UKPEPN̄KPỌ 18

Nam Owo Ekpep Obufa N̄kpọ

1 Corinth 9:19-23

SE AKPANAMDE: Nam mme owo ẹnen̄ede ẹkere ẹban̄a se afo etịn̄de ẹnyụn̄ ẹkpep obufa n̄kpọ.

Kere ban̄a se mme owo ẹma ẹkefọfiọk. Utu ke nditịn̄ se mme owo ẹma ẹkekokop, tịn̄ n̄kpọ emi edinamde mmọ ẹkpep obufa n̄kpọ.

Kûnen̄ede ubiat ini ke ini etịn̄de n̄kpọ emi mme owo ẹma ẹkefọfiọk, edi kam da ini tịn̄ n̄kpọ emi afo ọdiọn̄ọde ke mmọ ikopke akpa.
Yom se afo edidade itịm utịn̄ikọ fo. Edieke ekemede, yom uwụtn̄kpọ emi akanam mmọ mîkopke nọ, mîdịghe da n̄kpọ emi mmọ mîkekereke-kere kpep mmọ n̄kpọ. Edi kụt ete ke se afo etịn̄de isan̄ake isio ye se afo oyomde ndikpep mmọ.

Ke ini etịmde utin̄ikọ fo, nen̄ede tie kere se afo editịn̄de. Ndi oyom nditịn̄ ‘se iketịbede, ntak eketịbede, ini eketịbede, ebiet eketịbede, se ikanamde enye etịbe, ye nte oro ebehede nnyịn?’ Ke ini etịn̄de ikọ ọnọ otuowo, men ndusụk se ẹsiakde ke ekebe emi bụp mbụme nyụn̄ bọrọ man utịn̄ikọ fo enem.
Nam mme owo ẹkụt ke se afo etịn̄de ebehe mmọ. Wụt mme owo nte ikọ Abasi emi afo ọkwọrọde ekemede ndin̄wam mmọ ke usen ke usen. Da se isitịbede ke edem mbufo, nte mme owo ẹdude uwem, ye se mmọ ẹsinamde kpep mmọ n̄kpọ.