Uwem ye Utom Jesus

Akam Ediberi ke Ubet Enyọn̄

KE NTAK ntotụn̄ọ ima oro enye amade mme apostle esie, Jesus esitịm mmọ idem ọnọ unyọn̄ esie oro asan̄ade ekpere. Idahaemi, ke ama ọkọnọ mmọ item ye ndọn̄esịt ke anyanini, enye emenede enyịn ese heaven onyụn̄ eben̄e Ete esie ete: “Nọ Eyen Fo ubọn̄, man Eyen Fo ọnọ Fi ubọn̄; kpa nte ama ọkọnọ Enye odudu ndikara kpukpru obụkidem, ete akpada nsinsi uwem ọnọ owo ekededi eke Afo ayakde ọnọ Enye.”

Nso edemede udọn̄ ibuotikọ ke Jesus osio edi ntem​—kpa nsinsi uwem! Ke ẹma ẹkenọ enye “odudu ndikara kpukpru obụkidem,” Jesus ekeme ndiyak mme ufọn uwa ufak esie nnọ kpukpru ubonowo oro ẹkpan̄ade. Edi enye ayak “nsinsi uwem” ọnọ sụk mbon oro Ete onyịmede. Ke etịn̄de ikọ etiene ibuotikọ nsinsi uwem emi, Jesus akaiso ke akam esie ete:

“Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” Ih, edinyan̄a ọkọn̄ọ ke nnyịn ndinyene ifiọk mban̄a Abasi ye Eyen esie. Edi oyom ekese n̄kpọ akan sụk ifiọk ibuot.

Ana owo edi edidiọn̄ọ mmọ ata edidọdiọn̄ọ, ọkọride eti itie ufan ye mmọ. Ana owo oro ekere n̄kpọ nte mmọ ẹkerede onyụn̄ ese n̄kpọ nte mmọ ẹsede. Ndien akande kpukpru, ana owo an̄wana ndikpebe mme anana-mbiet edu mmọ ke ndinam n̄kpọ ye mbon en̄wen.

Jesus ndien ọbọn̄ akam ete: “Ami mma nnọ Fi ubọn̄ ke isọn̄, kemi n̄kanamde utom eke Afo ọkọnọde Mi nnam.” Ke ama akada utom esie ke ntre ọkọyọhọ ke nde emi onyụn̄ enyene mbuọtidem aban̄a enye ndikụt unen ke ini iso, enye eben̄e ete: “Ete, da ubọn̄, eke n̄kenyenede ye Afo ndien ererimbot edidu, nọ Mi.” Ih, enye idahaemi ọdọhọ yak ẹfiak ẹmen imọ ẹkenịm ke ubọn̄ eke heaven oro ikenyenede mbemiso ebe ke ediset ke n̄kpa.

Ke etịn̄de ibio ibio aban̄a akpan utom esie ke isọn̄, Jesus ọdọhọ ete: “Mma nyarade enyịn̄ Fo nnọ mme owo ẹmi okosiode ke ererimbot ọnọ Mi; mmọ ẹkedi Okwo, Afo okonyụn̄ ayak mmọ ọnọ Mi, mmọ ẹma ẹnyụn̄ ẹnịm mme ikọ Fo.” Jesus ama ada enyịn̄ Abasi, Jehovah, ke utom ukwọrọikọ esie onyụn̄ owụt nnennen usụn̄ oro ẹkotde enyịn̄ oro, edi enye ama anam se ikande oro man ayarade enyịn̄ Abasi ọnọ mme apostle esie. Enye n̄ko ama atat ifiọk ye esịtekọm oro mmọ ẹnyenede ẹban̄a Jehovah, edu esie, ye mme uduak esie.

Ke otorode Jehovah nte Andikpon n̄kan enye, kpa Owo emi enye anamde utom ke idak, Jesus ke nsụhọdeidem ọdọhọ ete: “Mmayak mme ikọ ẹmi ọkọnọde Mi nnọ mmọ: mmọ ẹkebọ mme ikọ oro, ẹnyụn̄ ẹnen̄ede ẹfiọk ẹte n̄koto ke ọtọ Fo n̄wọrọ, ẹnyụn̄ ẹnịm ke akpanikọ ẹte edi Afo ọkọdọn̄ Mi.”

Ke anamde ukpụhọde odu ke ufọt mme anditiene enye ye ubonowo eken, Jesus ndien ọbọn̄ akam ete: “Mben̄eke mban̄a ererimbot, edi mben̄e mban̄a mmọ oro ọkọnọde Mi . . . Ke adan̄aemi n̄kodude ye mmọ, Ami mma nda enyịn̄ Fo n̄kama mmọ . . . ; mma nnyụn̄ n̄kpeme mmọ, ndien baba owo mmọ kiet ikatakke, ke mîbọhọke eyen nsobo,” oro edi, Judas Iscariot. Ke ata ini emi, Judas odu ke utom emiom esie ndida Jesus nnọ. Ntre, ye unana edidiọn̄ọ, Judas ke anam N̄wed Abasi osu.

