Dze Kristo, Kplɔla Deblibo La Yome
ZI GEÐE la, ame siwo dzea amegbetɔ dziɖulawo yome la ɖua ŋukpe. Gake menɔa alea le ame siwo bɔbɔa wo ɖokuiwo ɖe Kristo ƒe kpɔkplɔ te la gome o. Yesu gblɔ be: “Miva gbɔnye, mi ame siwo katã le dagbadagbam, eye agba le mia wum la, eye mana gbɔdzɔe mi. Mitsɔ nye kɔkuti la ɖo mia ɖokui dzi, eye misrɔ̃ nu tso gbɔnye, elabena ame fafa menye, eye mebɔbɔ ɖokuinye ɖe anyi le dzi me, eye miakpɔ gbɔdzɔe na miaƒe luʋɔwo.” (Mat. 11:28, 29) Yesu ƒe amekpɔkplɔ hea dzidzeme vanɛ eye wòtua ame ɖo. Etsɔa ɖe le eme na ame beliwo kple ame siwo wote ɖe anyi la ŋutɔ, eye wòkpe wo be woatsɔ yeƒe kɔkuti bɔbɔe la. Gake nu kae Yesu yome dzedze lɔ ɖe eme?
Apostolo Petro ŋlɔ bena: “Kristo ŋutɔ kura gɔ̃ hã kpe fu le mia ta, eye wògblẽ kpɔɖeŋu ɖi na mi, be miadze yeƒe afɔɖoƒewo yome pɛpɛpɛ.” (1 Pet. 2:21) Aleke gbegbe wòle vevie be míadze Yesu ƒe afɔɖoƒewo yomee? Kpɔe le susu me ɖa be èle ameha aɖe, si le agble aɖe si me woɖi tomebɔmbwo ɖo, me tom la dome, eye mia dometɔ ɖeka koe nya ale si miawɔ ato eme dedie. Ðe màdze eƒe afɔɖoƒewo yome pɛpɛpɛ, eye ɖewohĩ nànɔ afɔ ɖom eƒe afɔɖoƒewo tututu oa? Nenema kee míaƒe etsɔme dedienɔnɔ nɔ te ɖe Yesu ƒe kpɔɖeŋu sɔsrɔ̃ le míaƒe agbenɔnɔ me dzi. Esia wɔwɔ bia be míaɖo toe ahawɔ ɖe eƒe sededewo dzi, eye míawɔ nu aduadu kple eteƒenɔlawo.
Ðo To Yesu Eye Nàwɔ Eƒe Sededewo Dzi
Le Yesu ƒe Todzimawunyaa ƒe nuwuwu lɔƒo la, egblɔ be: “Ame sia ame si sea nye nya siawo, eye wòwɔa wo dzi la, woatsɔe asɔ kple ŋutsu dzeaɖaŋu, si tu eƒe xɔ ɖe agakpe dzi. Eye tsi gã aɖe dza, eye tɔwo ɖɔ, eye ya ƒo va lɔ xɔ ma, gake memu o, elabena woɖo egɔme anyi ɖe agakpe dzi.”—Mat. 7:24, 25.
Eya ta Yesu tsɔ ame si ɖoa toe hewɔa eƒe nya dzi la sɔ kple “ŋutsu dzeaɖaŋu.” Ðe míeɖoa to tso dzi me tsɔ ɖenɛ fiana be míedea bubu kpɔɖeŋu si Kristo ɖo ɖi la ŋu hekpɔa ŋudzedze ɖe eŋua, alo Yesu ƒe sedede siwo dzi wɔwɔ le bɔbɔe, alo esiwo míekpɔ be wosɔ na mí la dzi koe míedina be míawɔ ɖoa? Yesu gblɔ be: “Mewɔa nu siwo dzea [Mawu ŋu] ɣesiaɣi.” (Yoh. 8:29) Mina míadze agbagba asrɔ̃ eƒe kpɔɖeŋu sia.
Le ƒe alafa gbãtɔ me la, apostoloawo ɖo kpɔɖeŋu nyui aɖe ɖi le ɖokuibɔbɔ ɖe Kristo ƒe kpɔkplɔ te me. Petro gblɔ na Yesu gbe ɖeka be: “Kpɔ ɖa! Míegblẽ nuwo katã ɖi, eye míele yowòme.” (Mar. 10:28) Nyateƒee, apostoloawo bu Yesu ƒe kpɔkplɔ te nɔnɔ nu xɔasi aɖe ŋutɔ, si wɔe be wolɔ̃ faa gblẽ nu bubuwo katã ɖi, eye wodze eyome.—Mat. 4:18-22.
Nuwɔwɔ Aduadu Kple Kristo Teƒenɔlawo
Esi wòsusɔ vie Yesu naku la, eƒo nu tso mɔ bubu aɖe si dzi míate ŋu ato adze eyome abe mía kplɔla ene la ŋu. Egblɔ be: “Ame si xɔa ame si medɔ ɖa la, exɔa nye hã.” (Yoh. 13:20) Le nyateƒe me la, Yesu yɔ eteƒenɔla amesiaminawo be ye ‘nɔviwo.’ (Mat. 25:40) Esi wofɔ Yesu ɖe tsitre yi dziƒo megbe la, woɖo ‘nɔviawo’ abe ‘Kristo teƒe nɔla’ siwo le amewo kpem be woana woadzra woa kple Yehowa Mawu dome ɖo la ene. (2 Kor. 5:18-20) Lɔlɔ̃ ɖe Kristo ƒe kplɔlanyenye dzi bia be míabɔbɔ mía ɖokui ɖe ‘nɔviawo’ te.
