Deuteronomy
20 “Edieke afo ediwọrọde aka ekọn̄ ye mme asua fo, edinyụn̄ okụtde mme enan̄-mbakara ye mme chariot ekọn̄,+ mbon emi ẹwakde ẹkan fi, kûfehe mmọ; koro Jehovah Abasi fo, emi okosiode fi ke isọn̄ Egypt, odude ye afo.+ 2 Ndien ama ekem ke ini mbufo ẹyomde nditọn̄ọ ekọn̄, yak oku edi editịn̄ ikọ ọnọ kpukpru owo.+ 3 Yak enye onyụn̄ ọdọhọ mmọ ete, ‘O Israel, mbufo ẹkop, mbufo ẹmọn̄ ẹn̄wana ekọn̄ ye mme asua mbufo mfịn emi. Ẹkûkop ndịk.+ Ẹkûdịghe, ẹkûnyụn̄ ẹnyek idem, ẹkûnyụn̄ ẹyak nsia eyeme mbufo ke iso mmọ,+ 4 koro Jehovah Abasi mbufo asan̄ade ye mbufo aka ndin̄wana ye mme asua mbufo nnọ mbufo man anyan̄a mbufo.’+
5 “Ndien yak ikpọ owo+ ẹdọhọ mbio obio ẹte, ‘Anie ọkọbọp obufa ufọk edi mîberekede ufọk oro kan̄a? Yak enye afiak ọnyọn̄ ufọk esie, mbak enye edikpa ke ekọn̄ ndien owo efen aka ekeberede ufọk oro.+ 6 Anie okonyụn̄ ọtọ in̄wan̄ vine ndien mîtọn̄ọke ndidia mfri esie? Yak enye afiak ọnyọn̄ ufọk esie, mbak enye edikpa ke ekọn̄ ndien owo efen ọtọn̄ọ ndidia mfri esie.+ 7 Anie okonyụn̄ odụk ediomi ndọ ye n̄wan edi mîdọhọ enye kan̄a? Yak enye afiak ọnyọn̄ ufọk esie,+ mbak enye edikpa ke ekọn̄ ndien owo efen emen n̄wan oro ọdọ.’ 8 Ndien ikpọ owo ẹnyene nditọn̄ọ ntak ndọhọ mbio obio ẹte, ‘Anie okop ndịk ye oyomonsia?+ Yak enye afiak ọnyọn̄ ufọk esie, mbak enye edinam esịt enyek nditọete esie, nte esịt enyekde enye.’+ 9 Ndien ama ekem ke ini ikpọ owo ẹkụrede ndinyene nneme ye mbio obio, yak mmọ ẹmek mme etubom ekọn̄ man ẹda mmọ usụn̄.
10 “Ke ini afo edisan̄ade ekpere obio ndin̄wana ekọn̄ ye enye, bem iso tan̄a emem nọ enye.+ 11 Ndien ama ekem edieke enye ọbọrọde fi emem emem onyụn̄ osiode usụn̄ ọnọ fi, do ndien kpukpru owo eke ẹdikụtde ke esịt ẹyekabade ẹdi mbon oro ẹnyịkde ẹnam ọkpọsọn̄ utom ẹnọ fi, ẹnyụn̄ ẹnam n̄kpọ ẹnọ fi.+ 12 Edi edieke enye mînamke emem ye afo,+ edi etịbide ekọn̄ ye afo, ndien afo akan enye okụk, 13 Jehovah Abasi fo ayayak enye esịn fi ke ubọk, ndien afo enyene ndiwot kpukpru irenowo esie ke iso akan̄kan̄.+ 14 Sụk iban ye nditọwọn̄+ ye ufene+ ye kpukpru se idude ke obio, ofụri mbụme esie ke afo enyene ndibụme nda ke idemfo;+ afo oyonyụn̄ adia mbụme mme asua fo, emi Jehovah Abasi fo ọnọde fi.+
15 “Ntem ke afo edinam ye kpukpru mme obio emi ẹnen̄erede ẹyom usụn̄ ẹkpọn̄ fi, eke mîdịghe obio mme idụt emi. 16 Edi amaedi mme obio mme idụt emi Jehovah Abasi fo ọnọde fi ke udeme, kûyak baba n̄kpọ kiet eke ọduọkde ibifịk odu uwem,+ 17 koro afo enyene ndisobo mmọ taktak, mme Hittite ye mme Amorite, mbon Canaan ye mme Perizzite, mme Hivite ye mbon Jebus,+ kpa nte Jehovah Abasi fo okowụkde fi; 18 mbak mmọ ẹdikpep mbufo ndinam kpukpru mbubiam n̄kpọ mmọ, emi mmọ ẹnamde ẹnọ mme abasi mmọ, ndien mbufo ẹnam idiọkn̄kpọ ẹdue Jehovah Abasi mbufo.+
19 “Edieke afo akande obio okụk ke ediwak usen onyụn̄ an̄wanade ekọn̄ ye enye man ada enye enyene, kûsobo mme eto esie ke ndikpen̄e mmọ ke ekụri; koro afo ayadia mfri mmọ, ntre kûkpen̄e mmọ uduọn̄ọ,+ koro ndi eto in̄wan̄ edi owo eke afo okposobode? 20 Edi amaedi eto emi afo ọfiọkde ete idịghe eto eke ẹdiade, sobo enye nyụn̄ kpi enye duọk nyụn̄ bọp ọkọ ekọn̄+ kanade obio eke an̄wanade ekọn̄ ye afo, tutu enye ọduọ.