Ikpehe 1
Nte Abasi Enen̄ede Ekere Aban̄a Nnyịn?
1, 2. Ewe mbụme ke mme owo ẹsibụp ẹban̄a Abasi, ndien ntak-a?
KE NDUSỤK ini ke uwem fo, ekeme ndidi afo ama obụp ete: ‘Edieke edide Abasi odu oro enen̄erede ekere aban̄a nnyịn, ntak emi enye ayakde ata ekese ndutụhọ odu-o?’ Kpukpru nnyịn imosobo ndutụhọ mîdịghe imọdiọn̄ọ iban̄a owo oro osobode.
2 Ke akpanikọ, ke ofụri mbụk mme owo ẹmekop ubiak ye ubiakesịt ẹto ekọn̄, nsọn̄ido, ubiatibet, ukwan̄ikpe, unana, udọn̄ọ, ye n̄kpa mbonima. Ke ọyọhọ isua ikie-20 nnyịn ikpọn̄, mme ekọn̄ ẹmewot se ikande owo miliọn 100. Ediwak miliọn owo eken ke mme itie ikie ẹma ẹda unan mîdịghe ẹtaba mme ufọkidụn̄ ye mme inyene. Ata ediwak enyene-ndịk n̄kpọ ẹmetịbe ke eyo nnyịn, ẹsụn̄ọde ke akwa mfụhọ, ekese ntuan̄a, ye ekikere unana idotenyịn ọnọ anana-ibat owo.
3, 4. Didie ke ediwak owo ẹkere ẹban̄a ediyak oro Abasi ayakde ndutụhọ odu?
3 Ndusụk owo ẹmekop idiọkesịt ẹnyụn̄ ẹkere ẹte ke edieke edide Abasi odu, enye inen̄ekede ikere iban̄a nnyịn. Mîdịghe mmọ ẹkeme ndikam n̄kere nte ke Abasi idụhe. Ke uwụtn̄kpọ, eren kiet oro ọkọbọde ufen oto ukọbọ ekpụk oro ekedide ntak n̄kpan̄a mme ufan ye ubon ke Ekọn̄ Ererimbot I ama obụp ete: “Abasi okodu m̀mọ̀n̄ ke ini nnyịn ikoyomde enye?” Owo efen, oro ọkọbọhọde ediwot oro mbon Nazi ẹkewotde ediwak miliọn owo ke Ekọn̄ Ererimbot II, ama okop mfụhọ etieti ke ntak ndutụhọ oro enye okokụtde tutu enye ọkọdọhọ ete: “Edieke afo ekpekemede ndidei esịt mi, enye okpowot fi.”
4 Ntem, ediwak owo ikemeke ndifiọk ntak emi eti Abasi akpayakde ndiọi n̄kpọ ẹtịbe. Mmọ ẹsiyịk m̀mê enye enen̄ede ekere aban̄a nnyịn mîdịghe m̀mê enye akam ododu. Ndien ediwak mmọ ẹkere ẹte ke ndutụhọ kpukpru ini edidi ubak uwem owo.
[Ndise ke page 2, 3]
Nte obufo ererimbot oro ọbọhọde ndutụhọ ekpere?