Leta Otu Emi Ẹsede Ẹban̄a Utom Mme Ntiense Jehovah

Edima Ufan Jehovah:

Jesus ọkọdọhọ ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:32) Ikọ oro ọsọn̄ọ nnyịn idem tutu! Enye owụt ke owo ekeme ndidiọn̄ọ akpanikọ, idem ke ndiọkeyo eke “mme akpatre usen” emi, emi ọyọhọde mi ye nsu ye abian̄a. (2 Timothy 3:1) Ndi emeti akpa ini emi okokụtde akpanikọ emi Bible ekpepde? Imenịm ke ama enem fi tutu!

Ndidiọn̄ọ ata akpanikọ nnyụn̄ nda enye n̄kpep mme owo kpukpru ini edi akpan n̄kpọ, edi ana uwem nnyịn n̄ko owụt ke imọdiọn̄ọ akpanikọ. Iwụt ke imọdiọn̄ọ akpanikọ edieke isidude uwem oro edinamde Abasi ama nnyịn. Ndien emi esịne ndinam se Jesus eketịn̄de okoneyo oro ekesierede usen emi ẹkewotde enye. Enye ọkọdọhọ mme apostle esie emi ẹkesọn̄ọde ẹda ye enye ete: “Edieke mbufo ẹnịmde mme ewụhọ mi, mbufo ẹyeka iso ẹdu ke ima mi, kpa nte ami nnịmde mme ewụhọ Ete mi nnyụn̄ ndude ke ima esie.”​—John 15:10.

Ndi omokụt ke Jesus ndikenịm ewụhọ Ete esie akanam Ete esie aka iso ama enye? Ukem se anade inam edi oro. Ikpoyom Abasi aka iso ama nnyịn, ana idu uwem kpukpru usen nte owo emi ọdiọn̄ọde akpanikọ. Jesus ama ọdọhọ mbubreyo oro n̄ko ete: “Edieke mbufo ẹfiọkde mme n̄kpọ emi, mbufo ẹyekop inemesịt edieke ẹnamde mmọ.”​—John 13:17.

Imenen̄ede inịm ke n̄wed emi ayan̄wam fi aka iso odu uwem nte owo emi ọdiọn̄ọde akpanikọ, onyụn̄ anam Abasi aka iso ama fi, ke adan̄aemi osụk etiede ebet ini emi edidude uwem ke nsinsi.​—Jude 21.