Ikpehe 5

Utịbe Utịbe Enọ eke Ifụre Uduak

1, 2. Ewe utịbe utịbe enọ edi ubak usụn̄ oro ẹkenamde nnyịn?

MAN ifiọk ntak emi Abasi ayakde ndutụhọ odu ye se enye edinamde aban̄a emi, oyom nnyịn ifiọk nte enye akanamde nnyịn. Enye ama anam se ikande edibot nnyịn ye ikpîkpu ikpọkidem ye mfre. Enye n̄ko ama obot nnyịn ye mme san̄asan̄a edu eke ekikere ye ntụk.

² Akpan ubak n̄kpọ kiet ke otu n̄kpọ ẹmi ẹnamde ekikere ye ntụk nnyịn edi ifụre uduak. Ih, Abasi ama esịn ukeme ifụre umek n̄kpọ ke esịt nnyịn. Enye ke akpanikọ ekedi utịbe utịbe enọ otode enye.

Nte Ẹnamde Nnyịn

3-5. Ntak emi nnyịn iwụtde esịtekọm ke ifụre uduak?

³ Ẹyak nnyịn ise nte ifụre uduak abuanade ke Abasi ndiyak ndutụhọ odu. Akpa kan̄a, kere ban̄a emi: Nte afo omowụt esịtekọm ke ndinyene ifụre ndimek se afo edinamde onyụn̄ etịn̄de, se afo edidiade onyụn̄ esịnede, orụk utom oro afo edinamde, ye ebiet ye nte afo edidude uwem? Mîdịghe nte afo okpoyom owo ebiere kpukpru ikọ ye edinam fo kpukpru ini ke uwem fo?

⁴ Idụhe owo oro odude ke eti idaha oro oyomde ẹkara uwem imọ ofụri ofụri ntre. Ntak mîyomke? Ke ntak usụn̄ oro Abasi akanamde nnyịn. Bible asian nnyịn ete ke Abasi okobot owo ke ‘mbiet esie, etie nte enye,’ ndien kiet ke otu ukeme oro Abasi ke idemesie enyenede edi ifụre umek n̄kpọ. (Genesis 1:⁠26; Deuteronomy 7:⁠6) Ke ini enye okobotde owo, enye ama ọnọ mmọ ukem utịbe utịbe ukeme oro​—⁠kpa enọ ifụre uduak. Oro edi ntak kiet emi anamde nnyịn isikụt edikpu ke ufịk ufịk mme andikara ẹsịnde nnyịn ke ufụn.

⁵ Ntre udọn̄ ndinyene ifụre idịghe mbuari mbuari n̄kpọ, koro Abasi edide Abasi ifụre. Bible ọdọhọ ete: “Ọtọ nte spirit Ọbọn̄ [“Jehovah,” New World Translation] odude, ubọhọ-ufụn etiene odu do n̄ko.” (2 Corinth 3:17) Ntem, Abasi ama ọnọ nnyịn ifụre uduak nte ubak usụn̄ oro ẹkenamde nnyịn. Sia enye ọkọfiọkde usụn̄ oro ekikere ye ntụk nnyịn ẹdinamde utom, enye ama ọfiọk ete ke nnyịn iyekop inemesịt ikan ye ifụre uduak.

6. Didie ke Abasi okobot mfre nnyịn ndinam utom ke n̄kemuyo ye ifụre uduak?

⁶ Ke adianade ye enọ ifụre uduak, Abasi ama ọnọ nnyịn ukeme ndikere n̄kpọ, ndidomo mme n̄kpọ nse, ndinam mme ubiere, ndinyụn̄ ndiọn̄ọ eti m̀mê idiọk. (Mme Hebrew 5:14) Ntem, ifụre uduak ekenyene ndikọn̄ọ ke ọniọn̄ ọniọn̄ edimek. Owo ikanamke nnyịn nte mme ukwak unamutom oro mînyeneke ekikere ẹmi mînyeneke uduak idemmọ. Owo ikonyụn̄ ibotke nnyịn ndinam n̄kpọ ke ntụk nte mme unam ẹsinamde. Utu ke oro, ẹkediọn̄ utịbe utịbe mfre nnyịn ndinam utom ke n̄kemuyo ye ifụre umek n̄kpọ nnyịn.

