Míewɔ Ɣeyiɣiawo Katã Ƒe Subɔsubɔdɔa Ƒe 50 Sɔŋ Le Artik Nutoa Me

AGBLEDELAWO ƒe ƒome aɖe mee wodzi mí ɖo le Dziehe Ostrobothnia le Finland; mí ame ewoe wodzi. Nu siwo dzɔ le Xexemeʋa II me kpɔ ŋusẽ ɖe míaƒe ɖevimegbenɔnɔ dzi. Togbɔ be afi si míenɔ la didi tso aʋakpeƒeawo kilometa alafa geɖe hã la, ŋɔdzinu siwo yi edzi le aʋaa me tsi susu me na mí. Esi woda bɔmb ɖe Oulu kple Kalajoki, siwo nye du siwo te ɖe mía ŋu le zã aɖe me la, míekpɔ be yame biã hẽ. Mía dzilawo de se na mí vevie be ne míenya kpɔ aʋawɔyameʋuwo va yina ko la, míasi abe enumake. Eya ta esi mía fo tsitsitɔ Tauno ƒo nu tso paradisonyigba si dzi nu madzɔmadzɔ wɔwɔ aɖeke manɔ o ŋu na mí la, ewɔ dɔ ɖe mía dzi ŋutɔ.

Tauno srɔ̃ Biblia me nyateƒea le Biblia Nusrɔ̃viwo ƒe agbalẽwo me esime wòxɔ ƒe 14. Esi Xexemeʋa II dze egɔme la, egbe be yemawɔ asrafodɔ o le eƒe dzitsinya si wòtsɔ Biblia na hehee ta, eye wolée de gaxɔ me. Wowɔ fui vevie le afi ma. Ðeko esia na wògaɖoe kplikpaa wu be yeasubɔ Yehowa, eye esi woɖe asi le eŋu la, dzo gaɖo eme ɖe subɔsubɔdɔa ŋu wu tsã. Kpɔɖeŋu nyui si mía foa ɖo la de dzi ƒo na mí, eya ta míedea Ðasefowo ƒe kpekpewo le kɔƒe si te ɖe mía ŋu la me. Míedea takpekpewo hã, togbɔ be ebiana be míaku kutri vevie ŋutɔ hafi ate ŋu adzra ga ɖo na mɔzɔzɔa hã. Míetɔa míaƒe aƒelikawo ƒe awuwo na wo, míedea sabalagble, eye míegbea atikutsetsewo. Esi wònye be dɔ geɖe nɔa mía dzi le agblea ta la, mí katã míetea ŋu dea takpekpeawo ɖekae o, ale wɔ mía dometɔ aɖewo yina gbã, eye bubuwo yina emegbe.

Nyateƒe siwo míesrɔ̃ tso Yehowa kple eƒe tameɖoɖowo ŋu la na míegalɔ̃e geɖe wu, eye esia na míetso nya me be míatsɔ míaƒe agbe aɖe adzɔgbe nɛ. Le ƒe 1947 me la, mí ame evea míexɔ nyɔnyrɔ tsɔ ɖo kpe míaƒe adzɔgbeɖeɖe dzi—Annikki xɔ ƒe 15, eye Aili xɔ ƒe 17. Mía nɔvinyɔnu Saimi hã xɔ nyɔnyrɔ le ƒe ma ke me. Míesrɔ̃ Biblia kple mía nɔvinyɔnu Linnea si le atsuƒe hã. Eya hã kple eƒe ƒomea va zu Yehowa Ðasefowo. Esi míexɔ nyɔnyrɔ vɔ la, míeɖoe be míava zu mɔɖelawo, eye míewɔa kpekpeɖeŋu mɔɖeɖedɔa tso ɣeyiɣi yi ɣeyiɣi.

ƔEYIƔIAWO KATÃ ƑE SUBƆSBUƆDƆA WƆWƆ

Le ƒe 1955 me la, míeʋu yi Kemi, du aɖe si le dziehe ɖaa me. Togbɔ be míedea dɔ me gbe sia gbe hã la, míedi kokoko be míazu mɔɖelawo, gake míevɔ̃na be míate ŋu akpɔ míaƒe nuhiahiãwo gbɔ o. Míesusui be ele be míadzra ga aɖe ɖo gbã. Ɣemaɣie míeɖo dze kple nɔvinyɔnu mɔɖela si ŋu míeƒo nu tsoe le gɔmedzedzea. Eƒe nya mawo na míekpɔe be Yehowa subɔsubɔ ɣeyiɣiawo katã menɔ te ɖe míaƒe nunɔamesiwo kple ƒometɔwo ƒe kpekpeɖeŋu ɖeɖe ko dzi o. Nu vevitɔe nye be míaɖo ŋu ɖe mía Fofo si le dziƒo ŋu.

