Deuteronomy

28 “Ndien ama ekem edieke afo edikopde uyo Jehovah Abasi fo edinyụn̄ etịmde anam kpukpru mme ewụhọ esie emi n̄wụkde fi mfịn emi,+ Jehovah Abasi fo n̄ko ayanam fi okon̄ akan kpukpru mme idụt eken ke isọn̄.+ 2 Ndien kpukpru mme edidiọn̄ emi ẹyetiene fi ẹnyụn̄ ẹsịm fi,+ koro afo okopde uyo Jehovah Abasi fo:

3 “Ọyọfọn ọnọ fi ke obio,+ oyonyụn̄ ọfọn ọnọ fi ke in̄wan̄.+

4 “Ọyọfọn ọnọ mfri idịbi+ fo ye mfri in̄wan̄ fo ye mfri idịbi ufene+ fo, mme abak enan̄ fo ye nditọerọn̄ fo.+

5 “Ọyọfọn ọnọ akpasa+ fo ye n̄kpọ unuak ndomuyo fo.+

6 “Ọyọfọn ọnọ fi ke ini afo odụkde, oyonyụn̄ ọfọn ọnọ fi ke ini afo ọwọrọde.+

7 “Jehovah ayanam fi akan mme asua fo emi ẹdahade ẹda ẹn̄wana ye afo.+ Mmọ ẹyesan̄a ke usụn̄ kiet ẹdi ndin̄wana ye afo, edi mmọ ẹyefen̄e ke iso fo ke usụn̄ itiaba.+ 8 Jehovah oyowụk ete edidiọn̄ esịm fi ke ufọk ubonn̄kpọ fo+ ye ke kpukpru se afo anamde,+ enye oyonyụn̄ ọdiọn̄ fi ke isọn̄ emi Jehovah Abasi fo ọnọde fi. 9 Jehovah ayanam fi edi edisana ikọt esiemmọ,+ kpa nte enye ọkọn̄wọn̄ọde ọnọ fi,+ koro afo enịmde mme ewụhọ+ Jehovah Abasi fo, onyụn̄ asan̄ade ke mme usụn̄ esie. 10 Ndien kpukpru owo ke isọn̄ ẹyekụt ke afo ekere enyịn̄ adian Jehovah,+ ndien mmọ ẹyebak fi.+

11 “Jehovah oyonyụn̄ anam mfri idịbi fo+ ye mfri idịbi ufene fo ye mfri in̄wan̄ fo ẹwak etieti,+ ke isọn̄ emi Jehovah ọkọn̄wọn̄ọde ọnọ mme ete ete fo ete iyọnọ fi.+ 12 Jehovah eyeberede ebiet ubon nti n̄kpọ esie, kpa heaven, ọnọ fi, man ọnọ isọn̄ fo edịm ke ini esie+ onyụn̄ ọdiọn̄ kpukpru utom ubọk fo;+ ndien afo ọyọnọ ediwak idụt n̄kpọ ke ebuọt, edi afo udubọhọ n̄kpọ ke ebuọt.+ 13 Ndien Jehovah eyenịm fi ke ibuot, idinịmke ke isịm; ndien afo edidoro ke enyọn̄ kpọt,+ ududụhe ke idak, koro afo enịmde mme ewụhọ+ Jehovah Abasi fo, emi ntemede fi mfịn emi nte enịm onyụn̄ anam. 14 Kûwọn̄ọde ukpọn̄ kpukpru ikọ emi ntemede mbufo mfịn emi, uka nnasia m̀mê ufien,+ utiene mme abasi en̄wen unyụn̄ unam n̄kpọ+ mmọ.

15 “Ndien ama ekem edieke afo mûkopke uyo Jehovah Abasi fo mûnyụn̄ utịn̄ke enyịn unam kpukpru mme ibet ye mme ewụhọ esie emi n̄wụkde fi mfịn emi, kpukpru isụn̄i emi ẹyetiene fi ẹnyụn̄ ẹsịm fi:+

16 “Ọyọdiọk ọnọ fi ke obio,+ ọyọdiọk ọnọ fi ke in̄wan̄.+

17 “Ọyọdiọk ọnọ akpasa+ fo ye n̄kpọ unuak ndomuyo fo.+

18 “Ọyọdiọk ọnọ mfri idịbi+ fo ye mfri in̄wan̄+ fo ye mme abak enan̄ fo ye nditọerọn̄ fo.+

