‘Xɔse ƒe Nyawo Tsɔtsɔ Nyi Mía Ðokuii’

¹ Mawusosroɖa gbenɔnɔ bia veviedodo geɖe. (Tim. I, 4:7-10) Agbagba dzedze be míazɔ agbemɔa dzi le mía ŋutɔwo ƒe ŋusẽ me ana ɖeɖi nate mía ŋu eye míagbɔdzɔ ahana ta. (Yes. 40:29-31) Mɔ siwo dzi míato axɔ ŋusẽ tso Yehowa gbɔ dometɔ ɖekae nye be ‘míatsɔ xɔse ƒe nyawo anyi mía ɖokui.’—Tim. I, 4:6.

² Gbɔgbɔmenuɖuɖu Nyuiwo: Yehowa toa eƒe Nya kple “dɔla nuteƒewɔla kple aɖaŋudzela” dzi naa gbɔgbɔmenuɖuɖu nyuiwo mí. (Mat. 24:45) Ðe míewɔa mía tɔ sinu be wòaɖe vi na mía? Ðe míexlẽa Biblia gbesiagbea? Ðe míeɖo ɣeyiɣi ɖi koŋ na ɖokuisinusɔsrɔ̃ kple ŋugblededea? (Ps. 1:2, 3) Gbɔgbɔmenuɖuɖu nyui siawo doa ŋusẽ mí eye wokpɔa mía ta tsoa Satana ƒe xexea ƒe ŋusẽkpɔɖeamedzi si naa míegbɔdzɔna me. (Yoh. I, 5:19) Ne míaƒe susu le nu tuameɖowo ŋu eye míetsɔ wo wɔa dɔe le míaƒe agbe me la, ekema Yehowa anɔ kpli mí.—Fil. 4: 8, 9.

³ Yehowa toa hamea ƒe kpekpewo hã dzi doa ŋusẽ mí. (Heb. 10:24, 25) Gbɔgbɔmenufiame siwo míexɔna kple ha tuameɖo siwo míedena le kpekpe siawo me la doa ŋusẽ mí be míanɔ te sesĩe ɖe dodokpɔwo nu. (Pet. I, 5: 9, 10) Sɔhɛ Kristotɔ aɖe gblɔ be: “Menɔa suku ŋkekea katã, eye wòtea ɖeɖi nye gbɔgbɔ ŋu. Gake kpekpeawo le nam abe tsiteƒe le dzogbe ene, elabena afisiae mekpɔa ŋusẽ le tsɔ nɔa te ɖe sukuŋkeke si kplɔe ɖo ƒe kuxiwo nui.” Aleke gbegbe woyra míi ɖe míaƒe agbagba dzedze be miade kpekpeawo ta enye si!

⁴ Gbeƒãɖeɖe Nyateƒea: Gbeƒãɖeɖe nɔ na Yesu abe nuɖuɖu ene. Edo ŋusẽ eyama. (Yoh. 4:32-34) Nenema kee ne míeƒo nu na amewo tso Mawu ƒe ŋugbedodo wɔnukuwo ŋu la, míesena le mía ɖokui me be ŋusẽ yeye ɖo mía ŋu. Gbeƒãɖeɖe edziedzi nana míaƒe susu nɔa Fiaɖuƒea kple yayra siwo ava kpuie la dzi hã. Ema naa míaƒe dzi dzea eme.—Mat. 11:28-30.

⁵ Mɔnukpɔkpɔ gã ka gbegbe enye si wònye na mí be míakpɔ gome le gbɔgbɔmenuɖuɖu nyui siwo nam Yehowa le eƒe amewo egbea me! Mina míayi edzi akɔ gbe dzi akafui dzidzɔtɔe.—Yes. 65:13, 14.