Ɣemaɣi la, ga si míedzra ɖo ate ŋu akpɔ ɣleti eve ƒe nuhiahiãwo gbɔ na mí. Eya ta le May 1957 me la, míede asi agbalẽ te be míawɔ mɔɖeɖedɔa ɣleti eve le Pello, si le Lapland, le Artik Nutoa ƒe dzigbe, gake míenɔ vɔvɔ̃m. Le ɣleti eve megbe la, ga si míedzra ɖo la katã gakpɔtɔ li na mí, eya ta míegade asi agbalẽ te be míawɔ mɔɖeɖedɔa ɣleti eve bubu. Eye le ɣleti eve megbe la, míaƒe gawo katã gakpɔtɔ li na mí. Azɔ míeka ɖe edzi be Yehowa akpɔ míaƒe nuhiahiãwo gbɔ na mí. Le mɔɖeɖedɔa wɔwɔ ƒe 50 megbe gɔ̃ hã la, ga si míedzra ɖo la gakpɔtɔ li na mí! Ne míetrɔ kpɔ megbe la, ewɔna na mí be Yehowa lé míaƒe alɔnu hele gbɔgblɔm na mí be: “Mègavɔ̃ o, makpe ɖe ŋuwò.”—Yes. 41:13.

Le ƒe 1958 me la, míaƒe nutome sue dzikpɔla ɖo aɖaŋu na mí be míayi aɖasubɔ abe mɔɖela veviwo ene le Sodankylä, le Lapland. Ɣemaɣi la, nɔvinyɔnu ɖeka pɛ koe nye Ðasefo le nuto ma me. Esrɔ̃ nyateƒea to mɔ wɔnuku aɖe dzi. Viaŋutsu kple woƒe sukuxɔmehatiwo zɔ mɔ yi Helsinki, si nye Finland ƒe fiadu. Esi wonɔ tsa ɖim le dua me la, nɔvinyɔnu tsitsi aɖe tsɔ Gbetakpɔxɔ ɖeka na ŋutsuvi sia, si nye ame mamlɛtɔ le megbe, be wòatsɔe ana dadaa. Ðevia tsɔe na dadaa, eye dadaa kpɔe dze sii enumake be yeke ɖe nyateƒe la ŋu.

Míehaya xɔ aɖe si le atidzeƒe aɖe si dzi wosrã la tame. Míewɔa kpekpewo le afi ma. Le gɔmedzedzea me la, mí ame evea kple nɔvinyɔnua kpakple vianyɔnu koe dea kpekpeawo. Míexlẽa agbalẽ siwo míasrɔ̃ la ɖekae. Emegbe ŋutsu aɖe si Ðasefowo srɔ̃ Biblia kplii la va wɔ dɔ le atidzeƒea. Eya kple eƒe ƒomea te kpekpeawo dede kple míaƒe ƒuƒoƒoa. Le ɣeyiɣi aɖe megbe la, eya kple srɔ̃a woxɔ nyɔnyrɔ. Nɔviŋutsu siae va kpɔa míaƒe kpekpeawo dzi azɔ. Tsɔ kpe ɖe eŋu la, ŋutsu bubu siwo wɔa dɔ le atidzeƒea te kpekpeawo dede, eye wova xɔ Biblia me nyateƒea. Le ƒe ʋɛ aɖewo megbe la, ƒuƒoƒoa me tɔwo va sɔ gbɔ ale gbegbe be míezu hame.

KUXI SIWO MÍEDO GOE

Ale si kɔƒewo didi tso wo nɔewo gbɔ le nutoa me la nye kuxi na mí le gbeƒãɖeɖedɔa me. Le dzomeŋɔli la, míezɔa afɔ, míedoa gasɔ, eye míekua akro gɔ̃ hã yia amewo gbɔ le nutoa me. Míaƒe gasɔwo kpena ɖe mía ŋu ŋutɔ. Míedonɛ yia takpekpewo, eye míedonɛ yina ɖasrãa mía dzila siwo gbɔ didi kilometa alafa geɖe la hã kpɔ. Le vuvɔŋɔli la, míeɖoa bɔs yia kɔƒe siwo le nutoa me la dometɔ ɖeka me, eye míetsɔa afɔ ɖoa eŋu wɔa aƒe me yi aƒe me dɔa. Ne míekpe kɔƒe aɖe ɖo vɔ la, míezɔna yia kɔƒe bubu me. Sno xɔa mɔa dzi keŋ, eye menye ɣesiaɣie wolɔnɛ le mɔa dzi o. Zi geɖe la, míetoa agbatsɔkeke siwo sɔwo tena ƒe toƒe siwo ɖe ɖe snoa dzi la. Ɣeaɖewoɣi la, sno dzana hebua ame siwo zɔ mɔa va yi la ƒe toƒewo, eye le adame ƒe gɔmedzedze la, snoa bɔbɔna ale gbegbe be ɖe míezɔa eme funyafunya ɖɔɖɔɖɔ.

