Ibuot 11
Mme N̄ke Obio Ubọn̄
1. Ntak emi mme n̄ke Jesus ẹdide n̄kpọ udọn̄ ẹnọ kpukpru mbon oro ẹnamde n̄kpọ ẹnọ Abasi?
KE ADAN̄AEMI okodude ye mme mbet esie, Jesus ama otop ediwak n̄ke m̀mê ọnọ mme uwụtn̄kpọ. Mmọemi ẹwụt se edidi andibuana ke obio ubọn̄ heaven abuanade. Mmọ ẹwụt se ikpedide usụn̄uwem “ekpri otu erọn̄” eke mme andida Obio Ubọn̄ nnyene, ọkọrọ ye mbon oro ẹdinyenede nsinsi uwem ke isọn̄ ke idak obio ubọn̄ oro. “Mme erọn̄ en̄wen” ẹmi, nde, ẹdara ndidiọn̄ọ mban̄a mme ntịn̄nịmikọ oro ẹban̄ade Obio Ubọn̄ oro, ẹnyụn̄ ẹbọn̄ akam ke ofụri esịt ẹte enye ‘edi.’—Luke 12:32; John 10:16; 1 Thessalonica 5:16-20.
2, 3. (a) Ntak emi Jesus ekesitịn̄de ikọ ke n̄ke? (b) Ntak emi mikesin̄wan̄ake mbon efen ke ebede mme mbet esie? (c) Ke mîbietke mbon oro ẹtịn̄de ẹban̄a ke N̄wed Matthew 13:13-15, ntak emi nnyịn ikpekpepde Ikọ Abasi ye ntịn̄enyịn?
2 Ke ama okotop kiet ke otu mme n̄ke ẹmi ọnọ mme owo, mme mbet Jesus ẹma ẹka ẹtiene enye ẹnyụn̄ ẹkebụp ẹte: “Nsinam Afo etịn̄de ikọ ye mmọ ke n̄ke?” Jesus ọbọrọ, ete:
“Ẹyak ẹnọ mbufo ndifiọk ndịbe n̄kpọ Obio Ubọn̄ Heaven, edi iyakke inọ mmọ.” (Matthew 13:10, 11)
Ndien ntak mîyakke inọ mmọ? Edi koro mmọ ikenyịmeke nditịm ndụn̄ọde nnyụn̄ mfiọk se mme ikọ esie ẹkewọrọde ntotụn̄ọ ntotụn̄ọ, man esịt mmọ okponụk mmọ ndinam n̄kpọ ke ntak “eti mbụk.” Mmọ ikadaha Obio Ubọn̄ nte ‘n̄kpọ uto’ m̀mê “pearl kiet emi okponde ekọmurua.”—Matthew 13:44-46.
3 Jesus ama okot oto ntịn̄nịmikọ Isaiah nte enyenede edisu ke idem mbon oro mînịmke ke akpanikọ, ọdọhọde ete: “Mbufo ẹsụk ẹkop, edi idifiọkke se ọwọrọde; Mbufo ẹsụk ẹse n̄ko, edi ididiọn̄ọke se edide: koro esịt mbon ẹmi ama akabade odobi, utọn̄ mmọ onyụn̄ ọsọn̄ ndikop ikọ, mmọ ẹnyụn̄ ẹbọp enyịn; mbak mmọ ẹdida enyịn mmọ ẹkụt usụn̄, ẹnyụn̄ ẹda utọn̄ mmọ ẹkop ikọ, ẹnyụn̄ ẹda esịt mmọ ẹfiọk n̄kpọ, ẹnyụn̄ ẹtọn̄ọ ntak ẹkabade, ndien Ami nnam udọn̄ọ okụre mmọ.” (Matthew 13:13-15) Nnyịn ikpenyene ndiyom ndifep edibiet mme anana esịtekọm mme owo oro. Ẹyak nnyịn, ndien, isịn idem nnyịn ke edikpep Ikọ Abasi.
4. (a) Nso orụk mme esịt ẹkekpu ndibọ ufọn nto ikọ Jesus? (b) Didie ke nnyịn ikeme ndinyene edidiọn̄ edieke in̄wanade ndifiọk se ikọ oro ọwọrọde?
