“Ke Oro Ebede Enye N̄ko Ama Ọnọ Ebe Esie Ndusụk”
NTE Adam ama odu ke ini urụkikọt eketịn̄de ikọ ọnọ Eve onyụn̄ abian̄a enye ndisọn̄ ibuot ye Abasi? Bible iwụtke emi. Genesis 3:6 (New World Translation) ọtọt ete ke Eve “ama ọtọn̄ọ ndida mfri esie nnyụn̄ ndia. Ke oro ebede enye n̄ko ama, ọnọ ebe esie ndusụk ke ini odude ye enye.” Nte ededi, ndusụk Bible oro ẹkabarede ẹnọ isio isio ekikere. King James Version esịn itien̄wed emi nte etienede mi: “Ekem enye ama ada mfri oro, onyụn̄ adia, onyụn̄ ọnọ ebe esie n̄ko emi okodude ye enye; enye onyụn̄ adia.”
Ikọ-edinam Hebrew oro ẹkabarede nte “ama ọnọ” odu ke uduot oro owụtde edinam akade-kaiso onyụn̄ asan̄a kiet ye san̄asan̄a uduot uyịri ikọ oro, “onyụn̄” [Hebrew, waw], ntem owụtde ibio ibio m̀mê se itienede ke adiana ke adiana. Ke ntre, New World Translation akabade waw, emi odude ke ediwak itie, oro eyịride udịm udịm n̄kpọntịbe ke Genesis 3:6, idịghe n̄kukụre ye “onyụn̄” edi n̄ko ye mme ikọ efen oro ẹdade ẹyịri ye usem, utọ nte “edikem,” “ntre,” ye “ke oro ebede.” New World Translation ke ntem emenyene ata eti ntak ke ndida ikọ enyọn̄ emi.
Nte Adam ekpeketie idop idop ntre ese nneme oro akakade iso ke ufọt an̄wan esie ye urụkikọt, akpan̄de utọn̄ okop nsunsu ye ikọ edidọk eke ọsọn̄ibuot oro enyịn mîkwe, oro okodude ke edem urụkikọt? Nte inem n̄kpọ, ekpep a-Bible owo Germany oro, J. P. Lange inyịmeke ye ekikere emi onyụn̄ etịn̄ ete: “Erenowo oro ndikodu ke itie ke ini edinam idomo oro, idem enye ndikodop uyo ntre, edi n̄kpọ ọsọn̄de ndikere.” Ndien ke ndinam ikọ oro “ye enye” an̄wan̄a, B. Jacob, atatikọ owo Jew ọdọhọ ete ke emi “[iwọrọke] enyeemi akadade ye n̄wan oro (ke mbemiso edinam oro m̀mê ke adan̄aemi n̄wan oro akadiade).”
Nneme oro Eve ekenyenede ye urụkikọt oro ama ayarade ete ke ebe esie ama asian enye aban̄a ewụhọ oro Abasi okowụkde owo ete okûdia eto oro. (Genesis 3:3) Ntre nte andidi ibuot nnọ Eve, Adam ama ọyọhọ mbiomo oro. Devil ama ofụmi ndutịm Abasi kaban̄a itie ibuot ndien mbufiọk ama abian̄a Eve sia okodude ikpọn̄. Eve ke ukperedem ama ọbọrọ ete: “Urụkikọt akabian̄a mi, ndien ndia.” (Genesis 3:13) Ẹma ẹbian̄a Eve sia enye okonịmde nsu ke akpanikọ, edi emi ikanamke idiọkn̄kpọ esie enen. Uwụtn̄kpọ esịnede ntọt mi owụt nte ke tutu amama nnyịn ikemeke ndinyene ntak ndinọ ke ndinam n̄kpọ oro akwan̄ade ke enyịn Jehovah.—1 Timothy 2:14.