Anie Edi Michael Etubom Mme Angel?

OWO iwakke nditịn̄ mban̄a edibotn̄kpọ spirit oro ẹkotde Michael ke Bible. Nte ededi, ke ini ẹtịn̄de ẹban̄a enye, esinyene se enye anamde. Ke n̄wed Daniel, Michael an̄wana ye ndiọi angel; ke leta Jude, enye eneni n̄kpọ ye Satan; ndien ke Ediyarade, enye an̄wana ekọn̄ ye Devil ye mme demon esie. Ebede ke ndida nnọ itie edikara Jehovah nnyụn̄ n̄n̄wana ye mme asua Abasi, Michael odu uwem ekekem ye se enyịn̄ esie ọwọrọde—“Anie Etie Nte Abasi?” Edi anie edi Michael?

Ndusụk ini, mme owo ẹsikere ẹkan enyịn̄ kiet. Ke uwụtn̄kpọ, ete-ekpụk oro Jacob ekekere Israel, ndien apostle Peter ekekere Simon. (Genesis 49:1, 2; Matthew 10:2) Kpasụk ntre, Bible owụt ke enyịn̄ Jesus Christ efen mbemiso enye ekedidude uwem ke isọn̄ ye ke enye ama akafiak ọnyọn̄ heaven edi Michael. Ẹyak nnyịn ineme mme ntak N̄wed Abasi emi anamde nnyịn idọhọ ntre.

Etubom Mme Angel. Ikọ Abasi okot Michael “etubom mme angel.” (Jude 9) Bible etịn̄ aban̄a “etubom mme angel” nte owo kiet, idịghe ediwak owo. Emi owụt ke angel kiet kpọt ekere enyịn̄ oro. Ke akande oro, ẹtịn̄ ẹban̄a Jesus ke ini ẹnemede n̄kpọ ẹban̄a utom etubom mme angel. Kaban̄a Ọbọn̄ Jesus Christ oro ekesetde ke n̄kpa, 1 Thessalonica 4:16 ọdọhọ ete: “Ọbọn̄ ke idemesie oyoto ke heaven osụhọde ye ọkpọsọn̄ n̄kpo, ye uyo etubom mme angel.” Mi, ẹtịn̄ ẹban̄a uyo Jesus nte edide uyo etubom mme angel. Ke ntre itien̄wed emi ọnọ ekikere nte ke Jesus ke idemesie edi Michael etubom mme angel.

Etubom Udịmekọn̄. Bible ọdọhọ ke ‘Michael ye mme angel esie ẹn̄wana ekọn̄ ye dragon ye mme angel esie.’ (Ediyarade 12:7) Ntre, Michael edi Etubom udịmekọn̄ mme anam-akpanikọ angel. Ediyarade n̄ko etịn̄ aban̄a Jesus nte Etubom udịm mme anam-akpanikọ angel. (Ediyarade 19:14-16) Ndien apostle Paul etịn̄ san̄asan̄a aban̄a “Ọbọn̄ Jesus” ye “mme okopodudu angel esie.” (2 Thessalonica 1:7) Ntre Bible etịn̄ aban̄a Michael ye “mme angel esie” onyụn̄ etịn̄ aban̄a Jesus ye “mme angel esie.” (Matthew 13:41; 16:27; 24:31; 1 Peter 3:22) Sia Ikọ Abasi mîwụtke ke itie ndomokiet nte ke udịmekọn̄ mme anam-akpanikọ angel iba ẹdu ke heaven—kiet emi Michael edide etubom ye efen emi Jesus edide etubom—esịne ifiọk ndidọhọ ke Michael idịghe owo efen ikan Jesus Christ ke itieutom esie ke heaven.a