Deuteronomy

22 “Edieke afo okụtde enan̄ eyenete fo m̀mê erọn̄ esie nte ẹyode ẹsan̄a, kûbe ukpọn̄ mmọ.+ Kûtre ndida mmọ mfiak nsọk eyenete fo.+ 2 Edi edieke eyenete fo mîkpereke fi, afo mûnyụn̄ udiọn̄ọke enye, afo enyene ndida unam emi ndụk ufọk fo, ndien enye oyodu ye afo tutu eyenete fo oyom enye. Ndien afo ọyọkpọn̄ ọnọ enye.+ 3 Ntem n̄ko ke afo edinam ye ass esie, ye ọfọn̄ esie, edinyụn̄ anam kpa ntre n̄ko ye n̄kpọ ekededi eke ọbọhọde eyenete fo osop, emi afo onyụn̄ okụtde. Kûbe ukpọn̄ enye.

4 “Edieke afo okụtde ass eyenete fo m̀mê ayara enan̄ esie nte ọduọde ana ke usụn̄, kûbe ukpọn̄ mmọ. Kûtre ndin̄wam enye mmenede mmọ.+

5 “N̄wan okûsịne ọfọn̄ erenowo,* erenowo okûnyụn̄ esịne ọfọn̄ an̄wan;+ koro owo ekededi eke anamde n̄kpọ emi edi mbubiam n̄kpọ ke enyịn Jehovah Abasi fo.

6 “Edieke okụtde efọk inuen ke usụn̄, ke eto m̀mê ke isọn̄ ye nditọ inuen+ m̀mê nsen ke esịt, eka inuen onyụn̄ okụbọde ke nditọ m̀mê ke nsen oro, kûda eka ukọrọ ye nditọ.+ 7 Kûtre ndiyak eka ọnyọn̄, edi afo emekeme ndida nditọ; man ọkpọfọn ye afo, usen uwem fo okponyụn̄ ebịghi.+

8 “Edieke ọbọpde obufa ufọk, afo enyene ndibọp ibio ibibene ke ọkọm ufọk fo,+ mbak ududa ubiomikpe iyịp udori ufọk fo koro owo ekeme ndidian̄ade nduọ.

9 “Kûtọ orụk n̄kpasịp iba+ ke in̄wan̄ vine fo, mbak ẹdibọ fi ofụri mbun̄wụm eke otode ke n̄kpasịp emi afo ọtọde ye mbun̄wụm in̄wan̄ vine fo ẹda ẹkenịm ke edisana ebiet.

10 “Kûdian enan̄ ye ass ọtọkiet uda ufụn̄ isọn̄.+

11 “Kûsịne ọfọn̄ eke ẹdade idet erọn̄ ye linen ẹnam.+

12 “Nam nyeriye ke mben mbinan̄ ke ọfọn̄ emi afo ofụhọde.+

13 “Edieke owo ọdọde n̄wan onyụn̄ enyenede ebuana ye enye ndien ekem asua enye,+ 14 onyụn̄ odori enye ikọ ete ke enye ama anam oburobụt ido onyụn̄ abiat enye enyịn̄+ onyụn̄ ọdọhọ ete, ‘N̄wan emi ke n̄kọdọ, ndien ke ini nnyenede ebuana ye enye, n̄kwe n̄kpọ eke owụtde ke enye edi n̄wan emi mîfiọkke erenowo’;+ 15 ete ye eka eyenan̄wan oro ẹnyene n̄ko ndida n̄kpọ eke owụtde ke enye edi eyenan̄wan emi mîfiọkke erenowo ndinọ mbiowo ke inuaotop obio;+ 16 ndien ete eyenan̄wan oro ọyọdọhọ mbiowo ete, ‘N̄kemen eyen mi nnọ owo emi ọdọ, ndien enye asua+ enye. 17 Ndien sese enye odori eyenan̄wan emi ikọ ete ke enye ama anam oburobụt ido,+ onyụn̄ ọdọhọ ete: “Mmokụt ke eyen fo inyeneke n̄kpọ eke owụtde ke enye edi n̄wan emi mîfiọkke erenowo.”+ Edi se n̄kpọ mi ndiwụt ke eyen mi edi eyenan̄wan emi mîfiọkke erenowo.’ Ndien mmọ ẹyetat ọfọn̄ oro ke iso mbiowo obio. 18 Ndien mbiowo+ obio ẹyemụm eren oro ẹtụnọ.+ 19 Mmọ ẹnyụn̄ ẹnyene ndibọ enye isop emi edide shekel silver ikie nnọ ete eyenan̄wan oro, koro enye akabiatde eyenan̄wan Israel enyịn̄;+ ndien enye oyosụk edi n̄wan esie. Owo idiyakke enye osio eyenan̄wan oro ndọ ke ofụri usen uwem esie.