4 Ke n̄ke esie oro ẹbụkde ke N̄wed Matthew ibuot 13:3-8, Jesus eketịn̄ aban̄a idemesie nte “asuan n̄kpasịp.” Enye asuan “ikọ obio ubọn̄” esịn ke nsio nsio orụk esịt. Esịt ndusụk owo ẹtie nte isọn̄ eke mben ọkpọusụn̄. Mbemiso n̄kpasịp oro ekemede nditịbe, Devil ọdọn̄ mbon ubi esie nte mme “inuen” ete ẹditan̄ “ikọ ke esịt mmọ ẹfep, mbak mmọ ẹdinịm ke akpanikọ ẹnyụn̄ ẹbọhọ.” Mme esịt eken ẹtie nte isọn̄ itiat. Ke akpa, mmọ ẹma ẹnyịme ikọ oro ye idatesịt, edi ekem nsek ikọn̄ emi eyemede ke idak idomo m̀mê ukọbọ. Ndusụk n̄kpasịp ẹduọn̄ọ ke “ikọt n̄kukịm,” emi “ekikere uwem eyo emi ye abian̄a inyene” ababade ikọ oro owot. Ah, edi “n̄kpasịp” ôdu n̄ko emi ẹkesuande ke eti orụk isọn̄!
“[Enye] edi owo emi okopde ikọ, onyụn̄ ọfiọkde se enye ọwọrọde; emi onyụn̄ osion̄ode mfri ke akpanikọ, onyụn̄ on̄wụmde idem, ndusụk utịm ikikie, ndusụk utịm ike-ata, ndusụk utịm ikedịp ye duop.” (Matthew 13:18-23; Mark 4:3-9, 14-20; Luke 8:4-8, 11-15)
Ih, nnyịn iyebọ edidiọn̄ ndien edisana utom oro nnyịn inamde inọ Abasi nnyịn eyekabade otịm on̄wụm mfri edieke inyịmede ikọ oro ye esịtekọm inyụn̄ isịnde idem inam utom ke ufọn obio ubọn̄ Abasi!
“ASUAN N̄KPASỊP” EN̄WEN
5. (a) Nso n̄ke efen ke ẹsịn udọn̄ ẹnọ nnyịn idahaemi ndikpan̄ utọn̄ nnọ? (b) Ntak emi “owo” emi mîkpedịghe Ọbọn̄ Jesus?
5 Ke otu mme andiwet Gospel emi, uwetn̄kpọ Mark ikpọn̄îkpọn̄ adian uwụtn̄kpọ efen emi abuanade isio isio “asuan n̄kpasịp” ke n̄ke “asuan n̄kpasịp” emi. Mbemiso ọnọde uwụtn̄kpọ emi, Jesus ama ọdọhọ mbet esie ikpọn̄îkpọn̄ ete: “Ẹtịn̄ enyịn ẹkpeme se mbufo ẹkopde.” Ndien enye adian n̄ke oro, ọdọhọde ete:
“Obio Ubọn̄ Abasi etie ntem, nte n̄kpọ eke owo asuande n̄kpasịp ke isọn̄; onyụn̄ edede idap onyụn̄ adahade ke enyọn̄, ke okoneyo ye ke uwemeyo; ndien n̄kpasịp otịbe onyụn̄ ọkọri, enye ifiọkke nte asan̄ade ọkọri.” (Mark 4:24-27)
Ke akpanikọ, “owo” emi idịghe Ọbọn̄ Jesus Christ emi ẹnọde ubọn̄, koro enye ikopke udọn̄ aba ndide idap ke okoneyo nte emi owo isọn̄ esikopde. M̀mê ndinen ndikpọdọhọ nte ke Eyen Abasi, emi akanamde utom ye Ete esie ke ndibot mme n̄kpọ, “ifiọkke” nte n̄kpọ ẹsisan̄ade ẹkọri. (Colossae 1:16) Mmọdo ke udọn̄ikọ oro nnyịn imekeme ndifiọk nte ke “owo” oro enyene n̄kpọ ndinam ye anditiene Christ kiet kiet oro ekpenyenede ‘nditịn̄ enyịn’ ke mme n̄kpọ aban̄ade “obio ubọn̄ Abasi.”
