Nu Ka Tae Amewo Megadea Bubu Woƒe Ƒometɔwo Ŋu O?

NU SI TAE WÒLE BE MÍADE BUBU MÍAƑE ƑOMETƆWO ŊU

• Agbalẽ aɖe si nye Mɔfiame Adre Siwo Nana Srɔ̃ɖeɖe Dzea Edzi (si le yevugbe me) gblɔ be ne srɔ̃tɔwo dea bubu wo nɔewo ŋu la, ewɔnɛ be wogaɖea lɔlɔ̃ fiaa wo nɔewo wu, “menye le nu gãwo me ko o, ke boŋ le nu suesuewo hã me gbe sia gbe.”

• Numekuku ɖee fia be ɖevi siwo srɔ̃ ale si woade bubu amewo ŋu la kpɔa dzidzɔ, woƒe dzi dzea eme, wo kple wo dzilawo dome nɔna nyuie, eye woƒe susu dzea akɔ anyi.

NU SI NÀTE ŊU AWƆ

Wò kple wò ƒomea miwɔ ɖoɖo si dzi miazɔ ɖo. Gbã la, wò kple srɔ̃wò minɔ anyi miadzro nu si wòfia be woade bubu ame ŋu me. Evelia, miŋlɔ nu siwo miadi be ƒomea me tɔ ɖe sia ɖe nawɔ atsɔ ade bubu nɔvia ŋu kple nu siwo mele be wòawɔ o. Etɔ̃lia, midzro ɖoɖo si miewɔ la me kple ɖeviawo, ale be ƒomea me tɔ ɖe sia ɖe ƒe susu nawɔ ɖeka le nya sia me.

Ðo kpɔɖeŋu nyui. Ne wò ƒometɔwo da vo la, ɖe nèhea nya ɖe wo ŋua? Ne wodo susu aɖe ɖa si mawɔ dɔ o la, ɖe nèkoa woa? Ne wole nu ƒom na wò la, ɖe nètsoa nya le wo nu alo zia kpia?

Kpekpeɖeŋu: Mègabu bubudede srɔ̃wò kple viwòwo ŋu be enye nu si yeawɔ ne wodze nɛ o, ke boŋ nu si wòle na ye be yeawɔ.

De bubu amea ŋu ne mèlɔ̃ ɖe eƒe susu dzi o gɔ̃ hã. Ƒo asa na nyagbɔgblɔwo abe “ɣesiaɣi” alo “gbeɖe o” ene zazã. Le kpɔɖeŋu me, “Ðokuiwò ŋu ko nèbuna ɣesiaɣi,” alo “Mèɖoa tom gbeɖe o.” Nya mawo tɔgbi gbɔgblɔ ɖe wò ƒometɔ ŋu ade abi eƒe seselelãme ŋu eye wòana nɔnɔme si do mo ɖa nado gã ɖe edzi.

NU SI WƆM YEHOWA ÐASEFOWO LE

Yehowa Ðasefowo dea dzi ƒo na amewo be woade bubu wo nɔewo ŋu le woƒe ƒomewo me. Woƒoa nu tso nya sia ŋu edziedzi le míaƒe videowo, nyatiwo, agbalẽwo kple agbalẽ gbadzawo me; eye womexɔa ga ɖe wo dometɔ aɖeke ta o.

NA SRƆ̃TƆWO: Nyatiwo ƒe hatsotso si nye Nu Si Akpe Ðe Ƒomewo Ŋu ate ŋu akpe ɖe srɔ̃ŋutsuwo kple srɔ̃nyɔnuwo ŋu be . . .

• woanye toɖola nyuiwo

• woatsi numaƒomaƒo na ame nɔewo nu

• woana dzrewɔwɔ natɔ

(Di “Nu Si Akpe Ðe Ƒomewo Ŋu” le jw.org)

NA DZILAWO: Nyatiwo ƒe hatsotso si nye Nu Si Akpe Ðe Ƒomewo Ŋu ate ŋu akpe ɖe dzilawo ŋu woana hehe wo viwo be . . .

• woaɖo to

• woakpe asi ɖe aƒemedɔwo wɔwɔ ŋu

• woanya ale si woagblɔ “meɖe kuku” kple “akpe”

(Di “Vihehe” alo “Ƒewuiviwo Hehe” le jw.org)

Kpɔ Nyɔ! No. 2, 2019 si ƒe tanyae nye “Nu Ade Siwo Wòhiã Be Ðeviwo Nasrɔ̃” kple Nyɔ! No. 2, 2018 si ƒe tanyae nye “Nu 12 Siwo Nana Ƒomewo Kpɔa Dzidzedze,” axa 8-11. (Di nyati mawo le jw.org)

NA SƆHƐWO: Nyati, video kple dɔwɔgbalẽvi vovovo siwo le jw.org ƒe akpa si nye Ƒewuiviwo Kple Sɔhɛwo ate ŋu akpe ɖe sɔhɛwo ŋu be . . .

• woanɔ anyi kple wo dzilawo kpakple wo nɔviwo le ŋutifafa me

• woaɖo dze kple wo dzilawo bubutɔe tso woƒe sededewo ŋu

• woana wo dzilawo naka ɖe wo dzi

(Di “Ƒewuiviwo Kple Sɔhɛwo” le jw.org)

Womexɔa ga ɖe jw.org nyatakakadzraɖoƒea zazã ta o. Womabia tso asiwò be nàxe fe, nàdɔ nu, alo nàŋlɔ ŋkɔ o, eye womabia be nàŋlɔ ŋuwò nyatakaka aɖeke o.