Ukpepn̄kpọ 4
Anie Edi Devil?
Satan kpa Devil—enye okoto m̀mọ̀n̄? (1, 2)
Didie ke Satan esibian̄a mme owo? (3-7)
Ntak emi afo ekpenyenede ndibiọn̄ọ Devil? (7)
1. Ikọ oro “devil” ọwọrọ owo emi osude ubi ubi nsu adian owo efen. “Satan” ọwọrọ asua m̀mê andibiọn̄ọ. Mmọemi ẹdi enyịn̄ oro ẹnọde akwa asua Abasi. Ke ntọn̄ọ ntọn̄ọ, enye ekedi mfọnmma angel emi okodude ke heaven ye Abasi. Nte ededi, enye ke ukperedem ama ekere aban̄a idemesie akaha onyụn̄ oyom utuakibuot oro Abasi enyenede unen ndibọ.—Matthew 4:8-10.
2. Angel emi, Satan, ama etịn̄ ikọ ọnọ Eve ebe ke urụkikọt. Ebede ke ndisu nsu nnọ enye, enye ama anam n̄wan emi ọsọn̄ ibuot ye Abasi. Satan ke ntem akan̄wana ye se ẹkotde “itie edikara,” m̀mê idaha, Abasi nte Ata Edikon̄. Satan ama eneni m̀mê Abasi akara ke usụn̄ oro odotde ye ke usụn̄ adade nti ufọn ọsọk mme andidu ke idak Esie. Satan n̄ko ama anam eyịghe odu aban̄a m̀mê owo ndomokiet eyekaiso anam akpanikọ ọnọ Abasi. Ebede ke ndinam emi, Satan ama anam idemesie asua Abasi. Oro edi ntak enye ekedide edikere Satan kpa Devil.—Genesis 3:1-5; Job 1:8-11; Ediyarade 12:9.
3. Satan esidomo ndibian̄a mme owo man ẹtuak ibuot ẹnọ enye. (2 Corinth 11:3, 14) Usụn̄ kiet oro enye abian̄ade mme owo ebe ke nsunsu ido ukpono. Edieke ido ukpono ekpepde nsu aban̄a Abasi, enye enen̄ede anam uduak Satan. (John 8:44) Mme owo oro ẹbuanade ke nsunsu ido ukpono ẹkeme ndinen̄ede nnịm ke akpanikọ nte ke mmimọ ituak ibuot inọ ata Abasi. Edi mmọ ẹnen̄ede ẹnam n̄kpọ ẹnọ Satan. Enye edi ‘abasi ererimbot emi.’—2 Corinth 4:4.
4. Ubụpekpo edi usụn̄ efen oro Satan enyenede odudu ke idem mme owo. Mmọ ẹkeme ndika mbịne mme spirit man ẹkpeme mmọ, ẹnọ mbon en̄wen unan, ẹtịn̄ ini iso, m̀mê ẹnam mme utịben̄kpọ. Satan edi idiọk odudu oro ọnọde kpukpru edinam ẹmi ibetedem. Man inem Abasi esịt, inaha nnyịn inyene n̄kpọ ndomokiet ndinam ye ubụpekpo.—Deuteronomy 18:10-12; Utom 19:18, 19.
5. Satan n̄ko abian̄a mme owo ebe ke ebeubọk ntan̄idem eke orụk ye utuakibuot nnọ mme esop ukaraidem. Ndusụk owo ẹkere ẹte ke idụt m̀mê orụk mmimọ ọfọn akan mmọ eken. Edi emi idịghe akpanikọ. (Utom 10:34, 35) Mbon eken ẹberi edem ke mme esop ukaraidem ndikọk mme mfịna owo. Ke ndinam emi, mmọ ẹsịn Obio Ubọn̄ Abasi. Enye edi n̄kukụre usọbọ kaban̄a mme mfịna nnyịn.—Daniel 2:44.
6. Usụn̄ efen emi Satan abian̄ade mme owo edi ndida mme udọn̄ unam idiọkn̄kpọ ndomo mmọ. Jehovah ọdọhọ nnyịn ifep ndiọi edinam koro enye ọfiọk ete ke mmọ ẹyenọ nnyịn unan. (Galatia 6:7, 8) Ndusụk owo ẹkeme ndiyom afo etiene mmimọ anam mme utọ edinam oro. Nte ededi, ti ete ke enen̄ede edi Satan oyom fi anam mme n̄kpọ ẹmi.—1 Corinth 6:9, 10; 15:33.
7. Satan ekeme ndida ukọbọ m̀mê ubiọn̄ọ man anam fi ọkpọn̄ Jehovah. Ndusụk mbonima fo ẹkeme ndiyat esịt ata etieti koro afo ekpepde Bible. Mbon eken ẹkeme ndida fi nnam nsahi. Edi anie ke afo akama isọn uwem fo? Satan oyom ndisịn fi ndịk ke idem man afo ekpetre ndikpep n̄kpọ mban̄a Jehovah. Kûyak Satan akan! (Matthew 10:34-39; 1 Peter 5:8, 9) Ebede ke ndibiọn̄ọ Devil, afo emekeme ndinem Jehovah esịt onyụn̄ owụt ete ke imọ imọnọ itie edikara Esie ibetedem.—Mme N̄ke 27:11.
[Mme ndise ke page 9]
Nsunsu ido ukpono, ubụpekpo, ye ufreidụt ẹtụn mme owo usụn̄
[Ndise ke page 9]
Biọn̄ọ Satan ebe ke ndikaiso n̄kpep n̄kpọ mban̄a Jehovah