“Míaƒe Dziwo Yɔ Fũu Kple Lɔlɔ̃ Eye Dzo Yeye Ðo Mía Me”

YAME ƒe dzoxɔxɔ nu nɔ sesẽm xoxo Fiɖa ŋdi ma le September 1922 me esime ame 8,000 va ƒo ƒu ɖe takpexɔa me. Zimenɔlaa ɖe gbeƒãe be le wɔnaa ƒe akpa vevi sia me la, mɔɖeɖe li be ame sia ame si di be yeado la nado faa, gake womaɖe mɔ na ame aɖeke be wòagage ɖe xɔa me o.

Wodzi hawo le “Kafukafu Ƒe Wɔna” si wotsɔ dze takpekpea gɔme la me. Eyome, Nɔviŋutsu Joseph F. Rutherford va tɔ ɖe nuƒolanɔƒea. Nyaselawo dometɔ akpa gãtɔ nɔ mɔ kpɔm vevie na nya si gblɔ ge wòala. Ame ʋɛ aɖewo nɔ yiyim nɔ gbɔgbɔm le dzoxɔxɔa ta. Nuƒolaa bia tso wo si moveviɖoɖotɔe be woanɔ anyi ase nyaa. Esi nuƒoa dze egɔme la, ɖe ame aɖe de dzesi avɔ gã legbee si woŋlɔ nyuie hesa ɖe nuƒolanɔƒea tame dze ŋgɔ nyaselawoa?

Nɔviŋutsu Rutherford ƒe nuƒoa ƒe tanyae nye “Dziƒofiaɖuƒe la gogo.” Esi wònɔ nuƒoa ƒom gaƒoƒo ɖeka kple afã sɔŋ la, eƒe gbe sesẽa xɔ xɔ bliboa me esime wònɔ nu ƒom tso ale si blema nyagblɔɖilawo ɖe gbeƒã Fiaɖuƒea ƒe vava vɔvɔ̃manɔmee la ŋu. Esi wòɖo nuƒoa ƒe akpa vevitɔ dzi la, ebia be, “Ðe miexɔ edzi se be Ŋutikɔkɔefia la dze dziɖuɖu gɔmea?” Nyaselawo ɖo eŋu sesĩe be: “Ɛ̃!”

Nɔviŋutsu Rutherford gblɔ kple gbe sesẽ be: “Ekema mitrɔ yi gbeadzi, O, mi Mawu dziƒoʋĩtɔ la ƒe viwo! . . . Mikpɔ ɖa, Fia la le dzi ɖum! Miawoe nye eƒe nyakakalawo. Eya ta miɖe gbeƒã, miɖe gbeƒã, miɖe gbeƒã.”

Ɣemaɣi tututu la, avɔ si le ŋɔŋlɔ le dzia la ke blewuu nyaselawo kpɔ. Nuŋɔŋlɔ si le edzi ye nye: “Miɖe Gbeƒã Fia La Kple Eƒe Fiaɖuƒe La.”

Nɔviŋutsu Ray Bopp gblɔ be: “Nyaselawo gli kple dzidzɔ.” Nɔvinyɔnu Anna Gardner gblɔ be “akpesisia ƒe sesẽ wɔe be xɔtiawo nɔ ʋuʋum kpekpekpe.” Nɔviŋutsu Fred Twarosh gblɔ be: “Enumake, nyaselawo katã tso ɖe tsitrenu zi ɖeka.” Nɔviŋutsu Evangelos Scouffas hã gblɔ be: “Ðeko wònɔ abe ɖe ŋusẽ triakɔ aɖee he mí katã le míaƒe zikpuiwo dzi ene, míetso ɖe tsitrenu eye aɖatsi lólo ɖe ŋku dzi na mí.”

Ame siwo de takpekpe ma la dometɔ akpa gãtɔ nɔ gbeƒã ɖem Fiaɖuƒe ŋuti nya nyuia xoxo. Gake azɔ la, dzo yeye ɖo wo me ɖe dɔa ŋu. Nɔvinyɔnu Ethel Bennecoff gblɔ tso Biblia Nusrɔ̃viawo ŋu be ‘woƒe dziwo yɔ fũu kple lɔlɔ̃ eye dzo yeye ɖo wo me’ ɖe dɔa ŋu. Nɔvinyɔnu Odessa Tuck, si xɔ ƒe 18 ɣemaɣi la, ɖoe kplikpaa tso takpekpe ma me be yeawɔ ɖe yɔyɔ si nye, “Ame kae ayi na mí?” la dzi. Egblɔ be: “Nyemenya afi si maɖe gbeƒã le, ale si maɖe gbeƒã alo nya si maɖe gbeƒãe o. Nu si menya koe nye be medi be mawɔ nu abe Yesaya, ame si gblɔ be, ‘Nyee nye esi! Dɔm!’ la ene.” (Yes. 6:8) Nɔviŋutsu Ralph Leffler gblɔ be: “Ŋkeke vevi ma koŋ dzie Fiaɖuƒea ŋuti nyakakadɔ si xɔ xexea me katã egbea la dze egɔme.”

Mewɔ nuku o be takpekpe si wowɔ le Cedar Point, Ohio, le ƒe 1922 me la nye nudzɔdzɔ vevi aɖe le teokrasi ƒe ŋutinya me! Nɔviŋutsu George Gangas gblɔ be: “Takpekpe ma wɔ dɔ ɖe dzinye meɖoe kplikpaa be nyemana takpekpe aɖeke nato ŋunye gbeɖe o.” Eye mena ɖeke to eŋu hã kpɔ o. Nɔvinyɔnu Julia Wilcox ŋlɔ bena: “Magblɔ ko be nyemate ŋu aɖɔ ale si gbegbe dzi dzɔam ɣesiaɣi si woƒo nu tso ƒe 1922 Cedar Point takpekpea ŋu le míaƒe agbalẽwo me o. Medina be magblɔ na Yehowa be, ‘Akpe na wò be èna mɔnukpɔkpɔm menɔ eteƒe.’”

Anɔ eme be míawo hã míeɖoa ŋku takpekpe aɖe si wɔ dɔ ɖe mía dzi ale gbegbe, si na míaƒe dzi yɔ fũu kple dzidzɔ eye dzo yeye ɖo mía me eye wòna míegalɔ̃ mía Mawu gã la kple eƒe Fia la geɖe wu la dzi. Ne míele ŋku ɖom takpekpe ma dzi la, eʋãa míawo hã be míagblɔ na Yehowa be, “Akpe na wò be èna mɔnukpɔkpɔm menɔ eteƒe.”