6. Nso n̄kpọ iba ke “asuan n̄kpasịp” kiet kiet ekpenyene ndikpeme, ndien ntak-a?
6 “Asuan n̄kpasịp” kiet kiet ekpenyene nditịm n̄kpeme orụk edu oro enye ọtọde, ọkọrọ ye n̄kann̄kụk oro enye ọtọde n̄kpasịp esie. Ye unana nnyịn ndidiọn̄ọ mban̄a enye, se ikemede ndikara edikọri eke edu nnyịn ekeme ndidi eti m̀mê idiọk, etiene orụk “isọn̄” m̀mê orụk mme owo oro nnyịn isan̄ade nsan̄a ye mmọ nte nnyịn in̄wanade ndikọri mme edu Christian—edide ke esịt m̀mê ke ọwọrọde ọkpọn̄ esop. (Men 1 N̄wed Corinth 15:33 domo.) Ke akpatre, “ọyọhọ ibokpot” eyen̄wụm, ndien nnyịn iyedọk nte ekemde. (Mark 4:28, 29) Edi akpan n̄kpọ didie ntem nte mbon oro ẹdide eke “ekpri otu erọn̄,” ye ke akpanikọ kpukpru mbon oro ẹyomde nsinsi uwem ke idak ndutịm Obio Ubọn̄ Abasi, ẹkpeme ebiet ye se mmọ ẹtọde ke se iban̄ade edikọri mme mbiet edu Christ!—Ephesus 4:17-24; Galatia 6:7-9.
NSUNSU OBIO UBỌN̄
7. Nsio nsio mme n̄ke oro ẹn̄wam nnyịn ndise Obio Ubọn̄ oro didie?
7 Mbụk Mark etịn̄ aban̄a Jesus nte akade iso ndidọhọ:
“Nnyịn idisan̄a didie iwụt mbiet Obio Ubọn̄ Abasi? m̀mê nso orụk n̄ke ke nnyịn idida iyarade enye iwụt?” (Mark 4:30)
Ekem enye odụri nnyịn ekikere owụt Obio Ubọn̄ ke isio isio usụn̄. Ke akpanikọ, mme n̄ke ẹmi ẹmen̄wam nnyịn ndikụt Obio Ubọn̄ oro ke nsio nsio idaha ekikere, nte oro nnyịn ikpesede ufọk oro ẹbọpde ke an̄wan̄wa ye ke esịt esịt, ye ke nsio nsio itụn̄.
8. (a) Ntak emi utịbe n̄kọri eke n̄kpasịp mustard oro mîkpedaha iban̄a mme andida Obio Ubọn̄ nnyene? (b) Ntak emi emi odotde ye “obio ubọn̄” Christendom nte esịnede ifiọk? (c) Didie ke edinam an̄wan̄a oro Abasi ọnọde aban̄a mbon mfiakedem Israel ọsọn̄ọ ekikere emi?
8 Mmọdo nso ke nnyịn ikpọdọhọ ke obio ubọn̄ Abasi ebiet? Jesus ọbọrọ ete:
“Ebiet n̄kpasịp mustard kiet, emi ekpride akan kpukpru n̄kpasịp eke ẹdude ke isọn̄, ke ini ẹtọde enye ke isọn̄; edi ẹma ẹtọ enye, enye ọkọri akabade okpon akan kpukpru mbiet, onyụn̄ asiaha ikpọ n̄kọk; ntre ke mme inuen enyọn̄ ẹkeme ndikụbọ ke mfụt esie.” (Mark 4:30-32)
Ndyọ ndyọ n̄kọri edi emi—ndien ke akpanikọ, n̄kpọ otịmde atara okpon akan “ekpri otu erọn̄” eke mme ada udeme Obio Ubọn̄ 144,000 nnyene, emi ‘edide eti uduak Ete ndida obio ubọn̄ oro nnọ mmọ’! (Luke 12:32; Eriyarare 14:1, 3) Utu ke oro, enye edi n̄kọri eke akwa nsunsu “eto” Christendom nte andisọn̄ ibuot ke esop oro Jesus ọkọtọde. (Luke 13:18, 19) Enye omokpon! Enye obure aban̄a se iwakde ibe mme andibuana 900,000,000 ke ofụri ererimbot, emi enye ọdọhọde nte ẹduakde heaven. Ọsọn̄ibuot obio ubọn̄ emi edi se Israel mbon mfiakedem ẹkedade ẹban̄a ke edem ko, emi Jehovah eketịn̄de aban̄a ete: “Ami n̄kọtọ fi ata vine, ata akpan n̄kpasịp: nsinam ndien afo akabarede edi idiọk eyen vine idụt ọnọ mi?”—Jeremiah 2:21-23; se n̄ko N̄wed Hosea 10:1-4.
9. (a) Mmanie ẹdi “mme inuen” ye mme n̄kọk “eto” oro? (b) Ke ẹkerede ikọ emi odude ke 2 Thessalonica 1 ye N̄wed Matthew 7, ntak akpanade nnyịn idahaemi iwọrọ ke idak “eto” oro?
