Nnyịn Ima Ibọk Nditọ Itiaita ke Ntụnọ Jehovah
NTE OVERLAC MENEZES OBỤKDE
“Mmọ ẹma ẹdibehe ke enan̄ukwak oro enyenede n̄kpọitie iba.” Emi edi nte Jornal de Resende ọkọtọn̄ọde mbụk esie ke ofụri page kiet aban̄a ubon nnyịn ke 1988, ke ini nnyịn ikọkpọn̄de Resende ika Lages ke n̄kan̄ edem usụk Brazil.
MBỤK oro ama akaiso ete: “Nte eyịghe mîdụhe, ikpọ owo ẹyeti n̄wan-ye-ebe oro ẹkedụride ntịn̄enyịn mbon Resende oto akpa ye esen esen n̄kpọisan̄ mmọ: enan̄ukwak oro enyenede akamba esan̄ukwak ye n̄kpọitie iba. Owo oro eketiede ke iso ekedi Overlac Menezes, kpa ‘andiwat’; n̄wan esie, Maria José, eketie ke ọyọhọ n̄kpọitie iba. Isua: 1956.”
Owo oro ekerede Arisio Maciel ekedi andiwet ibuotikọ oro, ndien enye ekedi n̄ko esenyịn ufọkutom radio obio oro. Enye ekebemiso osobo ye nnyịn ke edem ko ke 1956 ke ini ami ye n̄wan mi ikabuanade ke ndutịm radio Watch Tower Society eke urua ke urua oro, Mme N̄kpọ Oro Mme Owo Ẹkerede Ẹban̄a. Ke ibuotikọ oro, enye ama ewet kpa nte ami n̄kọdọhọde nte ke ini nnyịn ikodude do nnyịn “ima iwaha kpukpru ufọk ke Resende, ke efak ke efak.”
Nte afo akpama ndidiọn̄ọ nte ẹkesan̄ade ẹdiọn̄ọ nnyịn mfọn mfọn ntre ke Resende? Ye, ke adan̄aemi ikodude do, nte ikanamde nditọ itiaita ẹkọri ‘ke ntụnọ Jehovah’ ke adan̄aemi ikan̄wamde ke ndida eti mbụk Obio Ubọn̄ n̄waha kpukpru ufọk ke Resende?—Ephesus 6:4.
Ndikpep Mme Usụn̄ Jehovah
Ke January 1950, Adeilde eyeneka mi an̄wan ke Sáo Paulo ama ọtọn̄ọ ndikpep Bible ye Maria Minc, kiet ke otu Mme Ntiense Jehovah. N̄kedi isua 16 ini oro mma nnyụn̄ nna baptism nte owo Catholic, edi n̄kakaha ufọkederi ke ndusụk ini. Kpa ye oro, n̄kosụk nnonịm Abasi ke akpanikọ nnyụn̄ nyom ndinam n̄kpọ esie. Ntre okoneyo kiet, mma n̄ka ufọk Adeilde man n̄kanam ndụn̄ọde mban̄a obufa ido ukpono oro enye ọkọbọde ukpep. Maria Mine ama ọdọhọ yak mbuana ye mmimọ ke ukpepn̄kpọ oro, ndien nte akpa ini ke uwem mi, ami mma n̄kụt Bible. Ke ukpepn̄kpọ oro ẹketienede mma ndu ke n̄kpaidem ndikpep ke Bible nte ke enyịn̄ Abasi edi Jehovah, nte ke ibịghike isọn̄ eyekabade edi paradise, nte ke hell ikan̄ ye purgatory idụhe, ye nte ke owo inyeneke ukpọn̄ oro mîkpaha ke nsinsi. Mme iman mi ẹkedọhọ mi ẹte: “Ibuot eyebe fi ke okotde Bible akaha!”
Mma nnam eti n̄kọri ke ukpepn̄kpọ Bible mi nnyụn̄ ntọn̄ọ ndidụk mme mbonoesop ke Ufọkmbono Obio Ubọn̄ eke Esop Belém ke Sáo Paulo. Ke ndoride enyịn ndikụt ikpọ owo kpọt ke mbono oro, idem ama akpa mi inem inem ndikụt ediwak uyen ẹdide ubọkn̄ka mi. Ke February 5, 1950, mma ntiene mbuana ke utom ukwọrọikọ nte akpan ini, ndien ke November 4, ke kpasụk isua oro, mma nyarade uyakidem mi nnọ Jehovah ke mmọn̄ baptism.
