Ènya Yehowa Ðasefo aɖewoa? Anɔ eme be mía dometɔ aɖewo nye wò aƒelikawo, wò dɔwɔhatiwo, alo wò sukuhatiwo. Alo ɖewohĩ mía dometɔ aɖe dzro Biblia me kpli wò kpɔ. Ame kawo koŋue míenye, eye nu ka tae míeƒoa nu tso míaƒe dzixɔsewo ŋu na amewo?

Míele abe ame bubu ɖe sia ɖe ko ene. Míenye ame siwo tso dekɔnu vovovowo me siwo si nuteƒekpɔkpɔ vovovowo su. Mía dometɔ aɖewo nɔ subɔsubɔha bubuwo me tsã, eye ɖewo hã mexɔ Mawu dzi se tsã o. Gake hafi míeva zu Ðasefowo la, mía dometɔ ɖe sia ɖe gbɔ dzi ɖi dzro Biblia ƒe nufiafiawo me tsitotsito. (Dɔwɔwɔwo 17:11) Míeva kpɔ kakaɖedzi le nu siwo míesrɔ̃ ŋu, eye míawo ŋutɔwoe tiae be míasubɔ Yehowa Mawu.

Míenye ame siwo Biblia sɔsrɔ̃ le vi ɖem na. Abe ame bubu ɖe sia ɖe ene la, ele be míanɔ te ɖe kuxiwo kple míawo ŋutɔwo ƒe gbɔdzɔgbɔdzɔwo nu. Gake esi míedzea agbagba be míawɔ ɖe Biblia ƒe gɔmeɖosewo dzi ta la, míaƒe agbenɔnɔ va nyo ɖe edzi. (Psalmo 128:1, 2) Esiae nye susu siwo ta míegblɔa nu nyui siwo míesrɔ̃ le Biblia me ŋu nya na amewo la dometɔ ɖeka.

Míenye ame siwo nɔa agbe ɖe Mawu ƒe nudidiwo nu. Nudidi siawo siwo míesrɔ̃ le Biblia me la nana míekpɔa dzidzeme, míedea bubu amewo ŋu, eye wonana míenyea anukwareɖilawo kple dɔmenyolawo. Nɔnɔme nyui siawo kpena ɖe mía ŋu be míanye ame ɖɔʋuwo kple dɔ nyui wɔlawo le nutoa me, enana míaƒe ƒomewo wɔa ɖeka, eye wònana míenɔa agbe nyui. Esi míexɔ edzi se be “Mawu mekpɔa ame ŋkume o” ta la, míelé dzixɔse ɖeka me ɖe asi, si na míeva zu nɔviwo ƒe habɔbɔ ɖeka si me tɔwo tso dukɔ sia dukɔ me, eye míedea mama mía nɔewo dome le afi si ame aɖe tso ta o. Togbɔ be míele abe ame bubu ɖe sia ɖe ko ene hã, míeva zu ame siwo ƒe nɔnɔme to vovo.—Dɔwɔwɔwo 4:13; 10:34, 35.

• Mɔ kawo nue Yehowa Ðasefowo le abe ame bubuwo ke ene le?

• Nɔnɔme nyui kawoe va su Ðasefowo si to Biblia sɔsrɔ̃ me?

Ewɔna na ame geɖe be subɔsubɔha yeye aɖee Yehowa Ðasefowo nye. Gake tso blema ke, anye ƒe 2,700 kple edzivɔe nye esia la, woyɔa Mawu vavã la subɔlawo be “ɖasefowo.” (Yesaya 43:10-12) Do ŋgɔ na ƒe 1931 la, míetɔ ŋkɔ si nye Biblia Nusrɔ̃viwo. Ke nu ka tae míeva tsɔ ŋkɔ Yehowa Ðasefowo?

Ŋkɔ sia ɖea Mawu si subɔm míele la fiana. Ŋɔŋlɔawo ƒe nuŋlɔɖi xoxotɔ siwo li la ɖo kpe edzi be Mawu ƒe ŋkɔ, Yehowa, dze le Biblia me zi gbɔ zi akpe geɖe. Gake amewo ɖe Mawu ƒe ŋkɔ ɖa le Biblia gɔmeɖeɖe geɖe me hetsɔ dzesideŋkɔwo abe Aƒetɔ alo Mawu ene ɖo eteƒe. Ke hã, Mawu vavã la ɖe eƒe ŋkɔ ŋutɔŋutɔ si nye Yehowa fia Mose, eye wògblɔ be: ‘Esiae nye nye ŋkɔ tegbee.’ (2 Mose 3:15) Ŋkɔ sia na wòto vovo tso alakpamawu bubuwo gbɔ. Bubu gã wònye na mí be Mawu ƒe ŋkɔ kɔkɔe la le mía ŋu.