9 Nte ekemde ye edinam an̄wan̄a oro Matthew anamde aban̄a “eto” emi, ‘mme inuen enyọn̄ ẹdi ẹdikụbọ ke n̄kọk esie.’ Nte an̄wan̄ade, mmọ ẹdi kpasụk ukem “mme inuen” oro ẹkebemde iso ẹtịn̄ ẹban̄a ke n̄ke nte ẹtan̄de “ikọ obio ubọn̄” oro ẹkeduọn̄ọde ke mbenusụn̄ ẹta. (Matthew 13:4, 19, 31, 32) “Mme inuen” oro ẹkụbọ ke ediwak n̄ka ikie eke mme n̄kọk “eto” oro. Mmọ ẹda ẹban̄a ọsọn̄ibuot “owo eke edide ata abiatibet,” kpa mme ọkwọrọ ederi Christendom. Mmọ ẹyetaba itie mfụt mmọ ke ini Abasi edisịbede “eto” oro ọduọk, ọkọrọ ye nsunsu ido ukpono eken. Wọrọ ke idak esie, idahaemi! Koro iduọ “eto” oro emekpere!—Men 2 N̄wed Thessalonica 1:6-9; 2:3; Matthew 7:19-23 domo.
10, 11. (a) Ke ebuana ye nso mme ikọ ke Matthew ye Luke ẹbụk n̄ke aban̄ade “n̄kpasịp mustard” oro, ndien ntak odotde ntre? (b) Nso item ye ntọt ke n̄ke Obio Ubọn̄ emi aban̄ade leaven ọnọ nnyịn?
10 Nte odotde, Luke ewet n̄ke aban̄a “n̄kpasịp mustard” emi nte n̄kpọ etienede edisụn̄i oro Jesus okosụn̄ide mme ọsọn̄ibuot mbon ido ukpono eke usen esie. Ndien nte n̄kpọ eke odoride nsọn̄uyo ọnọ n̄kpọ emi, Matthew ye Luke ke oro ebede ẹwụt Jesus nte otopde n̄ke aban̄a “leaven.” (Matthew 13:32, 33; Luke 13:10-21) Ke ẹdade ẹtịn̄ ikọ ke ndamban̄a usụn̄ ke Bible, leaven kpukpru ini esibuana idaha unana mfọn, nte ke ini Jesus ọkọtọtde mme mbet esie ete “ẹtịn̄ enyịn ẹkpeme idem mbak leaven mme Pharisee ye mme Sadducee,” ye ke ini apostle Paul ọkọnọde mme anditiene Christ item nte ẹsio akani ‘leaven ibak ye ukwan̄ido’ ẹduọk.—Matthew 16:6, 11, 12; 1 Corinth 5:6-8; Galatia 5:7-9.
11 Ke n̄ke oro, n̄kpọ odu emi aban̄ade “Obio Ubọn̄ Heaven” emi ẹdọhọde nte ebietde leaven emi n̄wan emende esịn ke udomo ndomuyo ita. Ntre ke ofụri ndomuyo oro akabade ofụt. Emi ada aban̄a ndedịbe edida nsunsu ukpepn̄kpọ ye edinam mbon Babylon nsabade ata esop Christian, osụn̄ọde ke akamba nsunsu obio ubọn̄ eke Christendom. Emi ekpenyene ndinam n̄kpọ nte ntọt nnọ nnyịn. Ke ẹkụtde enyene mbọm utịp eke nsọn̄ibuot ke Christendom, “ekpri otu erọn̄” eke mme ada udeme Obio Ubọn̄ ye mme nsan̄a mmọ mfịn ẹkpenyene ndikpeme man ẹkûyak “leaven” nsunsu, abian̄a abian̄a ukpepn̄kpọ abiat ifiọk mmọ kaban̄a se isanade inyụn̄ idide akpanikọ oro mmọ ẹnyenede ke ofụri esịt ẹban̄a “ikọ Obio Ubọn̄.”
ASUAN N̄KPASỊP YE “OWO USUA” ESIE
12, 13. (a) Ke n̄ke “ibokpot” ye “mbiet,” didie ke Jesus osio mbon ẹmi enye aban̄ade owụt? (b) Nso edi idọk, ndien nso uyarade ke nnyịn ikụt ndiwụt nte ke enye ke akaiso mfịn?