Ibio ini ke oro ebede ẹma ẹmek mi nte ọnọ-utịn̄ikọ an̄wa. Ke ini oro, emi ọkọwọrọ ami ndinọ utịn̄ikọ ke efak ye ke itie nduọkodudu, n̄kamade ukwak utịn̄ikọ oro ẹkebọpde ẹdian ke moto. Edinam efen ekedi utom magazine. Ini oro nnyịn ikesikama ekpat magazine nnyịn ida ke mme inụk efak, ifioride ite: “Enyọn̄-Ukpeme ye Awake! Ọnọ Ntọt Obio Ubọn̄ Jehovah!” N̄kesinịmke ediwak magazine, edi mma nsinyene uko nditịn̄ ikọ ke an̄wa.
Utom Uyọhọ-Ini nte Utịtmbuba
Ibịghike ẹma ẹdụri ntịn̄enyịn mi ẹwụt nte utom usiakusụn̄, m̀mê utom ukwọrọikọ uyọhọ-ini edide akpan n̄kpọ. Nsiondi Enyọn̄-Ukpeme (Ikọmbakara) eke April 1, 1950, ama enyene ibuotikọ oro ẹkekotde: “Mme Asiakusụn̄ Eti Mbụk Efen Efen.” Enye ọkọdọhọ ete: “Ndibemiso nyom Obio Ubọn̄ ọwọrọ ke owo ekpenyene mme udọn̄ n̄kpọ Obio Ubọn̄ nte akakan n̄kpọ ke ekikere esie kpukpru ini. Uto owo oro eyeyom mme ifet ndinam n̄kpọ ke ufọn obio ubọn̄, idinyụn̄ ibemke iso iyom mme n̄kpọ obụkidem inyụn̄ ikọ inyene ererimbot ibon man ekpeme ini iso esie.” Ikọ ẹmi ama ọtọ edu usiakusụn̄ ke esịt mi.
Ibịghike, ediye eyenan̄wan emi ekekerede Maria José Precerutti ama okpụhọde uwem mi ke n̄wọrọnda usụn̄. Enye ke akanam eti n̄kọri ke ndikpep Bible ye mme ọdọ-ndọ ẹdide Mme Ntiense, kpa José ye Dília Paschoal. Ke January 2, 1954, enye ama akabade edi edima an̄wan mi, nsan̄a, ufan, ye owo un̄wam. Utịtmbuba esie, n̄ko, ekedi ndisiak usụn̄. Ntre, ke ibọde nsịnudọn̄ ito uwụtn̄kpọ mme isụn̄utom nte Harry Black, Edmundo Moreira, ye Richard Mucha, nnyịn ima isịn eben̄e ndidụk utom usiakusụn̄. Kere nte idatesịt—ye editịmede esịt nnyịn eketiede—ke ini nnyịn ikọbọde ibọrọ oro: “Ẹnyịme editoro oro ẹketorode fi ndidi esenyịn circuit”!
Ke ini n̄kọbọde akpa utom circuit mi, ndịk ama omụm mi. Obufa circuit mi ekesịne esop duop ke Rio de Janeiro, kpa ibuot obio Brazil eke ini oro, esịnede ndusụk esop ẹkperede Bethel. Ufọk isụn̄utom eke Watchtower Bible School of Gilead okodu ke akpa esop oro ẹkenọde mi n̄kese. Ke isua 22 ke emana, mma n̄kekere ke ami ndotke nnyụn̄ ndọhọ Brọda Mucha, emi ekesede enyịn aban̄a utom ke Brazil ini oro nte: “Nso ke ami n̄keme ndikpep mbon ẹmi?” Enye ama ọbọrọ ete: “Brọda, kam buan item otode Bible ye esop.” Eti item ke akpanikọ!
Isua kiet ke ukperedem, Maria José ama oyomo idịbi, ndien nnyịn ikenyene ndikpọn̄ utom circuit. Ye inemesịt, nte ededi, nnyịn ima ikaiso idu ke utom uyọhọ-ini. Ke ndibọrọ eben̄e oro ubon Finland iba, kpa ubon Edviks ye ubon Leiniös ẹkesịnde, N̄ka ama ọnọ nnyịn ika Resende nte mme akpan asiakusụn̄, kpa obufa efakutom oro owo 35,000 ẹdụn̄de. Edi ubon Leiniös ẹkenọ nnyịn enan̄ukwak oro enyenede n̄kpọitie iba emi ẹkesiakde ke ibuotikọ oro ke Jornal de Resende. Ke ikamade enan̄ukwak oro, nnyịn ima ikeme ndisuan ediwak n̄kpasịp akpanikọ ke eti efakutom oro, ndien ima ikaiso ndinam utom do ke ndusụk ọfiọn̄ ke adiaha nnyịn, Alice, ama akamana ke 1956. Ke nnyịn ima ikọnyọn̄, nditọete iban iba, Anita Ribeiro ye Marian Weiler, ẹma ẹdi ẹdiduọk mmọn̄ ke n̄kpasịp oro ndien ‘Abasi ama akaiso ndinam enye ọkọri.’ Mfịn, Resende emenyene esop usụkkiet ye mme asuanetop ẹwakde ẹbe 700.—1 Corinth 3:7.
