Jehovah Ama Mbon Oro Ẹnọde Enọ ke Inemesịt
“Yak kpukpru owo kiet kiet ọnọ nte enye akaduakde ke esịt esie: okûnọ ke mfụhọ esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.”—2 CORINTH 9:7.
1. Didie ke Abasi ye Christ ẹdi mme andinọ ke inemesịt?
JEHOVAH ekedi akpa owo oro ọkọnọde enọ ke inemesịt. Enye ke idara ama ọnọ ikpọn̄îkpọn̄ edibon Eyen esie uwem onyụn̄ ada enye ndibot mme angel ye ubonowo. (Mme N̄ke 8:30, 31; Colossae 1:13-17) Abasi ama ọnọ nnyịn uwem ye ibifịk ye kpukpru n̄kpọ, esịnede edịm heaven ye ini eduek, ọyọhọde esịt nnyịn ye inemesịt. (Utom 14:17; 17:25) Ke akpanikọ, Abasi ye Eyen esie, Jesus Christ, ẹdi mme andinọ enọ ke inemesịt. Mmọ ke idatesịt ẹnọ enọ ye edu unana ibụk. Jehovah akamama ererimbot ubonowo tutu “Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” Ndien Jesus ye unana n̄kụni ‘ama ọnọ ukpọn̄ esie nte ufak ndinyan̄a ediwak owo.’—John 3:16; Matthew 20:28.
2. Nte Paul ọdọhọde, nso utọ andinọ ke Abasi ama?
2 Mme asan̄autom Abasi ye Christ ẹkpenyene, ke ntre, ndidi mbon oro ẹnọde enọ ke inemesịt. Ẹma ẹsịn udọn̄ ẹnọ utọ edinọ oro ke udiana n̄wed emi apostle Paul ekewetde ọnọ ẹsọk mme Christian ke Corinth, emi ekewetde ke n̄kpọ nte 55 E.N. Ke etịn̄de nte an̄wan̄ade aban̄a mme ọkpọkpọ okụk enọ unyịmesịt oro ẹnọde akpan akpan man ẹn̄wam mme Christian ẹdide ubuene ke Jerusalem ye Judea, Paul ama ọdọhọ ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ esịt okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7; Rome 15:26; 1 Corinth 16:1, 2; Galatia 2:10) Didie ke ikọt Abasi ẹkenam n̄kpọ ẹban̄a mme ifet edinọ enọ? Ndien nso ke nnyịn ikeme ndikpep nto item Paul ke ndinọ enọ?
Ndidi se Unyịmesịt Onụkde
3. Ke nso udomo ke nditọ Israel ẹken̄wam edibọp ataya kaban̄a utuakibuot Jehovah?
3 Unyịmesịt esinụk ikọt Abasi ndinọ idem ye inyene mmọ ke ndin̄wam ẹnam uduak Abasi. Ke uwụtn̄kpọ, nditọ Israel ke idatesịt ẹma ẹn̄wam edibọp oro ẹkebọpde ataya kaban̄a utuakibuot Jehovah. Esịt ndusụk iban ama onụk mmọ ndidọk idet ebot, ke adan̄aemi ndusụk irenowo ẹkenamde utom nte mbonusọ. Mme owo oro ke inemesịt ẹma ẹnọ gold, silver, eto, linen, ye mme n̄kpọ eken nte “enọ Jehovah” oro ẹnọde ke unyịmesịt. (Exodus 35:4-35) Mmọ ẹma ẹnen̄ede ẹwụt ntatubọk tutu ẹkenọ mme n̄kpọ oro “ẹkem[de] ndinam kpukpru utom oro, onyụn̄ osụhọ.”—Exodus 36:4-7.
4. Ye nso edu ke David ye mmọ en̄wen ẹketịp etịbe kaban̄a temple?
4 Ediwak isua ikie ke ukperedem, Edidem David ama ọnọ n̄kpọ uwak uwak kaban̄a temple Jehovah oro Solomon eyen esie ekenyenede ndibọp. Sia David ‘akamade ufọk Abasi,’ enye ama ọnọ ‘san̄asan̄a inyene’ esie ke gold ye silver. Mbọn̄, mme etubom ye mbon en̄wen ‘ẹma ẹyọhọ ubọk mmọ ye enọ ẹnọde Jehovah.’ Ye nso utịp? Kamse, “kpukpru owo ẹdat esịt, koro mmọ ẹtatde ubọk: koro mmọ ẹtatde ubọk ẹnọ Jehovah ke ofụri esịt.” (1 Chronicles 29:3-9) Mmọ ẹkedi mme andinọ ke inemesịt.
