Deuteronomy
26 “Ndien ama ekem ke ini afo ke akpatre odụkde isọn̄ oro Jehovah Abasi fo ọnọde fi ke udeme, onyụn̄ adade enye enyene onyụn̄ odụn̄de ke esịt,+ 2 da ndusụk akpa mbun̄wụm+ ke otu kpukpru mbun̄wụm isọn̄, emi afo edidade ke isọn̄ fo emi Jehovah Abasi fo ọnọde fi, sịn ke akpasa nyụn̄ ka ke ebiet oro Jehovah Abasi fo edimekde ndinam enyịn̄ esie odu.+ 3 Nyụn̄ di ke iso oku+ emi edinamde utom ke mme usen oro didọhọ enye ete, ‘Nyom ndidọhọ Jehovah Abasi fo mfịn emi nte ke mmodụk isọn̄ emi Jehovah ọkọn̄wọn̄ọde ọnọ mme ete ete nnyịn ete iyọnọ nnyịn.’+
4 “Ndien oku oro ọyọbọ fi akpasa oro ke ubọk enịm ke iso itieuwa Jehovah Abasi fo. 5 Ndien afo enyene ndidọhọ ke iso Jehovah Abasi fo ete, ‘Ete mi ekedi owo Syria+ emi ekekperede n̄kpa; ndien enye osụhọde aka Egypt+ okodụn̄ do nte esenowo ye ata esisịt ibat owo;+ edi enye akabade akamba idụt do, okpon onyụn̄ awak etieti.+ 6 Ndien nditọ Egypt ẹfiomo nnyịn ẹnyụn̄ ẹtụhọde nnyịn ẹnyụn̄ ẹsịn nnyịn ke ọkpọsọn̄ ufụn.+ 7 Ndien nnyịn iseme inọ Jehovah Abasi mme ete ete nnyịn,+ ndien Jehovah okop eseme+ nnyịn onyụn̄ okụt ukụt nnyịn ye mfịna nnyịn ye ufịk eke ẹfịkde nnyịn.+ 8 Ke akpatre Jehovah ada ọkpọsọn̄ ubọk+ ye edinyanade ubọk+ ye ikpọ n̄kpọndịk+ ye mme idiọn̄ọ ye mme utịben̄kpọ+ osio nnyịn ke Egypt. 9 Ekem enye ada nnyịn edi ke ebiet emi onyụn̄ ọnọ nnyịn isọn̄ emi, kpa isọn̄ emi ọfiọrọde mmọn̄eba ye aranọkwọk.+ 10 Ndien sese mmada akpa mbun̄wụm isọn̄ oro Jehovah ọnọde mi ndi.’+
“Afo onyụn̄ enyene ndinịm enye ke iso Jehovah Abasi fo nnyụn̄ ntuak ibuot nnọ Jehovah Abasi fo.+ 11 Afo enyene ndidat esịt+ ke kpukpru nti n̄kpọ emi Jehovah Abasi fo ọnọde fi ye mbonufọk fo, afo ye eyen Levi ye esenowo emi odude ye afo.+
12 “Ke ini afo okụrede ndinọ ọyọhọ mbak duop+ ke ofụri mbun̄wụm fo ke ọyọhọ isua ita,+ kpa isua ọyọhọ mbak duop, afo enyene ndimen enye nnọ eyen Levi, esenowo, eyenakpa ye ebeakpa, ndien mmọ ẹyedia enye ke obio fo ẹyụhọ.+ 13 Ndien dọhọ ke iso Jehovah Abasi fo ete, ‘Mmosio edisana n̄kpọ ke ufọk mfep mmonyụn̄ mmen enye nnọ eyen Levi ye esenowo ye eyenakpa ye ebeakpa,+ nte ekemde ye kpukpru mme ewụhọ emi afo okowụkde mi. Mbiatke mme ewụhọ fo, nnyụn̄ mfreke mmọ.+ 14 N̄kadiaha baba kiet ke esịt ke ini ndude ke mfụhọ, n̄konyụn̄ nsioho baba kiet ke adan̄aemi mmensanake, n̄konyụn̄ nsioho baba kiet nnọ akpan̄kpa. Mmakpan̄ utọn̄ nnọ Jehovah Abasi mi. Mmanam kpa nte afo eketemede mi. 15 Tie ke heaven, edisana ebietidụn̄+ fo se, nyụn̄ diọn̄ ikọt fo Israel+ ye isọn̄ emi afo ọnọde nnyịn, nte afo ọkọn̄wọn̄ọde ọnọ mme ete ete nnyịn,+ kpa isọn̄ emi ọfiọrọde mmọn̄eba ye aranọkwọk.’+
16 “Mfịn emi Jehovah Abasi fo omowụk fi ete anam mme ewụhọ ye mme ubiereikpe+ emi; ndien afo enyene ndinịm nnyụn̄ nnam mmọ ke ofụri esịt+ fo ye ke ofụri ukpọn̄+ fo. 17 Afo amanam Jehovah ọdọhọ mfịn emi ete ke iyakabade idi Abasi fo ke adan̄aemi afo asan̄ade ke mme usụn̄ esie onyụn̄ enịmde mme ewụhọ+ esie ye mme ibet+ esie ye mme ubiereikpe+ esie onyụn̄ okopde uyo+ esie. 18 Amaedi Jehovah, enye amanam fi ọdọhọ mfịn emi ete ke imọ iyakabade idi ikọt esie, akpan inyene+ esie, kpa nte enye ọkọn̄wọn̄ọde ọnọ fi,+ ye nte ke imọ iyenịm kpukpru mme ewụhọ esie, 19 ye nte ke enye ayanam fi okon̄ akan kpukpru mme idụt eken oro enye akanamde,+ osụn̄ọde ke itoro ye eti enyịn̄ ye uyai, ke adan̄aemi afo owụtde ke idi edisana ikọt Jehovah Abasi fo,+ kpa nte enye ọkọn̄wọn̄ọde.”