19 “Ọyọdiọk ọnọ fi ke ini afo odụkde, oyonyụn̄ ọdiọk ọnọ fi ke ini afo ọwọrọde.+

20 “Jehovah ayanam isụn̄i+ ye ndutịme+ ye ufen ẹsịm fi ke kpukpru n̄kpọ eke afo odomode ndinam, tutu ẹsobo fi ẹfep, afo onyụn̄ awara atak, ke ntak idiọk edinam fo, koro afo ọkọkpọn̄de mi.+ 21 Jehovah ayanam idiọk udọn̄ọ eyịre fi tutu enye osobo fi efep ke isọn̄ emi afo akade ndida nnyene.+ 22 Jehovah ayada akpaikpai ikọn̄+ ye ọkpọsọn̄ ufiopidem ye ikan̄ekpo ye n̄kunya ye akan̄kan̄+ ye ufiop eyo+ ye mfụt+ etiene fi, ndien mmọ ẹyebịne fi tutu afo atak. 23 Ikpaenyọn̄ emi ofụkde fi ibuot ayakabade okpoho, isọn̄ emi odude fi ke idak oyonyụn̄ akabade ukwak.+ 24 Jehovah ayanam ntọn̄ ye obu ẹdep nte edịm ke isọn̄ fo. Mmọ ẹyeto ke heaven ẹdep fi ke idem tutu ẹsobo fi ẹfep. 25 Jehovah ayanam fi asuana ke iso mme asua fo.+ Afo ayasan̄a ke usụn̄ kiet aka ndin̄wana ye mmọ, edi afo eyefehe ke iso mmọ ke usụn̄ itiaba; ndien ndịk ayanam kpukpru mme obio ubọn̄ isọn̄ aban̄a se iwọrọde fi.+ 26 Ndien okpo fo eyedi udia mme edibotn̄kpọ eke ẹfede ke enyọn̄ ye mme unam ikọt, ndien ididụhe owo eke edinamde mmọ ẹdịghe.+

27 “Jehovah ayada mbufụt Egypt+ ye itu ye ndiọn̄ ye mbọn̄ etiene fi, ndien ididụhe owo eke edikemede ndikọk fi. 28 Jehovah ayada udọn̄ọ idat+ ye nnan+ ye editịmede esịt etiene fi.+ 29 Ndien afo ọyọfiọn̄ọ ubọk asan̄a ke ufọt uwemeyo, kpa nte nnan ọfiọn̄ọde ubọk asan̄a ke ekịm,+ ndien afo udukwe unen ke usụn̄ fo; ndien afo eyedi owo emi ẹtụkde ẹnyụn̄ ẹwode kpukpru ini, ndien ididụhe owo eke anyan̄ade fi.+ 30 Afo oyodụk ediomi ndọ ye eyenan̄wan, edi owo en̄wen ayadan̄ enye ke n̄kanubọk.+ Afo ọyọbọp ufọk, edi ududụn̄ke ke esịt.+ Afo ọyọtọ in̄wan̄ vine, edi ududiaha mfri esie.+ 31 Afo oyokụt nte ẹwotde enan̄ fo—edi udutaha baba kiet. Ẹyebọ fi ass fo ke n̄kanubọk—edi enye iditọn̄ọke ntak inyọn̄ itiene fi. Ẹyeda mme erọn̄ fo ẹnọ mme asua fo—edi ididụhe owo eke anyan̄ade mmọ ọnọ fi.+ 32 Ẹyeda nditọiren fo ye nditọiban fo ẹnọ idụt efen+ ndien enyịn fo oyokụt, mmọ ẹyenyụn̄ ẹdọn̄ fi itọn̄ kpukpru ini—edi udunyeneke odudu.+ 33 Mbon oro afo mûfiọkke ẹyedia mfri in̄wan̄ fo ye kpukpru mbun̄wụm fo;+ ndien afo eyedi owo emi ẹtụkde ẹnyụn̄ ẹfịkde kpukpru ini.+ 34 Ndien se enyịn fo ẹdikụtde ẹyenam fi adama idat.+

35 “Jehovah ayada ata idiọk mbufụt emi owo mîdikemeke ndikọk etịm fi ke edọn̄ mbiba ye ke ukot mbiba, ọtọn̄ọde ke ekaikpat fo tutu esịm etịn̄ibuot fo.+ 36 Jehovah ayada fi+ ye edidem fo+ eke afo edimekde ete akara fi aka idụt eke afo ye mme ete ete fo mîkọfiọkke; ndien do ke afo edinam n̄kpọ mme abasi efen, eke eto ye eke itiat.+ 37 Ndien afo eyedi n̄kpọ n̄kpaidem+ ye ufiet+ ye isụn̄i ke otu kpukpru mme idụt eke Jehovah edidade fi aka.

