1 Chronicle
15 Ndien enye aka iso ọbọp mme ufọk+ ọnọ idemesie ke Obio David; ndien enye etịm itie+ ọnọ ekebe ata Abasi onyụn̄ owụk tent ọnọ enye. 2 Adan̄aoro ke David ọkọdọhọ ete: “Baba owo kiet inyeneke ndimen ekebe ata Abasi ke mîbọhọke nditọ Levi, koro edi mmọ ke Jehovah ekemek ete ẹmen ekebe Jehovah+ ẹnyụn̄ ẹsan̄a utom+ ẹnọ imọ ke nsinsi nsinsi.” 3 Ndien David osop ofụri Israel ọtọkiet ke Jerusalem+ man ẹmen ekebe+ Jehovah ẹdọk ẹdi itie emi enye eketịmde ọnọ enye.
4 Ndien David obon nditọ Aaron+ ye nditọ Levi ọtọkiet; 5 ke otu nditọ Kohath, Uriel+ etubom ye nditọete esie, owo ikie ye edịp; 6 ke otu nditọ Merari,+ Asaiah+ etubom ye nditọete esie, owo ikie iba ye edịp; 7 ke otu nditọ Gershom,+ Joel+ etubom ye nditọete esie, owo ikie ye edịp ye duop; 8 ke otu nditọ Elizaphan,+ Shemaiah+ etubom ye nditọete esie, owo ikie iba; 9 ke otu nditọ Hebron, Eliel etubom ye nditọete esie, owo anan̄; 10 ke otu nditọ Uzziel,+ Amminadab etubom ye nditọete esie, owo ikie ye duopeba. 11 N̄ko-n̄ko, David okot Zadok+ ye Abiathar+ mme oku, ye nditọ Levi kpa Uriel,+ Asaiah+ ye Joel,+ Shemaiah+ ye Eliel+ ye Amminadab, 12 ndien enye ọdọhọ mmọ ete: “Mbufo ẹdi mme etubom+ mme ete nditọ Levi. Mbufo ẹnam idem mbufo asana,+ mbufo ye nditọete mbufo, ndien mbufo ẹnyene ndimen ekebe Jehovah Abasi Israel ndọk ndi itie emi ami n̄ketịmde nnọ enye. 13 Koro mbufo mîkanamke ntre ke akpa ini,+ Jehovah Abasi nnyịn obụmede an̄wana ye nnyịn,+ sia nnyịn mîkoyomke enye nte ido edide.+ 14 Ntre mme oku ye nditọ Levi ẹnam idemmọ asana+ man ẹkemen ekebe Jehovah Abasi Israel ẹdọk ẹdi.
15 Ekem nditọ Levi ẹka ẹkemen+ ekebe ata Abasi ke mme eto esie ẹbiom ke afara mmọ,+ kpa nte Moses okowụkde ke uyo Jehovah. 16 Ndien David ọdọhọ mme etubom nditọ Levi ete ẹnịm nditọete mmọ emi ẹdide mme ọkwọikwọ,+ ẹnam mmọ ẹkama mme n̄kpọ ubre ikwọ,+ kpa ndido urụk+ ye mme harp+ ye mme usan n̄kukwak,+ ẹbre ikwọ uyo ọsọn̄ man ẹnam ẹkop n̄kpo idara.
17 Ntem nditọ Levi ẹnịm Heman+ eyen Joel, ndien ke otu nditọete esie, ẹnịm Asaph+ eyen Berechiah; ke otu nditọ Merari nditọete mmọ, ẹnịm Ethan+ eyen Kushaiah; 18 ndien nditọete mmọ eke ọyọhọ otu iba ẹdu ye mmọ,+ oro edi, Zechariah,+ Ben ye Jaaziel ye Shemiramoth ye Jehiel ye Unni, Eliab ye Benaiah ye Maaseiah ye Mattithiah ye Eliphelehu ye Mikneiah, ye Obed-edom+ ye Jeiel mme ekpeme-inuaotop, 19 ndien mme ọkwọikwọ kpa Heman,+ Asaph+ ye Ethan, ẹkwak usan n̄kukwak okpoho uyo ọsọn̄;+ 20 ndien Zechariah ye Aziel+ ye Shemiramoth ye Jehiel ye Unni ye Eliab ye Maaseiah ye Benaiah ẹnyụn̄ ẹda ndido urụk ẹkwọ Alamoth,+ 21 ẹnyụn̄ ẹnịm Mattithiah+ ye Eliphelehu ye Mikneiah ye Obed-edom ye Jeiel ye Azaziah ndida harp+ n̄kwọ Sheminith,+ man ẹnam n̄kpọ nte mme adausụn̄; 22 ẹnyụn̄ ẹnịm Chenaniah+ ke etubom nditọ Levi ndise mban̄a edibiom Ekebe, enye eteme nte ẹbiomde, koro enye ekenyenede usọ;+ 23 ndien Berechiah ye Elkanah ẹdi mme ekpeme-inuaotop+ Ekebe oro; 24 ndien Shebaniah ye Joshaphat ye Nethanel ye Amasai ye Zechariah ye Benaiah ye Eliezer oku ẹfri obukpon̄+ ke ọkpọsọn̄ uyo ke iso ekebe ata Abasi, Obed-edom ye Jehiah ẹnyụn̄ ẹdi mme ekpeme-inuaotop itie Ekebe oro.
25 Ndien David+ ye mbiowo Israel+ ye mme etubom+ mme tọsịn ẹkedi mbon emi ẹkesan̄ade ẹka ndimen ekebe ediomi Jehovah ke ufọk Obed-edom+ ndọk ndi ye idara.+ 26 Ndien edikem ke ata Abasi ama akan̄wam+ nditọ Levi ke ini mmọ ẹmende ekebe ediomi Jehovah, mmọ ẹwa abak nyara enan̄ itiaba ye okukịm erọn̄ itiaba.+ 27 Ndien David esịne anana-ubọk kod emi ẹdade eti ọfọn̄ ẹnam, ntre n̄ko ye kpukpru nditọ Levi emi ẹbiomde Ekebe ye mme ọkwọikwọ ye Chenaniah+ kpa etubom mme obiom Ekebe, emi ẹkedide mme ọkwọikwọ;+ edi David esịne ephod+ linen. 28 Ndien kpukpru nditọ Israel ẹmen ekebe ediomi Jehovah ẹdọk ẹdi ye n̄kpo idara+ ẹnyụn̄ ẹfri nnụk+ ye obukpon̄,+ ẹkwak usan n̄kukwak+ ẹnyụn̄ ẹbre ndido urụk ye harp+ ke ọkpọsọn̄ uyo.
29 Edikem ke ini ekebe ediomi+ Jehovah edide edisịm Obio David, Michal,+ eyen Saul, osio iso ke window okụt nte Edidem David enekde unek onyụn̄ adarade;+ ndien enye ese edidem ke ndek+ ke esịt esie.