Ibuot 9
Mme Ada Udeme Obio Ubọn̄ Ẹmụm Nsọn̄ọnda Ẹkama
1. (a) Ntak emi Jesus ọkọbọde enyịn̄ emi ọfọnde akan? (b) Mmanie ẹkeme ndibọ ufọn nto uwụtn̄kpọ esie, ndien ke nso usụn̄?
KE NDINAM akpanikọ tutu osịm n̄kpa, Jesus ama ọbọ enyịn̄ emi otịmde ọfọn akan eke mme angel. Ke otu kpukpru mme enyene ifiọk edibot n̄kpọ Abasi, enye edi Enyeemi akanamde owụt nte ke eyen Abasi emekeme ndimụm mfọnmma nsọn̄ọnda n̄kama ke n̄kan̄ Abasi, ntem owụtde Satan nte osu nsu. Nte ekemde, apostle Paul ewet ete: “Ke Enye ama akama utom edinam owo ẹsana ke mme idiọkn̄kpọ [oto ke ndinọ ufak], Enye osụhọde etetie ke ubọk nnasia Andinyene ubọn̄ ke enyọn̄.” Nso akwa uwụtn̄kpọ ke enye okonịm ntem ọnọ kpukpru mbon oro ẹtiede ẹbet ‘edidi’ Obio Ubọn̄ oro—mbon oro ẹdide eke “ekpri otu eṛon̄” oro ẹdade obio ubọn̄ eke heaven ẹnyene ye mmọ oro ẹdidide mme andidu ke idak obio ubọn̄ oro ke isọn̄! Nte ukem apostle oro ekewetde ke ukperedem: “Ẹyak ifehe mbuba eke anade nnyịn ke iso ye ime, iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama; emi okobiomde [eto ndutụhọ], onyụn̄ abatde bụt ke ekpri n̄kpọ kaban̄a idatesịt eke anade Enye ke iso; okonyụn̄ osụhọrede etetie ke ubọk nnasia ebekpo Abasi.”—Mme Hebrew 1:3, 4; 12:1, 2.
2-4. (a) Didie ke Jesus akakaiso ọnọ ukpep onyụn̄ atan̄ mme mbet esie obok kaban̄a utom ukwọrọikọ? (b) Nnyịn isan̄a didie ifiọk nte ke mmọ ẹma ẹda “eti mbụk” oro ẹsọk mme owo ke mme ufọk mmọ? (c) Nso eti uwụtn̄kpọ ke edinam emi okonịm ọnọ ikọt Abasi mfịn?
2 Idịghe edifọn uwụtn̄kpọ ikpọn̄îkpọn̄ ke Jesus ọkọnọ mme anditiene enye, edi enye n̄ko ama eteme onyụn̄ ọnọ mmọ ukpep, man mmọ ẹdikeme ndikaiso ke utom Abasi ke enye ama ọnyọn̄.
“Enye asan̄a ke ikpọ obio ye obio in̄wan̄, ọkwọrọ onyụn̄ obụk eti mbụk Ubọn̄ Abasi, mbet duopeba ẹnyụn̄ ẹsan̄a ye Enye.”—Luke 8:1.
3 Ke ukperedem, Jesus ama osio mme mbet duopeba oro ọdọn̄ ete ẹka ke idemmọ “ẹkọkwọrọ Ubọn̄ Abasi, ẹnyụn̄ ẹnam mbon udọn̄ọ ẹkop nsọn̄idem.” “Ndien mmọ ẹdaha ẹkasan̄a ke kpukpru obio in̄wan̄ ẹkwọrọ gospel, ẹnyụn̄ ẹnam udọn̄ọ ẹkụre ke kpukpru ebiet.” (Luke 9:2, 6) Mmọ ẹkenyene ndiyom mbon ẹmi ẹdotde ke mme ikpọ obio ye ke mme obio in̄wan̄, ndien mmọ ẹkenam emi oto ke ndika ntiene mme owo ẹmi ke ufọk mmọ. Enye ama oyom uko uko edimụm nsọn̄ọnda n̄kama oto mmọ, kpasụk nte oyomde oto Mme Ntiense Jehovah ke ediwak efakutom mfịn, ke ntak edibiọn̄ọ emi ẹbiọn̄ọde etop emi. Jesus ọkọdọhọ: “Ndien edieke ufọk oro odotde, yak emem mbufo odoro ke esịt; edi edieke ufọk oro mîdotke, yak emem mbufo afiak etiene mbufo. Owo ekededi eke mînyịmeke ndidara mbufo, nnyụn̄ n̄kop ikọ mbufo, ke ini mbufo ẹwọn̄ọde ke ufọk m̀mê ke obio oro, ẹken̄ ntan ikpat mbufo ẹduọk.”—Matthew 10:7, 11-14.