Yame ƒe fafa miamiamia kple snodzadza nana míedoa vuvɔmewu gã titriwo. Míedoa afɔwui lɔbɔ siwo wotsɔ alẽfu wɔ, míedoa afɔwui eve alo etɔ̃ ɖe afɔ ɖe sia ɖe, eye míedoa afɔkpa glodzowo. Gake sno gaɖoa míaƒe afɔkpawo me kokoko. Hafi míaflɔ aƒe aɖe ƒe atrakpui la, míeɖea míaƒe afɔkpawo heʋuʋua sno ɖa le wo me. Míaƒe vuvɔmewu lɔbɔawo toga fana le esi míedze snoawo ta. Eye ne fafa nu sẽ ɖe edzi la, vuvɔmewuawo toga liana goŋgoŋ abe ziŋgliwo ene. Srɔ̃nyɔnu aɖe gblɔ be: “Xɔse akuakua ye le mia si, elabe mielɔ̃ faa to fafa sia gbegbe me va mía gbɔ.” Míezɔ afɔ wu kilometa 11 hafi va ɖo aƒe ma me.

Esi wònye be kɔƒeawo dome didi ta la, zi geɖe la míetsia nutoa me tɔwo ƒe aƒewo me dɔna. Ne míekpɔ be zã le dodom la, míetea teƒe si míatsi adɔ la didi. Aƒewo le kpokploe, gake nutoa me tɔwo doa vivi ɖe ame ŋu eye wowɔa amedzro, eye wonaa mlɔƒe kple nuɖuɖu siaa mí. Zi geɖe la, kpagbadzoɖekɛ, ƒeɖekadzoɖekɛ alo sisiblisi gɔ̃ hã ƒe agbalẽwo dzie míemlɔna. Ɣeaɖewoɣi la, míemlɔa aba bɔbɔewo dzi. Le kpɔɖeŋu me, nyɔnu aɖe si le aƒe gã aɖe me la tsɔ amedzroxɔ, si me aba nyui aɖe si dzi woɖo abadzivɔ ɣiwo ɖo le la na mí le dziƒoxɔ dzi. Zi geɖe la, míenɔa Biblia me nyawo me dzrom kple ame siwo gbɔ míedze va se ɖe zãtiƒe ke. Le teƒe aɖe la, atsu kple asi si gbɔ míedze la mlɔ xɔa ƒe akpa ɖeka, eye míawo hã míemlɔ akpa kemɛ. Míenɔ Ŋɔŋlɔawo me dzrom kpli wo tso zã me va se ɖe fɔŋli. Ŋutsua kple srɔ̃a nɔ nya geɖe biam mí, ne míeɖo ame ɖeka tɔ ŋu vɔ la, ame evelia hã biaa etɔ.

MÍAƑE SUBƆSUBƆDƆA KPƆ DZIDZEDZE

Lapland-nyigba mewɔa nu o gake enye nuto dzeani aɖe, eye eƒe anidzedze toa vovo le ƒea ƒe ɣeyiɣi vovovowo me. Gake ame siwo kpɔa ŋudzedze ɖe Yehowa ŋu ŋue míekpɔ dzidzɔ ɖo wu. Dzianukwaretɔ siwo míeɖe gbeƒã na la dometɔ aɖewoe nye atitsola siwo wɔa dɔ le atitsoƒe siwo le Lapland nutoa me. Ɣeaɖewoɣi la, mí nɔvinyɔnu sue eve siawo míeva kena ɖe ŋutsu gbogbo aɖewo ŋu le aƒe suewo me. Ŋutsu dzɔtsu siawo ɖoa to Biblia me gbedeasia hexɔa míaƒe agbalẽwo kple dzidzɔ.