Kiet ke otu akpa mbon oro ami n̄kosobode ke Resende ekedi Manoel Queiroz. Ke adan̄aemi n̄kadade mbet bọs, mma nnọ enye n̄wed iba ke itie utom esie. Enye, n̄wan esie, Piedade, ke ukperedem ẹma ẹnam eti n̄kọri ndien mmọ mbiba ẹma ẹna baptism. Manoel ama akabade edi ebiowo ke esop onyụn̄ akaiso ke edinam akpanikọ tutu usen n̄kpa esie. Ami n̄ko mma n̄kpep n̄kpọ ye Alvaro Soares. Ke akpa mbonoesop oro enye okodụkde, enye ama odu ke n̄kpaidem ndikụt n̄kpasịp owo itiokiet, edi mfịn enye edi esenyịn city ke Resende emi mme owo ẹwakde ẹbe tọsịn kiet ẹsidụkde mme mbonoesop ke nsio nsio esop. Ke 1978, Carlos, eyen Alvaro ama ọdọ adiaha nnyịn, Alice. Mfịn, mme owo ẹwakde ẹbe 60 ke ubon Soares ẹdi Mme Ntiense.
Ndikpọn̄ Resende ọkọwọrọ ke imemen utom uyọhọ-ini nnyịn ikphụhọ ye mbiomo Christian efen, ‘nditịm n̄kpọ nnọ mbonufọk nnyịn.’ (1 Timothy 5:8) Nte ededi, nnyịn ima in̄wana ndimụm edu usiakusụn̄ n̄kama, inịmde utom uyọhọ-ini nte utịtmbuba nnyịn. Mma nnam utom ye usiakifia kiet ke São Paulo, ndien ke isua kiet mma nsinam isan̄ itiat 190 ke utịturua kiet kiet n̄ka Resende man n̄kan̄wam otu asuanetop ẹdide owo 15 do. Ekem, ke 1960, nnyịn ima ifiak ika Resende.
Edibọk Nditọ—Ifetutom Efen Efen
Nnyịn ke akpanikọ ikaduakke ndinyene ata uwak nditọ, edi mmọ ẹma ẹdi, ke adiana ke adiana. Ke Alice ama akamana, Léo, ndien ekem Márcia, Maércio, Plínio, André, ndien ke akpatre, ke 1976, Sônia ye Sofia, amana-iba. Ima ibọ eyen kiet kiet ke inemesịt nte “udeme Jehovah.” (Psalm 127:3) Ndien ima ibọk eyen kiet kiet “ke ntụnọ [Jehovah]” ye un̄wam esie.—Ephesus 6:4.
Nte ededi, emi ikememke utom. Ndusụk ini nnyịn ima isitua eyet ke ntak mme mfịna. Edi n̄kpọ eyenutom ama odu. Nnyịn ikasan̄a didie ibọk mmọ? Ke ukpepn̄kpọ ubon, ke ndida mmọ n̄ka mme mbonoesop ye an̄wautom toto ke ini uyen mmọ, ke ndinam n̄kpọ ọtọkiet, ke ndikụt nte ke mmọ ẹdụk nti nsan̄a, ke ndinọ mmọ ntụnọ oro enyenede iwụk, ye nnyịn ke idem nnyịn ndinịm eti uwụtn̄kpọ.