4 Ekem, ke ini Jesus okosiode mme mbet 70 eken ọdọn̄, enye ama ọdọhọ mmọ ete: “Sese, mmesio mbufo ndọn̄ nte nditọ erọn̄ ke ufọt mme ekpe ikọt.” Mmọemi, nde, ẹkenyene ndika ke ufọk mme owo, koro Jesus ama akaiso ndidọhọ ete: “Ufọk ekededi eke mbufo ẹdụkde, ẹbemiso ẹdọhọ ẹte, Yak emem odu ke ufọk emi. Ndien edieke eyen emem odude do, emem mbufo eyedoro enye ke idem: edi edieke eyen emem mîdụhe, emem mbufo eyefiak etiene mbufo.” Idem edieke mme owo oro mîkpan̄ke utọn̄ inọ “eti mbụk,” ẹkenyene nditọt mmọ nte ke obio ubọn̄ Abasi ke asan̄a ekpere! (Luke 10:3-11) Emi onịm eti uwụtn̄kpọ ọnọ utom oro Mme Ntense Jehovah ẹnamde mfịn, nte mmọ ẹsan̄ade ke ufọk ke ufọk ye etop idọn̄esịt ye eke ntọt emi otode Abasi.—Isaiah 61:1, 2.
NDIKWỌRỌ IKỌ KPA YE UKỌBỌ
5. Ke nso mme usụn̄ ke Jesus emi ẹkenamde eset ọkọsọn̄ọ etịn̄ orụk utom emi odude ke iso ọnọ mme anditiene enye?
5 Ke n̄kpa Jesus, mme mbet oro ẹma ẹsuana. Edi ediwak ini ke etienede ediset ke n̄kpa esie ke spirit enye ama owụt mmọ idem ke idem eke obụk oro emende-men esịne, ndinam mmọ ẹtịm ẹfiọk ẹnyụn̄ ẹsọn̄ idem. (1 Corinth 15:3-8) Ke kiet ke otu mme ini ẹmi Jesus ama obụp Peter ikata m̀mê enye ama imọ. Peter ama okop mfụhọ aban̄a emi, edi Jesus ama ọsọn̄ọ etịn̄ ikata ete, nte idiọn̄ọ ima, ana Peter ọbọk onyụn̄ ekpeme “mme erọn̄” esie, kpa “nditọ erọn̄” esie. (John 21:15-17) Ke ini ediwụt idem efen, Jesus ama ọdọhọ mme anam-akpanikọ mbet esie 11 ete:
“Ệnọ Mi ofụri odudu ke heaven ye ke isọn̄. Mbufo ẹka ẹkanam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu osịm utịt ererimbot.” (Matthew 28:18-20)
Ekese utom ke okodu ke iso ọnọ mmọ.
6. Ntak emi mme mbet Jesus ẹdinamde ‘utom eke okponde akan’?
6 Jesus ama ọdọhọ mme mbet esie ete: “Ke akpanikọ ke ndọhọ mbufo, Owo eke ọbuọtde idem ye Ami eyenyụn̄ anam utom eke Ami nnamde; enye eyenyụn̄ anam utom eke okponde akan oro: sia Ami nnyọn̄de ntiene Ete.” (John 14:12) Mmọ ẹyekụre efakutom oro otịmde okpon akan se enye okokụrede ẹnyụn̄ ẹda utom edikwọrọ obio ubọn̄ Abasi emi ẹkaiso ke ini otịmde ebịghi akan.