Nunya le eme be míade ŋugble le ale si míewɔa nu ɖe Ŋɔŋlɔawo me aɖaŋuɖoɖo siwo míexɔna le ɣeyiɣi nyuitɔ dzi to míaƒe Biblia srɔ̃gbalẽwo dzi la ŋu. Ne míesrɔ̃a Ŋɔŋlɔawo eye míedea hamea ƒe kpekpeawo la, eɖoa ŋku Kristo ƒe nyawo dzi na mí. (2 Pet. 3:1, 2) Ne míekpɔa gome le gbɔgbɔmenuɖuɖu siawo me edziedzi la, míeɖenɛ fiana be míekpɔ ŋudzedze ɖe wo ŋu tso dzi blibo me. Gake alekee wòle be míawɔ nui ne wogahea míaƒe susu yia aɖaŋuɖoɖo aɖewo dzi ake ɣeaɖewoɣi? Le kpɔɖeŋu me, Mawu ƒe Nyaa ɖo aɖaŋu na Kristotɔwo be woaɖe srɔ̃ “le Aƒetɔ la me ko.” (1 Kor. 7:39) Ƒe alafa ɖeka kple edzivɔe nye esia la, wodzroa nya sia me tso ɣeyiɣi yi ɣeyiɣi le Gbetakpɔxɔ me. Kakaɖedzitɔe la, Kristo nɔviwo toa esia dzi ɖea ale si wotsɔ ɖe le míaƒe gbɔgbɔmenyonyo me lɔlɔ̃tɔe la fiana to nyati siawo kple aɖaŋuɖoɖo bubu siwo tso gbɔgbɔ me la tata me. Wɔwɔ ɖe ŋkuɖodzinya siawo dzi nye mɔ aɖe si dzi míato aɖee afia be míedze míaƒe Kplɔla deblibo, Yesu Kristo, yome.
Lododowo 4:18 gblɔ be: ‘Ame dzɔdzɔe ƒe toƒe le abe agudzedze ƒe kekeli, si nɔa kɔkɔm ɖe edzi, va se ɖe esime ŋu kena keŋ ene.’ Ɛ̃, Yesu, mía Kplɔla la, mewɔa kuvia o, ele dɔ dzi vevie le asitɔtrɔ yeyewo wɔm hena nuwo le ŋgɔ yim. Eya ta mɔ bubu aɖe si dzi míato anɔ nu wɔm aduadu kple Kristo ‘nɔviwo’ ye nye be nukpɔsusu nyui nanɔ mía si ku ɖe asitɔtrɔ ɖe sia ɖe si “kluvi nyateƒetɔ kple aɖaŋudzela” la wɔna le míaƒe agbalẽwo me le ale si míese Ŋɔŋlɔawo me nyateƒeawo gɔme ŋu la ŋu.—Mat. 24:45.
Míegaɖea mía ɖokui bɔbɔ ɖe Kristo ‘nɔviwo’ te fiana hã to nuwɔwɔ aduadu kple dzikpɔla siwo woɖo le Kristo hamea me dzi. Apostolo Paulo gblɔ be: “Miɖo to ame siwo le ŋgɔ xɔm le mia dome la, eye mibɔbɔ mia ɖokui, elabena wole miaƒe luʋɔwo ŋu dzɔm.” (Heb. 13:17) Le kpɔɖeŋu me, hamemetsitsi aɖe ate ŋu ade dzi ƒo na mí le ale si wòle vevie be míanɔ zɔzɔm ɖe Ƒometadedeagu fiẽsi ƒe ɖoɖoa dzi ŋu, alo ate ŋu aɖo aɖaŋu aɖewo na mí ku ɖe míaƒe gbeadzisubɔsubɔdɔa ƒe akpa aɖewo ŋu. Dzikpɔla mɔzɔla aɖe ate ŋu azã Ŋɔŋlɔawo atsɔ aɖo aɖaŋu na mí ku ɖe Kristotɔwo ƒe agbenɔnɔ ƒe akpa aɖe ŋu. Ne míelɔ̃na faa wɔna ɖe aɖaŋuɖoɖo mawo tɔgbi dzi la, míeɖenɛ fiana be míedze Yesu, míaƒe Kplɔla la, yome.
Nublanuitɔe la, kplɔla nyui aɖeke mele xexea si o. Gake aleke gbegbe Kristo, míaƒe Kplɔla lɔ̃ame la, yome nɔnɔ faa akɔ na míi ye nye esi! Eya ta mina míawɔ míaƒe ŋutete ɖe sia ɖe aɖo to míaƒe Kplɔla la, eye míawɔ nu aduadu kple ame siwo zãm wòle egbea.
[Nɔnɔmetatawo si le axa 27]
Ðe nèwɔna ɖe Ŋɔŋlɔawo me aɖaŋuɖoɖo si nye be nàganɔ kɔkuti ɖeka te kple dzimaxɔsetɔ o la dzia?