Nuteƒekpɔkpɔ dodzidzɔname geɖewo su mía si. Gbe ɖeka la, gaƒoɖokui si le ʋudzeƒe la do ŋgɔ miniti atɔ̃, si wɔe be ʋua dzo le mía gbɔ. Eya ta míeɖo ʋu bubu yi kɔƒe bubu me. Míeɖe gbeƒã le kɔƒe ma me kpɔ o. Le aƒe gbãtɔ si me míeyi la, míedo go ɖetugbui aɖe si gblɔ be: “Ðetugbuiwo, mieva pɛpɛpɛ abe ale si menɔ mɔ kpɔm na mi ene.” Míenɔ Biblia srɔ̃m kple nɔvianyɔnu. Ðetugbui sia bia tso nɔvia si be wòana míava ye gbɔ le yeƒe kɔƒea me le ŋkeke ma tututu dzi. Gake nɔvianyɔnua megblɔe na mí o. Míedze Biblia sɔsrɔ̃ kple eya kpakple eƒe ƒometɔ siwo le aƒe si te ɖe wo ŋu me. Eteƒe medidi o, míeva nɔa nua srɔ̃m kple wo katã ɖekae, eye ame wuievee kpɔa gome le nusɔsrɔ̃a me. Tso ɣemaɣi la, ƒome ma me tɔ geɖewo va zu Yehowa Ðasefowo.

Le ƒe 1965 me la, woɖo mí ɖe hame si me míele fifia le Kuusamo le Artik Nutoa ƒe anyigbe gome. Ɣemaɣi la, gbeƒãɖela ʋɛ aɖewo koe nɔ hamea me. Le gɔmedzedzea me la, gbeƒãɖeɖe le míaƒe nutoa me sesẽ vie. Ameawo léa woƒe subɔsubɔ me ɖe asi goŋgoŋ eye wobua nazã ɖe mía ŋu. Ke hã ame geɖewo dea bubu Biblia ŋu, eye esia ʋua mɔnu na mí míeɖoa dze kpli wo. Eya ta vivivi la, míeva nya ameawo nyuie, eye anɔ abe ƒe eve ene megbe la, eva nɔ bɔbɔe na mí wu be míadze Biblia nusɔsrɔ̃wo gɔme.

MÍEKPƆTƆ LE SUBƆSUBƆDƆA DZI VEVIE

Egbea ŋusẽ megale mía ŋu be míanɔ gbeadzi ɣeyiɣi didi o, gake míegadea gbeadzi gbe sia gbe kloe. Nya nyuia gbɔgblɔ na amewo le míaƒe nutoa me va nɔ bɔbɔe na mí ŋutɔ esi mía tasiyɔvi de dzi ƒo na Aili be wòasrɔ̃ ʋukuku, eye wòsrɔ̃e hexɔ ʋukugbalẽvi le ƒe 1987 me esi wòxɔ ƒe 56. Míegaxɔ kpekpeɖeŋu bubu esime wotu Fiaɖuƒe Akpata yeye na mí eye míeʋu yi xɔ aɖe si wotu kpe ɖe akpataa ŋu la me.

Dzidziɖedzi si teƒe míekpɔ la naa míekpɔa dzidzɔ geɖe. Esi míedze ɣeyiɣiawo katã ƒe subɔsubɔdɔa gɔme le Finland ƒe dziehe la, gbeƒãɖela ʋɛ aɖewo koe nɔ nuto gã ma me. Fifia hame geɖewoe le nutome sue ɖeka me. Edzɔna zi geɖe le takpekpe suewo kple gãwo me be ame aɖe nayɔ eƒe ŋkɔ na mí ahabia mí be míedze si ye hã. Le wo dometɔ aɖewo gome la, míesrɔ̃ Biblia kple amewo le woƒe aƒe me esime wonɔ ɖevime. Nuku siwo míeƒã ƒe gbogbo aɖewoe nye esi va yi la tse ku!—1 Kor. 3:6.

Ƒe 2008 mee míekpɔ ƒe 50 le míaƒe mɔɖela vevi dɔa wɔwɔ me. Míeda akpe na Yehowa be míete ŋu de dzi ƒo na mía nɔewo si wɔe be míete ŋu do dzi le eƒe dɔ vevi sia me. Nu boo mele mía si le agbe me o, gake naneke mehiãa mí o. (Ps. 23:1) Míeva kpɔe dze sii be vɔvɔ̃ si ɖo mí le gɔmedzedzea me la mehiã hafi o. Gake dzidzɔtɔe la, Yehowa do ŋusẽ mí le ƒe siawo katã me le ɖekawɔwɔ me kple ŋugbe si wòdo le Yesaya 41:10 be: “Mali ke wò, makpe ɖe ŋuwò, eye matsɔ nye xɔname ƒe nuɖusi alé wò.”