20 “Edi edieke n̄kpọ emi edide akpanikọ, n̄kpọ mîkonyụn̄ idụhe ndiwụt ke enye ekedi eyenan̄wan emi mîfiọkke erenowo,+ 21 mmọ ẹnyene ndida eyenan̄wan oro n̄wọrọ ndi enyịnusụn̄ ufọk ete esie, ndien irenowo obio oro ẹnyene nditọn̄ọ enye ke itiat, ndien enye enyene ndikpa, koro enye akanamde esuene esuene ido+ ke Israel ke enye ndisan̄a akpara ke ufọk ete esie.+ Ntre ke afo edisio se idiọkde efep ke otu mbufo.+

22 “Edieke ẹkụtde owo nte adan̄de ye n̄wan owo,+ mmọ mbiba ẹnyene ndikpa, eren oro ye n̄wan oro.+ Ntre ke afo edisio se idiọkde efep ke Israel.+

23 “Edieke eyenan̄wan emi mîfiọkke erenowo odụkde ediomi ndọ ye owo+ ndien owo en̄wen okụt enye ke obio onyụn̄ adan̄ ye enye,+ 24 mbufo ẹnyene n̄ko ndida mmọ mbiba n̄wọrọ ndi inuaotop obio oro nnyụn̄ ntọn̄ọ mmọ ke itiat, ndien mmọ ẹnyene ndikpa, eyenan̄wan oro koro enye mîkofiorike n̄kpo ke obio, ye eren oro sia enye akasabarede n̄wan ekemmọ owo.+ Ntre ke afo edisio se idiọkde efep ke otu mbufo.+

25 “Edi edieke edide ke in̄wan̄ ke eren oro okokụt eyenan̄wan emi okodụkde ediomi ndọ ye owo en̄wen, onyụn̄ omụm enye adan̄, eren oro akadan̄de enye kpọt enyene ndikpa, 26 ẹkûnam eyenan̄wan oro n̄kpọ. Enye inamke idiọkn̄kpọ eke odotde n̄kpa, koro ikọ emi etie nte emi owo adahade ke enyọn̄ owot ekemmọ owo.*+ 27 Koro enye okokụt eyenan̄wan emi ke in̄wan̄. Eyenan̄wan emi okodụkde ediomi ndọ mi ama ofiori n̄kpo, edi owo ikodụhe ndinyan̄a enye.

28 “Edieke owo okụtde eyenan̄wan emi mîfiọkke erenowo, mînyụn̄ idụkke ediomi ndọ ye owo en̄wen, ndien enye omụm n̄wan oro adan̄,+ ndien ẹyarade n̄kpọ emi,+ 29 eren oro akadan̄de enye enyene n̄ko ndinọ ete eyenan̄wan oro shekel silver aba ye duop,+ ndien enye ayakabade edi n̄wan esie koro enye akasabarede enye. Owo idiyakke enye osio eyenan̄wan oro ndọ ke ofụri usen uwem esie.+

30 “Owo okûda n̄wan ete esie, mbak enye edifụhọde ete esie ọfọn̄.+