Nyene Ofụri Akpanikọ!
“AKANANAM ami n̄kwe enyịn oro ke Bible mi,” ntre ke Francisco eketịn̄ ke ini enyịn̄ oro, Jehovah okodụkde edi ke nneme ye owo Ntiense Jehovah. Edi akpanikọ, enye ikpekekemeke ndikụt enyịn̄ Abasi oro ke Bible esie, kpa nsiondi eke 1916, edikabade eke Almeida mbon Portugal. Enyịn̄ oro Jehovah ikesịneke ke Bible oro. Nte owo Catholic mbon Brazil, Francisco esidụk Mass kpukpru ini ke Sunday esinyụn̄ okop inem ndikot Bible ke ufọk esie. Edi enyịn̄ oro Jehovah ama edemede enye udọn̄.
Anie Edi Abasi?
Urua efen oro eketienede, owo Ntiense oro ama ada edikabade Bible Almeida efen ọsọk enye. Mmọ ẹma ẹmen Bible mbiba ẹmi ẹdomo ẹse ke Psalm 83:18. Ndien nso ke mmọ ẹkekụt? Kamse, ke nsiondi eke 1966 oro, itien̄wed oro okot ete: “Afo, emi enyịn̄ oro JEHOVAH enyenede kpọt, edi Ata Edikon̄ ke ofụri isọn̄”! Nte ededi, ke nsiondi eke 1969, utu ke “JEHOVAH” ẹda ikọ oro “ỌBỌN̄.” “Omokụt do, mmọ ẹma ẹkpụhọ n̄kpọ mi,” ntre ke owo Ntiense oro ọkọdọhọ, ndien ekem enye ama obụp ete: “‘Ọbọn̄ ke akpanikọ idịghe enyịn̄, nte edi?” Francisco ama ọdọhọ ete, “Baba.” Ke akamade iso iyatesịt iyatesịt, enye ama adian do ete: “Mmọ ẹkpesan̄a didie ẹnam oro?”
Emi ama eberede usụn̄ ọnọ esisịt ndụn̄ọde aban̄ade enyịn̄ Abasi. Ke uwụtn̄kpọ, Francisco ama ọfiọk ete ke nte ekemde ye The Catholic Encyclopedia (1910), Jehovah edi “ata enyịn̄ Abasi ke Akani Testament.” Enye n̄ko ama ọfiọk ete ke enyịn̄ oro ekpere ndisịm utịm ike-7,000. Akabade n̄wed ndomokiet inyeneke unen ndikpụhọ ata enyịn̄ Jehovah nsịn Ọbọn̄, kpa udorienyịn̄ kpọt. Francisco ama oyom akpanikọ aban̄ade enyịn̄ oro Jehovah, ndien enye ama enyene, oto Bible ke idemesie ye ke ndụn̄ọde oro ẹkenọde ndausụn̄ eke odotde.
Nso Idi Idaha Jesus?
Nte ẹkewụtde ke akpa ibuotikọ, ido ukpono ererimbot ẹmesiak mmọn̄ ke ediwak akpanikọ. Ke unana idotenyịn, ke utom ukwọrọikọ mmọ eke ufọk-ke-ufọk, Mme Ntiense Jehovah ẹsinyene ifet ndibiere se mme owo ẹnịmde ke akpanikọ. Nte ededi, emi ekeme ndikpụhọde ke ebiet ke ebiet, edi ndusụk ekikere ẹsidi idiọn̄ọ n̄kpọ. Ke uwụtn̄kpọ, ke ini ẹsibụpde ẹte, ‘Anie edi Abasi?’ ndusụk mme enyeneufọk ẹsidọhọ ẹte, ‘Jesus.’ Ye iboro emi ikọ mmọ ọwọrọ nte ke Jesus edi Abasi Andikara kpukpru n̄kpọ. Edi nte ekikere emi owụt se idide akpanikọ?
Kere ban̄a mme akpanikọ ẹtienede mi. Jesus ama ọbọn̄ akam ọnọ Ete esie ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Ndi afo ama okụt ete ke Jesus iketịn̄ke iban̄a idemesie edi eketịn̄ aban̄a Ete esie eke heaven nte “ata Abasi kierakiet”? Ke ntre, mme akpa mbet Jesus ẹma ẹnen ke ini mmọ ẹkedọhọde enye ẹte: “Ke akpanikọ Afo edi eyen Abasi.” Jesus ke idemesie ọkọdọhọ ete: “Ndi Eyen Abasi.” Ke ntre, akpanikọ edi nte ke Jesus idịghe Abasi Andikara kpukpru n̄kpọ, edi enye edi Eyen Jehovah Abasi.—Matthew 14:33; John 10:36.