Ŋkɔ sia ɖea dɔ si wɔm míele la fiana. Ame gbogbo aɖewo siwo nɔ anyi tso blema ke, tso ame dzɔdzɔe Abel dzi, ɖi ɖase be yewoxɔ Yehowa dzi se. Le ƒe alafa geɖe siwo kplɔe ɖo me la, Noa, Abraham, Sara, Mose, David, kple ame bubu geɖewo va kpe ɖe “ɖasefowo ƒe alilikpo gã” sia ŋu. (Hebritɔwo 11:4–12:1) Míawo hã míeɖoe kplikpaa be míaɖi ɖase tso nyateƒe si ku ɖe mía Mawu la ŋu, abe ale si ko amewo ɖia ɖase le ʋɔnu tsɔ ʋlia ame maɖifɔwo ta ene.

Ŋkɔ sia si le mía ŋu nana míesrɔ̃a Yesu. Biblia yɔ Yesu be enye ‘ɖasefo nuteƒewɔla kple nyateƒetɔ.’ (Nyaɖeɖefia 3:14) Yesu ŋutɔ gblɔ be ‘yena amewo nya Mawu ƒe ŋkɔ la’ eye yeyi edzi ‘ɖi ɖase tso nyateƒe’ si ku ɖe Mawu ŋu la ŋu. (Yohanes 17:26; 18:37) Eya ta ele be Yehowa ƒe ŋkɔ nanɔ Kristo yomedzela vavãwo ŋu, eye woana amewo nanya ŋkɔ la. Esia tututue Yehowa Ðasefowo dzea agbagba wɔna.

• Nu ka tae Biblia Nusrɔ̃viwo va tsɔ ŋkɔ Yehowa Ðasefowo?

• Tso ɣekaɣie ɖasefowo nɔ Yehowa si le anyigba dzi?

• Ame kae nye Yehowa ƒe Ðasefo gãtɔ?

Biblia gblɔe ɖi be le Kristo ƒe ku megbe la, aʋatsonufialawo aɖo Kristotɔ gbãtɔwo dome eye woatɔ tsi Biblia me nyateƒea. (Dɔwɔwɔwo 20:29, 30) Ema tututue dzɔ esi ƒeawo va nɔ yiyim. Amewo tsɔ trɔ̃subɔlawo ƒe dzixɔsewo va tsaka kple Yesu ƒe nufiafiawo, eye esia na alakpasubɔsubɔha siwo be Kristotɔwoe yewonye la va do. (2 Timoteo 4:3, 4) Aleke míawɔ aka ɖe edzi be nu si tututu Biblia fia la ƒe gɔmesese vavãtɔ ye su mía si egbea?

Ɣeyiɣia de be Yehowa naɖe nyateƒea ɖe go. Mawu gblɔe ɖi be le ‘nuwuɣia la, sidzedze vavãtɔ adzi ɖe edzi.’ (Daniel 12:4) Le ƒe 1870 me la, ame ʋɛ aɖewo siwo ƒo ƒu nɔ nyateƒea dim la va kpɔe dze sii be sɔlemehawo ƒe nufiafia geɖe mesɔ ɖe Ŋɔŋlɔawo nu o. Eya ta wodze Biblia me nyateƒea ƒe gɔmesese vavãtɔ didi gɔme, eye Yehowa yra wo wova se Ŋɔŋlɔawo gɔme nyuie.

Dzianukwaretɔwo dzro Biblia me tsitotsito. Biblia Nusrɔ̃vi veviedonula mawo siwo do ŋgɔ na mí la zã nusɔsrɔ̃mɔnu aɖe si zãm míegale va se ɖe egbe. Wodzro Biblia me nyati vovovoawo me ɖekaɖeka. Ne wova ɖo Biblia ƒe akpa aɖe si gɔmesese sesẽ na wo dzi la, wodia mawunyakpukpui bubu siwo kɔ nya ma tututu me. Ne wova kpɔ gɔmesese si wɔ ɖeka kple Ŋɔŋlɔawo ƒe akpa bubuawo la, woŋlɔa ale si woƒo nya tae ɖi. Esi wona Biblia la ŋutɔ ƒe kpukpuiwo kɔ eƒe kpukpui bubuawo me alea la, wogava ke ɖe Mawu ƒe ŋkɔ kple eƒe Fiaɖuƒe la, tame si wòɖo ɖe ameƒomea kple anyigbaa ŋu, nɔnɔme si me ame kukuwo le, kple tsitretsitsi ƒe mɔkpɔkpɔa ŋuti nyateƒea ŋu. Biblia me nyateƒe siwo ŋu woke ɖo la na wova ɖe asi le aʋatsodzixɔse kple nuwɔna geɖewo ŋu.​—Yohanes 8:31, 32.