Akpa 5—Biblia-nusɔsrɔ̃ Siwo Yia Ŋgɔ Wɔwɔ

Nu Agbɔsɔsɔme si Miasrɔ̃

¹ Yesu bu eƒe nusrɔ̃lawo ƒe ŋutete ŋu le nu fiafia wo me, si na wòƒo nu na wo “abe alesi wòanya se na wo ene.” (Mar. 4:33; Yoh. 16:12) Nenema kee egbea hã ele na Mawu ƒe Nya la fialawo be woadze agbagba anya nu agbɔsɔsɔme si woasrɔ̃ kple Biblia-nusrɔ̃vi aɖe. Nu agbɔsɔsɔme si woate ŋu asrɔ̃ la anɔ te ɖe nufialaa kple nusrɔ̃via siaa ƒe ŋutete kple nɔnɔmewo dzi.

² Tu Xɔse Sẽŋu Ðo ɖe Eme: Nusi nusrɔ̃vi aɖewo asrɔ̃ zi ɖeka ko ase egɔme bɔbɔe la, ahiã be woasrɔ̃e kple nusrɔ̃vi bubuwo ya zi eve alo zi etɔ̃ hafi woase egɔme. Ne nusrɔ̃via mele nua gɔme sem tututu o la, mele be míaŋe aɖaba aƒu edzi ahadze agbagba be míawu agbalẽa nu kaba o. Ele be woatu nusrɔ̃vi ɖesiaɖe ƒe dzixɔse yeyea ɖe Mawu ƒe Nya la dzi sesĩe.—Lod. 4:7; Rom. 12:2.

³ Ne mia kple nusrɔ̃via miele nu srɔ̃m kwasiɖa ɖesiaɖe la, zã ɣeyiɣi geɖe alesinu hiã nàtsɔ akpe ɖe eŋu wòase nusi srɔ̃m wòle tso Mawu ƒe Nya la me gɔme eye wòaka ɖe edzi. Mègatsi dzi ɖe nusɔsrɔ̃a wɔwɔ ŋu si awɔe be maɖe vi na nusrɔ̃via bliboe o. Zã ɣeyiɣi sɔgbɔ nàtsɔ ahe nusrɔ̃via ƒe susu ayi nya veviawo dzi eye miadzro ŋɔŋlɔ vevi siwo dzi wotu nufiafiaa ɖo la me.—Tim. II, 3:16, 17.

⁴ Na Nusɔsrɔ̃a Nazɔ Tẽ: Togbɔ be míedi be míatsi dzi ɖe nusɔsrɔ̃a wɔwɔ ŋu o hã la, ele be míatsri nya bubu siwo meku ɖe nusɔsrɔ̃a ŋu o hã dede eme. Ne enye numame na nusrɔ̃via be wòaƒo nu tso eya ŋutɔ ƒe nyawo ŋu fũ le nusɔsrɔ̃a wɔɣi la, ɖewohĩ anyo be míawɔ ɖoɖo adzro wo me le nusɔsrɔ̃a megbe.—Nyagb. 3:1.

⁵ Le go bubu me la, dzi si le mía ŋutɔwo mía dzɔm ɖe nyateƒea ŋu ate ŋu ana wòasesẽ na mí be míatsri nya geɖe gbɔgblɔ le nusɔsrɔ̃a wɔɣi. (Ps. 145:6, 7) Kpɔɖeŋu alo nuteƒekpɔkpɔ ɖeka aɖe dede nusɔsrɔ̃a me ɣeaɖewoɣi ate ŋu aɖe vi na nusrɔ̃via, gake míadi be woasɔ gbɔ alo adidi ale gbegbe be woahe nusrɔ̃via ƒe susu ɖa le Biblia me gɔmedzenufiafiawo ŋuti sidzedze vavãtɔ si xɔm wòle la gbɔ o.

⁶ Ne míesrɔ̃ nu agbɔsɔsɔme si sɔ ɖe nɔnɔmeawo nu kple Biblia-nusrɔ̃viwo ɣesiaɣi la, míakpe ɖe wo ŋu ‘woazɔ le Yehowa ƒe kekeli me!’—Yes. 2:5.