrɔ̃a dzi le Subɔ Mawu ƒe agbalẽa me kplii. Woate ŋu asrɔ̃ Àte Ŋu Anye Mawu Xɔlɔ̃! ƒe agbalẽ gbadzaa kple amesiwo mede suku yi ŋgɔ o alo menya nuxexlẽ tututu o.

⁴ Biblia-nusɔsrɔ̃ wɔwɔ kpe ɖe ame miliɔn geɖe ŋu wova zu Yesu Kristo ƒe nusrɔ̃la vavãwo. (Mat. 28:19, 20) Ne ètsɔ aɖaŋuɖoɖo siwo le nyati siwo akplɔ esia ɖo me si woata ɖe wo nɔewo yome de dɔwɔwɔ me la, àte ŋu awɔ Biblia-nusɔsrɔ̃ siwo yia ŋgɔ.