7. Nso utịben̄kpọ akada osịm ọyọhọ edinọ ikọ ntiense ke usen Pentecost, ndien ye nso n̄wọrọnda utịp?
7 Ke ama okosịm ubọk nnasia Ete esie ke heaven, Jesus ama anam n̄kpọ oro akpade owo idem. Ke usen Pentecost, 33 C.E., enye ama an̄wan̄a edisana spirit ọduọk mme mbet esie oro ẹkebetde, ẹyetde mmọ aran ndidi mme ada udeme ye enye ke obio ubọn̄ Abasi eke heaven. Ke akpatre, ẹyemek owo 144,000 ẹsio ke otu ubonowo ndidi ndidem ye mme oku ke heaven ye Christ. Nte utịp ọkpọsọn̄ ikọ ntiense oro ẹkenọde ke usen kiet oro kpọt, mme Jew ye mme andikpono Abasi ke ido mme Jew 3,000 ẹma ẹnyịme ikọ oro ke ofụri esịt ẹnyụn̄ ẹna baptism.—John 14:2, 3; Eriyarare 14:1-5; 20:4, 6; Utom Mme Apostle 2:1-4, 14, 40, 41.
8-11. (a) Nso ntuaha ke emi ekedemede ke ufọt mme adaiso mme Jew oro ye mme apostle? (b) Didie ke mme apostle ẹkewụt idemmọ nte mme andimụm nsọn̄ọnda n̄kama? (c) Nte ekemde ye N̄wed Utom Mme Apostle 5:40-42, nso eti uwụtn̄kpọ ke mme apostle oro ẹkenịm ẹnọ ikọt Abasi mfịn?
8 Edikwọrọ “eti mbụk” oro ama atara ke ofụri Jerusalem nte ikan̄ ndak. Ndien kpasụk ntre ke ukọbọ akatara. Ibịghike ẹma ẹmụm mme apostle ẹka iso mme Jew ke esop Sanhedrin ẹnyụn̄ ẹkpan mmọ ẹte ẹkûtịn̄ ikọ ke enyịn̄ Jesus. Nte mmọ ẹyemụm nsọn̄ọnda mmọ ẹkama? Peter ye John ẹma ẹbọrọ ẹte: “Mbufo ẹkam ẹkere m̀mê enen ke enyịn Abasi ndikop uyo mbufo n̄kan eke Abasi: koro nnyịn mîkemeke nditre nditịn̄ se nnyịn ikokụtde inyụn̄ ikopde.” Ẹma ẹsana mme apostle oro ẹyak isan̄ emi, ndien mmọ ye mme nsan̄a mmọ inikiet ẹma ẹnọ Abasi ekọm, ẹben̄ede enye ẹte: “Ndien ke emi, Jehovah, . . . nọ mme asan̄autom Fo odudu nditịn̄ ikọ Fo ke ofụri uko.” Ntem mmọ ẹma ẹkaiso ndikwọrọ ikọ ye un̄wam spirit Jehovah.—Utom Mme Apostle 4:19, 20, 29, 31.
9 Mme adaiso ido ukpono oro ẹfiak ẹmụm mme apostle ẹnyụn̄ ẹsịn mmọ ke ufọk n̄kpọkọbi. Edi ikedịghe uduak Abasi nte mmọ ẹdu do. Ke okoneyo angel Jehovah ama osion̄o mmọ, anam ke ini eyo esierede, ẹkụt mmọ ẹfiakde ẹkpep owo n̄kpọ ke temple ke Jerusalem.—Utom Mme Apostle 5:17-21.
10 Nso ke Sanhedrin oro akpanam man akpan “eti mbụk” ndisuana? Ini kiet efen ẹma ẹfiak ẹda mme apostle oro ẹdi esop, ndien akwa oku obụp mmọ ete: “Nnyịn ima isọn̄ uyo ikpan mbufo, ite ẹkûkpep aba n̄kpọ ke enyịn̄ [Jesus] emi: ndien sese, ẹmọyọhọ Jerusalem ye ukpepn̄kpọ mbufo, ẹnyụn̄ ẹyom iyịp owo emi ọkọbọ nnyịn.” Ibọrọ unana edikan̄ mbuọtidem eke mme apostle oro ekedi, ke onyụn̄ osụk edi ke ofụri isua ikie-19 emi ebede:
“Nnyịn inyene ndikop uyo Abasi n̄kan uyo owo”!
Nso ke mme Jew oro edinam mbon oro ẹmụmde nsọn̄ọnda mmọ ẹkama mi? Gamaliel emi ekedide ekpepibet ama ọnọ enyene ọniọn̄ item ete: “Ẹdianade ẹkpọn̄ mmọemi, ẹsana mmọ ẹyak: koro edieke odu emi m̀mê utom emi otode owo, eyewụre: edi edieke otode Abasi, mbufo idikemeke ndiwụri mmọ; mbak m̀mê mbufo ediyoho idem nte ẹn̄wanade ye Abasi.”—Utom Mme Apostle 5:27-39.