Isua ifan̄ ẹmi ẹkebede, ke ndutịm mbono oro ẹkenịmde ke Cruzeiro, São Paulo, esenyịn circuit ama anam ndụn̄ọde ye nnyịn. Ke mma n̄ketịn̄ n̄kpọ mban̄a ukpepn̄kpọ ubon nnyịn, esenyịn circuit oro ama obụp mi ete: “Nso udeme ke n̄wan fo ekenyene ke emi?” Ami mmeti nte ke mmọn̄eyet ama asiaha mi ke enyịn, ndien eketie nte akamba eboho n̄kpọ esịne mi ke inua tutu eyedi se mmen̄kemeke ndinọ ibọrọ. Ntak-a? Koro mma nnen̄ede n̄wụt esịtekọm mban̄a eti udeme oro Maria José ekenyenede ke ndimụm ubon ukara Abasi nnyịn n̄kama. Ke ekpedide enye ikọnọhọ un̄wam edinam akpanikọ, n̄kpọ ọkpọkọsọn̄ ata etieti!
Toto ke ini ediomi ndọ nnyịn, ami ye Maria José ima isitie ọtọkiet ikpep Bible. Ke ini nditọ ẹkedide, ama akabade edi ata n̄kpọ-ata ndikaiso ke ukpepn̄kpọ oro kpukpru ini. Man an̄wam ke afan̄ emi, ke urua kiet kiet mma nsiwet ini ukpepn̄kpọ ye n̄wed oro idikpepde ndian ke usụn̄ fridge. Ami n̄ko mmasinọ san̄asan̄a utomufọk. Ke uwụtn̄kpọ, usen kiet Márcia ye Plínio ẹma ẹn̄wana ke okpokoro udia. Ntre ke ndan̄nsiere, mmọ ẹma ẹkụt utomufọk adianade ke fridge “Nte ekemede nditie ufan ufan ye nditọeka fo.” Ke ukpepn̄kpọ oro eketienede, mmọ mbiba ẹma ẹtịn̄ ikọ ẹnyụn̄ ẹbiere mfịna mmọ.
Mfịna en̄wen ekesidi ke usenubọk Sunday ke ini nditọiren ẹkesiwakde ndidọhọ ke mmimọ imọdọn̄ọ ikaha ndiwọrọ an̄wautom. Léo ye Plínio ẹkedi nta ke nditịbi ubiak idịbi ye udọn̄ọ eken ndi man ẹkûsan̄a ye nnyịn ke utom ukwọrọikọ. Ini kiet ekededi oro n̄keyịk m̀mê mmọ ẹnen̄ede ẹdọn̄ọ, mma nsitịn̄ n̄kpọ ntem: ‘Edieke udọn̄ọ omụmde fi akaha ndiwọrọ an̄wautom, do ke akpanikọ afo udunyeneke odudu ndibre bọl ke ukperedem.’ Nte ido edide, mmọ ẹma ẹsisọsọp ẹkan n̄kpọ emi ubọk ke n̄wọrọnda usụn̄.
Ke idaha kiet, ama oyom nnyịn ise iban̄a se ikotịbede ye ntịn̄enyịn. Ke ini Léo ekedide isua 11, enye ama asan̄a ye ekemmọ Mme Ntiense aka mbre unọ idem inemesịt, ndien ye unana edibọ unyịme enye ama edep unam oro odobide ke pound iba ata. Ke ukperedem, ke ini ikọbọde n̄wed isọn, Maria José ama obụp Léo ete: “Ndi emefre ke afo ama edep unam?” Enye ama ọbọrọ nte anana ndudue ete, “Baba, n̄kedepke.” N̄wan mi ama ọdọhọ ete, “Ọfọn, yak ika ikeneme ye enyene-ufọkurua oro.” Ke usụn̄ oro do, ibuot-efre ama ọkpọn̄ Léo. Enye ama ayarade ete, “Mmeti, okụk n̄kakamade ikekemke ntre mma ndep ke isọn nnyụn̄ mfre ndikpe isọn oro.” Mma n̄kpe okụk oro nnyụn̄ ndọhọ enyene-ufọkurua oro ada Léo ke utom, ayakde enye anam utom tutu enye osio isọn oro ọnọ mi. Ufen esie ekedi oro. Kpukpru usenubọk ke n̄kanika inan̄, Léo ekedi akpa owo ndisịm itieutom, ndien ke ọfiọn̄ kiet enye ama ekpe mi okụk oro ọyọhọ ọyọhọ.
Ufọk nnyịn kpukpru ini ekesiyọhọ ye mme asiakusụn̄, mme esenyịn oro ẹsan̄ade-san̄a, mme isụn̄utom, ye mbonufọk Bethel. Ata ediwak ini nnyịn ikesinịmke television ke ufọk, ndien emi ama an̄wam nnyịn ndikọri eti ido ukpepn̄kpọ ye mme edu Christian. Edi ke utọ idaha ntem ke nnyịn ikọbọk nditọ nnyịn. Ndusụk leta oro mmọ ẹkenọde ẹsọk nnyịn ke mmọ ẹma ẹkekponi ọmọsọn̄ọ nte ke enye ama enyene ufọn.—Se ekebe ke page 30.