5. Didie ke nditọ Israel ẹken̄wam utuakibuot akpanikọ ke ediwak isua ikie?
5 Ke ediwak isua ikie oro ẹkebede, nditọ Israel ẹma ẹnyene ifet ndin̄wam ataya utuakibuot, temple ke ukperedem, ye itieutom oku ye mme Levite do. Ke uwụtn̄kpọ, ke eyo Nehemiah mme Jew ẹma ẹbiere nditịp etịbe man ẹsọn̄ọ ẹmụm edisana utuakibuot ẹkama, ẹfiọkde ẹte ke mmimọ ikpenyeneke ndifụmi ufọk Abasi. (Nehemiah 10:32-39) Ukem ntre mfịn, Mme Ntiense Jehovah ke inemesịt ẹsinọ enọ ke unyịmesịt ndida mbọp nnyụn̄ ndiọn̄ mme itie usopidem nnyụn̄ n̄n̄wam utuakibuot akpaniko.
6. Nọ mme uwụtn̄kpọ ẹban̄ade nte mme Christian ẹnọde enọ ke inemesịst?
6 Mme akpa Christian ẹkedi mme andinọ ke inemesịt. Ke uwụtn̄kpọ, Gaius ama anam “utom akpanikọ” ke ndifọn ido ye mbon oro ẹsan̄ade isan̄ ke ufọn Obio Ubọn̄, idem nte Mme Ntiense Jehovah ẹnamde ntatubọk atara osịm mme esenyịn ẹmi ẹsan̄ade-san̄a, ẹmi Watch Tower Bible and Tract Society osiode ọdọn̄ kemi. (3 John 5-8) Esikpa n̄kpọ ndinam nditọete iren ẹmi ẹnam isan̄ ẹka mme esop nnyụn̄ nnam ntatubọk atara osịm mmọ, edi emi enyene ufọn didie ntem ke n̄kan̄ eke spirit!—Rome 1:11, 12.
7. Didie ke mbon Philippi ẹkeda inyene obụkidem mmọ ẹnam n̄kpọ?
7 Mme esop ke ofụri ofụri ẹsida inyene obụkidem ẹmenede mme ufọn n̄kpọ Obio Ubọn̄. Ke uwụtn̄kpọ, Paul ama asian mme andinịm ke akpanikọ ke Philippi ete: “Kpa ke idem ini ndude ke Thessalonica, mbufo ẹkenọ n̄kpọ mfọn ẹsọk mi utịm ikaba ndin̄wam mi ke unana mi. Idịghe nte nyom enọ, edi nyom mbufo ẹn̄wụm mfri eke edidiọn̄de-diọn̄ ọwọrọ mbufo udori.” (Philippi 4:15-17) Mbon Philippi ẹkenọ n̄kpọ ke inemesịt, edi nso mme n̄kpọ ikedemerede utọ edinọ ke inemesịt oro?
Nso Idemede Edinọ ke Inemesịt?