11 Ntem ẹma ẹmịn̄a mme apostle oro, ẹwụk mmọ ẹte ẹtre nditịn̄ ikọ ẹnyụn̄ ẹsana mmọ ẹyak. Mmọ ẹkenam n̄kpọ didie ẹban̄a emi? Mmọ ẹma ẹdara koro ẹkebatde ẹte mmọ ẹmedot ndibọ esuene ke ntak enyịn̄ Jesus.
“Ndien kpukpru usen, ke temple ye ke ufọk, mmọ idopke uyo ndikpep nnyụn̄ n̄kwọrọ, nte Jesus edi Christ.” (Utom Mme Apostle 5:40-42)
Mme ada udeme Obio Ubọn̄ ẹmi ẹma ẹbiere ndiyọ se ededi oro okoyomde mmọ ẹyọ man ẹkaiso ke utom Abasi. Mmọ ke ntre ẹma ẹnịm eti uwụtn̄kpọ ẹnọ kpukpru mme ntiense Abasi akpanikọ oro ẹkade iso ndikwọrọ Obio Ubọn̄ ‘an̄wan̄wa ye ke ufọk ke ufọk’ tutu osịm mfịn.—Utom Mme Apostle 20:20, 21.
“ETI MBỤK” OBIO UBỌN̄ ASUANA
12. Nte ẹwụtde ke N̄wed Utom Mme Apostle 8:1-4, didie ke ukọbọ esiwak ndisụn̄ọ ke n̄kaiso edisuan “eti mbụk”?
12 Ukọbọ afiak ọsọn̄ ubọk, tutu kpukpru owo, ibọhọke mme apostle, ẹsuana ke edem Judea ye Samaria. Edi emi n̄kukụre akan̄wam ndinam utom edinọ ikọ ntiense oro atara, koro “mmọ eke ẹsuanade ẹsan̄a ke ebiet ke ebiet ẹkwọrọ gospel.” (Utom Mme Apostle 8:1-4) Nte enemde, ukem n̄kpọ oro omotịbe ke eyomfịn. Ke ini mme ukara oro ẹkarade ke ufịk ẹsin̄wanade nditre Mme Ntiense Jehovah oto ke ndinam mmọ ẹsuana ke mme ebiet ẹdade nsan nsan, mmọ ẹsikaiso ndikwọrọ ikọ do, ndien “eti mbụk” emi amasuana.
13, 14. (a) Ini ewe ke san̄asan̄a urua mfọn Abasi kaban̄a mme Jew okosịm utịt, ndien mmanie ke ẹkeda ẹdisịn inioro nte mme ada udeme Obio Ubọn̄? (b) Didie ke mme ikọ Paul ke N̄wed Utom Mme Apostle ibuot 13 ye N̄wed Mbon Rome ibuot 11 ẹsio emi ẹwụt?
13 Nte ededi, ke ini edem oro ke akpa isua ikie, nte ẹkenyene ndikwọrọ etop Obio Ubọn̄ oro nnọ mme Jew ye mbon Samaria mme andidụn̄ ndiana ikpọn̄îkpọn̄? Nte mmọ ikpọn̄îkpọn̄ ke ẹdida ofụri ibat mme andibuana ke obio ubọn̄ heaven ẹto? Oro ikanaha edi ntre idem kpa ye utịbe ikọ ntiense oro ẹkenọde. Nte an̄wan̄ade, ke 36 C.E., nte san̄asan̄a “urua” mfọn Abasi kaban̄a mme Jew okosịmde utịt, Jehovah ama eteme Peter ete aka etiene etubom mbonekọn̄ Italy, Cornelius, ke ufọk esie ke Caesarea. Nte Peter ọkọkwọrọde ikọ ọnọ owo emi mîkedịghe Jew mi ye ofụri ufọk esie, edisana spirit ama edidoro mmọ ke idem, ẹyetde mmọ aran ndidi mme ada udeme Obio Ubọn̄. Ẹma ẹnịm mmọ baptism nte akpa mme Gentile ẹmi mînaha mbobi ndikabade esịt ndụk ido ukpono Christ.—Utom Mme Apostle 10:1-48.
