Ukpepn̄kpọ 11
Mme Edinịm ke Akpanikọ ye Ido Edinam Ẹmi Mînemke Abasi Esịt
Mme utọ edinịm ke akpanikọ ye mme ido edinam ewe ẹkwan̄a? (1)
Ndi mme Christian ẹkpenyene ndinịm ke akpanikọ nte ke Abasi edi Abasi-Ita-ke-Kiet? (2)
Ntak emi mme ata Christian mîsidiaha Christmas, Easter, m̀mê mme usen emana? (3, 4)
Ndi mme akpan̄kpa ẹkeme ndinọ mme oduuwem unan? (5)
Ndi Jesus akakpa ke cross? (6)
Edi akpan n̄kpọ didie ndinem Abasi esịt? (7)
1. Idịghe kpukpru mme edinịm ke akpanikọ ye ido edinam ẹdiọk. Edi Abasi inyịmeke mmọ edieke mmọ ẹtode nsunsu ido ukpono m̀mê ẹtuahade ye mme ukpepn̄kpọ Bible.—Matthew 15:6.
2. Abasi-Ita-ke-Kiet: Ndi Jehovah edi Abasi-Ita-ke-Kiet—owo ita ke Abasi kiet? Baba-o! Jehovah, kpa Ete, edi “ata Abasi kierakiet.” (John 17:3; Mark 12:29) Jesus edi akpa edibon Eyen Esie, ndien enye odu ke idak Abasi. (1 Corinth 11:3) Ete omokpon akan Eyen. (John 14:28) Edisana spirit idịghe owo; enye edi anamutom odudu Abasi.—Genesis 1:2; Utom 2:18.
3. Christmas ye Easter: Jesus ikamanake ke December 25. Enye akamana ke n̄kpọ nte October 1, kpa ini ke isua emi mme ekpemerọn̄ ẹsidude ke an̄wa ye ufene mmọ ke okoneyo. (Luke 2:8-12) Akananam Jesus itemeke mme Christian ite ẹdia usọrọ usen emana imọ. Utu ke oro, enye akasian mme mbet esie ete ẹti n̄kpa imọ. (Luke 22:19, 20) Christmas ye mme ido edinam esie ẹnyene ntọn̄ọ ẹto mme nsunsu ido ukpono eset. Kpa ntre ke edi ye mme ido edinam Easter, utọ nte edikama mme nsenunen ye mme oyot. Mme akpa Christian ikadiaha Christmas m̀mê Easter, mme ata Christian inyụn̄ idiaha mfịn.
4. Mme Usen Emana: Mme owo oro mîkatuakke ibuot inọ Jehovah ẹkenam n̄kukụre usọrọ usen emana iba oro ẹtịn̄de ẹban̄a ke Bible. (Genesis 40:20-22; Mark 6:21, 22, 24-27) Mme akpa Christian ikanamke mme usọrọ usen emana. Ido edinịm mme usọrọ usen emana enyene ntọn̄ọ oto mme nsunsu ido ukpono eset. Mme ata Christian ẹsinọ mme enọ ẹnyụn̄ ẹnyene edifọn ini ọtọkiet ke mme ini eken ke isua.
5. Ndịk Ẹnyenede Ẹban̄a Mme Akpan̄kpa: Mme akpan̄kpa ikemeke ndinam n̄kpọ ndomokiet m̀mê ndikop ntụk ndomokiet. Nnyịn ikemeke ndin̄wam mmọ, ndien mmọ ikemeke ndinọ nnyịn unan. (Psalm 146:4; Ecclesiastes 9:5, 10) Ukpọn̄ esikpa n̄kpa; enye isikaha iso idu uwem ke owo ama akakpa. (Ezekiel 18:4) Edi ndusụk ini ndiọi angel, ẹmi ẹkotde mme demon, ke abian̄a ẹsinam nte idi spirit mme akpan̄kpa. Mme ido edinam ekededi oro ẹnyenede n̄kpọ ndinam ye ndịk oro ẹnyenede ẹban̄a m̀mê utuakibuot oro ẹtuakde ẹnọ mme akpan̄kpa ẹkwan̄a.—Isaiah 8:19.
6. Cross: Jesus ikakpaha ke cross. Enye akpakpa ke eto. Ikọ Greek oro ẹkabarede “cross” ke ediwak Bible ọkọwọrọ kpa ubak eto kiet. Idiọn̄ọ cross enyene ntọn̄ọ oto mme nsunsu ido ukpono eset. Mme akpa Christian ikakamake cross m̀mê ndituak ibuot nnọ enye. Ke ntre, nte afo emekere ke ekpenen ndikama cross ke utuakibuot?—Deuteronomy 7:26; 1 Corinth 10:14.
7. Ekeme ndisọn̄ ata etieti ndikpọn̄ ndusụk mme edinịm ke akpanikọ ye mme ido edinam ẹmi. Mme iman ye mme ufan ẹkeme ndidomo ndinam fi okûkpụhọde mme n̄kpọ oro afo onịmde ke akpanikọ. Edi ndinem Abasi esịt edi akpan n̄kpọ akan ndinem mme owo esịt.—Mme N̄ke 29:25; Matthew 10:36, 37.
[Ndise ke page 22]
Abasi idịghe Abasi-Ita-ke-Kiet
[Ndise ke page 23]
Christmas ye Easter ẹnyene ntọn̄ọ ẹto mme nsunsu ido ukpono eset
[Ndise ke page 23]
Ntak ndomokiet idụhe ndituak ibuot nnọ mme akpan̄kpa m̀mê ndikop ndịk mban̄a mmọ