8. Didie ke afo okpowụt ete ke spirit Abasi esidemede ikọt esie ndidi mme andinọ ke inemesịt?
8 Edisana spirit, m̀mê anamutom odudu Jehovah, esidemede ikọt esie ndidi mme andinọ ke inemesịt. Ke ini mme Christian ke Judea ẹkedude ke unana, spirit Abasi ama onụk mme andinịm ke akpanikọ efen ndin̄wam mmọ ke n̄kpọ obụkidem. Man ẹsịn udọn̄ ẹnọ mme Christian ke Corinth ẹnam ukeme mmọ ke ndinọ utọ enọ oro, Paul ama asiak uwụtn̄kpọ aban̄a mme esop ke Macedonia. Okposụkedi mme andinịm ke akpanikọ ke Macedonia ẹkesobode ukọbọ ye unana, mmọ ẹma ẹwụt ima nditọete ke ndinọ n̄kpọ mbe nte ata ukeme mmọ edide. Mmọ ẹma ẹkam ẹkpe ubọk ẹyom ifet ndinọ enọ! (2 Corinth 8:1-5) Uduak Abasi ikọn̄ọke ke mme enọ mbon imọ ikpọn̄îkpọn̄. (James 2:5) Mme asan̄autom esie oro ẹyakde idem ẹnọ, emi ẹdide ubuene ke n̄kpọ obụkidem ẹdi akpan un̄wam ke ndin̄wam utom ukwọrọikọ Obio Ubọn̄ ke okụk. (Matthew 24:14) Edi, mmọ ibọhọ ufen ke ntak ntatubọk mmọ, koro Abasi ye unana edikpu ọmọnọ se ikọt esie ẹyomde ke utom emi, ndien odudu oro an̄wamde enye ndikaiso ye n̄kọri edi spirit esie.
9. Didie ke mbuọtidem, ifiọk, ye ima ẹnyene ebuana ye edinọ ke inemesịt?
9 Mbuọtidem, ifiọk, ye ima ẹdemede edinọ ke inemesịt. Paul ọkọdọhọ ete: “Nte mbufo [mbon Corinth] ẹdade iso ke kpukpru n̄kpọ, ke mbuọtidem, ke editịn̄ ikọ, ye ifiọk, ye kpukpru ufiopesịt, ye ima eke mbufo ẹmade nnyịn, ẹda iso n̄ko ke utom mfọn emi. Ndọhọke nnịm nte ewụhọ, edi nda ufiopesịt mmọ efen ndomo n̄wụt nte ima mbufo edide akpanikọ.” (2 Corinth 8:7, 8) Nditịp n̄kpọ nsịn kaban̄a uduak Jehovah akpan akpan ke ini andinọ enyenede esisịt n̄kpọ, esiyom mbuọtidem ke mme ndutịm ini iso oro Abasi anamde. Mme Christian oro ẹyọhọde ye ifiọk ẹyom ndinam uduak Jehovah, ndien mbon oro ẹyọhọde ye ima oro ẹnyenede ẹnọ enye ye ikọt esie ẹsida inyene mmọ ẹnam n̄kpọ ke inemesịt ndinam uduak esie akakaiso.
10. Ntak ẹkemede ndidọhọ nte ke uwụtn̄kpọ Jesus esidemede mme Christian ndinọ enọ ke inemesịt?
10 Uwụtn̄kpọ Jesus esidemede mme Christian ndinọ enọ ke inemesịt. Ke ama akakpak mbon Corinth ndinọ n̄kpọ ke ima, Paul ama ọdọhọ ete: “Mbufo ẹmefiọk mfọn Ọbọn̄ nnyịn Jesus Christ, ẹte, okposụkedi nte Enye ekedide enyene-n̄kpọ, ke ntak mbufo Enye akabade edi ubuene, man oto ke ubuene Esie mbufo ẹkabade ẹdi mme enyene-n̄kpọ.” (2 Corinth 8:9) Ke enyenede n̄kpọ ke heaven akan eyen Abasi efen ekededi, Jesus ama an̄wan̄a idemesie ye kpukpru n̄kpọ ẹmi onyụn̄ emen uwem owo esịne. (Philippi 2:5-8) Ke ndikabade ndi ubuene ke usụn̄ unana ibụk emi, nte ededi, Jesus ama otịp n̄kpọ esịn ke ndinam enyịn̄ Jehovah asana onyụn̄ ọnọ uwem esie nte uwa ufak ke ufọn mme owo oro ẹdinyịmede enye. Ke n̄kemuyo ye uwụtn̄kpọ Jesus, nte nnyịn ikpọnọhọ n̄kpọ ke inemesịt man in̄wam mbon efen inyụn̄ itịp n̄kpọ isịn ke ndinam enyịn̄ Jehovah asana?
11, 12. Didie ke eti ndutịm ekeme ndinam nnyịn idi mme andinọ ke inemesịt?