Ndifiak Nsiak Usụn̄!
Ke ini ediwak nditọ nnyịn ẹkekọride ẹwọrọ owo, mma nti ibuotikọ kiet ke nsiondi Enyọn̄-Ukpeme (Ikọmbakara) eke March 1, 1955, emi ẹkekotde “Ndi Utom Uyọhọ-Ini Enyene Fi?” Enye ọkọdọhọ ubak ubak ete: “Ndusụk owo ẹkeme ndinyene ntụk edida utom uyọhọ-ini nte esen esen n̄kpọ. Edi ke emi mmọ ẹmenam ndudue, koro ke ntak en̄wọn̄ọ uyakidem esie nnọ Christian kiet kiet enyene mbiomo ndinam utom uyọhọ-ini ibọhọke mme idaha oro enye mîkemeke ndinyan̄a ẹkpan enye ndinam ntre.”
Okoneyo usen kiet mma mbọn̄ akam nnọ Jehovah nte afiak eberede usụn̄ ọnọ mi ndifiak ndụk utom uyọhọ-ini. Ubon mi ẹma ẹdiana kiet ye. ami, mme ufan ẹma ẹnyụn̄ ẹsịn udọn̄ ẹnọ mi. Ke edide ata n̄kpọ n̄kpaidem ọnọ mi, esenyịn usiakifia oro ami n̄kanamde utom ke isua 26 ama onyịme mi nnam utom ke ibio ini man n̄keme ndinam utom nte asiakusụn̄ ofụri ini. Ntre ami ye inemesịt mma ntọn̄ọ utom oro n̄kọkpọn̄de ke ata ediwak isua mbemiso. Ndien owo ita ke otu nditọ mi ẹma ẹtiene uwụtn̄kpọ mi.
Nnyịn ima inam utom isua iba ke Itatiaia, emi ami n̄kedide ebiowo ke isua 15, ndien ekem nnyịn ima ibiere ndiwọrọ n̄kanam utom ke ebiet oro udọn̄ okokponde akan. Emi ọkọwọrọ ndidu uwem ke ekpri okụk ukpọn̄ utom, emi edide n̄kpọ nte mbahade kiet ke itie inan̄ ke ata okụk ọfiọn̄. Kpa ye oro, ndikọn̄ mbuọtidem ke un̄wọn̄ọ Jesus ke Matthew 6:33, nnyịn ima iwet N̄ka iban̄a ndutịm nnyịn. Urua kiet ke oro ebede, akayak esisịt nnyịn ndifọfrọ ke enyọn̄ ọnọ idara ke ndibọ ibọrọ mmọ: “Owụt eti ibuot nnyịn ndinọ ekikere nte yak mbufo ẹka obio Lages. Kpa ye oro mbio obio esie ẹwakde ẹbe owo 200,000, mme asuanetop 100 kpọt ẹdu do ke n̄kpri esop ita. Mbufo ẹyesịn akwa un̄wam ke efakutom oro.”
Nnyịn ima idaha ke February 1988. Ndien mi ke nnyịn isụk idu, emi oyomde usụn̄ akan itiat 600 ọkpọn̄ nditọ ye mme ufan nnyịn. Idahaemi ke nnyịn isụk iwọrọ ke ndiọkn̄kan ini etuep oro edide akpa ke isua 20. Ami ndi n̄kukụre ebiowo ke esop nnyịn, ntre ekese n̄kpọ ẹdu ndinam. Edi, ẹmediọn̄ nnyịn ata etieti. Se inemde nnyịn esịt akpan akpan edi efakutom oro. Ke ini nnyịn ikọn̄de usụn̄ufọk mmọ, mme OWO ẹsidọhọ ẹte: “Mbọk ẹdụk ẹdi-o!” Edi mmemmem n̄kpọ nditọn̄ọ ukpepn̄kpọ Bible. Ke ini okụk mîdụhe nnyịn imesibọ nsio nsio n̄kpọ nte enọ, ndien nnyịn imesinyọn̄ ufọk ye suọp, enem-utebe aran, razor, ọfọn̄ nditọn̄wọn̄ (idade isọk eyeyen nnyịn), ibokpot, ikọn̄udia, mfri, yogurt, wine, ye idem ice cream. Ini kiet nnyịn ima ibọ ifụm eto!