Le ƒe 1879 me la, Biblia Nusrɔ̃viwo kpɔe be ɣeyiɣia de be yewoana amewo nanya nyateƒenya siawo. Eya ta tso ƒe ma me la, wodze Gbetakpɔxɔ Le Gbeƒã Ðem Yehowa Ƒe Fiaɖuƒe magazine la tata gɔme ɖe Eŋlisigbe me, eye míegale etam va se ɖe egbe. Fifia míele Biblia me nyateƒea gblɔm le dukɔ 240 me le gbegbɔgblɔ 750 kple edzivɔ me. Sidzedze vavãtɔ medzi ɖe edzi alea gbegbe kpɔ le xexea me o!

• Nu kae va dzɔ ɖe Biblia me nyateƒea dzi le Kristo ƒe ku megbe?

• Nu kae kpe ɖe mía ŋu míegava ke ɖe nyateƒe si le Mawu ƒe Nya la me ŋu?

Le ƒe geɖe siwo va yi me la, Yehowa Ðasefowo zã Biblia gɔmeɖeɖe vovovowo, wota wo hema wo na amewo. Gake míeva kpɔe be ehiã be míata Biblia gɔmeɖeɖe si akpe ɖe amewo katã ŋu be woasrɔ̃ “nyateƒe ƒe sidzedze vavãtɔ la,” abe ale si Mawu dii ene. (1 Timoteo 2:3, 4) Eya ta tso ƒe 1950 me la, míedze Xexe Yeye Gɔmeɖeɖe Biblia si xexlẽ le bɔbɔe la tata gɔme. Míeɖe Biblia sia gɔme nuteƒewɔwɔtɔe wòsɔ pɛpɛpɛ hetae ɖe gbegbɔgblɔ siwo wu 130 me fifia.

Biblia aɖe si gɔmesese le bɔbɔe hiã. Gbegbɔgblɔwo trɔna ne ɣeyiɣiawo va le yiyim, eye nya siwo wozã le Biblia gɔmeɖeɖe geɖe me la me mekɔ o alo womegazãa nya mawo le nuƒoƒo me egbea o, si wɔe be wo gɔmesese sesẽna. Azɔ hã, wova ke ɖe ŋɔŋlɔawo ƒe asinuŋɔŋlɔ xoxotɔ aɖewo ŋu, siwo de pɛpɛpɛ eye wo ŋlɔɣi gogo gbãtɔawo, eye esia kpe ɖe amewo ŋu wova se Hebrigbe, Aramgbe, kple Helagbe siwo me woŋlɔ Biblia ɖo gbã la gɔme ɖe edzi wu.

Biblia gɔmeɖeɖe aɖe si metɔ tsi Mawu ƒe nya la o hiã. Ele vevie be Biblia gɔmeɖelawo naɖe nyawo gɔme wòasɔ pɛpɛpɛ ɖe ŋɔŋlɔ gbãtɔawo nu, ke menye be woatrɔ Mawu ƒe nya si tso gbɔgbɔ me la ale si wodii o. Gake nu si dzɔe nye be, le gɔmeɖeɖe geɖe me la, woɖe Mawu ƒe ŋkɔ Yehowa ɖa le Ŋɔŋlɔ Kɔkɔeawo me.

Biblia aɖe si akɔ Eŋlɔla ƒe ŋkɔ ŋu la hiã. (2 Samuel 23:2) Le Xexe Yeye Gɔmeɖeɖe Biblia me la, míenɔ te ɖe Biblia ƒe asinuŋɔŋlɔgbalẽ xoxotɔwo, abe esi ƒe foto dze le ete le afi sia ene, dzi gbugbɔ Yehowa ƒe ŋkɔ de teƒe siwo wu 7,000 siwo wòdze le la katã. (Psalmo 83:19) Numekuku siwo míewɔ ƒe geɖe kutrikukutɔe la na míete ŋu ta Biblia sia si xexlẽ doa dzidzɔ na ame le esi wòɖe Mawu ƒe susuwo ɖe go pɛpɛpɛ ta. Xexe Yeye Gɔmeɖeɖe Biblia la ɖale mia degbe me loo alo meli o, míele dzi dem ƒo na wò be nàna Yehowa ƒe Nya la xexlẽ gbe sia gbe nazu numame na wò.—Yosua 1:8; Psalmo 1:2, 3.

• Nu ka tae míekpɔe be Biblia gɔmeɖeɖe yeye aɖe hiã?

• Nu kae wòle be ame sia ame si di be yeasrɔ̃ Mawu ƒe lɔlɔ̃nu la nanɔ wɔwɔm gbe sia gbe?