11 Eti ndutịm anam ẹkeme ndinọ enọ ke inemesịt. Paul ama asian mbon Corinth ete: “Ke akpa usen urua, mbufo owo kiet kiet ẹsio n̄kpọ ke udori eke ẹkụtde, ẹkpọnọde ẹnịm n̄kan̄ kiet, mbak mbufo ẹdinyene nditịp etịbe ke ini ndide.” (1 Corinth 16:1, 2) Ke ukem ọkpọkpọ ye usụn̄ unyịmesịt oro, mbon oro ẹduakde nditịp etịbe man ẹnam utom Obio Ubọn̄ mfịn akaiso ẹyenam ọfọn ndisio n̄kpọ ke udori mmọ nnịm kaban̄a uduak oro. Nte utịp otode utọ eti ndutịm oro, Mme Ntiense kiet kiet, mme ubon, ye mme esop ẹkeme nditịp etịbe ndimenede utuakibuot akpanikọ.
12 Ndinam ndutịm utịp etịbe eyenam nnyịn ikop inemesịt. Nte Jesus ọkọdọhọde, “Ọfọn [“Inemesịt odu ke,” NW] ndinọ akan ndibọ.” (Utom 20:35) Ntre mbon Corinth ẹma ẹkeme ndinam idara mmọ ọtọt ke nditiene item Paul nte yak mmọ ẹnam uduak mmọ emi ekebịghide ke isua kiet ke ndinọ okụk ẹka Jerusalem. Enye ama ọdọhọ ete: “Enem Abasi esịt ndibọ enọ nte asan̄ade ekekem ye se owo enyenede, idịghe nte ebede ukeme esie.” Ke ini owo etịpde etịbe nte ekemde ye se enye enyenede, ẹkpenyene ndida mmọ ke ọsọn̄urua n̄kpọ. Edieke nnyịn inyenede mbuọtidem ke Abasi, enye ekeme ndisịn n̄kpọ nyọhọ man mbon oro ẹnyenede ekese ẹtat ubọk, idịghe nditatahade n̄kpọ, ndien mbon oro ẹnyenede esisịt ẹkûnana n̄kpọ nte edisụhọrede odudu ye ukeme mmọ ndinam n̄kpọ esie.—2 Corinth 8:10-15.
Ndutịm Unọ Enọ oro Ẹnọde Ntịn̄enyịn
13. Ntak emi mbon Corinth ẹkekemede ndinyene mbuọtidem ke edise oro Paul ekesede aban̄a mme enọ?
13 Okposụkedi Paul ekesede aban̄a ndutịm utịp etịbe oro man mme andinịm ke akpanikọ oro ẹdude ke unana ẹkpekeme ndinyene un̄wam n̄kpọ obụkidem nnyụn̄ mbuana ọkpọsọn̄ ọkpọsọn̄ ke utom ukwọrọikọ n̄kan, enye m̀mê mmọ en̄wen ikosioho okụk oro ndomokiet ke ufọn idemmọ. (2 Corinth 8:16-24; 12:17, 18) Paul ama anam utom man ese aban̄a mme udọn̄ n̄kpọ obụkidem esie utu ke ndidori esop ekededi mbiomo ke idem. (1 Corinth 4:12; 2 Thessalonica 3:8) Ke ndiyak enọ oro ẹtịpde mi nsịn enye ke ubọk, ke ntre, mbon Corinth ẹkeyak mmọ ẹsịn ke ubọk anam-akpanikọ, anam-ọkpọsọn̄ utom asan̄autom Abasi.
14. Kaban̄a edida mme enọ nnam n̄kpọ, nso mbụk ke Watch Tower Society onịm?
14 Tọn̄ọ nte ẹkesịn Watch Tower Bible and Tract Society ke idak ibet ke 1884, mbon oro ẹtịpde etịbe ẹnyene uyarade nte ke enye edi anam-akpanikọ andise mban̄a kpukpru enọ oro ẹyakde ẹsịn enye ke ubọk ke ibuot utom Obio Ubọn̄ Jehovah. Nte ekemde ye n̄wedibet esie, N̄ka esidomo ndiyụhọ n̄kponn̄kan udọn̄ kpukpru owo, kpa udọn̄ n̄kpọ eke spirit. Ẹnam emi ke uduot n̄wed Bible ye item ke nte ẹkemede ndinyene edinyan̄a. Mfịn, Jehovah ke anam editan̄ oro ẹtan̄de mbon mbieterọn̄ ẹbok ke esop esie oro ọkọride-kọri mi awara, ndien edidiọn̄ esie oro odude ke ọniọn̄ ọniọn̄ edida mme enọ oro ẹnọde nnam n̄kpọ ke utom ukwọrọikọ Obio Ubọn̄ edi uyarade unyịme Abasi. (Isaiah 60:8, 22) Nnyịn imenyene mbuọtidem ite ke enye eyekaiso ndidemede esịt mme andinọ n̄kpọ ke inemesịt.