Nso Idi Uduak Ẹnyenede Ẹban̄a Isọn̄?
Nso kaban̄a uduak ẹnyenede ẹban̄a emana emi, ye isọn̄? John F. Kennedy, ada-ibuot ukara United States oro ama akakpa, ọkọdọhọ UN General Assembly ete: “Nnyịn imenyene odudu ndinam enyeemi edi mfọn n̄kan emana ubonowo ke mbụk ererimbot—m̀mê ndinam enye edi akpatre.” Mme andikara ererimbot eyomfịn nte an̄wan̄ade ẹkere n̄kpọ ke ukem usụn̄ oro. Se Mme Ntiense Jehovah ẹsiwakde ndikop ke utom ukwọrọikọ mmọ edi nte ke utịt ererimbot, ẹyeda ikan̄ m̀mê ekọn̄ nuclear ẹsobo ekondo Isọn̄. Ke ndisọn̄ọ se ẹnịmde ke akpanikọ emi, ndusụk owo ẹsinyan ubọk ẹwụt Ediyarade 21:1, emi ọdọhọde ete: “Ekem n̄kụt obufa enyọn̄ ye obufa isọn̄; koro akpa enyọn̄ ye akpa isọn̄ ẹma ẹbe ẹfep, inyan̄ibom inyụn̄ idụhe aba.”
Bible esiwak ndida ikọ oro “isọn̄” ke ndamban̄a usụn̄, etịn̄de aban̄a ubonowo. Ẹkụt uwụtn̄kpọ kiet ke Genesis 11:1, NW, emi ọdọhọde ete: “Ofụri isọn̄ ama akaiso ndidi usem kiet ye ikọ kiet.” (Se n̄ko 1 Ndidem 2: 1, 2, NW; Psalm 96:1, NW.) Ke Ediyarade 21:1, “akpa isọn̄” idaha iban̄a ekondo emi, edi ada aban̄a idiọk n̄kaowo oro ẹdisobode. Emi eyeberede usụn̄ ọnọ edifiak n̄wụk Paradise ke isọn̄. (Luke 23:43; 2 Thessalonica 1:6-9; Ediyarade 21:4) Ndien emi odu ke n̄kemuyo ye mme n̄wed eken ke Bible, emi owụtde ete ke owo idisoboke ata isọn̄ ifep tutu amama. Ke uwụtn̄kpọ, Psalm 104:5 ọdọhọ ete ke Abasi “odori isọn̄ ke itie esie, idisehekede ke nsinsi nsinsi.” (Men Ecclesiastes 1:4 domo.) Ke akpanikọ, Jehovah ‘okobot isọn̄ man ẹdụn̄ ke esịt’ ke nsinsi.—Isaiah 45:18.
Ntak Enyenede Ofụri Akpanikọ-ọ?
Se isụk isiakde oro ẹdi uwụtn̄kpọ ifan̄ ke mme ukwan̄ ekikere oro edide ọsọ n̄kpọ mfịn. Nte ededi, ke ini enyeneufọk onyịmede ndikere n̄kpọ, nte Francisco akanamde, Mme Ntiense Jehovah ẹsinem esịt nte ke usụn̄ eberede ọnọ nneme oro ọnọde ifiọk aban̄a mme akpanikọ N̄wed Abasi.
Owo nditre ndinyene ofụri akpanikọ ekeme ndida n̄kosụn̄ọ ke mme utịp utua n̄kpọfiọk. Ke ndinọ uwụtn̄kpọ: Ke ini Jesus okodude ke isọn̄, ẹma ẹnam ediwak owo ẹnịm ke akpanikọ nte ke enye ekedi sụk eyen Mary ye Joseph, emi akpa ekedide anam-usọ otode Nazareth. Ntre, mmọ ikọnọhọ enye ekese n̄kpan̄utọn̄. Ke ndusụk udomo, mmọ ẹma ẹnen. Jesus ekedi eyen Mary, emi ẹkeyomode ke edisana spirit. Enye ekedi eyen oro Joseph akadade-da enyene, ndien enye ke akpanikọ ama anam utom nte anam-usọ. (Mark 6:3) Nte ededi, ndi oro ekedi ofụri akpanikọ aban̄ade enye? Baba! Enye ikosụhọkede ndomokiet ikan Messiah ye “Ọbọn̄ mbọn̄” oro ẹkedoride enyịn ẹban̄a! (Ediyarade 17:14; Luke 1:32-35; Utom 2:36) Unana edinyene ofụri akpanikọ aban̄ade Jesus ama anam ediwak owo ẹtaba utom oro owo mîditọn̄ọke ntak inam aba—edikop inem ọkpọ ọkpọ ebuana ye Jesus ke isọn̄.