38 “Afo ayasuan ediwak n̄kpasịp ke in̄wan̄, edi editan̄ esisịt,+ koro n̄kukun̄kpọyọriyọ ẹditade mmọ.+ 39 Afo ọyọtọ in̄wan̄ vine onyụn̄ ọdiọn̄, edi udun̄wọn̄ke wine, udunyụn̄ utetke mfri,+ koro utụn̄ ẹditade mmọ.+ 40 Afo eyenyene eto olive ke ofụri obio fo, edi udufiọn̄ọke aran, koro olive fo ẹyebehe.+ 41 Afo oyobon nditọiren ye nditọiban, edi mmọ idikaha iso idu ye afo, koro ẹyeda mmọ ẹka ntan̄mfep.+ 42 N̄kpọnta ẹyeta kpukpru eto fo ye mfri in̄wan̄ fo. 43 Esenowo eke odude ye afo ọyọdọdiọn̄ oforo akan fi, ke adan̄aemi afo edidiọn̄de-diọn̄ ebuene.+ 44 Enye ọyọnọ fi n̄kpọ ke ebuọt, edi afo udunọhọ enye n̄kpọ ke ebuọt.+ Enye eyedi ibuot, edi afo edidi isịm.+

45 “Ndien kpukpru isụn̄i+ emi ẹyetiene fi ẹnyụn̄ ẹbịne fi ẹnyụn̄ ẹsịm fi tutu ẹsobo fi ẹfep,+ koro afo mûkokopke uyo Jehovah Abasi fo, mûkonyụn̄ unịmke mme ibet esie ye mme ewụhọ esie emi enye okowụkde fi.+ 46 Ndien mmọ ẹyedoro fi ye nditọ fo ke idem nte idiọn̄ọ ye utịben̄kpọ ke nsinsi,+ 47 koro mûkanamke n̄kpọ Jehovah Abasi fo ke idatesịt ye inemesịt+ ke ini kpukpru n̄kpọ ẹwakde.+ 48 Ndien afo ayanam n̄kpọ mme asua fo+ emi Jehovah edidọn̄de ẹtiene fi, ke biọn̄+ ye nsatitọn̄ ye iferi ye unana kpukpru n̄kpọ; ndien enye ọyọkọn̄ọ fi ọkpọnọ ukwak ke itọn̄, tutu enye osobo fi efep.+

49 “Jehovah ayanam idụt ke anyan ebiet,+ ke utịt isọn̄, adaha an̄wana ye afo, kpa nte ntrukpom ofụkde unam omụm,+ idụt eke afo mûdukopke usem mmọ,+ 50 idụt eke ọsọn̄de iso,+ emi mînamke n̄kpọ ke asari ye akani eren, mîdinyụn̄ ituaha akparawa owo mbọm.+ 51 Ndien mmọ ẹyeta nditọ ufene fo ẹnyụn̄ ẹdia mfri in̄wan̄ fo, tutu ẹsobo fi ẹfep,+ mmọ idinyụn̄ iyakke wheat ye obufa wine m̀mê aran ye mme abak enan̄ fo m̀mê nditọerọn̄ fo ẹsụhọ ẹnọ fi tutu mmọ ẹsobo fi ẹfep.+ 52 Ndien mmọ ẹyekan fi ẹkụk ke kpukpru mme obio fo tutu edikon̄ ye n̄kpọsọn̄ ibibene fo emi afo ọbuọtde idem ke esịt ẹduọn̄ọ ke ofụri isọn̄ fo, ih, mmọ ẹyekan fi ẹkụk ke kpukpru obio fo ke ofụri isọn̄ fo, emi Jehovah Abasi fo ọnọde fi.+ 53 Ndien afo ayata mfri idịbi fo, kpa obụk nditọiren fo ye obụk nditọiban fo,+ emi Jehovah Abasi fo ọnọde fi, ke ntak mbaba ye afanikọn̄ emi mme asua fo ẹdikụkde fi ẹsịn.