15. Ntak emi magazine emi ke ini ke ini esitịn̄de n̄kpọ aban̄a enọ?
15 N̄ka ke ini ke ini esida mme ikpehe n̄wed emi ndinam mme andikot ẹdu ke edidemede ẹban̄a ifet oro mmọ ẹnyenede ndinọ enọ unyịmesịt man ẹn̄wam utom ukwọrọikọ Obio Ubọn̄ ofụri ererimbot. Emi idịghe ndibeben̄e, edi edi n̄kpọ editi ọnọ kpukpru owo oro ẹduakde ndin̄wam ‘edisana utom eti mbụk’ nte Abasi oforide mmọ. (Rome 15:16; 3 John 2) N̄ka esifam kpukpru okụk oro ẹnọde ke usụn̄ oro man ada anam ẹdiọn̄ọ enyịn̄ ye Obio Ubọn̄ Jehovah. Ẹsibọ kpukpru etịbe ke idatesịt, ẹnọ ekọm, ẹnyụn̄ ẹda ke ndisuan eti mbụk Obio Ubọn̄ Abasi. Ke uwụtn̄kpọ, ebede ke usụn̄ emi ke ẹn̄wam utom isụn̄utom ke ediwak idụt, ndien ẹda emi ẹse ẹban̄a ẹnyụn̄ ẹtat mme itie umịn̄n̄wed emi edide akpan n̄kpọ ke ndisuan ifiọk Bible. N̄ko-n̄ko, ẹda mme etịbe oro ẹtịpde kaban̄a utom ofụri ererimbot ẹse ẹban̄a ekọmurua edimịn̄ mme Bible ye mme n̄wed ukpep Bible oro osụk ọkọride-kọri adianade ye ọkpọ umụmikọ ye ọkpọ umụm ndise video. Ke mme utọ usụn̄ oro ẹtat mme ufọn n̄kpọ Obio Ubọn̄ ebe ke mme andinọ enọ ke inemesịt.
Itoho ke Edinyenyịk
16. Okposụkedi ibat ibat Mme Ntiense Jehovah ẹforode ke n̄kan̄ obụkidem, ntak ẹdarade mme etịbe ẹmi mmọ ẹtịpde?
16 Edi ibat ibat Mme Ntiense Jehovah ẹforo ke n̄kan̄ obụkidem. Okposụkedi mmọ ẹkemede ndinọ ukeuke okụk nditat mme ufọn n̄kpọ Obio Ubọn̄, mme enọ mmọ kpa ye oro ẹdi akpan n̄kpọ. Ke ini Jesus okokụtde nte ubuene ebeakpa kiet esịnde ekpri okụk oro enyenede esisịt ekọmurua ke ekebe etịbe temple, enye ama ọdọhọ ete: “Ebeakpa emi ama esịn okụk akan kpukpru mmọ: koro kpukpru mmọ [mme etịp etịbe eken] ẹkesiode n̄kpọ ke nyọhọ-nsụhọ mmọ ẹsịn ke etịbe: edi ke unana esie enye osio kpukpru se enye akpadade odu uwem ọnọ.” (Luke 21:1-4) Okposụkedi enọ esie ekekpride, enye ekedi andinọ ke inemesịt—ndien ẹma ẹdara etịbe esie.
17, 18. Nso idi akpan n̄kpọ ke mme ikọ Paul ke 2 Corinth 9:7, ndien nso ke ẹwụt ke ikọ Greek oro ẹkabarede “inemesịt”?