14 Ke ukperedem, ke ini apostle Paul ye mme nsan̄a esie ẹkesobode ikan̄îkan̄ ubiọn̄ọ ẹto mme Jew ke Antioch ke Pisidia, Paul ama ọdọhọ mme Jew oro ete: “Ana nte ẹbemiso ẹtịn̄ ikọ Abasi ẹnọ mbufo. Sia mbufo ẹsịnde ikọ oro, ẹnyụn̄ ẹbatde ẹte mmimọ idotke nsinsi uwem, sese, nnyịn ikabade itiene mme Gentile. Koro Ọbọn̄ eteme nnyịn ntre ete, Mmonịm Fi ke un̄wana mme idụt, man Afo akpada edinyan̄a edi tutu osịm ke utịt ererimbot.” (Utom Mme Apostle 13:46, 47) Nte Paul eketịn̄de ke ukperedem ke uwụtn̄kpọ oro enye ọkọnọde, mme Jew ẹmi mîkenịmke ke akpanikọ do ẹketie nte ndammana n̄kọk oro ẹsịbede ẹfep ke eto olive. Ẹkpekeda ofụri ibat mme ada udeme Obio Ubọn̄ oro ẹto otu mme Jew kpọt. Nte ededi, ẹma ẹbahade “mme Gentile,” nte mme n̄kọk olive ikọt, ẹsịn ke itie mmọ, ntre ke “ẹyenyan̄a” “ofụri Israel [eke spirit],” tutu osịm uyọhọ ibat mme andibuana ke Obio Ubọn̄.—N̄wed Mbon Rome 11:13-26; Galatia 6:16.
NSỌN̄ỌNDA KE IDAK “UKỤT”
15, 16. (a) Nso ke Paul akanam onyụn̄ ọdọhọ aban̄a “ukụt,” ndien nso eti uwụtn̄kpọ ke emi ọnọ nnyịn? (b) Nso ikpedi idaha ekikere nnyịn kaban̄a ubiọn̄ọ otode mme ukara m̀mê mme andibuana ke ubon, ndien nso utịp ke ẹn̄wọn̄ọ ẹnọ nnyịn?
15 Kpa ye n̄kaiso ukọbọ, anam-akpanikọ esenyịn emi asan̄ade-san̄a do, kpa apostle Paul, ama afiak aka ke Antioch, man ọkọsọn̄ọ onyụn̄ esịn udọn̄ ọnọ mme mbet oro ndinyụn̄ nsọn̄ọ n̄wụk ndutịm eke esop. Adan̄aoro ke Paul ọkọdọhọ ete:
“Nnyịn inyene ndibe ke ediwak ukụt ndụk ke Obio Ubọn̄ Abasi.”—Utom Mme Apostle 14:21-23.
16 Paul ama akaiso ndisobo udeme nsọn̄ọn̄kpọ ye mme idomo esie. Edi enye ekedi n̄wọrọnda uwụtn̄kpọ ke ndimụm nsọn̄ọnda esie n̄kama. Enye ama onịm uwụtn̄kpọ ọnọ ediwak mbon oro mfịn ẹn̄wanade ọkpọsọn̄ en̄wan mbuọtidem. Ndusụk ke otu mmọemi ẹkenyene ndiyọ ufen umia ikpa, n̄kpọkọbi ye edidịghe idem uwem mmọ. Ubiọn̄ọ ototo mme akara ukara ufịk, m̀mê idem ata ndima iman. Ndusụk ẹdi se mme andibuana ke ubon ẹkekan̄de ke ntak mmọ ndinyịme nnyụn̄ nnam n̄kpọ mban̄a “gospel Ubọn̄ Abasi.” (Matthew 24:14) Nte ededi, utọ mbon oro ẹmebọ ndọn̄esịt ẹto mme ikọ Jesus ẹmi: “Baba owo kiet idụhe, eke ọkọkpọn̄de ufọk, m̀mê nditọeka iren, m̀mê nditọeka iban, m̀mê eka, m̀mê ete, m̀mê nditọ, m̀mê isọn̄, ke ntak Mi ye ntak gospel, emi mîdibọhọ n̄kpọ utịm ikikie ke emi ke ini emi, mme ufọk, ye nditọeka iren, ye nditọeka iban, ye mme eka, ye nditọ, ye isọn̄, ikọrọ ye ukụt: ye nsinsi uwem ke eyo emi edidide.” (Mark 10:29, 30) Mmọ ke akpanikọ ẹsibọ n̄kpọ “utịm ikikie” ke ntotụn̄ọ itie ebuana oro mmọ ẹnyenede ye Jehovah ye Eyen esie ye ke idara idara ebuana mmọ ye ekpụk ubon ofụri ererimbot oro Jehovah enyenede.