12 Ke n̄ke efen Jesus emen “Obio Ubọn̄ Heaven” odomo ye “owo eke asuande eti n̄kpasịp ke in̄wan̄ esie.” Ekem, “adan̄aemi owo edede idap, owo usua esie edi edisuan idiọk n̄kpasịp esịn ke otu ibokpot, ndien adaha ọnyọn̄.” Nso orụk mbun̄wụm ke ẹkpedori enyịn ndinyene nto utọ in̄wan̄ oro? Jesus ama akaiso ndiwụt asuan n̄kpasịp emi nte edide enye ke idemesie, kpa “Eyen Owo,” emi editọ n̄kpasịp Obio Ubọn̄ esie okosụn̄ọde ke edin̄wụm mme anditiene Christ ẹbietde ibokpot, kpa “nditọ Obio Ubọn̄ Heaven.” Owo usua oro edi “Satan,” ndien “idiọk n̄kpasịp” oro edi “nditọ andidiọk”—ibụk ibụk “n̄kpasịp” ido ukpono esie. (Men N̄wed Genesis 3:15 domo.) Ke edisu emi, ndusụk ata mme anditiene Christ ẹma ẹkaiso ndikọri mbuaha ye “idiọk n̄kpasịp” oro ama okonịm akwa nsọn̄ibuot idiọn̄ọ ọtọn̄ọde ke akpa isua ikie kaiso. Edi idahaemi ke ọyọhọ isua ikie-20 nnyịn emi, nnyịn imedisịm ini ukpen̄e—“akpatre ini eyo emi; ndien mbon ukpen̄e ẹdi mme angel”!—Matthew 13:24-30, 36-39.
13 Ke akpatre, ke idak ndausụn̄ mme angel, ẹyebahade “eti n̄kpasịp” ẹsio ye “idiọk n̄kpasịp.” Ẹma ẹyarade in̄wan̄în̄wan̄ ukpụhọde oro odude ke ufọt mmọ mbiba ẹmi ẹwụt. Nte nnyịn idikụtde, akpakịp uyarade ẹdu nte ke “Eyen Owo” omodu mfịn ke obio ubọn̄ heaven esie, atan̄de ata mme anditiene Christ mbon mbiet eti n̄kpasịp obok ọnọ utom Obio Ubọn̄. Edi nso kaban̄a Christendom ye mme andikpep nsọn̄ibuot esie? N̄ke Jesus akaiso ndidọhọ ete:
“Eyen Owo eyesio mme angel Esie ọdọn̄, ndien mmọ ẹyetan̄ kpukpru n̄kpọ ẹmi ẹsịnde owo ẹduọ, ye mmọemi ẹnamde ukwan̄ido ẹfep ke Obio Ubọn̄ Esie.”
Mme ọkwọrọ ederi Christendom ẹma ẹnam mbon esịt akpanikọ ẹtuak ukot ẹduọ ke ediwak isua ikie oto ke mme nsunsu ukpepn̄kpọ mmọ ye enyọn̄ enyọn̄ ediwụt idem nte idide owo Abasi. Edi mmọ ẹmedidụk ke idak ubiereikpe Abasi, ndien ke ‘ẹtua ẹnyụn̄ ẹta edet mmọ.’ Mfịn mmọ ke ẹseme ẹban̄a editek ubọk ke un̄wam oro mme ọsọ owo ẹnọde ọkọrọ ye ubahade oro odude ke ufọt n̄ka mmọ. Ke okpụhọrede, ikọt Jehovah mbon mbiet eti n̄kpasịp ke ẹnọ ikọ ntiense idara idara ẹban̄a obio ubọn̄ esie. Mmọ ke ẹyama “nte utịn ke Obio Ubọn̄ Ete mmọ.”—Matthew 13:40-43; men N̄wed Isaiah 65:13, 14 domo.
UFORO UFORO UTOM ‘UKỌ IYAK’
14, 15. (a) Didie ke Jesus ọkọtọn̄ọ akwa utom ‘ukọ iyak,’ edi nso orụk ‘edikọ’ akaiso tutuko, ye nso adan̄a ‘edimụm’? (b) Nso udeme ke mme angel ẹnyene, ndien didie ke mmọ ẹsat mme “iyak” oro? (c) Nso ifet ke nnyịn ke ntre ikpenyene ndiwụt esịtekọm mban̄a?