17 Kaban̄a utom unọ un̄wam ke ibuot mme Christian ke Judea, Paul ọkọdọhọ ete: “Yak kpukpru owo kiet kiet ọnọ nte enye akaduakde ke esịt esie: okûnọ ke mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) Ekeme ndidi apostle oro eketịn̄ aban̄a ikpehe Mme N̄ke 22:8 ke edikabade eke Septuagint, emi ọdọhọde: “Abasi ọdiọn̄ owo oro ọnọde ke inemesịt; eyenyụn̄ ọnọ unana oro otode ke utom esie.” (The Septuagint Bible, emi Charles Thomson akabarede) Paul ama emen “ọdiọn̄” okpụhọ ye “amama,” edi ebuana odu, koro ndibọ mme edidiọn̄ ẹmi ẹsito ima Abasi.
18 Owo oro ọnọde ke inemesịt esinen̄ede okop inemesịt ndinọ. Kamse, ikọ oro, “inua imam” ọwọrọ oto ikọ Greek oro ẹkabarede “inemesịt” ke 2 Corinth 9:7! Ke osiode emi owụt, eyen ukpepn̄kpọ oro, R. C. H. Lenski ama ọdọhọ ete: “Abasi ama mmemmem esịt, idara idara, okop-inemesịt andinọ . . . [emi] mbuọtidem esie ọyọhọde ye edituak inua imam ke ini ifet efen ndinọ enọ ọbiọn̄ọrede enye ke iso.” Owo oro enyenede utọ idara idara edu oro inọhọ enọ ke n̄kụni m̀mê ke edinyenyịk edi enyene udọn̄ ke enye ndinọ enọ. Nte afo emesikop utọ inemesịt oro ke ndinọ enọ man an̄wam mme ufọn n̄kpọ Obio Ubọn̄?
19. Didie ke mme akpa Christian ẹketịp etịbe?
19 Mme akpa Christian ikakamake usan etịbe isan̄a ikanade m̀mê ndinọ ọyọhọ mbak duop ke ndinọ mbahade udori n̄kpọ kiet ke itie duop ke uduak ido ukpono. Utu ke oro, etịbe mmọ ofụri ofụri ekedi ke unyịmesịt. Tertullian, emi ẹkenamde akabade esịt odụk Ido Ukpono Christ ke n̄kpọ nte 190 E.N., ekewet ete: “Okposụkedi nnyịn inyenede ekebe etịbe nnyịn, enye isịneke okụk ndida ndep edinyan̄a, nte eke ido ukpono oro enyenede ekọmurua esie. Ke usen kiet ke ọfiọn̄ [nte an̄wan̄ade ini kiet ke ọfiọn̄] ke enye amade, owo kiet kiet esịn ekpri enọ; edi n̄kukụre edieke emi enemde enye esịt, ndien n̄kukụre edieke enye ekemede; koro owo inyịkke-yịk owo; kpukpru ẹdi ke unyịmesịt.”—Apology, Ibuot XXXIX.
20, 21. (a) Nso ke akpa nsiondi magazine emi eketịn̄ aban̄a ifet ndin̄wam uduak Abasi ke okụk, ndien didie ke emi abuana idem idahaemi? (b) Nso isitịbe ke ini nnyịn idade mme ọsọn̄urua inyene nnyịn ikpono Jehovah?
20 Ndinọ enọ ke unyịmesịt kpukpru ini esidi ido edinam ke otu mme asan̄autom Jehovah eke eyomfịn. Ndusụk ini, nte ededi, ndusụk owo isidaha ifet oro mmọ ẹnyenede ndin̄wam uduak Abasi inam n̄kpọ ọyọhọ ọyọhọ ke ndinọ mme enọ. Ke February 1883, ke uwụtn̄kpọ, magazine emi ọkọdọhọ ete: “Ndusụk owo ẹbiom ata ndodobi mbiomo okụk ke ntak mmọ efen, emi odudu mmọ ndinọ un̄wam okụk osụhọrede ọnọ ebeubọk utom ye edikpa mba, ndien ke ntre ẹbiat ufọn oro mmọ ẹnyenede; inyụn̄ idịghe ntre ikpọn̄, edi mbon oro . . . mîdiọn̄ọke idaha oro odude ọyọhọ ọyọhọ, ẹsidi mme anditaba ifet edibọ mme edidiọn̄ ke ntak unana ntatubọk mmọ ke nditịp etịbe okụk.”
