Ndifiọk S’idude ke Mbụk
Ndiyarade Ubiomikpe Iyịp Mmọ
“Nnyịn ikokot ekọn̄ oro [Ekọn̄ Ererimbot 11] edisana ekọn̄ inyụn̄ inọ mme owo ẹka an̄waekọn̄,” Shingen Hosokawa, kpa akwa ewetn̄wed nnọ Ọfis Temple eke Ata Edisana N̄ka Buddha eke Obio Otani ke Japan, onyịme ete ke edi ntre. “Bụt anam nnyịn ata etieti ke iso edisana Buddha.” Ke Ederi Editi Kpukpru Mme Akpa-n̄kpa Ekọn̄” eke ndondo emi, isua 45 ke Ekọn̄ Ererimbot II ama okokụre, n̄ka oro, emi enyenede mme andinịm ke akpanikọ ẹwakde ẹbe million ition, ama onyịme nduduọhọ esie ke “ndidianakiet unyịme unyịme ke [mme ukeme ẹkesịnde ke ekọn̄ eke] Ekọn̄ Ererimbot II.” Asahi Shimbun ọkọdọhọ ete, “Akananam idụhe ini oro n̄ka ido ukpono Buddha etịn̄de n̄kpọ in̄wan̄în̄wan̄ aban̄a nduduọhọ idemesie oro enye ekenyenede ke ekọn̄ ke edinam ido ukpono.”
Nte ededi, nte ata ediwak ido ukpono ikpokopke ‘bụt ata etieti’ ke ndikenyịk ediwak n̄kparawa owo ndika ekọn̄? Nte ekemde ye Kodansha Encyclopedia of Japan, ayak esisịt ndidi kpukpru mbon Buddha, “Christian,” ye mme n̄ka Shinto ke Japan ẹma ẹsiak Esop Ido Ukpono ke 1941 “man ẹnọ idụt oro n̄kpọ n̄kpeme-idem eke spirit ke ini ekọn̄.”
Nte n̄kpaidem mîdụhe, ke etịn̄de otụk ukara ererimbot eke nsunsu idọ ukpono nte “Akwa Babylon,” Bible ọdọhọ ete: “Ke obio emi ẹma ẹkụt iyịp . . . kpukpru mmọemi owo ẹkewotde ke isọn̄.” (Ediyarade 18:2, 24) Ndi Jehovah Abasi, Andinọ owo uwem, eyekot mbon ido ukpono oro ẹdinam ibat uduọkiyịp mmọ? Kpa ibuotn̄wed Ediyarade oro etịn̄ in̄wan̄în̄wan̄ aban̄a se iditịbede inọ Akwa Babylon, ọdọhọde ete: “Ekem ọkpọsọn̄ angel emen itiat emi etiede nte akwa itiat ukọk-ibokpot, ọduọk ke inyan̄, onyụn̄ ọdọhọ ete, Ntem ke ẹdisio akwa obio Babylon ẹduọk ke ọkpọsọn̄ iduọ, ndien [owo] idikwe enye aba.”—Ediyarade 18:21.
Unana Mme Oku
Mme n̄ka ido ukpono Buddha ke Japan ẹnyene mfịna oro mme owo ẹwọrọde ẹkpọn̄ mme temple ndien ndien. Mbon oro ẹdụn̄de ẹkpere temple ẹmi mme oku mîdụn̄ke ke ẹsua ẹnọ mbon nyon̄ ndiyo ke okụre temple ẹmi ọkọrọ ye n̄kpọndịk odude ke ikan̄ ndibụmede nsak. N̄ka Zen Buddhist Myoshinji ama ebiere ndise mban̄a mfịna emi ke ndiwụri mme temple ẹmi m̀mê ndimen mmọ ndian ye mmọ oro ẹdude ẹkpere. Se ibede mbahade 20 eke ikie ke otu temple 3,500 eke n̄ka Myoshinji ke ofụri Japan ẹyedi inyeneke oku oro odụn̄de-dụn̄ mîdịghe edi mme oku ẹsito mme mbọhọ temple ẹdinam utom do.