Mfọnn̄kan Ntọn̄ọ

7, 8. Ewe eti ntọn̄ọ ke Abasi ọkọnọ akpa ete ye eka nnyịn?

⁷ Ndiwụt nte Abasi ekekerede aban̄a, ke adianade ye enọ ifụre uduak, ẹma ẹnọ akpa ete ye eka nnyịn, Adam ye Eve, kpukpru n̄kpọ ẹmi owo ekededi nte owụtde eti ibuot ekpekemede ndiyom. Ẹkesịn mmọ ke akwa paradise oro ekebietde in̄wan̄ inemesịt. Mmọ ẹma ẹnyene akpakịp n̄kpọ obụkidem. Mmọ ẹma ẹnyene mfọnmma ekikere ye ikpọkidem, ntre mmọ ikenyeneke ndisọn̄ m̀mê ndidọn̄ọ m̀mê ndikpa​—⁠mmọ ẹkpekedu uwem ke nsinsi. Mmọ ẹkpekenyene mfọnmma nditọ oro ẹkpekekemede n̄ko ndinyene inem inem, nsinsi ini iso. Ndien ibatowo oro ẹtọtde-tọt ẹkpekekeme ndinyene ọnọ-uyụhọ utom eke ediwọn̄ọde ofụri isọn̄ ke akpatre nsịn ke paradise.​—⁠Genesis 1:⁠26-⁠30; 2:⁠15.

⁸ Kaban̄a se ẹkenọde, Bible obụk ete: “Abasi okụt kpukpru se enye akanamde, ndien, sese ẹfọn etieti.” (Genesis 1:31) Bible n̄ko etịn̄ aban̄a Abasi ete: “Utom esie ọfọn ama.” (Deuteronomy 32:⁠4) Ih, Andibot ama ọnọ ekpụk ubonowo mfọnmma ntọn̄ọ. Enye ikpekekemeke ndifọn n̄kan oro. Nso Abasi emi ekerede aban̄a ke enye okowụt nte idide ntem!

Ifụre Enyene Adan̄a

9, 10. Ntak emi anade ẹkama ifụre uduak nte enende?

⁹ Nte ededi, nte Abasi akaduak ete ifụre uduak okûnyene adan̄a? Kere ban̄a akamba obio oro n̄kpọisan̄ awakde emi mînyeneke ibet uwat, emi kpukpru owo ẹkemede ndiwat ke usụn̄ ekededi ke usọp ekededi. Nte afo okpoyom ndiwat uwat ke mme utọ idaha oro? Baba, oro ekpedi ntịme ntịme uwat ndien ke akpanikọ okposụn̄ọ ke ediwak mbabuat n̄kpọntịbe.

¹⁰ Ntre n̄ko ke edi ye enọ Abasi eke ifụre uduak. Ifụre oro mînyeneke adan̄a ọkpọwọrọ ndutịme ke n̄kaowo. Ana ibet odu ndinọ mme edinam owo ndausụn̄. Ikọ Abasi ọdọhọ ete: “Ẹdu uwem nte mme owo oro ẹnyenede ifụre, ndien ẹkûdede ẹda ifụre mbufo nte ntak ukwan̄ido.” (1 Peter 2:⁠16, JB) Abasi oyom ẹkama ifụre uduak ke ufọn kpukpru owo. Enye ikoyomke nnyịn inyene ọyọhọ ọyọhọ ifụre, edi ukeuke ifụre, isụkde ibuot inọ ibet.

Ibet Anie?

11. Ibet anie ke ẹkenam nnyịn ndisụk ibuot nnọ?

¹¹ Ibet anie ke ẹkenam nnyịn ndisụk ibuot nnọ? Ikpehe efen ke 1 N̄wed Peter 2:16 (JB) ọdọhọ ete: “Mbufo idịghe ifụn owo efen ibọhọke Abasi.” Emi iwọrọke ufịk ufịk itie ufụn, edi, utu ke oro, enye ọwọrọ nte ke ẹkenam nnyịn ndikop inemesịt n̄kan ke ini nnyịn isụkde ibuot inọ ibet Abasi. (Matthew 22:​35-40) Ibet esie, ke akande ibet ekededi oro owo anamde, ọnọ mfọnn̄kan ndausụn̄. “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.”​—⁠Isaiah 48:⁠17.