21 Nte akwa otuowo ẹbụn̄ọde ẹdụk esop Jehovah mfịn, ndien nte utom Abasi atarade odụk Edem Usiahautịn Europe ye mme ebiet oro ke mbemiso ẹkedoride ukpan, udọn̄ oro ọkọride-kọri ke nditat itie umịn̄n̄wed ye mme itie eken odu. Ana ẹmịn̄ Bible ye mme n̄wed efen efen. Ediwak utom ukara Abasi eken ke ẹkaiso; nte ededi, ẹkeme ndinam ndusụk usọp usọp edieke okụk oro ekemde odude. Ke akpanikọ, nnyịn imenyene mbuọtidem ite ke Abasi eyenọ se ẹyomde, ndien nnyịn imọfiọk ite ke ẹyediọn̄ mbon oro ẹdade ‘mme ọsọn̄urua inyene’ mmọ ẹkpono Jehovah. (Mme N̄ke 3:9, 10) Ke akpanikọ, “owo eke ọtọde ke ntatubọk, uwak uwak ke enye eyenyụn̄ ọdọk.” Jehovah ‘eyefori nnyịn ke kpukpru orụk ntatubọk,’ ndien edinọ oro nnyịn inọde n̄kpọ ke inemesịt eyenam ediwak owo ẹkọm ẹnyụn̄ ẹtoro enye.—2 Corinth 9:6-14.
Wụt Esịtekọm Ban̄a Mme Enọ Abasi
22, 23. (a) Nso idi enọ mfọn Abasi oro inua mîkemeke nditịn̄? (b) Sia nnyịn iwụtde esịtekọm ke enọ Jehovah, nso ke nnyịn ikpanam?
22 Ke edide se ntotụn̄ọ esịtekọm onụkde, Paul ke idemesie ama ọdọhọ ete: “Ekọm enyene Abasi ke enọ Esie emi ayan̄ade edeme.” (2 Corinth 9:15) Nte “usio-isop” idiọkn̄kpọ mme Christian oro ẹyetde aran ye eke ererimbot, Jesus edi isọn̄ ye usụn̄ enọ mfọn Jehovah oro inua mîkemeke nditịn̄. (1 John 2:1, 2) Enọ oro edi “akwa mfọn Abasi” oro enye owụtde ikọt esie ke isọn̄ ebe ke Jesus Christ, ndien enye odu kaban̄a edinyan̄a mmọ ye ubọn̄ ye ediwụt unen Jehovah.—2 Corinth 9:14.
23 Ntotụn̄ọ esịtekọm nnyịn aka ebịne Jehovah ke ntak enọ mfọn oro inua mîkemeke nditịn̄ ye ediwak enọ eke spirit ye eke obụkidem efen oro enye ọnọde ikọt esie. Kamse, eti ido oro Ete nnyịn eke heaven enyenede ọnọ nnyịn edi ata utịbe tutu enye okpon akan ukeme owo nditịn̄! Ndien ke akpanikọ enye ekpenyene ndinụk nnyịn ndidi mme andinọ ke inemesịt. Ye ọyọhọ esịtekọm, ndien, ẹyak nnyịn inam kpukpru se nnyịn ikemede man ifori uduak atat-ubọk Abasi nnyịn, Jehovah, kpa akpa ye n̄kponn̄kan Andinọ ke inemesịt!
Nte Afo Emeti?
◻ Unyịmesịt esinụk ikọt Jehovah ndinam nso?
◻ Nso isidemede edinọ enọ ke inemesịt?
◻ Didie ke Watch Tower Society esida kpukpru enọ oro enye ọbọde anam n̄kpọ?
◻ Nso utọ andinọ ke Abasi ama, ndien didie ke nnyịn ikpowụt esịtekọm iban̄a ediwak enọ Esie?
[Ndise ke page 15]
Ke ini ẹkebọpde ataya utuakibuot, nditọ Israel ẹma ẹnam utom ọkpọsọn̄ ẹnyụn̄ ẹtịp etịbe ntatubọk ẹnọ Jehovah
[Ndise ke page 18]
Ẹsidara ẹnyụn̄ ẹda mme etịbe nte eke ebeakpa oro ke akpan n̄kpọ