Deuteronomy

27 Ndien Moses ye mbiowo Israel ẹwụk mme owo ẹte: “Mbufo ẹnịm kpukpru mme ewụhọ emi n̄wụkde mbufo mfịn emi.+ 2 Ndien ama ekem ke usen emi mbufo ẹdibede Jordan+ ẹdụk isọn̄ oro Jehovah Abasi fo ọnọde fi, afo enyene ndiwụk ikpọ itiat nnyụn̄ nyet mmọ ndom. 3 Afo onyụn̄ enyene ndiwet kpukpru ikọ ibet+ emi ke mmọ ke afo ama ekebe,+ man afo odụk isọn̄ oro Jehovah Abasi fo ọnọde fi, isọn̄ emi ọfiọrọde mmọn̄eba ye aranọkwọk, kpa nte Jehovah Abasi mme ete ete fo ọkọdọhọde fi.+ 4 Ndien ama ekem ke ini mbufo ẹbede Jordan, mbufo ẹnyene ndiwụk mme itiat emi ke Obot Ebal,+ kpa nte ntemede mbufo mfịn emi, afo onyụn̄ enyene ndiyet mmọ ndom.+ 5 Afo enyene ndibọp itieuwa do nnọ Jehovah Abasi fo, kpa itieuwa oro ẹnamde ke itiat. Kûda ukwak usọi mmọ.+ 6 Da itiat oro owo mîsiakke-siak bọp itieuwa Jehovah Abasi fo, nyụn̄ wa edifọp uwa ke esịt nọ Jehovah Abasi fo.+ 7 Nyụn̄ wa mme uwa ebuana+ nyụn̄ dia mmọ do,+ nyụn̄ dat esịt ke iso Jehovah Abasi fo.+ 8 Ndien wet kpukpru ikọ ibet+ emi ke mme itiat oro, wet mmọ ẹnen̄ede ẹn̄wan̄a.”+

9 Ekem Moses ye mme oku, kpa nditọ Levi, ẹdọhọ ofụri Israel ẹte: “O Israel, dop uyo nyụn̄ kpan̄ utọn̄. Mfịn emi afo amakabade edi ikọt Jehovah Abasi fo.+ 10 Nyụn̄ kop uyo Jehovah Abasi fo nyụn̄ nam mme ibet+ esie ye mme ewụhọ+ esie, emi ami n̄wụkde fi mfịn emi.”

11 Ndien Moses owụk mme owo ke usen oro, ete: 12 “Mmọ emi ẹdida ke Obot Gerizim+ ẹdiọn̄ mme owo ke mbufo ẹma ẹkebe Jordan: Simeon ye Levi ye Judah ye Issachar ye Joseph ye Benjamin. 13 Ndien mmọ emi ẹdida ke Obot Ebal+ ẹsịn isụn̄i:+ Reuben, Gad ye Asher ye Zebulun, Dan ye Naphtali. 14 Ndien nditọ Levi ẹyebọrọ ẹnyụn̄ ẹdọhọ kpukpru owo ke Israel ke ọkpọsọn̄ uyo ẹte:+

15 “‘Ọdọdiọk ọnọ owo eke anamde edisọi mbiet+ m̀mê editara mbiet,+ n̄kpọ emi Jehovah esede ke mbubiam,+ kpa utom anamusọ eto ye anamusọ ukwak,+ onyụn̄ emende enye enịm ke ndịbe ebiet.’ (Ndien kpukpru owo ẹnyene ndibọrọ, ‘Amen!’)+

16 “‘Ọdọdiọk ọnọ owo eke esịnde ete esie ye eka esie ke ndek.’+ (Ndien kpukpru owo ẹnyene ndibọrọ, ‘Amen!’)

17 “‘Ọdọdiọk ọnọ owo eke esịkde adan̄a ekemmọ owo.’+ (Ndien kpukpru owo ẹnyene ndibọrọ, ‘Amen!’)

18 “‘Ọdọdiọk ọnọ owo eke anamde nnan otụn usụn̄.’+ (Ndien kpukpru owo ẹnyene ndibọrọ, ‘Amen!’)

19 “‘Ọdọdiọk ọnọ owo eke akwan̄ade+ ikpe+ esenowo+ ye eyenakpa ye ebeakpa.’+ (Ndien kpukpru owo ẹnyene ndibọrọ, ‘Amen!’)

20 “‘Ọdọdiọk ọnọ owo eke adan̄de n̄wan ete esie, koro enye ofụhọrede ete esie ọfọn̄.’+ (Ndien kpukpru owo ẹnyene ndibọrọ, ‘Amen!’)

21 “‘Ọdọdiọk ọnọ owo eke adan̄de unam+ ekededi.’ (Ndien kpukpru owo ẹnyene ndibọrọ, ‘Amen!’)

22 “‘Ọdọdiọk ọnọ owo eke adan̄de eyeneka esie an̄wan m̀mê eyenete esie an̄wan.’+ (Ndien kpukpru owo ẹnyene ndibọrọ, ‘Amen!’)

23 “‘Ọdọdiọk ọnọ owo eke adan̄de eka an̄wan esie.’+ (Ndien kpukpru owo ẹnyene ndibọrọ, ‘Amen!’)

24 “‘Ọdọdiọk ọnọ owo eke edịbede owot ekemmọ owo.’+ (Ndien kpukpru owo ẹnyene ndibọrọ, ‘Amen!’)

25 “‘Ọdọdiọk ọnọ owo eke ọbọde ubọkedem aka ndiwot ukpọn̄ eke mîduehe isop.’+ (Ndien kpukpru owo ẹnyene ndibọrọ, ‘Amen!’)

26 “‘Ọdọdiọk ọnọ owo eke mîdinamke mme ikọ ibet emi.’+ (Ndien kpukpru owo ẹnyene ndibọrọ, ‘Amen!’)