Jesus akaiso ọbọn̄ akam ete, “Ererimbot asasua mmọ . . . Mben̄eke nte Afo osio mmọ ke ererimbot efep, edi mmeben̄e nte ekpeme mmọ ke idiọk esie. Mmọ idịghe eke ererimbot, kpa nte Ami mmendịghe eke ererimbot.” Mme anditiene Jesus ẹdu ke ererimbot, kpa ndutịm n̄kaowo emi Satan akarade, edi ana mmọ kpukpru ini ẹbahade ẹkpọn̄ ererimbot ye idiọkido esie.

Jesus akaiso ete, “Da akpanikọ Fo dianade mmọ nịm nọ Idemfo: ikọ Fo edi akpanikọ.” Mi Jesus okot N̄wed Abasi usem Hebrew eke odudu spirit emi enye ndien ndien osiode ikọ oro, “akpanikọ.” Edi se enye ekekpepde mme mbet esie ye se mmọ ẹkedide ẹdiwet ke ukperedem ke idak ndausụn̄ odudu spirit nte N̄wed Abasi eke Christian usem Greek, edi “akpanikọ” n̄ko. Akpanikọ emi ekeme ndinam owo asana, okpụhọde uwem esie ofụri ofụri, onyụn̄ anam enye edi owo oro adianarede ọkpọn̄ ererimbot.

Jesus kemi ọbọn̄ akam ete “mben̄eke mban̄a mmọemi ikpọn̄, edi mben̄e mban̄a mmọ nde eke ẹbuọtde idem ye Ami oto ke ikọ mmọ.” Ntre Jesus ọbọn̄ akam aban̄a mbon oro ẹdidide mme anditiene enye oro ẹyetde aran ye mme mbet ini iso ẹmi ẹditan̄de ẹbok ke “otuerọn̄ kiet.” Nso ke enye eben̄e ọnọ kpukpru mmọemi? “Man mmọ kpukpru ẹkpekam ẹdi kiet, nte Afo, Ete, odude Mi ke idem, Ami nnyụn̄ ndude ke Afo; . . . man mmọ ẹdi kiet, kpa nte nnyịn idide kiet.”

Jesus ye Ete esie idịghe owo kiet ke ata ata usụn̄, edi mmọ ẹdu ke edinyịme ke kpukpru n̄kpọ. Jesus ọbọn̄ akam ete mme anditiene imọ ẹkop inem ukem edidianakiet emi man otodo “ererimbot ẹfiọk ẹte ke edi Afo okosio Mi ọdọn̄, omonyụn̄ ama mmọ, kpa nte akamade Mi.”

Ke ibuot mbon oro ẹdidide mme mbet esie oro ẹyetde aran, Jesus eben̄e ete: “Mmoyom nte mmọemi Afo ọkọnọde Mi ẹdidu ye Ami ke ebiet eke ndude; man mmọ ẹkụt ubọn̄ Mi emi Afo ọkọnọde Mi: koro Afo akamama Mi, ndien ẹdiwụk adaha ererimbot.” Ko ke ata edem edem, anyanini mbemiso Adam ye Eve ẹkenyenede akpa eyen mmọ, Abasi ama ama edima Eyen esie kierakiet, emi akakabarede edi Jesus Christ.

Ke eberide akam esie, Jesus afiak ọsọn̄ọ etịn̄ ete: “Mmayarade enyịn̄ Fo nnọ mmọ, nyenyụn̄ nyarade: man ima emi Afo akamade Mi odu mmọ ke esịt, Ami nnyụn̄ ndu mmọ ke esịt.” Ye mme apostle oro, ndikpep enyịn̄ Abasi ama abuana owo kiet kiet ndidi ndidiọn̄ọ ima Abasi. John 17: 1-26; 10:16; Mme N̄ke 8:22, 30.

▪ Ke nso usụn̄ ke ẹkenọ Jesus “odudu ndikara kpukpru obụkidem”?

▪ Ndifiọk Abasi ye Eyen esie ọwọrọ nso?

▪ Ke mme usụn̄ ewe ke Jesus akayararede enyịn̄ Abasi?

▪ Nso idi “akpanikọ,” ndien didie ke enye anam Christian ‘asana’?

▪ Didie ke Abasi, Eyen esie, ye kpukpru mme andituak ibuot ke akpanikọ ẹdi kiet?

▪ Ini ewe ke “ẹ[ke]wụk adaha ererimbot”?