Ikpehe 2
Isọn̄ Oro Ọbọhọde Ndutụhọ
1, 2. Isio isio ekikere ewe ke ediwak owo ẹnyene?
NTE ededi, ediwak miliọn owo ke ofụri ererimbot ẹnyene ata isio isio ekikere. Mmọ ẹbemiso ẹda ẹkụt utịbe utịbe ini iso oro enyenede ubonowo. Mmọ ẹdọhọ ẹte ke ibịghike ererimbot oro ọbọhọde ukwan̄ido ye ndutụhọ ofụri ofụri eyedu mi ke isọn̄ emi. Mmọ ẹnyene mbuọtidem ẹte ke ẹyesio se idiọkde ẹfep ke mîbịghike ẹnyụn̄ ẹwụk ata obufa ererimbot. Mmọ ẹkam ẹdọhọ ẹte ke ẹsịn itiat idakisọn̄ obufa ererimbot emi idem idahaemi!
2 Mme owo ẹmi ẹnịm ke akpanikọ ẹte ke obufa ererimbot emi eyebọhọ ekọn̄, nsọn̄ido, ubiatibet, ukwan̄ikpe, ye unana. Enye edidi ererimbot oro udọn̄ọ, mfụhọ, ntuan̄a, ye idem n̄kpa mîdidụhe. Ke ini oro mme owo ẹyekọri ẹsịm mfọnmma ẹnyụn̄ ẹdu uwem ke nsinsi ke inemesịt ke paradise isọn̄. Kamse, ẹyenam idem mbon oro ẹkekpade ẹset ẹnyụn̄ ẹnyene ifet ndidu uwem ke nsinsi!
3, 4. Ntak emi mme utọ owo oro ẹnyenede mbuọtidem ẹban̄a ekikere mmọ?
3 Nte ekikere oro aban̄ade ini iso mi edi ikpîkpu ndap, kpa ekikere oro ẹkpekam ẹmade-ma ndikụt etịbede? Baba, idịghe ndomo esisịt. Enye ọkọn̄ọ ke mbuọtidem oro enyenede ata eti isọn̄ nte ke n̄kpọ ndomokiet ikemeke ndibiọn̄ọ Paradise oro edide mi. (Mme Hebrew 11:1) Ntak emi mmọ ẹnyenede iwụk ntre-e? Koro ata ọkpọsọn̄ Andibot ekondo ọn̄wọn̄ọ enye.
4 Kaban̄a mme un̄wọn̄ọ Abasi, Bible ọdọhọ ete: “Baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.” “Abasi idịghe owo eke enye okposude nsu . . . Nte enye ọdọhọ, ndien etre ndinam? Nte enye ọn̄wọn̄ọ, ndien etre ndinam osu?” “Jehovah mme udịm ọmọn̄wọn̄ọ, ete, Iditreke ndiwọrọ kpa nte n̄kekerede; onyụn̄ osu kpa nte n̄kaduakde.”—Joshua 23:14; Numbers 23:19; Isaiah 14:24.
5. Mme mbụme ewe ke oyom ẹbọrọ?
5 Nte ededi, edieke uduak Abasi ekedide ndiwụk paradise isọn̄ oro ọbọhọde ndutụhọ, ntak emi enye akayakde ndiọi n̄kpọ ẹtịbe ke akpa itie? Ntak emi enye ekebetde ke isua tọsịn itiokiet tutu idahaemi ndinen̄ede se ikwan̄ade? Nte ofụri isua ikie eke ndutụhọ ẹmi ẹwụt ẹte ke ekeme ndidi Abasi inen̄ekede ikere iban̄a nnyịn, mîdịghe nte ke enye ikam idụhe?