Taɖodzinu Si Anɔ Ame Si

AMEGBETƆWO LE ETƆXƐ LE MƆ GEÐE NU—MÍEŊLƆA NU, TAA NU, TOA NUWO VƐ EYE MÍEDEA ŊUGBLE LE AGBEMEBIABIA VEVIWO ŊU. Biabia siawo ƒe ɖewoe nye: Nu ka tae wowɔ xexea ɖo? Alekee míewɔ va dzɔ? Tameɖoɖo kae le agbe ŋu? Alekee etsɔme anɔ?

Ame aɖewo media ŋuɖoɖowo na biabia mawo o, elabe wosusu be ŋuɖoɖoawo meli o. Ame bubuwo hã susu be biabia mawo mele vevie o elabe ɖeko agbea dzɔ le eɖokui si le vo me. Nufialagã William Provine si nye ŋutinya kple nugbagbeŋutinunyala gblɔ be, “mawu aɖeke meli o, eye taɖodzinu aɖeke mele amegbetɔwo si o.” Egagblɔ hã be “Mɔfiame gbagbe aɖeke meli le agbe nyui nɔnɔ ŋu o eye taɖodzinu gbagbe aɖeke mele agbe ŋu o.”

Gake ame aɖewo meda asi ɖe susu ma dzi o. Wode dzesii be nuwo zɔna ɖe ɖoɖo kple se tɔxɛ aɖewo nu le xexea me. Dzɔdzɔmenuwo wɔa nuku na ame siawo eye wokpɔe be amegbetɔwo gɔ̃ hã dzea agbagba léa ŋku ɖe wo dometɔ aɖewo ŋu toa nuwo vɛ. Eye nu siwo dzɔna gbe sia gbe nana wokpɔnɛ be Wɔla aɖe si si nunya le lae wɔ nu siawo siwo wɔa dɔ ɖe ɖoɖo nyui nu la, ke menye ɖe wodzɔ le vo me o.

Esia na ame aɖewo siwo xɔ nɔnɔmetɔtrɔ nufiafia dzi se la trɔ susu. Na míadzro kpɔɖeŋu eve siawo me kpɔ:

ÐƆKTA ALEXEI MARNOV. Ðɔkta sia si nye susu kple lãmenusesewo ŋuti dɔwɔla la gblɔ be: “Wofia mí le suku si mede be míagaxɔ Mawu dzi se o eye be ɖe nuwo dzɔ le wo ɖokui si. Wobua ame sia ame si xɔ Mawu dzi se be eƒe ŋku meʋu o.” Gake le ƒe 1990 mea ale si wòbua nuwo ŋu va trɔ.

Egblɔ be: “Medzea agbagba ɣesiaɣi be mabu susu si tae wowɔ nuwo abe amegbetɔ ƒe ahɔhɔ̃ ene la ŋu. Wogblɔna tso ahɔhɔ̃ wɔnuku sia ŋu be ale si wowɔe la gɔme sese sesẽ wu nu bubu ɖe sia ɖe le xexea me. Gake ɖe wowɔ ahɔhɔ̃a be míatsɔ asrɔ̃ nu ahanya nanewo wɔwɔ eye emegbe ko míakua? Edze abe susu mele nya sia me o ene. Eya ta meva nɔ ŋugble dem le nya siawo ŋu be: ‘Nu ka tae míele agbe ɖo? Tameɖoɖo kae le agbe ŋu?’ Esi mebu nya siawo ŋu vevie vɔ la, meƒo nya ta be Wɔla aɖe kokoko li.”

Esi Alexei di be yeanya tameɖoɖo si le agbe ŋu ta la, eva te Biblia sɔsrɔ̃. Emegbe srɔ̃a, si hã nye Ðɔkta, eye wònye mawudzimaxɔsela la hã te Biblia sɔsrɔ̃ kple susu be yeatsɔ atsi tsitre ɖe ye srɔ̃ Alexei ŋu. Gake fifia wo ame evea xɔ Mawu dzi se vevie eye wova se tameɖoɖo si le esi na amegbetɔwo la gɔme le Ŋɔŋlɔawo me.

ƔEŊUTINUNYALA, ÐƆKTA HUABI YIN. Aƒenɔ Huabi Yin srɔ̃ nu tso dzɔdzɔmeŋusẽwo ŋu eye wòku nu me tso ɣea ŋu hena ƒe geɖe.

Aƒenɔ Huabi gblɔ be: “Ɣesiaɣi si mí dzɔdzɔmeŋutinunyalawo míelé ŋku ɖe nuwɔwɔwo ŋua, míekpɔnɛ be wowɔa dɔ le ɖoɖo tɔxɛ aɖe koŋ nu si fia be se vevi aɖe dzi zɔm wole. Mebiaa ɖokuinye be, ‘Ame kae wɔ se siawo na wo? Ne ele vevie be woalé ŋku ɖe dzo si wotsɔ ɖaa nu gɔ̃ hã ŋua, ke ame kae wɔ se si dzi ɣea zɔna ɖo?’ Esi ɣeyiɣiawo va nɔ yiyim la, meƒo nya ta be nya gbãtɔ siwo dze le Biblia me lae ɖo nye biabiaa ŋu wòsɔ nyuie. Afi ma gblɔ be: ‘Le gɔmedzedzea me Mawu wɔ dziƒo kple anyigba.’”—1 Mose 1:1.

Le nyateƒe me la, dzɔdzɔmeŋutinunya kpe ɖe mía ŋu míekpɔ ŋuɖoɖo na biabia siwo dzea egɔme kple “aleke” abe: Aleke ahɔhɔ̃menugbagbeviwo wɔa dɔe? Eye aleke ɣea wɔna naa dzoxɔxɔ kple kekeli mí? la ene. Gake Alexei kple Huabi va kpɔe be Biblia ɖo biabia vevi siwo nye “nu ka tae” la ŋu. Biabia siawo ƒe ɖewoe nye: Nu ka tae wowɔ xexea ɖo? Nu ka tae xexea zɔna ɖe se aɖewo dzi? Eye nu ka tae míele agbe ɖo?

Biblia gblɔ tso anyigba ŋu be: “Menye ɖeko [Mawu wɔe] dzodzro o, ke boŋ ɖe wòmèe be woanɔ edzi.” (Yesaya 45:18) Nyateƒee tameɖoɖo aɖe tae Mawu wɔ anyigbaa ɖo, eye abe ale si nyati si kplɔ esia ɖo afia ene la, tameɖoɖo ma wɔ ɖeka kple nu si míele mɔ kpɔm na le etsɔme.