Te Ðe Mawu Ŋu
‘Adzro Wò Vevie’
ENYEA vevesese na mí ne míekpɔ míaƒe lɔlɔ̃tɔ aɖe wòkpe fu heku. Le dzɔdzɔme nu la, míexaa nu ne nu siawo tɔgbi dzɔ. Ke hã, efaa akɔ na mí ŋutɔ be míanya be míaƒe nuxaxawo le nyanya na mía Wɔla, Yehowa Mawu. Gawu la, edi vevie be yeazã yeƒe ŋusẽ si ɖeke mesɔ kplii o la atsɔ agbɔ agbe kukuawo. Kpɔ ale si nya siwo Hiob gblɔ le Hiob 14:13-15 naa mɔkpɔkpɔ amee ɖa.
Bu nɔnɔmea ŋu kpɔ. Hiob, si nye ŋutsu aɖe si si xɔse sẽŋu le la le dodokpɔ sesẽwo me tom, si ƒe ɖewoe nye be eƒe kesinɔnuwo dome gblẽ, via lɔlɔ̃awo katã ku, eye dɔléle vɔ̃ɖi aɖe dze edzi. Esi wònɔ fu kpem vevie la, eyɔ Mawu gblɔ bena: “Oo, ne naxaɣlam ɖe tsiẽƒe . . . ɖe!” (Kpukpui 13) Hiob bui be ne yele tsiẽƒe la, anye gbɔdzɔe na ye. Le afi ma la, anɔ abe kesinɔnu si Mawu tsɔ ɣla ene, eye avo tso fukpekpe kple vevesese me.a
Ðe Hiob atsi tsiẽƒe ɖikaa? Hiob mexɔe se nenema o. Eyi eƒe gbedodoɖaa dzi ale: “Oo, . . . naɖo ɣeyiɣi nam, eye naɖo ŋku dzinye emegbe ɖe!” Hiob ka ɖe edzi vevie be ɣeyiɣi kpui aɖe koe yeanɔ tsiẽƒe, eye be Yehowa maŋlɔ ye be o. Hiob tsɔ ɣeyiɣi si wòatsɔ anɔ tsiẽƒe la sɔ kple “aʋamenɔɣiwo,” si fia ɣeyiɣi si me wòle nɛ be wòanɔ lalam le tsiẽƒe. Va se ɖe ɣekaɣi? Egblɔ be: “Va se ɖe esime gbɔdzɔe nava nam.” (Kpukpui 14, NW) Gbɔdzɔe ma fia be woaɖee tso tsiẽƒe, alo woafɔe ɖe tsitre tso kukuawo dome!
Nu ka tae Hiob xɔe se be yeakpɔ gbɔdzɔe? Enya ale si mía Wɔla lɔ̃ame la sena le eɖokui me ɖe esubɔla wɔnuteƒe siwo ku la ŋu. Hiob gblɔ be: “Àyɔm, eye matɔ na wò, ne wò asinudɔwɔwɔ ƒe nu le dzrowòm.” (Kpukpui 15) Hiob nya be Mawu ƒe asinudɔwɔwɔe yenye. Esi wònye be Agbenala lae wɔ Hiob ɖe dadaa ƒe vidzidɔ me ta la, godoo la, ate ŋu afɔe ɖe tsitre ne eku.—Hiob 10:8, 9; 31:15.
Hiob ƒe nyawo fia mí ale si gbegbe Yehowa lɔ̃ míi: Melɔ̃a nu le ame siwo le abe Hiob ene, siwo tsɔ wo ɖokui nɛ be wòatrɔ asi le yewo ŋu ne yewoanye ame siwo dze le eŋkume la, gbɔ o. (Yesaya 64:7) Yehowa dea asixɔxɔ esubɔla wɔnuteƒewo ŋu. Nuteƒewɔla siwo ku la ƒe nu le ‘edzrom vevie.’ Agbalẽnyala aɖe gblɔ tso Hebrigbe me nya si gɔme woɖe alea ŋu be, “ɖikekemanɔmee la, enye nya siwo wɔa dɔ ɖe ame dzi wu, siwo wotsɔ ɖɔa didi vevie la, dometɔ ɖeka.” Ɛ̃, menye ɖeko Yehowa ɖoa ŋku esubɔlawo dzi ko o, ke edi be yeagbɔ agbe wo hã.
Dzidzɔtɔe la, edze Yehowa ŋu be yeaɖe tame si yeɖo be yeafɔ kukuawo ɖe tsitre la afia le Biblia ƒe agbalẽ gbãtɔ siwo woŋlɔ la dometɔ ɖeka me.b Edi be nàgakpɔ wò lɔlɔ̃tɔ siwo ku la ake. Ŋkuɖoɖo nya sia dzi ate ŋu aɖe wò vevesesea dzi akpɔtɔ. Ðe manyo be nàsrɔ̃ nu tso Mawu lɔ̃ame sia, kpakple ale si nàte ŋu ana wòatrɔ asi le ŋuwò be nànɔ ame siwo akpɔ eƒe tameɖoɖowo me vava teƒe la, dome ŋu oa?
Biblia ƒe akpa si míade dzi ƒo na wò be nàxlẽ le March me:
[Etenuŋɔŋlɔwo]
a Numekugbalẽ aɖe gblɔ be Hiob ƒe nya, si nye “naxaɣlam,” ate ŋu afia “[nàdzram] ɖo abe kesinɔnu xɔasi ene, ne manɔ dedie.” Agbalẽ bubu gblɔ be woate ŋu aɖe nya sia gɔme be “dzram ɖo abe kesinɔnu ene.”
b Ne èdi be yeanya nu geɖe wu tso ŋugbe si Biblia do be woafɔ kukuawo ɖe tsitre be woanɔ agbe le dzɔdzɔenyenye ƒe xexe yeye me ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe ta 7 lia. Yehowa Ðasefowoe tae.