Gbɔgbɔwo Menɔ Anyigba dzi Kpɔ Heku O
Gbɔgbɔwo li! Gbɔgbɔ nyuiwo kple gbɔgbɔ vɔ̃wo siaa le gbɔgbɔmenuto siwo ŋku mekpɔna o la me. Amesiwo nɔ agbe le anyigba dzi hekue wonyea?
Ao, menye woawoe o. Ne ame ku la, meyia gbɔgbɔmexexe me, abe alesi ame geɖe bunɛ ene o. Aleke míewɔ nya esia? Elabena Biblia ye gblɔe nenema. Biblia nye nyateƒegbalẽ si tso Mawu vavã ɖeka kolia, si ŋkɔe nye Yehowa, gbɔ. Yehowae wɔ amegbetɔwo; enya nusi dzɔna ɖe wo dzi ne woku la nyuie.—Psalmo 83:19Shftd; Timoteo II, 3:16.
Anyi mee Adam tso, eye wògatrɔ yi anyi me
Biblia gblɔ be Mawu “tsɔ anyi” mè ame gbãtɔ Adam. (Mose I, 2:7) Mawu tsɔ eyama da ɖe Paradiso me le Eden-bɔ me. Ne ɖe Adam wɔ ɖe Yehowa ƒe se dzi la, anye ne meku o; agakpɔtɔ anɔ agbe le anyigba dzi egbea. Gake esi Adam ɖo koŋ da le Mawu ƒe se dzi la, Mawu gblɔ nɛ bena: “[Àgatrɔ] azu anyi, elabena eya mee woɖe wò tsoe. Anyi nènye, eye anyi ke nagatrɔ azu!”—Mose I, 3:19.
Nya sia gɔme ɖe? Afikae Adam nɔ hafi Yehowa tsɔ anyi mèe? Menɔ afi aɖeke o. Menye gbɔgbɔ si womedzi haɖe o le dziƒo o. Menɔ anyi o. Eyata esime Yehowa gblɔ na Adam be ‘agatrɔ azu anyi’ la, nusi gblɔm wòle ye nye be Adam aku. Medzo yi gbɔgbɔmenuto me o. Esi Adam ku la, meganɔ agbe o, eye meganɔ anyi o, abe tsã ene. Kue nye agbemanɔmanɔ.
Ke ame bubu siwo ku ya ɖe? Ðe woawo hã megali oa? Biblia ɖo eŋu be:
“Wo katã [amegbetɔwo kple lãwo siaa] woyina teƒe ɖeka; anyi me wo katã wotso, eye anyi wo katã woagazu.”—Nyagblɔla 3:20.
“Kukuawo menya naneke o.”—Nyagblɔla 9:5.
“Woƒe amelɔlɔ̃ kple fuléle kpakple ŋuʋaʋã nu yi gbaɖegbe ke.”—Nyagblɔla 9:6.
“Nuwɔwɔ alo tamebubu, sidzedze alo nunya mele tsieƒe, afisi yi ge nala o.”—Nyagblɔla 9:10.
“[Ame gbugbɔna] yia eƒe anyi gbɔ; gbemagbe eƒe tameɖoɖowo nu yina.”—Psalmo 146:4.
Ame gbagbewo koe ate ŋu awɔ nusiawo
Ðe wòsesẽ na wò be nàxɔ ŋɔŋlɔ siawo dzi asea? Ne nenemae la, ekema bu esia ŋu kpɔ: Le ƒome geɖewo me la, ŋutsue wɔa dɔ kpɔa ga tsɔna kpɔa ƒomea dzi. Ne ŋutsua ku la, zi geɖe la, eƒe ƒomea kpea fu. Ɣeaɖewoɣi la, ga si srɔ̃a kple viawo ate ŋu atsɔ aƒle nuɖuɖui gɔ̃ hã menɔa wo si o. Ðewohĩ ŋutsua ƒe futɔwo asẽ tame le wo ŋu. Azɔ bia ɖokuiwò se be: ‘Ne ŋutsu ma le agbe le gbɔgbɔmexexe me la, nukatae meyia edzi kpɔa eƒe ƒomea dzi o? Nukatae mekpɔa eƒe ƒomea ta tso ame vɔ̃ɖiwo si me o?’ Nusitae nye be ŋɔŋlɔawo to nyateƒe. Ŋutsua megale agbe o, eye magate ŋu awɔ naneke o.—Psalmo 115:17.
Ame kukuwo mate ŋu akpe ɖe amesiwo dɔ le wuwum la ŋu alo akpɔ amesiwo ŋu wole tame sẽm le la ta o
Ðe esia fia be ame kukuwo magagbɔ agbe gbeɖe oa? Ao, menye nenemae wòfia o. Míaƒo nu tso tsitretsitsia ŋu emegbe. Gake nusi wòfiae nye be ame kukuwo menya nusi wɔm nèle o. Womate ŋu akpɔ wò, ase wò nuƒo, alo aƒo nu kpli wò o. Mehiã be navɔ̃ wo o. Womate ŋu akpe ɖe ŋuwò o, eye womate ŋu awɔ nuvevi wò o.—Nyagblɔla 9:4; Yesaya 26:14.