Ukpepn̄kpọ 5
Nso Idi Uduak Abasi Kaban̄a Isọn̄?
Ntak emi Jehovah okobotde isọn̄? (1, 2)
Ntak emi isọn̄ mîdịghe paradise idahaemi? (3)
Nso iditịbe inọ ndiọi owo? (4)
Ke ini iso, nso ke Jesus edinam ọnọ mbon udọn̄ọ? mbon usọn̄? mme akpan̄kpa? (5, 6)
Man abuana ke mme edidiọn̄ ini iso, nso ke afo enyene ndinam? (7)
1. Jehovah okobot isọn̄ emi man mme owo ẹkpekeme ndidara ndidụn̄ ke enye ke nsinsi. Enye okoyom nti owo, kpa mbon inemesịt, ẹdụn̄ ke isọn̄ kpukpru ini. (Psalm 115:16; Isaiah 45:18) Owo idisoboke isọn̄ tutu amama; enye eyebịghi ke nsinsi.—Psalm 104:5; Ecclesiastes 1:4.
2. Mbemiso Abasi akanamde owo, Enye ama emek ekpri ubak isọn̄ kiet onyụn̄ anam enye akabade edi ediye paradise. Enye okokot emi in̄wan̄ Eden. Edi mi ke enye ekesịn akpa eren ye n̄wan oro, Adam ye Eve. Abasi akaduak ete mmọ ẹnyene nditọ ẹnyụn̄ ẹyọhọ ofụri isọn̄. Sụn̄sụn̄ mmọ ẹkpekenam ofụri isọn̄ akabade edi paradise.—Genesis 1:28; 2:8, 15.
3. Adam ye Eve ẹma ẹnam idiọkn̄kpọ ebe ke ndikokoi mbiat ibet Abasi. Ntre Jehovah ama osion̄o mmọ ke in̄wan̄ Eden efep. Ẹma ẹduọk Paradise. (Genesis 3:1-6, 23) Edi Jehovah ifreke uduak esie kaban̄a isọn̄ emi. Enye ọn̄wọn̄ọ ndinam enye akabade edi paradise, emi mme owo ẹdidụn̄de ke nsinsi. Didie ke enye edinam emi?—Psalm 37:29.
4. Mbemiso isọn̄ emi ekeme ndikabade ndi paradise, ẹnyene ndision̄o ndiọi owo mfep. (Psalm 37:38) Emi editịbe ke Armageddon, emi edide ekọn̄ Abasi ndida ntre idiọkido. Ke oro ebede, ẹyekọbi Satan ke isua 1,000. Emi ọwọrọ ke owo idiyakke ndiọi owo ndomokiet ẹsụhọ man ẹbiat isọn̄. Ikọt Abasi kpọt ẹdibọhọ.—Ediyarade 16:14, 16; 20:1-3.
5. Adan̄aoro Jesus Christ eyekara nte Edidem ke isọn̄ emi ke isua 1,000. (Ediyarade 20:6) Enye eyesio idiọkn̄kpọ sụn̄sụn̄ efep ke ekikere ye ke ikpọkidem nnyịn. Nnyịn iyekabade idi mfọnmma owo kpa nte Adam ye Eve ẹkedide mbemiso mmọ ẹkenamde idiọkn̄kpọ. Adan̄aoro udọn̄ọ, usọn̄, ye n̄kpa ididụhe aba. Ẹyenam mbon udọn̄ọ ẹkop nsọn̄idem, ndien mbon usọn̄ ẹyefiak ẹkabade ẹdi n̄kparawa.—Job 33:25; Isaiah 33:24; Ediyarade 21:3, 4.
6. Ke Tọsịn Isua Ukara Jesus, mme owo oro ẹdide mme anam-akpanikọ ẹyenam utom man ẹnam ofụri isọn̄ akabade edi paradise. (Luke 23:43) N̄ko, ẹyenam ediwak miliọn mme akpan̄kpa ẹset ẹdidu uwem nte owo ke isọn̄. (Utom 24:15) Edieke mmọ ẹnamde se Abasi oyomde oto mmọ, mmọ ẹyekaiso ẹdu uwem ke isọn̄ ke nsinsi. Mîdịghe ntre, ẹyesobo mmọ ke nsinsi.—John 5:28, 29; Ediyarade 20:11-15.
7. Akpa uduak Abasi kaban̄a isọn̄ ke ntre eyekụt unen. Nte afo akpama ndibuana ke mme edidiọn̄ ini iso ẹmi? Edieke edide ntre, afo enyene ndikaiso n̄kpep n̄kpọ mban̄a Jehovah nnyụn̄ nnam mme n̄kpọ oro enye oyomde. Ndidụk mme mbonoesop ke Ufọkmbono Obio Ubọn̄ n̄kann̄kụk eke Mme Ntiense Jehovah eyen̄wam fi ndinam ntre.—Isaiah 11:9; Mme Hebrew 10:24, 25.
[Ndise ke page 10]
Paradise oro ẹkeduọkde
[Mme ndise ke page 11]
Ke Armageddon ebede, ẹyenam isọn̄ akabade edi paradise