14 “N̄ko n̄ko,” Jesus ọdọhọ, “Obio Ubọn̄ Heaven ebiet iyịre eke ẹduọkde ke inyan̄, emi onyụn̄ omụmde kpukpru orụk iyak.” (Matthew 13:47) Jesus ke idemesie ọkọtọn̄ọ utom ‘ukọ iyak’ emi, ke ini enye okokotde akpa mme mbet esie ete ẹkpọn̄ iyịre mmọ ẹdi man inam mmọ ẹdi “mme ọkọ owo.” (Matthew 4:19) Edi ke ini akwa mfiakedem oro, ke idak ntịn̄enyịn ukpeme eke mme angel ibat ibat otu mme anam-akpanikọ ye mme ido ukpono Christendom ke ẹkekaiso ‘ndikọ’ mme mbet. Nte ededi, nte ofụri ofụri ediwak million edibot n̄kpọ oro ẹdụn̄de ke inyan̄ ke mme itie ikie mi ẹma ẹkabade ẹdi ‘iyak eke ẹfọnde’? Nte ima ikowụt, mme ido ukpono Christendom ẹkọn̄ mme ukpepn̄kpọ mmọ ke akwaifiọk mbon Greek eke Plato, ye ke “mme ndịben̄kpọ” eke Babylon eset. Ẹkụt mbun̄wụm mmọ ke usua, en̄wan ye uduọkiyịp emi ọyọhọde ke ofụri mbụkuwem Christendom, ye ke mmọ ndinọ un̄wam ke mme ekọn̄ ererimbot eke ọyọhọ isua ikie-20 nnyịn.
15 Ke akpatre, ke “akpatre ini eyo emi,” ini emekem ọnọ mme angel ndidụri “iyịre” oro ndọk esụk. Emi ada aban̄a mme esop oro ke isọn̄ ẹmi ẹdọhọde nte idide mme anditiene Jesus Christ—eke akpanikọ ye eke nsu. Mme “iyak” oro ẹkụtde nte “mîfọnke” inọ “Obio Ubọn̄ Heaven” ẹnyene ndidi se ẹtopde ẹduọk, ẹsịn ke “akwa ikan̄” nsobo emi asakde. “Do ke editua eyet ye edita edet eyedu.” (Matthew 13:48-50) Edi mme angel oro ke ẹsat n̄ko ‘nti iyak’ ke ndamban̄a iyịre oro ẹsion̄o. Nnyịn ikpowụt esịtekọm didie ntem kaban̄a ifet nnyịn eke ẹdidi se ẹbatde ẹsịn ke otu mmọemi—san̄asan̄a mbon oro ẹyakde idem ẹnọ kaban̄a edinọ enyịn̄ Jehovah ubọn̄ oro ẹnyụn̄ ẹbọn̄de akam ke in̄wan̄în̄wan̄ usụn̄ ẹte obio ubọn̄ esie “edi”!
16. Akpatre n̄ke emi anam nso mme mbụme ẹdemede, ndien ntak emi nnyịn ikpenyenede udọn̄ ke ediyom ibọrọ?
16 Nte ededi, nso edi “akpatre ini eyo emi,” emi Jesus ọsọn̄de uyo etịn̄ aban̄a ntre ke akpatre n̄ke emi? Nso edi “ukperedem ini” emi ediwak mbet Jesus ẹkewetde ẹban̄a? Nte nnyịn idahaemi idu uwem ke mme usen oro? Ke edide ntre, nso ke emi ọwọrọ ọnọ nnyịn, ye ofụri ubonowo?
[Ndise ke page 104
KERE MME N̄KE OBIO UBỌN̄ JESUS!
● Mmọ ẹnam an̄wan̄a nte Obio Ubọn̄ edide se idemerede owo udọn̄, nte “n̄kpọuto” m̀mê “pearl.” Ẹda mbon oro ẹyomde enye ẹdomo ye “eti isọn̄,” “ibokpot,” ‘nti iyak.’
● Ẹwụt nsunsu obio ubọn̄ nte n̄kpasịp “eto” mustard ye ediwak n̄kọk, leaven ke uyo. Mme andinọ enye un̄wam ẹdi “mme inuen,” “idiọk n̄kpasịp,” ‘mme iyak eke mîfọnke.’
● Ke ndida nse n̄kọri Obio Ubọn̄ emi ke nsio nsio usụn̄, nnyịn imekeme nditịm mfiọk akwa eneni emi anade ke isọ ofụri ubonowo mfịn nte ọfọnde akan, ẹnyụn̄ ẹsịn udọn̄ ẹnọ nnyịn ndisọn̄ọ nda nnyụn̄ nnam akpanikọ nnọ Obio Ubọn̄ oro.