17. (a) Nso mme idomo ke akpa mme anditiene Christ ẹkenyene ndiyọ n̄ko? (b) Nso edifọn uwụtn̄kpọ ye item ke Paul ọkọnọ nnyịn?
17 Apostle Paul ye mme nsan̄a esie ẹkenyene ndin̄wana n̄ko mbiọn̄ọ mme idomo otode ererimbot kaban̄a use ye uyom inyene obụkidem. Mmọ ẹkedi owo, kpasụk nte nnyịn. Ke ini isobode utọ mme n̄kpọ etabi oro nnyịn ikpenyene ndinam nte Paul akanamde, emi ọkọdọhọde ete: “Ntọn̄ọ idem mi ita, nnam enye odụk ufụn, mbak, ke mma n̄kọkwọrọ nnọ owo en̄wen, ke usụn̄ ekededi ẹdisio mi ke idem mi ẹduọk.” Ndien kpa nte Paul, nnyịn, nde, imekeme ndinyene ukpeme ito editịn̄ mban̄a obio ubọn̄ Abasi nnọ mme mbọhọidụn̄ nnyịn. Paul ama etịn̄ aban̄a utọ edisana utom oro ete: “Idifọnkefọn inọ mi edieke mmen̄kwọrọke gospel.”—1 Corinth 9:16, 27.
‘ẸKAN ỌYỌHỌ ỌYỌHỌ’
18. Nso nsịnudọn̄ ke Paul ọkọnọ kpukpru ata mme anditiene Christ, ndien didie ke afo anam n̄kpọ aban̄a oro?
18 Apostle Paul ama asian nsan̄a mme Christian oro ẹyetde aran nde ete: “Edi edieke nnyịn idide nditọ [Abasi], imonyụn̄ inyene udeme ke se ẹnịmde ẹnọ nditọ; imenyene udeme ke se Abasi onịmde; imasan̄a ye Christ inyene udeme: koro [adan̄a] nte nnyịn ima ikụt ndutụhọ ye Enye, iyenyụn̄ ida ubọn̄ ye Enye.” Edi se enye akakade iso nditịn̄ ama ada aban̄a “akwa otu owo” eke “mme erọn̄ en̄wen” ukem ukem, emi mfịn ẹyomde ubọn̄ ubọn̄ utịp nsinsi uwem ke paradise isọn̄. (Eriyarare 7:9; John 10:16) Paul ama esịn udọn̄ ọnọ kpukpru mme Christian akpanikọ, ete:
“Anie edidianade nnyịn ke ima Christ? Nte ukụt edidianade, m̀mê ndutụhọ, m̀mê isịnenyịn, m̀mê akan̄, m̀mê ubuene ye unana, m̀mê ndịk, m̀mê ofụt? . . . Edi ke kpukpru n̄kpọ ẹmi nnyịn imakan, inyụn̄ idọdiọn̄ ikan, oto ke Enyeemi akamade nnyịn. Koro mmotịm mbụre mfiọk nte, n̄kpa ye uwem, ye mme angel ye mbọn̄, ye n̄kpọ eke ẹdude ke emi, ye n̄kpọ eke edidide, ye mme odudu, ye ukon̄ ye utụn̄ọ, ye n̄kpọ efen ekededi eke ẹbotde idikemeke ndidianade nnyịn ke ima Abasi, emi odude ke Christ Jesus Ọbọn̄ nnyịn.” (N̄wed Mbon Rome 8:17, 35-39; se n̄ko 2 Corinth 11:22-28)
Nte afo ke ọkọri orụk mbuọtidem oro ke ima Abasi ye ke ‘edidi’ eke obio ubọn̄ Ọbọn̄ Jesus? Afo ekpenyene ndikọri!
19. Nso item ke Paul ọkọnọ aban̄a n̄kpọ ndịk efen oro akamade n̄kpa?
19 N̄kpọ efen emi anade odu ke mben̄eidem ndin̄wana mbiọn̄ọ ke “ukperedem ini” emi edi nsunsu ukpepn̄kpọ. Paul ama ọtọt aban̄a emi n̄ko. (Utom Mme Apostle 20:29, 30; 2 Timothy 3:1, 13) Edi mmọn̄ ke nsunsu mme andikpep ẹsito, ndien didie ke nnyịn ikeme ndikpeme idem ye mmọ?