12. Ewe ifụre umek n̄kpọ ke nnyịn inyene ke esịt ibet Abasi?

¹² Ke ukem ini oro, ibet Abasi ọnọ akwa ifụre umek n̄kpọ ke esịt adan̄a mmọ. Emi osụn̄ọ ke nsio nsio n̄kpọ onyụn̄ anam ekpụk ubonowo enyene ndyọ. Kere ban̄a nsio nsio orụk udia, edisịnen̄kpọ, ikwọ, utom usọ, ye mme ufọkidụn̄ ke ofụri ererimbot. Nnyịn ke akpanikọ isima ndimek mme utọ n̄kpọ oro ke idem nnyịn utu ke owo efen ndibiere nnọ nnyịn.

13. Mme oto obot ibet ewe ke ana nnyịn isụk ibuot inọ ke ufọn nnyịn?

¹³ Ntem ẹkebot nnyịn ndikop inemesịt n̄kan ke ini isụkde ibuot inọ ibet Abasi kaban̄a edu owo. Enye edi ukem ye edisụk ibuot nnọ mme oto obot ibet Abasi. Ke uwụtn̄kpọ, edieke nnyịn ifụmide ibet odudu oro odụride n̄kpọ ada inyụn̄ itode ke n̄kokon̄ ebiet ifrọ, nnyịn iyeda unan mîdịghe ikpa. Edieke nnyịn ifụmide mme ibet esịtidem nnyịn inyụn̄ itrede ndidia udia, ndin̄wọn̄ mmọn̄, m̀mê ndikot ibifịk, nnyịn iyekpa.

14. Nnyịn isan̄a didie ifiọk ite ke owo ikobotke owo ndida ke idem n̄kpọn̄ Abasi?

¹⁴ Ke akpanikọ, kpa nte ẹkebotde nnyịn ye udọn̄ ndisụk ibuot nnọ mme oto obot ibet Abasi, ẹma ẹbot nnyịn ye udọn̄ ndisụk ibuot nnọ ibet Abasi eke ido uwem ye eke n̄kaowo. (Matthew 4:⁠4) Owo ikobotke owo ndida ke idem n̄kpọn̄ Andinam mmọ nnyụn̄ n̄kụt unen. Prọfet Jeremiah ọdọhọ ete: “Owo eke asan̄ade inyụn̄ ikemeke ndinen̄ede ikpat esiemmọ. O Jehovah, tụnọ mi.” (Jeremiah 10:​23, 24) Ntre ke kpukpru usụn̄ ẹkebot owo ndidu uwem ke idak itie edikara Abasi, idịghe eke idemmọ.

15. Nte ibet Abasi ẹkpekedi mbiomo ẹnọ Adam ye Eve?

¹⁵ Edisụk ibuot nnọ ibet Abasi ikpekedịghe mbiomo inọ akpa ete ye eka nnyịn. Utu ke oro, enye akpakanam n̄kpọ ke ufọn mmọ ye eke ofụri ekpụk ubonowo. Ke ekpekedide akpa owo iba oro ẹma ẹsọn̄ọ ẹdu ke adan̄a ibet Abasi, kpukpru n̄kpọ ẹkpekesan̄a nte ọfọnde. Ke akpanikọ, nnyịn idahaemi ikpodu uwem ke utịbe utịbe paradise inemesịt nte ima ima, ekpụk ubonowo oro adianade kiet! Ukwan̄ido, ndutụhọ, ye n̄kpa ikpodụhe.

[Ndise ke page 11]

Andibot ama ọnọ owo mfọnmma ntọn̄ọ

[Ndise ke page 12]

Nte afo okpoyom ndiwat uwat ke usụn̄ oro moto ẹsiwakde edieke ibet uwat mîkpodụhe?