Ntak nnanenyịn emi-e? The Daily Yomiuri, anam an̄wan̄a ete, “N̄ka oro ke enyene mfịna edikụt mbon oro ẹdidade itie mme oku oro ẹkpọn̄de utom ndien n̄kparawa oku iyomke ẹnọ mmimọ ika mme temple oro ẹdude ke mme ebiet oro owo mîwakke.” N̄ka oro ama odomo ndinọ mbon oro ẹkekpọn̄de utom ukpep nte mme oku, edi enye ama ototop ndutịm oro ọduọk. Okposụkedi Myoshinji ọdọhọde ke “emi idịghe emana oro ẹdade ibat mme temple oro ẹdude nte uyarade ukeme,” edi mfan̄a idụhe nte ke odudu mmọ ke osụhọde.
Nte n̄kpọ udọn̄, n̄wed Bible eke Ediyarade ama ebemiso etịn̄ ete ke mmọn̄ Euphrates, emi ndutịm ido ukpono ofụri ererimbot—“Akwa Babylon”—etiede, ‘eyesat.’ (Ediyarade 16:12; 18: 2, 9, 11) Nso ke mmọn̄ oro ada aban̄a? “Mmọn̄ oro okokụtde . . . edi mbio obio, ye otuowo, ye mme idụt ye usem.” (Ediyarade 17:15) “Mmọn̄ oro” m̀mê mme andinọ ibetedem ndisat, ke ada itie in̄wan̄în̄wan̄ ke obio Edem Usiahautịn eke Akwa Babylon.
Mfọnmma Usọbọ
“Ọkpọsọn̄ ndịk oro nnyịn isakde iso ise idahaemi... enyene odudu ata etieti ibọhọke ẹtọn̄ọ idahaemi ẹnam n̄kpọ man ẹkpan mmọ, mmọ iditreke-tre ndida n̄kosụn̄ọ ke ndiọi utịp ke ndutịm uforo oro edidiade ekese okụk ye n̄wụre ke n̄kaowo ye n̄ka ukaraidem,” ntre ke Worldwatch Institute, emi odude ke Washington, D.C., U.S.A., etịn̄. Isua oko ntọt ofụri isua eke ufọkutom oro ama odụri owo utọn̄ ete ke ufiop ofụm n̄kpa, unana edịm, ye ukwọ ẹkam ẹdi ubak ubak ke otu ikpọ afanikọn̄ oro ẹdisịmde isọn̄ oro ẹma ẹkebabiat mi. Mme ikpehe oro ẹkenyande ubọk ke ntọt oro man ẹnọ usọp usọp ntịn̄enyịn ẹsịne edikpeme ibatowo ndiwak n̄kaha, edinam odudu usion̄o n̄kpọ ndi ọsọn̄ idem ekem, edifiak ntọ eto, ye edikpan akan̄. Nte ededi, ufọkutom oro ọdọhọ ete ke usọp usọp ‘ndutịm unam n̄kpọ ofụri ererimbot’ ye ‘ikpọ ukpụhọde ke edu unam n̄kpọ owo’ ẹdi se ẹyomde man ẹnyene nti utịp.
Nte nnyịn imekeme ndikụt ndutịm ofụri ererimbot oro edidade ikpọ ukpụhọde edi ke eyo nnyịn? Ih, edi itoho ke mme ukeme owo ndomokiet m̀mê otuowo. Ntak mîtoho-o? Koro prọfet Jeremiah ekewet ke ediwak isua ikie ẹmi ẹkebede ete: “Usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemọ.” Utu ke oro, Bible ọn̄wọn̄ọ ete ke Jehovah Abasi “[eye]sobo mmọemi ẹsọbode isọn̄” eyenyụn̄ ‘enen̄ede mme n̄kpọ onịm’ ke ufọn mme andidụn̄ isọn̄.—Jeremiah 10:23; Ediyarade 11:18; Micah 4:3, 4.