Dụn̄ọde Ofụri Akpanikọ
Mme okot a-Bible ẹtịm ẹdiọn̄ọ obio Beroea (idahaemi ẹkotde Véroia) ke Macedonia eset ke ntak eti edu mme andidụn̄ enye ke akpa isua ikie. Nso ikedi edu oro? Mbụk oro ọdọhọ ete: “Mmọ ẹkop ikọ [oro apostle Paul ọkọkwọrọde] ke edinyịme esịt, ẹnyụn̄ ẹdụn̄ọde n̄wed Abasi ke usen usen, ẹte ifiọk m̀mê mme ikọ oro ẹkem ntre.” Utịp-e? “Ediwak mmọ ẹnịm ke akpanikọ, ediwak ikpọ iban Greek ye irenowo n̄ko.”—Utom 17:11, 12.
Se idotde itoro edi edu mme prọfet Abasi eke eset. Mmọ “ẹma ẹtịm ẹyom ẹnyụn̄ ẹdụn̄ọde” n̄kpọ ẹban̄a edinyan̄a oro ekenyenede ndidi ebe ke Messiah. (1 Peter 1:10) Abasi ama ọdiọn̄ ukeme mmọ. Ke akpanikọ, ndien, n̄kpere n̄kan usụn̄ idụhe. Ediyom ifịk ifịk ye edidụn̄ọde mme ukpepn̄kpọ ke ntịn̄enyịn—emi edi usụn̄ ndinyene ofụri akpanikọ ẹtode Bible!
Afo emekeme ndiyịk ete, ‘Ami n̄kpọtọn̄ọ ke m̀mọ̀n̄?’ Ke ama okokot ndusụk n̄wed Christian, n̄wan kiet odụn̄de ke Brazil ekewet ete: “Nnyịn [enye ye ebe esie] ima isọsọp idifiọk ite ke nnyịn ima iyom utọ ifiọk oro efen efen, man inyene ibọrọ ke ediwak mbụme oro nnyịn ikobụpde . . . Mbọk, n̄keme didie ndinyene Bible ye mme n̄wed eken oro ẹdin̄wamde mi ndidiọn̄ọ n̄kpọ efen efen mban̄a Ete nnyịn eke heaven?” N̄wan emi ama odụk nnennen usụn̄: adade mme n̄wed akpanikọ oro ẹkọn̄ọde ke Bible okot Bible. Edieke afo n̄ko oyomde ofụri akpanikọ, n̄wan̄a esịt fo nọ Jehovah Abasi, nyụn̄ ben̄e un̄wam esie. Ndien mbọk tịmfiọk ikọ nsịnudọn̄ ẹmi: “Edieke owo mbufo ekededi ananade eti ibuot, yak enye eben̄e Abasi emi ọnọde kpukpru owo ke ntatubọk, mînyụn̄ itọhọke owo; ndien Abasi eyenọ enye. Edi yak enye eben̄e ke mbuọtidem, okûyok.”—James 1:5, 6.
Ediwak million owo ke ẹneme Bible ye Mme Ntiense Jehovah, ke ntre ẹtịmde ẹyom ẹnyụn̄ ẹdụn̄ọrede akpanikọ. Ndibọ nnyụn̄ nda utọ nnennen ifiọk oro aban̄ade ata Abasi ye Jesus Christ nsịn ke edinam ọwọrọ nsinsi uwem. (John 17:3) Oro ekeme ndidi akwa edidiọn̄ fo edieke afo odụn̄ọrede ifịk ifịk onyụn̄ enyenede ofụri akpanikọ.
[Ndise ke page 7]
Ofụri akpanikọ aban̄ade Jesus ekedi nte ke enye ekedi Messiah, ikedịghe sụk anam-usọ