54 “Ndien amaedi eren emi odude ye afo, emi mîsọn̄ke idem ẹnyụn̄ ẹdekde-dek, enye ayada idiọk enyịn+ ese eyeneka esie ye edima an̄wan esie ye nditọ esie emi ẹsụhọde, 55 idinyụn̄ inọhọ owo mmọ baba kiet obụk nditọ esie emi enye editade, koro baba n̄kpọ kiet mîsụhọke inọ enye ke ntak mbaba ye afanikọn̄ emi mme asua fo ẹdikụkde fi ẹsịn ke kpukpru mme obio fo.+ 56 Amaedi n̄wan emi odude ye afo, emi mîsọn̄ke idem ẹnyụn̄ ẹdekde-dek, emi mîdehedei iyak ikpat esie otụk isọn̄ ke ntak emi enye mîsọn̄ke idem emi ẹnyụn̄ ẹdekde-dek,+ enye ayada idiọk enyịn ese edima ebe esie ye eyeneren esie ye eyenan̄wan esie, 57 ye ebiet-eyen eke otode enye n̄kpatian̄ ukot ọwọrọ ye nditọiren esie emi enye amande,+ koro enye ayata mmọ ke ndịbe ke ntak ananade kpukpru n̄kpọ ye ke ntak mbaba ye afanikọn̄ emi mme asua fo ẹdikụkde fi ẹsịn ke obio fo.+

58 “Edieke afo mûtịn̄ke enyịn unam kpukpru ikọ ibet emi ẹwetde ke n̄wed emi+ man abak ubọn̄ ubọn̄+ ye enyene-uten̄e+ enyịn̄ emi, Jehovah,+ kpa Abasi fo, 59 Jehovah ayanam ufen fo ye ufen nditọ fo ẹnen̄ede ẹsọn̄ ubọk, ikpọ ufen+ emi ẹbịghide, ye ata ndiọi udọn̄ọ+ emi ẹbịghide. 60 Ndien enye ayada kpukpru ndiọi udọn̄ọ Egypt emi afo okokopde ndịk aban̄a etiene fi, ndien mmọ ẹyeyịre fi.+ 61 N̄ko, amaedi udọn̄ọ ekededi ye ufen ekededi emi owo mîwetke ke n̄wed ibet emi, Jehovah ayanam mmọ ẹtiene fi tutu ẹsobo fi ẹfep. 62 Ndien ata esisịt ibat owo ẹdisụhọ ẹnọ mbufo,+ okposụkedi mbufo ẹkewakde nte ntantaọfiọn̄ ke ikpaenyọn̄,+ koro afo mûkokopke uyo Jehovah Abasi fo.

63 “Ndien ama ekem, kpa nte Jehovah akadatde esịt aban̄a mbufo ndifọn ye mbufo nnyụn̄ nnam mbufo ẹwak,+ kpa ntre ke Jehovah edinyụn̄ adat esịt ndiwot mbufo nnyụn̄ nsobo mbufo;+ ndien ẹyesọhi mbufo ẹfep ke isọn̄ emi mbufo ẹkade ndida nnyene.+

64 “Ndien Jehovah ayasuan fi ọdọn̄ ke otu kpukpru mme idụt, ọtọn̄ọde ke utịt isọn̄ kiet tutu esịm ke utịt isọn̄ eken,+ ndien do ke afo edinam n̄kpọ mme abasi efen emi afo ye mme ete ete fo mîkọfiọkke, eke eto ye eke itiat.+ 65 Ndien afo ududụhe ke ifụre+ ke otu mme idụt oro, ebiet nduọkodudu idinyụn̄ idụhe inọ ekaikpat fo; ndien do ke Jehovah edinọ fi esịt ndịk+ ye n̄kịmenyịn+ ye oyomonsia. 66 Uwem fo oyonyụn̄ odu ke ọkpọsọn̄ ndịk, afo oyonyụn̄ edịghe ke okoneyo ye ke uwemeyo, udunyụn̄ utịmke ufiọk se uwem fo ediwọrọde.+ 67 Afo ọyọdọhọ ke usenubọk ete, ‘Akpakam edi mbubreyo!’ oyonyụn̄ ọdọhọ ke mbubreyo ete, ‘Akpakam edi usenubọk!’ ke ntak emi esịt editịmerede fi ye ke ntak se enyịn fo edikụtde.+ 68 Ndien Jehovah ayada fi afiak aka Egypt ke ubom ke usụn̄ emi n̄kọdọhọde fi mban̄a nte, ‘Udukwe enye aba,’+ ndien do ke mbufo ẹdinyam idem mbufo ẹnọ mme asua mbufo nte ifịn iren ye ifịn iban,+ edi owo eke edepde ididụhe.”