Mfri Oro Adade Uwak Edidiọn̄ Edi
Mfịn, ke isua 56 ke emana, ami mmesikop inemesịt inikiet ekededi oro n̄kerede mban̄a ubon nnyịn. Nditọ oro “ikamanake ke akpanikọ.” Ẹkeman mmọ ẹsịn ke ufọk Christian, ndien ẹkenyene nditọ akpanikọ ke nsek esịt ye ekikere mmọ. Mbon oro ẹkedọde ndọ ẹkedọ “owo Abasi.” (1 Corinth 7:39; Deuteronomy 6:6, 7) Edi akpanikọ, nnyịn ima isinam ndudue ke se ibierede. Ndusụk ini ima isikpe ukwan̄ ikpe. Inikiet ami mma n̄kpu ndinịm eti uwụtn̄kpọ m̀mê nsiode enyịn n̄kpọn̄ mbiomo mi nte ete ye ebendọ. Ke ini n̄kedide ndidiọn̄ọ se n̄kanamde, mma mben̄e Jehovah ye n̄wan mi ye nditọ mi ndifen nnọ mi, nnyụn̄ n̄n̄wana ndinen̄ede se ikakwan̄ade.
Kpa ye mme unana mfọnmma nnyịn, ubon nnyịn—emi ọkọride idahaemi ke ntak mme ebe nditọ nnyịn, iban nditọ nnyịn, ye nditọ nditọ—emenyene owo itiokiet ke utom uyọhọ-ini, mbiowo inan̄, ye asan̄autom unamutom kiet. Kpukpru mmọ ẹna baptism ibọhọke nditọ nditọ oro. N̄kpri nditọ ita oro ẹsụk ẹdude ye nnyịn ẹduak ndida utom uyọhọ-ini nte ubọkọkọ mmọ. Nso edidiọn̄ okponde akan emi ke owo okpodori enyịn ndinyene? Ami mmadat esịt ke Jehovah ndikada nnyịn usụn̄ ke ndinam nditọ nnyịn ẹkọri ke ntụnọ esie. Nnyịn imokop inemesịt ndikụt nte mmọ ẹkade iso ẹtiene mme ukpepn̄kpọ esie. Ndien mbọn̄ akam nte nnyịn, ye mmọ nde, tutu amama ikûwọn̄ọde ikpọn̄ usụn̄ uwem.
[Ekebe ke page 30]
Ke mmọ ẹma ẹkekọri ẹwọrọ owo, ndusụk ini nditọ nnyịn ẹsiwụt esịtekọm ke mme leta ẹban̄a usụn̄ nte nnyịn ikọbọkde mmọ. Ifan̄ edi ẹmi ke otu n̄kpọ oro mmọ ẹsiwetde:
“Papa, nịm ete ke afo ye Mama ẹma ẹnam ata mfọn n̄kan n̄kpọ ẹnọ nnyịn, idem okposụkedi mbufo ẹkesinamde ndudue—kpa n̄kpọ oro esitịbede ediwak ini idahaemi ọnọ mi ye Carlos ke nditụnọ eyeneren nnyịn, Fabrício.”
Alice, adiaha, isua 33, eka nditọiren iba.
“Nnyịn inyene ndinyịme nte ke mbufo ẹma ẹsịn ukeme mbufo mbiba ke ndibọk nnyịn ke ntụnọ ye item Jehovah. Ndien didie ke nnyịn ibọ ufọn akamba akamba ito enye ntem!”
Mánia, udun̄wan, isua 27, ye ebe esie, emi odude ke utom circuit.
“Ami mmọdiọn̄ọ nte ke ifetutom oro ami nnyenede idahaemi ikpekemeke nditịbe tutu amama ke mîkpedịghe un̄wam oro mbufo mbiba ẹkenọde ndiwụk enyene-nsọn̄ọnda itiat idakisọn̄ eke spirit ye ima nnyenede nnọ Jehovah ye utom esie.”
Maércio, akpan, isua 23, akpan asiakusụn̄.
“André bọ ufọn ọyọhọ ọyọhọ ke ebuana ye ifiọkutom Papa. Kûdedei ufụmi item esie. Afo eyekeme ndin̄wam kiet eken. Ami mmokop inemesịt idahaemi n̄kan nte n̄kokopde.”
Plínio, eyeneren, isua 20, ke Bethel.
[Ebiet Ẹdade Ndise Ẹto ke page page 26]
Ndise: MOURA
[Ebiet Ẹdade Ndise Ẹto ke page page 27]
Foto: CALINO