Job

7 “Nte ọkpọsọn̄ utom+ inaha inọ owo ke isọn̄,

Ndien nte mme usen esie ibietke mme usen owo eke ẹkpede utom?+

 2 Enye asan̄a en̄wek nte ofụn oyom mfụt,+

Enye onyụn̄ etie nte owo eke ẹkpede utom emi etiede ebet okụkutom+ esie.

 3 Ntem ẹmenam mme ọfiọn̄ enyọn̄+ mi ẹdi ikpîkpu,

Ẹmenyụn̄ ẹbat mme okoneyo afanikọn̄+ ẹnọ mi.

 4 Ke ini nsụhọrede nna, ami ndọhọ nte, ‘Ini ewe ke ndidaha nda?’+

Ndien ke ini eyo ebịghide ndisiere, ami nnyụn̄ nna do mmian̄a tutu esịm tụhi-tụhi usenubọk.

 5 Ndọn̄+ ye ebok ntọn̄+ ẹmefụk mi obụkidem;

Ikpọkidem mi adiana n̄kikan onyụn̄ eyemede.+

 6 Mme usen mi ẹkabade ẹsọp+ ẹkan eto ọdọk-ọfọn̄,

Mmọ ẹnyụn̄ ẹsịm utịt, inyeneke idotenyịn.+

 7 Ti ete ke uwem mi edi ofụm;+

Nte ke enyịn mi idikwe aba se ifọnde.

 8 Enyịn owo emi okụtde mi idikwe mi aba;

Enyịn fo eyese mi, edi ami ndidụhe.+

 9 Obubịt enyọn̄ esịm utịt esie onyụn̄ osop;

Ntre owo eke osụhọrede aka Udi* idiwọrọke idi.+

10 Enye idifiakke aba inyọn̄ ufọk esie,

Ebiet esie idinyụn̄ idiọn̄ọke enye aba.+

11 Ke ntre, ami ndikịbike inua mi.

Ami nyetịn̄ ikọ ke nnanenyịn mi;

Nyonyụn̄ ntịn̄ mban̄a nte ayatde ukpọn̄+ mi!

12 Nte ami ndi inyan̄ m̀mê akamba unam mmọn̄,

Emi afo ekpenịmde owo ete ekpeme+ mi?

13 Ke ini ndọhọde nte, ‘Bed mi ọyọdọn̄ mi esịt,

Bed mi ayanam ọkpọsọn̄ ekikere mi efere,’

14 Ndien afo amada ndap esịn mi ndịghe,

Afo omonyụn̄ ada n̄kukụt esịn mi ndịk ke idem,

15 Ndien ukpọn̄ mi emek ibifịk ndibaba enye,

Emek n̄kpa+ utu ke mme ọkpọ mi.

16 Ami mmesịn enye;+ ndidụhe uwem ke nsinsi.

Daha kpọn̄ mi, koro mme usen mi ẹdide ibifịk.+

17 Owo+ edi nso eke afo ọbọkde enye,

Emi afo onyụn̄ esịnde esịt ke enye,

18 Emi afo owụkde enye enyịn ke idem kpukpru usenubọk,

Emi afo onyụn̄ odomode enye ese kpukpru ini?+

19 Ntak emi mûtreke ndiwụk mi enyịn ke idem,+

Mûnyụn̄ uyakke mi mmen etap?

20 Edieke nnamde idiọkn̄kpọ, oro abiak fi didie, O Andise ubonowo?+

Ntak emi afo asakde iso ese mi, tutu ndikabade ndi mbiomo nnọ fi?

21 Ndien ntak emi afo mûdahakedo ke idiọkn̄kpọ mi+

Mûnyụn̄ ufụmike ndudue mi?

Koro ke emi ami mmọn̄ nsụhọde nna ke ntan;+

Ndien afo oyoyom mi, edi ami ndidụhe.”